Read eggon Amarku 6 Bible Online

Amarku 6 - eggon bible

Amarku 6

¹Eyesu pa la moanwyeotum baŋ a zgi odne Ojayiru nga moa a gre Anazarata osku ba Eyesu a hlu ma.

²Onda Asabat Eyesu a gre anwyeakulu nga a nye moare odlo Ahogbrẽ. Moare nzenze a ba a gno onyenye baŋ nga moa a ka egbregbre nzenze. Moa a zhĩ ma, Eyesu a hwiŋ edgu onyenye he lo ayaŋ? Nga a kpo anyu a hwiŋ edgu okaobmye he lo? A kpo anyu a kpo ayakplo ba egbregbre eka he?

³Aŋa angyiŋ a wo anwye la a sẽ amgbla, anwye Emeri angyiŋ mbo? Moanáŋ angyiŋ a wo Eyakubu, ta la Ojosi, ta la Eyahuda, ta la Esima mbo? Moanáŋ-alashle a wo ahe ka la gi mbo? Okyku eka he moare ba osku ba Anazarata a tla Eyesu.

⁴Eyesu a nyuŋ mo a lu mi le, Moare ayaŋ a mbo a la a ka arehwĩ ba Ahogbrẽ a hom otum la olbi o wo le moa-osku baŋ, pa la moa-egu baŋ pa la moa-odne baŋ dne a ka ŋa la olbi mbo.

⁵Eyesu a kpo a gbu baŋ a kpo ayakplo egbregbre osku Anazarata nzenze mbo o wo le a tka moakyeŋ la a no olo fi nga a shaŋ mo.

⁶Eyesu a ka egbregbre a gre eshri okyku moarehwi ba osku ba Anazarata a wo obmi ba adlidzi ma mbo. Eyesu a gre anwye esku pyeŋ la a wo akekaŋ ba obiŋ Egalili nga a nyum oshpa.

⁷A pla moanwyeotum otsko baŋ a shki nga a shri ekʼpo a da mo eshri egbgabi, nga a gʼba mo aha-haha okyku o da mo a yi anwye esku andandandim a nyum oshpa.

⁸Eyesu a shĩ mo a lu mi le, O wo bimi e zgi edzi e yi e nyum oshpa le ame e klo ba akyeŋ a mbo a sko emakyeŋ ta la eŋa mbo, o wo le opi o dzi oklo sha. E shri agbrotsa ta la abre, ta la amgbaŋ mbo.

⁹E ygi ariga akyekyeŋ nga e ghwo akpadga.

¹⁰Nga o wo bimi e gbu osku le, e dzu odne oriori bimi e tum ma, e nyiŋ adne mbo. E dzu ma-me o tsa onda bimi e kso.

¹¹Osku bimi e gbu ma, o wo moa a yga gimi mbo le, agimi e dzu mo e zga, nga e ndza abgo bimi nga e yi egimi. Alo ó tsa mo.

¹²Moanwyeotum nga a gre a yi a nyum oshpa okyku o da moare a ghwo obiŋ odlobi mo.

¹³Moa a se egbgabi a sku moare. Moa a tsiŋ moare la a no olo awargi eshri nga moa a shaŋ.

¹⁴Eyesu a gbu eshko a gre eshri okyku ayakplo egbregbre baŋ a la a kpo. Ehirudu anyuŋ-areŋ a mbo a gno oshpa ayakplo egbregbre ba Eyesu a kpo. Moabze a lu mi le, Eyohana la a kpo abaptisma angyiŋ a bla a kso la esõ. Okyku eka he angyiŋ a la a kpo ayakplo egbregbre he lo.

¹⁵Moabze a lu mi le, Are he lo a wo Eliya angyiŋ. Moabze a lu mi le, Are he lo a wo akyeŋ eshki moare ba Ahogbrẽ á hom mo otum obiŋ hi ogbyigbyi.

¹⁶Omba ba Ehirudu a gno odlo moare a la a lu nga, a lu mi le, Are he lo a wo Eyohana la a kpo abaptisma aŋa angyiŋ ame e da mo a kplu eshri baŋ. A sa a bla a kso eku.

