Read eggon Amarku 15 Bible Online

Amarku 15 - eggon bible

Amarku 15

¹Endigigiŋ onda oha nga, moandakʼpo olu ba Ahogbrẽ pa la moandakʼpo, pa la moa la a nye odaŋ, pa la moandakʼpo la a sheŋ ombgu, moa a kpo shoshoŋ nga a shki nga a hwim odlo eshri ombgu Eyesu. Ambla he nga moa a da mo a ta Eyesu aslika nga moa shri ŋa a gre aku ombgu ba Ebilatu.

²Ebilatu a zhĩ Eyesu a lu mi le, Aŋo angyiŋ o wo Anyuŋ-areŋ moaEyahuda? Eyesu a tno Ebilatu ma a lu mi le, Aŋo o lu eka he lo.

³Moandakʼpo olu ba Ahogbrẽ a lu ohrẽ andandandim eshri Eyesu.

⁴Ebilatu a zhĩ Eyesu a lu mi le, Aŋo o tno ekplokyeŋ mbo? Aŋo o gno ohrẽ moa a la a lu eshri boŋ he mbo?

⁵Ambo Eyesu a tno ma ku-ku mbo, okyku eka he Ebilatu a ka egbregbre.

⁶Omba moa a ri abgo Apaska, Ebilatu a la a kyu arekyeŋ eshki moarehwi moa a vu mo a ta aku abgo, o wo moare a shri ovẽ a shri a ba.

⁷Omba he lo alomakyeŋ la a bga ebga omba moa a kpo ambgu, eshko baŋ e ri Abaraba, pa la moa la a kpo ambgu lo ka la ŋa, moa a vu mo a ta aku.

⁸Moarekyeŋ a shri ovẽ a shri a ba okro Ebilatu okyku o daŋ a kpo a ghwo a mo.

⁹Ebilatu a zhĩ mo a lu mi le, Agimi e klo ame e kyu areŋ moaEyahuda abgo?

¹⁰Ebilatu a zhĩ eka he okyku eshi a yi zhezheŋ moandakʼpo olu ba Ahogbrẽ a shri Eyesu a ba okyku efpu angyiŋ.

¹¹Ambo moandakʼpo olu a klo ozhẽ ibu moare okyku o da Ebilatu a kyu Abaraba abgo a sku baŋ a kyu Eyesu abgo.

¹²Ebilatu a zhĩ eshki a lu mi le, Agimi e klo ame e kpo are ba agimi e bzi ŋa ma areŋ moaEyahuda eshi?

¹³Moa a ta enzi angyangyeŋ a lu mi le, O gŋe ŋa egŋe aki!

¹⁴Ebilatu a zhĩ mo a lu mi le, Aŋa a kpo gimi eshi? Moa a tno ma a lu mi le, O gŋe ŋa egŋe aki!

¹⁵Ebilatu a klo o raŋ eshki esõ, okyku eka he a kyu Abaraba abgo eka moa a klo nga a da mo a yla Eyesu andzu, nga a shri ŋa a di okyku o da mo a gŋe ŋa egŋe aki.

¹⁶Moanwyeakyuŋ a shri Eyesu a gre ekpazhi Ebilatu, moa a bzi lo Eplatoriyom, nga moanwyeakyuŋ ba ogʼba okyeŋ mvye a pla a shki ahe lo.

¹⁷Moa a ygi Eyesu ariga la a wo abme mlemle, nga a ngybi azhli ezga a zga ŋa eshri.

¹⁸Nga moanwyeakyuŋ a nyuŋ ŋa a lu mi le, Aŋo Anyuŋ-areŋ moaEyahuda o dzu pyapyaŋ nga o ta abyi obiŋ hi.

¹⁹Moa a sheŋ ŋa opi eshri, moa a ta akyi a ygi ŋa, nga moa a gbyle a kʼpu obiŋ egi ayi baŋ.

²⁰Ambla moa a dzĩ ŋa a khwo nga, moa a hwro ariga la a wo abme mlemle a sku ŋa, nga moa a ygi ŋa anzho egʼba baŋ. Nga moa a shri ŋa a gre okro moa a gŋe moare egŋe aki.

²¹Omba moanwyeakyuŋ a shri Eyesu a shri a yi okro moa a gŋe moare egŋe aki nga, moa a ka alom moa a bzi ŋa Esima ba obiŋ ba Esirini, moa a vu ŋa a daŋ a shri egŋe aki ba Eyesu. Esima a wo adaŋ Alaksanda ta la Orufu.

²²Moa a shri Eyesu a gre okro moa a bzi lo Oglogota, o dzu, Okro ba Amgbatku Eshri.

²³Okro hi lo, moa a shri ami la a bza moa a kŋe lo a bga ta la edgu agumakyeŋ moa a bzi lo emri, a da Eyesu, ambo a wa lo mbo.

²⁴Moa a gŋe Eyesu egŋe aki a khwo nga, moa a fye emvye eshri aknye baŋ okyku o da mo a ka are la á ba a ri lo.

