Read eggon Amarku 11 Bible Online

Amarku 11 - eggon bible

Amarku 11

¹Omba ba Eyesu pa la moanwyeotum baŋ a ba osusku ta la anwye esku ahakyeŋ moa a bzi lo ma Ebefagi ta la Ebetanya, a wo osusku ta la Orushalima. Omba moa a gbu akũ-akyeŋ ba asĩ aki moa a bzi olivi a wo ma nga,

²Eyesu a hom moanwyeotum aha baŋ otum a lu mi le, Agimi e yi osku la o wo egi ayi bimi. Agimi e gre bgu le, agimi é ka ashrishrikyeŋ moa a vre lo a ka mbo, e ngla lo e shri e kom me.

³O wo ba arekyeŋ a zhĩ gimi a lu mi le, Ayi a da gimi e ngla lo? Agimi e tno ŋa ma e lu mi le, Adigi-odne a klo lo, shoshoŋ nga á shri lo á ba.

⁴Moa a gre odnekyeŋ la o wo akaŋ ozhẽ nga, moa a ka ashrishrikyeŋ moa a dze ekpazhi odne lo. Omba moa a ngla lo nga,

⁵moarekyeŋ a zhĩ mo a lu mi le, Ayi a da gimi e ngla ashrishri lo?

⁶Moa a tno ma eka ba Eyesu a nye mo. Okyku eka he moa a da moanwyeotum a shri lo a gre.

⁷Moa a shri ashrishri lo a ba nga, moa a shki aknye ma nga Eyesu a vre lo.

⁸Moare nzenze a hwro aknye mo a ngla ozhẽ, nga moakyeŋ a kplu embgu elgi a shri a ngla ozhẽ.

⁹Moare la a gre ozhẽ, pa la moa la a lu Eyesu ma egi ambla a lu angyangyeŋ a lu mi le, E hlu Ahogbrẽ eshko! Ahogbrẽ a kpo a ghwo are la a ba eshko Adigi-odne!

¹⁰Ahogbrẽ a kpo a ghwo la oreŋ ba adigi Adawuda! E hlu Ahogbrẽ eshko!

¹¹Eyesu a gbu Orushalima, a gre Anyuŋ-akulu, nga a mbli lo a ka. La olum-ore a bla a gre Ebetanya pa la moanwyeotum baŋ.

¹²Onda oha omba moa a zgi Ebetanya a bla a ba, embyle e kpo Eyesu.

¹³A ka esĩ ebro ogyugyuŋ la ayeya dgidgidgi. A klo agbro ma, ambo a hwiŋ mbo, okyku eshi omba ba alo e fu angyiŋ mbo.

¹⁴Eyesu nga a ta anyuabi a ygi lo a lu mi le, Arekyeŋ á ri agbro boŋ nga mbo. Moanwyeotum baŋ a gno odlo baŋ a lu.

¹⁵Omba ba Eyesu pa la moanwyeotum baŋ a gbu Orushalima, moa a gre Anyuŋ-akulu nga Eyesu a kyku moa la a kpo egbmo ma eshyẽ. A mu eteblo moa la a nyiŋ amgbaŋ,[5] ta la emgbakyiŋ moa la a shri aklungu a gbmo.

¹⁶Eyesu a bmi ba arekyeŋ a gre Anyuŋ-akulu eshyẽ la anzhokyeŋ mbo.

¹⁷A nye moare a lu mi le, Ahogbrẽ a lu ma moa a ta Akpa baŋ a lu mi le, Moa á bzi Odne me aku o fa olu moare mvye. Ambo agimi e zhiŋ lo e da lo a dzu emvygi moasi.

¹⁸Moandakʼpo olu ba Ahogbrẽ, pa la moa la a nye odaŋ a gno ekplo ba Eyesu a kpo, nga moa a klo ozhẽ o bga ŋa. Moa a kpo eyli baŋ okyku eshi onyenye baŋ o dzu egbregbre angyiŋ pa la moare.

¹⁹Olum-ore nga, Eyesu pa la moanwyeotum baŋ a kso a sku Orushalima.

²⁰Onda oha endigiŋ nga omba ba Eyesu pa la moanwyeotum baŋ a bre a yi, moa a ka esĩ ebro lo e kpu e zgi embgu e gre emgbʼba.

²¹Ebitru a tne aga ekplo la e kpo. A ka esĩ ebro lo nga a nyuŋ Eyesu a lu mi le, Andakʼpo o ka, esĩ ebro boŋ o ta anyuabi o ygi lo mi e kpu.

²²Eyesu a tno mo ma a lu mi le, E ka, o wo bimi e bmi ba adlidzi ta la Ahogbrẽ,

²³agimi é kpo é gbu ba agimi e lu ta la akũ a mbo e lu mi le, O gʼbu o yi o gre anyuŋ-ondzu. O wo bimi e fu lo eha esõ bimi mbo, ambo agimi e bmi ba adlidzi ekplo ba agimi e lu lo é ba e kpo le, moa á kpo lo okyku gimi.

²⁴Okyku eka he ame e lu e da gimi, o wo bimi e fa olu e vẽ ekplokyeŋ le, e bmi ba adlidzi ba agimi e hwiŋ lo, ekployaŋ a mbo bimi e vẽ, agimi é hwiŋ lo.

²⁵E kyu areyaŋ a mbo la a ta akpu egi ayi bimi abgo okyku omba bimi e vẽ Ahogbrẽ le, okyku o daŋ a mbo a kyu gimi abgo. [

²⁶O wo bimi e kyu moahwõ abgo odlobi moa a la a kpo gimi mbo le, Adigimi la a wo Ongyeŋ a mbo á kyu gimi abgo odlobi bimi e la e kpo ŋa mbo.]

²⁷Eyesu pa la moanwyeotum baŋ a bla a ba Orushalima. Omba moa a dzi Anyuŋ-akulu, moandakʼpo olu ba Ahogbrẽ pa la moa la a nye odaŋ, pa la moandakʼpo a ba okro Eyesu.

²⁸Moa a zhĩ ŋa a lu mi le, La ekʼpo ayi aŋo o la o kpo ayakplo egbregbre eka he?

²⁹A tno mo ma a lu mi le, Ame é zhĩ gimi ekplo ekyekyeŋ. O wo bimi e tno me ma bgu le, ame é lu é da gimi.

³⁰Eyesu a nyuŋ mo a lu mi le, E lu e da me, la ekʼpo ayi Eyohana la a kpo abaptisma, a la a kpo abaptisma? La ekʼpo arehwĩ le, la e ba Ahogbrẽ?

³¹Moa la a ba a zhĩ Eyesu odlo moa a kla ekplo ba Eyesu a zhĩ ta la emo a la a lu mi le, Agi é tno ma é lu la eshi? O wo bi e lu mi ma Eyohana a kpo abaptisma la ekʼpo Ahogbrẽ, aŋa á zhĩ á lu mi le, Okyku eshi agi e bmi ta la Eyohana mbo?

³²Ambo o wo ba agi e lu mi le, La ekʼpo arehwĩ angyiŋ…(moa a kpo eyli moarehwi okyku moare nzenze a bmi ba adlidzi ba Eyohana a wo are ba Ahogbrẽ a hom otum angyiŋ).

³³Okyku ekahelo moa a tno Eyesu ma a lu mi le, Agi e yi mbo. Eyesu a tno mo ma a lu mi le, Ame a mbo é lu é da gimi ekplo la e shri ekʼpo e da me e la e kpo ayakplo egbregbre he lo mbo.