Read eggon Amarku 3 Bible Online

Amarku 3 - eggon bible

Amarku 3

¹Eyesu a bla a gre anwyeakulu nga, a ka andeobgo alomakyeŋ ma.

²Moarekyeŋ la a klo o kla odlo ta la Eyesu a wo ma. Moa a kʼpu a klo o ka o dzu mbo Eyesu á shaŋ alom hi onda Asabat okyku eshi moa a klo o vu ŋa.

³Eyesu a nyuŋ andeobgo a lu mi le, O ba egi ayi.

⁴Nga Eyesu a zhĩ moare a lu mi le, Odaŋ o lu mi ma agi e kpo eshi onda Asabat? Ma agi e kpo e ghwo le, e kpo obi? Ma agi e shla esõ arehwĩ le, e bga lo? Akyeŋ a mbo eshki mo a tno ma a gbu mbo.

⁵Esõ e tpi Eyesu ayi pa la mo nzenze omba he lo, ambo ekakahelo a mbo Eyesu a ka mo ayiekŋe, okyku moa a shpi esõ e gre eshri. Eyesu nga a nyuŋ alom lo a lu mi le, O ndba obgo boŋ. A ndba lo nga a shaŋ.

⁶Ambla he nga moaEfarisi a zgi anwyeakulu a gre okyku o fu eshri pa la moa la a lu Ehirudu ma okyku o da mo a bga Eyesu.

⁷Eyesu pa la moanwyeotum baŋ a gre akaŋ atam ba Egalili, nga moare nzenze a lu ŋa ma. Moare a zgi obiŋ ba Egalili, ta la Eyahuda,

⁸ta la osku ba Orushalima, ta la obiŋ ba Edumiya, ta la ongre ondzu ba Ordu, ta la akekaŋ ba esku ba Ataya, ta la Esidoŋ. Moare nzenze a ba okro Eyesu okyku eshi moa a gno oshpa ayakplo baŋ a la a kpo.

⁹Eshki moare e gre eshri nga, okyku eka he Eyesu a nyuŋ moanwyeotum baŋ ma moa a nyuŋ amgblami a dze adzadzi a daŋ a tspi ma okyku o da moare a fye ŋa mbo.

¹⁰Eyesu a shaŋ moare nzenze, okyku eka he moare la a no olo a la a mu emo, okyku o da mo a tka ŋa.

¹¹Ombayaŋ a mbo moa ba egbgabi andandandim e kpo otum pa la mo a ka Eyesu, moa a kpo nga a tsu a gbu obiŋ nga a ta enzi angyangyeŋ a lu mi le, Eyesu aŋo o wo Anwye Ahogbrẽ angyiŋ.

¹²Eyesu a jygu egbgabi lo odaŋ osheshye, a lu mi ma moa a lu baŋ a wo Anwye Ahogbrẽ a da arekyeŋ mbo.

¹³Eyesu a vre akũ nga, a bzi moare baŋ a klo a da mo a ba okro baŋ.

¹⁴A sla otsko eskhi mo, nga a bzi moahi lo Moa la a nyum oshpa. A nyuŋ mo a lu mi le, Ame e sla gimi okyku o da gimi e dzu pa la me nga e hom gimi otum e da gimi e nyum oshpa.

¹⁵Agimi é hwiŋ ekʼpo okyku o se egbgabi andandandim o sku moare.

¹⁶Moa otsko baŋ a sla a ri Esima ba Eyesu a bzi ŋa Ebitru,

¹⁷ta la Eyakubu, ta la Eyohana moanwye Azabadi. Eyesu a bzi mo Obonigis. O dzu Moanwye la a wo eka Angyum Ogbu.

¹⁸Andru, ta la Efilibu, ta la Abatalamawu, ta la Amatiyu, ta la Otoma, ta la Eyakubu anwye Alafus, ta la Atadas, ta la Esima anwye obiŋ.

¹⁹Ta la Eyahuda Eskariyoti la a yla Eyesu.

²⁰Eyesu a kso akaŋ atam Egalili a gre odne, nga eshki e shki nzenze nga Eyesu ta la moanwyeotum baŋ a hwiŋ anvaŋ moa a ri algo mbo.

²¹Moare a la a lu mi le, Eyesu a dro. Omba moanáŋ Eyesu a gno eka he nga moa a gre eshki lo okyku o shri ŋa o ba odne.

²²Moa la a nye odaŋ akyeŋ la a zgi Orushalima a ba a lu mi ma Ebilazabuba a kpo otum ta la Eyesu. Moakyeŋ a lu mi ma areŋ egbgabi angyiŋ a shri ekʼpo a da Eyesu eshri egbgabi, nga a la a se mo.

²³Eyesu a bzi moare nga a ta egŋe andandandim ta la mo a zhĩ mo a lu mi le, Eshitaŋ e kpo anyu e se Eshitaŋ?

²⁴Eyesu a sa a lu mi le, O wo ba obiŋ-okyeŋ o gʼba eŋa nga moa kpo ambgu ta la emo le, obiŋ lo ó tsu ó gbu.

²⁵O wo ba ogu-okyeŋ o gʼba emo nga moa a la a kpo ambgu ta la emo le, ogu lo ó tsu ó gbu.

²⁶O wo ba oreŋ ba Eshitaŋ o gʼba eŋa le, ó tspi gbagbu mbo, ó tsu ó gbu.

²⁷Arekyeŋ a kpo a gbu baŋ a gom odne are la a wo oshye a yi a si esi ma mbo, o wo le a vu are odne lo a bʼbu endzi ayga dne a kpo a gbu baŋ a gom lo nga a si.

²⁸Agimi e tne aga e ka! Ahogbrẽ á kyu moare abgo ayakplobi moa a la a kpo pyeŋ, ta la ayakplobi la a zgi anyu mo la a wo nzenze ekayaŋ a mbo.

²⁹Ambo are la a lu odlobi eshri Ogbgaodzi le, Ahogbrẽ á kyu ŋa abgo ombgu mbo ku-ku. Odlobi baŋ ó dzu eshri baŋ gbagbu-amo.

³⁰Eyesu a lu eka he okyku eshi moakyeŋ a lu mi ma aŋa a kpo otum ta la ogbgabi.

³¹Ambla fi nga anaŋ Eyesu ta moanáŋ a gbu. Moa a tspi ekpazhi nga moa a bzi Eyesu a daŋ a ba.

³²Moare la a shki a ta Eyesu a kpaŋ a lu a daŋ a lu mi le, Eyesu, anoŋ, ta la moanóŋ a klo ŋo edzi.

³³Eyesu a zhĩ mo a lu mi le, Ayi angyiŋ a wo anungu? Moayi angyiŋ a wo moanime?

³⁴Eyesu a ka eshki tki nga a lu mi le, E ka, agimi angyiŋ e wo anungu pa la moanime.

³⁵Are la a la a kpo ekplo ba Ahogbrẽ a klo angyiŋ a wo anime-alalom, ta la anime-alashle, ta la anungu.