Read eggon Amarku 12 Bible Online

Amarku 12 - eggon bible

Amarku 12

¹Ambla he nga Eyesu a lu odlo pa la moandakʼpo olu ba Ahogbrẽ, pa la moa la a nye odaŋ, pa la moandakʼpo, pa la moare nzenze la egŋe, a lu mi le, Aloma-kyeŋ a fu algo agbi baŋ nga a hwom lo oso, nga a kpo ohwĩ esheshyẽ agbi lo, nga a ta atandla moa a dzu ma a kʼpu agbi. Alom lo a shri agbi lo a ghwo moarekyeŋ abgo nga a gre oskukyeŋ.

²Omba moa a kpo algo agbi nga, are agbi a hom awaghrẽ baŋ otum okyku o da mo a shri ogʼba algo baŋ a daŋ.

³Moa la a kpaŋ agbi a vu awaghrẽ a taŋ ŋa andzu nga a kyu ŋa abgo a daŋ a gre ababgo.

⁴Areagbi lo a sa a hom awaghrẽ-akyeŋ otum nganga, moa la a kpaŋ agbi a sheŋ awaghrẽ he lo api eshri, nga moa a ka ayiekŋe baŋ mbo.

⁵Areagbi a sa a hom awaghrẽ-akyeŋ otum nganga, moa la a kpaŋ agbi a vu ŋa a bga a ta okom. Moa a kpo pa la moa-wagbrẽ ahwõ ekakahelo. Moa a taŋ moakyeŋ andzu nga moa a bga moakyeŋ a ta okom.

⁶Areagbi a wo la are ahwõ ma mbo baŋ á hom ŋa otum mbo, o wo le anwye esõ baŋ akyakyeŋ sha. Okpyemgbyeŋ a mo nga, a hom anwye baŋ otum okro moa la a kpaŋ agbi lo. Areagbi a lu esõ baŋ a lu mi le, Ame e bmi ba adlidzi, moa la a kpaŋ agbi me, á ka anwye me la olbi.

⁷Omba ba moa la a kpaŋ agbi a ka anwye esõ areagbi a ba nga, moa a lu mi le, E ka anwye esõ ba areagbi lo a ba a mi. E da gi e bga ŋa e ta okom okyku o da ogu lo o dzu o bi.

⁸Moa a vu ŋa a bga a ta okom nga a shri okom baŋ a ta agbi lo la edzi.

⁹Eyesu a zhĩ mo a lu mi le, Eka ekplo bimi e gno hi, eka bimi e ka, areagbi lo á kpo moa la a kpaŋ agbi eshi? Eyesu a tno ma a lu mi le, Areagbi lo á ba a bga moa la a kpaŋ agbi lo nga á shri agbi á ghwo moahwõ abgo.

¹⁰Eyesu a zhĩ moare la a wo ka la ŋa a lu mi le, Agimi e tsi Akpa ba Ahogbrẽ e ka mbo? Ezhim moa la a mbdzi aku a tla lo a ta eka ba alo e wo la ekplokyeŋ mbo, E zhiŋ e dzu ezhim la e wo la owlama e gre pyeŋ.

¹¹Ohe lo Adigi-odne angyiŋ a kpo. O wo ekplo egbregbre angyiŋ egi eyayi bi.

¹²Moandakʼpo ba Eyahuda a zga ngre okyku o vu Eyesu, okyku eshi moa a yi baŋ a ta egŋe he lo eshri mo angyiŋ. Moa a kpo eyli eshki okyku eka he moa a dzu ŋa a zga nga a gre emo.

¹³Moa a da moaEfarisi, pa la moa la a lu Ehirudu ma a gre okro Eyesu la ozhiozhĩ okyku o kpyi ŋa.

¹⁴Moa a ba okro baŋ a khwo nga, moa a zhĩ ŋa a lu mi le, Andakʼpo, agi e yi aŋo o wo are la a lu adlidzi angyiŋ. Aŋo o kpo eyli arekyeŋ mbo, nga aŋo o la o nye odlo Ahogbrẽ ba adlidzi baŋ a shri a ba okyku moare. O lu o da gi, ozhẽ Odaŋ bi o wo odzi moa a hre ewaŋ a da Ekeza Anyuŋ-areŋ le, o wo odzi mbo?