¹⁷Ehirudu angyiŋ a da mo a vu Eyohana a ta aku. Ehirudu a vu ŋa a ta aku eshri Ehirudiya ashe anáŋ Efilibu baŋ a sko a kyu.

¹⁸Eyohana a bmi ba Ehirudu a ngʼga ashe lo a kyu mbo, okyku eshi ashe he lo a wo ashe Efilibu anáŋ.

¹⁹Okyku eka he esõ e tpi ashe he lo ayi ta la Eyohana, nga a klo o bga ŋa, ambo okyku eyli Ehirudu aŋa a kpo akplokyeŋ mbo.

²⁰Ehirudu a kpo eyli Eyohana okyku eshi a yi Eyohana a wo arehwĩ ba eda edzi nga a wo esesla. Okyku eka he a kpaŋ ŋa nga a kpo ŋa akplokyeŋ abi mbo. Ehirudu a gno oraŋ ta la odlo Eyohana, ambo a klo ŋa mbo.

²¹Onda ba Ehirudu a kpo abgo olum onda ba moa a mbre ŋa nga, a bzi moandakʼpo la a ri ekʼpo ka la ŋa, pa la moandakʼpo moare la a kpo otum akyuŋ, pa la moandakʼpo ba obiŋ ba Egalili. Olum onda he lo Ehirudiya he lo a hwiŋ ozhẽ ekplo baŋ a klo.

²²Onda he lo, anwye-alashle Ehirudiya a gre aku moare a shki ma a la a ri abgo nga, a zhga ara adzadzi egi ayi Ehirudu pa la moahwõ. Moa mvye a gno oraŋ a gre eshri. Ehirudu nga a nyuŋ anwyeshe lo a lu mi le, Ame é shri ekployaŋ a mbo boŋ o vẽ é shri é doŋ.

²³Ehirudu a kʼpi ashum a lu mi le, Adlidzi ekployaŋ a mbo boŋ o vẽ, o wo boŋ o klo ogʼba ba oreŋ me a mbo ame é shri é doŋ.

²⁴Anwyeshe a gno eka he nga, a knye a gre a yi a zhĩ anaŋ a lu mi le, Aŋo o klo me a vẽ eshi okro Ehirudu? Anaŋ a tno ma a lu mi le, Ame e klo eshri Eyohana la a kpo abaptisma.

²⁵Anwyeshe lo a knye a ba a gre okro Ehirudu nga a vẽ a lu a mi le, Ame e klo boŋ o kplu eshri Eyohana la a kpo abaptisma o ta amgbalga o shri o da me ohuhuhi.

²⁶Ekplo he lo e tpi Ehirudu esõ ayi nzenze, ambo okyku anzi moazhẽ, o dzu omgbybi baŋ a bli ohwihwim baŋ.

²⁷Okyku eka he a hom are la a kʼpu aku moa a vu moare a ygi ma otum, ma a yi a kplu eshri Eyohana a shri a ba. Are la a kʼpu lo a gre a yi a kplu eshri Eyohana.

²⁸A shri eshri lo amgbalga a da anwyeshe, nga anwyeshe a shri lo a kom anaŋ.

²⁹Omba moanwyeotum ba Eyohana a gno ba moa a kplu Eyohana eshri nga, moa a gre a yi a sko okom baŋ a ngybi.

³⁰Moanwyeotum la a zgi onyumoshpa a ba okro Eyesu nga moa a lu eka ayakplo moa a kpo a daŋ.

³¹Moare a ba okro Eyesu ombamba mvye, nga Eyesu pa la moanwyeotum baŋ a hwiŋ anvaŋ ba moa a ri algo mbo. Eyesu a nyuŋ moanwyeotum baŋ a lu mi le, Agimi e da gi e yi agbakyeŋ okyku o da gi e dzu e bʼbu, okyku omba fi.

³²Moa a gre amgblami nga a gre agbakyeŋ.

³³Moare nzenze a ka omba ba Eyesu pa la moanwyeotum baŋ a yi. Okyku eka he moa a sõ oshyi nga a gre okro moa a yi a sheŋ mo a ta.

³⁴Omba ba Eyesu a zgi amgblami nga a ka eshki moarehwi a shki. Moa a wo ŋa ayiekŋe okyku eshi moa a wo eka ékylu la e wo are la a kpaŋ mo ma mbo. Eyesu a nye mo ayakplo nzenze.

