Read eggon Amarku 2 Bible Online

Amarku 2 - eggon bible

Amarku 2

¹Ambla ba elum fi nga, Eyesu a bla a gre Akafanahum, oshpa baŋ a ba odne o ngla o tsi o gre.

²Moare nzenze a ba, nga okro o fu kpate odne. Ekpazhi a mbo e fu kpate. Eyesu a nyum oshpa a ygi mo.

³Omba he nga, moarehwi anyi a shri alomakyeŋ la a no olo o mom egʼba a ba.

⁴Moa a klo o shri ŋa o yi okro Eyesu aku eshyẽ. Eshki e shki nzenze, okyku eka he moa a kpo a gbu mbo. Moa a lom ŋa akpakpa nga a vre eshri aku[2] nga moa a bʼba ewyle eshri aku ongyeŋ, nga moa a sko alom lo akpakpa a shri a sõ ewyle lo a gile a gre aku eshyẽ.

⁵Eyesu a yi moare he lo a wo la obmi ba adlidzi ma nga, a nyuŋ alom la a mom egʼba a lu mi le, Anwye me, Ame e kyu ŋo abgo odlobi boŋ.

⁶Moare la a nye odaŋ akyeŋ moa a wo ma, moa a lu esõ mo a lu mi le,

⁷Okyku eshi Eyesu a tpi eshko Ahogbrẽ ayi eka he? Arekyeŋ a kyu abgo odlobi a gbu mbo, o wo le Ahogbrẽ sha a kpo a gbu.

⁸Eyesu a ka aga mo a bmye nga a zhĩ mo a lu mi le, Okyku eshi agimi e tne aga edgu hi?

⁹Oyaŋ o wo ohli o gre, moa a lu ta la alom lo ma, Ame e kyu ŋo abgo odlobi boŋ le, moa a lu ma, O kso o sko akpakpa boŋ o yi eŋo la oshye egʼba.

¹⁰Ame Eyesu e tsa gimi okyku o da gimi e yi ba Anwye Arehwĩ a wo ekʼpo obiŋ hi, ba a kyu abgo odlobi. Nga a nyuŋ alom la a mom egʼba a lu mi le,

¹¹Ame e lu e doŋ, o kso o sko akpakpa boŋ o yi eŋo odne.

¹²Moa a ka alom lo a kso, a sko akpakpa baŋ a gre eŋa odne. Moare a ka egbregbre nzenze. Moa a hlu Ahogbrẽ eshko a lu mi le, Agi e ka ekplokyeŋ egbregbre eka he ondakyeŋ mbo.

¹³Omba ba Eyesu a bla a yi akaŋ atam ba Egalili, moare nzenze a ba nga a nye mo.

¹⁴Omba baŋ a yi nga, a ka alom la a yga ewaŋ ba eshko baŋ e ri Eliwu, a wo anwye Alafus, a dzu aku moa a yga ewaŋ. Eyesu a nyuŋ ŋa a lu mi le, O lu me ma. Eliwu a kso nga a lu ŋa ma.

¹⁵Ambla fi nga, Eyesu a ri algo odne ba Eliwu. Moa la a yga ewaŋ nzenze pa la moaedlobi moa a la a lu Eyesu ma, nga moakyeŋ eshki mo a dzu a ri algo otsotse ta la Eyesu pa la moanwyeotum baŋ.

¹⁶Moakyeŋ la a nye odaŋ, moa a wo ba ogu moa a bzi mo Efarisi, moa a ka ba Eyesu a ri algo pa la moaedlobi, pa la moa la a yga ewaŋ nga, moa a zhĩ moanwyeotum baŋ a lu mi le, Okyku eshi aŋo o ri algo pa la moa la a yga ewaŋ, pa la moaedlobi?

¹⁷Eyesu a gno eka he nga a tno mo ma a lu mi le, Are la a wo oshye a la a yi aku agum mbo, o wo le are la a no dne. Ame e ba okyku o bzĩ moaedlodzi angyiŋ mbo, ambo okyku moaedlobi.

¹⁸Omba moanwyeotum ba Eyohana la a kpo abaptisma, pa la moaEfarisi a nyom eshri algo, moakyeŋ a ba okro Eyesu a zhĩ ŋa a lu mi le, Okyku eshi moanwyeotum Eyohana la a kpo abaptisma, pa la moaEfarisi a nyom eshri algo omba he, ambo moanwyeotum boŋ a nyom eshri algo mbo?

¹⁹Eyesu a tno ma a lu mi le, E ka bimi e ka, o wo odzi ba moazhẽ a nyom eshri algo omba moa a kpo abgo anwyeshe? O kpo o gbu moazhẽ a nyom eshri algo mbo, o wo ba anwyealom anwyeshe a wo ma pa la mo.

²⁰Omba ó yi ó ba, ba moa á ba a sko anwyealom anwyeshe a sku mo. Omba mi lo angyiŋ moa á hwiŋ algo oruri nga mbo.

²¹Arekyeŋ a la a shri oknye ohe a shum ewyle oknye ogbyi mbo. O wo baŋ a shum oknye ogbyi la oknye ohe le, ó da ewyle lo é hwile é ta ma-ma angyiŋ.

²²Moa a la a shri ami anab la a bza mbo a shri a ygi émgbu egbyi mbo.[3] O wo moa a shri lo a ygi émgbu egbyi le, omba ba alo a bza nga a vẽ, é ndzu, nga ami anab ta la emgbu á tpi ayi. O raŋ o gre ba moa a shri ami anab la a bza mbo a ygi émgbu ehe.

²³Onda Asabat nga, Eyesu a la a dzi agbi esekʼpa pa la moanwyeotum baŋ. Nga moa a la a sheŋ ashri esekʼpa nga a khwa lo a taŋ.

²⁴Nga moaEfarisi a lu ta la Eyesu a lu mi le, O ka, moanwyeotum boŋ a pre odaŋ bi okyku moa a kpo eka he onda Asabat.

²⁵Eyesu a zhĩ mo a lu mi le, Agimi e tsi ekplo ba Adawuda, pa la moa la a wo ka la ŋa a kpo omba moa a wo algori ma mbo mbo? Eka embyle e kpo mo nga

²⁶Adawuda a gre anwyeakulu nga a sko agbrotsa ba moa a shri a ndba Ahogbrẽ. Ohi lo o kpo omba ba Abita a wo andakʼpo olu ba Ahogbrẽ. Adawuda a pre odaŋ angyiŋ, okyku eshi moandakʼpo olu ba Ahogbrẽ sha a wo ekʼpo ma moa a taŋ lo.

²⁷Eyesu a lu mi le, Moa a kpo Asabat okyku owlama arehwĩ angyiŋ. Moa a kpo arehwĩ okyku Asabat mbo.

²⁸Okyku eka he Anwye Arehwĩ a wo ekʼpo ma eshri Asabat.