Read eggon Oluka 1 Bible Online

Oluka 1 - eggon bible

Oluka 1

¹Andakʼpo Etiyofolu! Moare nzenze a zga gble okyku o ta oshpa ayakplo la a kpo agʼbaha bi.

²Moa a ta oshpa ba moa a ka ayakplo he lo okũ oriori a lu a da gi, nga moa a nyum oshpa lo.

³Aŋo Etiyofolu, okyku ba ame e klo aga ogyugyuŋ ayakplo he lo pyeŋ, a zga okũ oriori ba alo, ame e ka o wo odzi ba ame e ta oshpa ekployaŋ a mbo e shri e kom ŋo.

⁴Ame e ta lo e shri e kom ŋo okyku o doŋ o yi adlidzi ba ekpíoyaŋ a mbo moa a nye ŋo.

⁵Ohe lo o zga esi omba ba Ehirudu a wo anyuŋ-areŋ ba obiŋ ba Eyahuda. Andakʼpo olu ba Ahogbrẽ a wo ma, eshko baŋ e ri Azakariya. Aŋa a wo arehwĩ ba ogu ba moandakʼpo olu ba Ahogbrẽ, moa a bzi ogu he lo ma Abiya. Ashe baŋ a mbo a wo arehwĩ ba ogu ba moandakʼpo olu ba Ahogbrẽ angyiŋ. Eshko baŋ e ri Alisabatu.

⁶Moaha lo pyeŋ moa a wo moare ba odlodzi angyiŋ egi ayi Ahogbrẽ. Moa a kpaŋ odaŋ ba Ahogbrẽ adzadzi.

⁷Alisabatu a dga eklu. A wo la anwye ma mbo ku-ku. Alisabatu ta la Azakariya, moa a sheŋ a tsoŋ nzenze bgu.

⁸Ondakyeŋ, Azakariya a kpo otum ba andakʼpo olu egi ayi ba Ahogbrẽ omba ba otum o gbu o baŋ. A gre nga a la a kpo otum.

⁹Ozhẽ otum moandakʼpo olu ba Ahogbrẽ osaosla o gbu eshri baŋ, baŋ angyiŋ a ba a yi a ta ama la a shka efpi ovo ambgu. Okyku eka he a gre Anyuŋ-akulu ba Adigi-odne.

¹⁰Omba baŋ a la a ta ama la a shka efpi he lo ovo nga, moare la a wo edzi a fa olu.

¹¹Anwyeadga ba Adigi-odne a ba okro baŋ, nga a tspi egi obgori ba ambgu lo okro ba Azakariya a la a ta ama la a shka efpi ovo.

¹²Omba ba Azakariya a ka ŋa nga, eso e kpla ŋa e gbu, nga eyli e kpo ŋa.

¹³Ambo anwyeadga ba Ahogbrẽ a nyuŋ ŋa a lu mi le, Aŋo Azakariya, o da eyli e kpo ŋo mbo! Ahogbrẽ a sheŋ a gno olu boŋ. Okyku eka he, Alisabatu ashe boŋ á mbre ŋo anwyealom, eshko baŋ é ri Eyohana.

¹⁴Aŋo ó kpo ovye, nga moahwõ moa á gno oraŋ nzenze omba ba moa a mbre anwye he lo!

¹⁵Okyku eshi, aŋa á dzu are ba esesla egi ayi ba Adigi-odne. Okyku eka he aŋa á wa ami anab la a no mbo, o mbo le a wa ami la a bza mbo ku-ku. Moa á bli ŋa la Ogbgaodzi o zgi omba ba moa a mbre ŋa.

¹⁶Aŋa á zhiŋ moare nzenze ba Esrayila á ba ozhẽ ba Adigi-odne Ahogbrẽ mo.

¹⁷Á yi eka anwyeadga ba Ahogbrẽ, la oshye, ta la ekʼpo eka ba Eliya arehwĩ ba Ahogbrẽ a hom ŋa otum. Á shri moada, pa la moanwye á zga ozhẽ okyekyeŋ. Nga á zhiŋ moa la a shye eshri a da mo a dzu moare ba odlodzi. Á nyuŋ odzudzu ba moarehwi ba Adigi-odne á kpo o tsa baŋ a ba.

¹⁸Azakariya a nyuŋ anwyeadga ba Ahogbrẽ a lu mi le, Ame é kpo anyu é ba e yi ba alo o wo adlidzi angyiŋ? O ka, ame e wo atsoŋ are nga ashe me a mbo a sheŋ a tsoŋ bgu.

¹⁹Anwyeadga ba Ahogbrẽ a tno ma a lu mi le, Ame angyiŋ e wo Egabilu. Ame e la e tspi egi ayi ba Ahogbrẽ ombamba pyeŋ. Aŋa angyiŋ a hom me otum okyku o da me e lu Oshpaodzadzi he lo e doŋ,

²⁰ambo aŋo o bmi ba adlidzi ta la oshpa ba ame e shri e ba he lo mbo. Ó bli omba ba omba o kpo. Okyku boŋ o bmi ba adlidzi ta la oshpa lo mbo, ó dzu amgbyiŋ. Aŋo ó kpla egba ó gbu mbo o wo le ekplo ba ame e lu e doŋ é bli ayga dne.

²¹Omba he lo nga, moare a la a dzu a bli Azakariya. Moare a ka egbregbre eka ba Azakariya a yi a dga Anyuŋ-akulu lo ma-me.