¹⁵Eyesu a ka a tspi moa a klo o kpyi ŋa nga a zhĩ mo a lu mi le, Agimi e klo e kpyi me okyku eshi? E shri eyiamgbaŋ e ba e da me e ka.

¹⁶Moa a shri eyiamgbaŋ a ba. Eyesu a yga lo nga a zhĩ mo a lu mi le, Eshri ayi, ta la eshko ayi e wo ma? Moa a tno ma a lu mi le, Eshri ta la eshko ba Ekeza angyiŋ.

¹⁷Eyesu a nyuŋ mo a lu mi le, O ba alo o wo he, o shri ekplo la e wo e ba Ekeza e shri e daŋ, nga e shri ekplo la e wo e ba Ahogbrẽ e da Ahogbrẽ. Moare a ka egbregbre ta la odlo baŋ.

¹⁸MoaEsaduki a ba okro Eyesu. Moahi lo a bmi ta la oksoeku mbo.

¹⁹Moa a ba nga moa a nyuŋ Eyesu a lu mi le, Andakʼpo, Omusa a ta odaŋ a da gi a lu mi le, O wo ba anáŋ arekyeŋ a kpu a dzu ashe a zga nga moa a wo anwye ma mbo le, anáŋ are lo a sko ashe lo a kyu, okyku o da mo a mbre anwye okyku o da eshko are la a kpu mi lo e kpu e dga mbo.

²⁰Moa a lu a da Eyesu a lu mi le, Moanáŋ afoha a wo ma. Andakʼpo ekpyemgbyeŋ a kyu ashe nga, a hwiŋ anwye mbo, nga a kpu a dzu ashe lo a zga ashe-eshaku.

²¹Anáŋ la a ta a ka, a sko ashe-eshaku lo a kyu, nga alom lo a kpu a dzu ashe lo a zga ashe-eshaku. Anáŋ ba otra a sko ashe-eshaku lo a kyu. Ekakahelo o kpo ka la ŋa.

²²Ekakahelo o kpo pa la moahwõ. Moafoha a kyu ashe lo, moa a kpu nga moa a mbre moanwye mbo. Ashe a mbo a ka a kpu.

²³MoaEsaduki a zhĩ a lu mi le, Moafoha a kyu ashe he lo, okyku eka he onda moa á ba a kso eku, ashe lo á dzu a ba ayi? O ka, moafoha angyiŋ a kyu ŋa.

²⁴Eyesu a nyuŋ mo a lu mi le, Agimi e ta akpu angyiŋ. Agimi e yi ekplo la e da gimi e lu eka he lo? Okyku bimi e yi Akpa ba Ahogbrẽ ta la ekʼpo ba Ahogbrẽ mbo angyiŋ.

²⁵Omba moa la a kpu á ba a kso eku, moa á dzu eka moanwyeadga ba Ahogbrẽ angyiŋ, nga moarealom pa la moashe á kyu eble mbo.

²⁶Eshri moa la á ba a kso eku, agimi e tsi akpa ba Omusa a ta eshri akla la a ri ovo mbo? Moa a ta akpa a lu mi ma Ahogbrẽ a nyuŋ Omusa a lu mi le, Ame e wo Ahogbrẽ ba Ebrahim pa la ba Eshaku, pa la ba Eyakubu.

²⁷O dzu, aŋa a wo Ahogbrẽ moare la a kpu angyiŋ mbo, ambo a wo a moare la a wo esõ ma. Okyku eka he agimi e ta akpu e gre eshri.

²⁸Arekyeŋ la a nye odaŋ a wo okro he lo a gno eka ba Eyesu a tno moaEsaduki ma adzadzi. Are he lo a ba nga a zhĩ Eyesu a lu mi le, Odaŋyaŋ angyiŋ o wo anyuanyuŋ o gre mvye?