²⁵Moa a gŋe Eyesu egŋe aki etetne la amgbaŋ atronyi.

²⁶Moa a ta engla a bre egŋe aki lo a lu mi le, Anyuŋ-areŋ moaEyahuda.

²⁷Moa a gŋe moasi aha egŋe aki ta la Eyesu. Akyeŋ a wo obgori baŋ, ahwõ a wo obgoehre baŋ. [

²⁸Okro he lo, odlo ba Akpa ba Ahogbrẽ a lu mi le, Moa a tsi ŋa a ghwo eshki moaedlobi, o bli.]

²⁹Moare la a bre a yi nga, a dzĩ ŋa nga moa a kaŋ eshri mo, nga a lu mi le, Agi e ka bgu, ma aŋo ó kypi Anyuŋ-akulu nga ó bla alo ó mbdzi elum etra sha ma?

³⁰O gile nga o shla eshri boŋ o da gi e ka.

³¹Moandakʼpo olu ba Ahogbrẽ, pa la moa la a nye odaŋ a dzĩ Eyesu ta la emo a lu mi le, Aŋa a shla moahwõ ambo a shla eshri baŋ a gbu mbo.

³²Moa a sa a lu mi le, E da gi e ka Emisiya Anyuŋ-areŋ ba Esrayila a gile egŋe aki lo ohuhuhi. O wo baŋ a gile le, agi é bmi ba adlidzi ka la ŋa. Moasi aha moa a gŋe mo egŋe aki ta la Eyesu, moa a mbo a dzĩ ŋa.

³³La olum o vu eshri evbu e hwĩ eka awa atra.

³⁴Omba ambgaŋ atra nga Eyesu a ta enzi angyangyeŋ nga a lu la olomokyeŋ a lu mi le, Eloyi, Eloyi, olama asabaghtani? O dzu, Ahogbrẽ me, Ahogbrẽ me, okyku eshi aŋo o dzu me o zga?

³⁵Moabze la a wo okro he lo a lu mi le, E gno, Eyesu a bzi Eliya.

³⁶Arekyeŋ eshki moa la a wo osusku ta la okro he lo a knye a gre la asusku moa a ghwo lo ami abza, a tpi lo aki nga a shri a ghwo Eyesu anyu okyku o daŋ a wa. Nga, are lo a lu mi le, Agi e ka, o dzu mbo Eliya á ba a gile ŋa.

³⁷Eyesu a ta agyim angyangyeŋ a khwo nga, a kpu.

³⁸Ashye oknye moa a kha ayizhẽ Anyuŋ-akulu a tsa a gʼba aha a zgi ongyeŋ a ba obiŋ.

³⁹Andakʼpo moanwyeakyuŋ la a wo ma, a ka eka ba Eyesu a ta agyim angyangyeŋ nga a kpu. A lu mi le, Adlidzi angyiŋ alom he lo a wo Anwye Ahogbrẽ.

⁴⁰Moashekyeŋ la a ba, a tspi ogyugyuŋ nga a ka ekplo la e kpo. Moashe he lo a wo Esalomi ta la Emeri Amagadaliya, ta la Emeri anaŋ Eyakubu la a wo andetse, ta la Ojosi.

⁴¹Moahi lo a la a lu Eyesu ma omba baŋ a wo Egalili, nga a kpo a ghwo la ŋa. Moashe ahwõ nzenze a mbo a wo ma. Moa a ba Orushalima ka la ŋa.

⁴²La olum-ore nga, Oyusufu ba Arimatiya a ba okro moa a gŋe Eyesu egŋe aki.

⁴³Oyusufu ba Arimatiya a wo eshki moandakʼpo la a sõ ombgu. A ka ayi ozhẽ okyku oba-ba ba Oreŋ Ahogbrẽ. Onda he lo o wo onda moa a kpo otum a ghwo otno, o dzu onda Ojuma. Oyusufu a gre okro Ebilatu la oshye-esõ, a zhĩ a lu mi le, Andakʼpo, o wo boŋ o bmi le, o da me e sko okom Eyesu e ngybi.

⁴⁴Ebilatu a ka egbregbre a gre eshri moa a lu mi ma Eyesu a kpu. A bzi andakʼpo moanwyeakyuŋ a zhĩ ŋa a lu mi le, Eyesu a sheŋ a kpu bgu?

⁴⁵Ambla ba Ebilatu a gno otnoma lo, a nyuŋ Oyusufu a lu mi le, Aŋo o kpo o gbu boŋ o sko okom Eyesu.

⁴⁶Oyusufu a gbmo oknye la o wo kyekyekyle nga a kpmye Eyesu ma nga a ngybi ŋa ongybi ba onmwre, nga a shki anyu lo la anyuŋ ayaŋ.

⁴⁷Emeri Amagadaliya ta la Emeri anaŋ Ojosi a ka okro moa a ngybi Eyesu ma.