³⁵Olum-ore moanwyeotum a nyuŋ Eyesu a lu mi le, Olum o gbu ogbu a mo, odnekyeŋ o wo ahe mbo.

³⁶Okyku eka he o kyu eshki abgo o da mo a yi agbi ta la anwye esku la a wo osusku ahe, a gbmo algo a ri.

³⁷Eyesu a nyuŋ mo a lu mi le, Agimi e klo algo e da mo a ri. Moa a tno ŋa ma a lu mi le, Agi é yi é gbmo agbrotsa ba Enaira ekʼpoenyi é shri é ba é da mo?

³⁸Eyesu a zhĩ mo a lu mi le, Agbrotsa ahrẽ agimi e wo alo ma? E yi e ka nga e ba e lu e da me. Moa a gre a ka nga, moa a ba a lu mi le, Agbrotsa atno, ta la atsa aha a wo ma.

³⁹Eyesu a lu ma moanwyeotum baŋ a da moare mvye a shki obiŋ asoso awu.

⁴⁰Okyku eka he moare a shki obiŋ, nga a dzu ele-eluŋ. Eshki-ebze, moare ekʼpoetno a wo ma.

⁴¹Ambla ba Eyesu a tslo agbrotsa atno ta la atsa aha, a ka ongyeŋ, a vye Ahogbrẽ a khwo nga a gʼba mo alo.

⁴²Areyaŋ a mbo a taŋ agbrotsa ta la atsa aha lo a wyo gble.

⁴³Moanwyeotum a pla agbrotsa ta la atsa la a ra nga, a bli aksu otsko.

⁴⁴Moarehwi la a taŋ agbrotsa a wo ezbietno.

⁴⁵Ebuebu Eyesu a nyuŋ moanwyeotum baŋ ma moa a yi Ebetseda o tsa baŋ a ba. Osku lo o wo eshri osu ba atam Egalili. Eyesu a kyu eshki abgo a da mo a gre.

⁴⁶Ambla he nga Eyesu a gre akũ-akyeŋ okyku o fa olu.

⁴⁷Olum-ore omba ba amgblami a wo agʼbaha atam, Eyesu a wo eŋa okrokyeŋ akũ.

⁴⁸A ka moanwyeotum baŋ a la a tpi amgblami mo la ewu. Omba he lo ogbga ogbu o som mo ayi. La amgbaŋ atra o mbo le amgbaŋ afĩ ba endigiŋ, Eyesu a dzi ami a ba okro mo nga a bre a yi.

⁴⁹Omba moa a ka ŋa a dzi ami a yi nga, moa a ta enzi angyangyeŋ a lu mi le, E ka amu!

⁵⁰Omba moa a ka Eyesu eyli e kpo mo. Eyesu a nyuŋ mo a lu mi le, Agimi e shye esõ bimi! Ame angyiŋ. E kpo eyli mbo!

⁵¹Eyesu a gre amgblami lo pa la mo a khwo nga, ogbga ogbu o dum. Moanwyeotum baŋ a ka egbregbre a gre eshri nga moa a yi eheŋ-ekyeŋ moa a wo ma mbo.

⁵²Moanwyeotum Eyesu a ka onyenye ba agbrotsa a bmye mbo. O gre mo eshri okaobmye.

⁵³Moa a bmyi atam lo nga moa a ba osku moa a bzi lo Ajanasarata. Moa a dze amgblami mo akaŋ atam.

⁵⁴Omba ba moa a zgi amgblami, shoshoŋ nga moare a ka a bmye ba alo a wo Eyesu angyiŋ.

⁵⁵Ambla moare a gno oshpa ba Eyesu a ba a khwo nga, moa a zgi ekro andandandim a ba la moalolo akpakpa moa a lom ma, okyku o daŋ a shaŋ mo.

⁵⁶Okroyaŋ a mbo ba Eyesu a gre, anwye esku, ta la esku, ta la agbi, ta la ekyku, moa a sko moalolo a kom ŋa ekro he lo, nga moa a vẽ ŋa okyku o daŋ a bmi nga a da moalolo a tka ariga baŋ. Moa la a tka ariga baŋ mvye moa a shaŋ.