²⁹Eyesu a tno ma a lu mi le, Odaŋ he angyiŋ o wo anyuanyuŋ o gre mvye. Agimi arehwĩ ba Esrayila e gno, Adigi Ahogbrẽ sha a wo Ahogbrẽ.

³⁰O dzu omgbybi boŋ o klo Adigi Ahogbrẽ boŋ la esõ boŋ mvye, la ayaŋ esõ boŋ mvye, la aga boŋ mvye, la oshye boŋ mvye.

³¹Odaŋ ba oha ba anyuanyaŋ o lu mi le, Aŋo o klo a ba ekpazhi boŋ eka eshri boŋ. Odaŋ-okyeŋ o gre odaŋ aha he lo mbo.

³²Are la a nye odaŋ a nyuŋ Eyesu a lu mi le, A gba Andakʼpo, ekplo boŋ o lu e wo adlidzi angyiŋ. Adigi sha a wo Ahogbrẽ, nga Ahogbrẽ-akyeŋ a wo ma mbo, o wo le aŋa sha.

³³Okyku eka he o dzu omgbybi ba are a klo Ahogbrẽ la esõ baŋ mvye, la aga baŋ mvye, la oshye baŋ mvye, nga baŋ a klo a ba ekpazhi baŋ eka eshri baŋ. O wo odzi o gre moa a kpaŋ odaŋ aha he o sku moa a shri oshriondba ba abyi a shri a da Ahogbrẽ.

³⁴Eyesu a ka okaobmye ba alom he lo nga a nyuŋ ŋa a lu mi le, Aŋo o wo osusku ta la Oreŋ ba Ahogbrẽ. Ambla he nga arekyeŋ a zhĩ Eyesu akplokyeŋ nga mbo.

³⁵Omba ba Eyesu a nye moare Anyuŋ-akulu, a zhĩ mo a lu mi le, Okyku eshi moa la a nye odaŋ a la a lu mi ma Emisiya á ba ogu ba Adawuda?

³⁶E ka, Ogbgaodzi o tsa Adawuda o daŋ a lu mi le, Ahogbrẽ a nyuŋ Adime-odne a lu mi le, O dzu obgori me, O tsa ba ame e da moafpu ŋo a tsu a gbu egi ayi boŋ.

³⁷Eyesu a lu mi le, E ka, Adawuda a mbo a bzi Emisiya Adaŋ. Emisiya a kpo anyu a dzu a ba ogu ba Adawuda? Moare nzenze a ngli a gno onyenye Eyesu la ovyevye.

³⁸A nye mo a lu mi le, E nyuŋ e kpo-kpo pa la moa la a nye odaŋ, moa la a klo o ygi ariga agre, o dzi o yi ekyku nga a klo moare a ka mo la anyuanyuŋ.

³⁹Moa a la a sla ekro moandakʼpo a dzu ma anwyeakulu, ta la okro moa a kpo abgo ma, okyku o da mo a ka mo la anyuanyuŋ.

⁴⁰Moa a la a ngʼga moashe-eshaku anzho adne mo. Ambla he nga moa a fa olu la o dzõ odzõ egi ayi moarehwi. Okyku eka he egbre mo é vu olo ngre é gre!

⁴¹Eyesu a dzu osusku ta la angongo moa a shri ofaodi a ygi ma, nga a ka moare omba moa a shri ofaodi mo a ygi angongo. Moangyiŋ a shri amgbaŋ nzenze a ygi ma.

⁴²Ashe-eshaku la a wo ekŋeo totno a shri okobo okyekyeŋ baŋ a wo alo ma a shri a ba a ta angongo lo.

⁴³Eyesu a bzi moanwyeotum baŋ a lu mi le, Adlidzi, ashe-eshaku la a shri amgbaŋ a ta angongo hi a gre areyaŋ a mbo ahe.

⁴⁴Moahwõ a fa ofa angyiŋ ekplo moa a wo alo ma, ambo ashe-eshaku he lo la a wo ekŋe a gre eshri a shri ekplo baŋ a wo alo ma ekpyemgbyeŋ a shri a ba a ta angongo.