²²Omba ba Azakariya a zgi edzi nga, a kpla egba pa la moare a gbu mbo. Omba he lo moare a ka a bmye baŋ a yi a ka okoka Anyuŋ-akulu. A lu odlo a gbu mbo, o wo le a tsa abgo sha.

²³Ambla ba omba ba otum ba Azakariya Anyuŋ-akulu o bli nga, a gre eŋa odne.

²⁴Ambla fi nga ashe baŋ Alisabatu a kpo onyi. A dzu odne okyku eha etno.

²⁵Alisabatu a lu mi le, Ambla ba omba o dga o dzu nga, Adigi-odne a kpo a ghwo la me ozhẽ he lo. Aŋa a sko anzi la a wo eshri me a sku me.

²⁶Oha ba ofi ba Alisabatu a kpo onyi nga, Ahogbrẽ a hom anwyeadga moa a bzi ŋa ma Egabilu otum oskukyeŋ moa a bzi lo ma Anazarata obiŋ ba Egalili.

²⁷A shri oshpa a kom anwyeshekyeŋ ba Oyusufu a kpo eshra baŋ. Oyusufu a wo ba ogu ba Adawuda Anyuŋ-areŋ. Eshko ba anwyeshe he lo e ri Emeri.

²⁸Anwyeadga ba Ahogbrẽ a ba okro anwyeshe a nyuŋ ŋa a lu mi le, Opyapyaŋ ba eso o dzu ka la ŋo. Ahogbrẽ a wo ka la ŋo, okyku eka he, aŋa a doŋ o raŋ eshri okro baŋ!

²⁹Odlo ba anwyeadga ba Ahogbrẽ a lu he lo o kpo Emeri ewu eso baŋ nzenze. A ka lo a bmye mbo.

³⁰Anwyeadga ba Ahogbrẽ a nyuŋ ŋa a lu mi le, Emeri, o da lo o kpo ŋo ewu eso mbo. Ahogbrẽ angyiŋ a sla ŋo.

³¹Aŋo ó kpo onyi, nga ó mbre anwye, nga ó glo ŋa eshko e ri Eyesu.

³²Aŋa á wo la esesla, nga moa á bzi ŋa Anwye Ahogbrẽ ba Esesla. Adigi-odne Ahogbrẽ á daŋ a dzu Anyuŋ-areŋ eka ba adaŋ Adawuda.

³³Á dzu Anyuŋ-areŋ ogu ba Eyakubu gbagbu-amo. Oreŋ baŋ ó khwo ku-ku mbo.

³⁴Emeri a tno anwyeadga ba Ahogbrẽ lo ma a lu mi le, Ame e yi e wo anwyeshe sha ayga, ohe lo ó kpo anyu ó ba o kpo ó gbu?

³⁵Anwyeadga ba Ahogbrẽ a tno ma a lu mi le, Ogbgaodzi ó bli ŋo, nga ekʼpo ba Ahogbrẽ angyiŋ é ba e kpo otum ka la ŋo. Okyku eka he anwye ba esesla he lo, moa á bzi ŋa Anwye ba Ahogbrẽ.

³⁶Aŋo o tne aga o ka eshri ba anóŋ, Alisabatu. O ka, aŋa a dga eklu, ambo a kpo eha efĩ baŋ a wo la onyi a mo. Aŋa ba moa a lu ma a dga eklu.

³⁷Aŋo o ka, ekplokyeŋ e gre Ahogbrẽ abgo mbo ku-ku.

³⁸Emeri a tno ma a lu mi le, Ame e wo anwye-odne ba Adigi-odne, okyku eka he ame e ka ayi ozhẽ ba ekployaŋ a mbo boŋ o lu é ba e bli. Ambla he nga anwyeadga ba Ahogbrẽ a zhiŋ ogbu a dzu Emeri a zga.

³⁹Ambla fi nga, Emeri a vu anzho abgo a khwo nga a vre a gre anwye oskukyeŋ la a wo obiŋ ba Eyahuda.

⁴⁰A gre odne ba Azakariya nga a yi a shko Alisabatu.

⁴¹Omba ba Alisabatu a gno oshko ba Emeri a khwo nga, anwye a kpo esku akpyki baŋ. Ogbgaodzi o bli eso Alisabatu.

⁴²Nga Alisabatu a lu odlo angyangyeŋ a lu mi le, Aŋo ashe la o raŋ eshri eshki moashe! Anwye boŋ ó ba o mbre he lo a mbo á raŋ eshri ma!

⁴³Okyku eshi edgu ekplo he e kpo pa la me, ba anaŋ Adigi-odne a mbo a ba a shko me?

⁴⁴O ka, ambla ba ame e gno oshko boŋ e khwo nga, anwye la a wo akpyki me a kpo esku la ovyevye.

⁴⁵Aŋo o wo la oraŋ ma o gre eshri, boŋ o bmi ba adlidzi ba oshpa ba Adigi-odne ó ba o bli!

⁴⁶Emeri a lu mi le, Eso me e la e hlu Adigi-odne eshko.

⁴⁷Ame e wo la ovye eso ma okyku Ahogbrẽ, Areoshla me.

⁴⁸Okyku baŋ a tne aga me anwye-odne baŋ la a wo bleble. Omba la o yi hi pyeŋ nga, moare á bzi me are la a raŋ eshri.

⁴⁹Okyku anyuŋ ayakplo ba Ahogbrẽ la a wo ekʼpo ma, a kpo okyku me. Eshko baŋ e wo la esesla.

⁵⁰Aŋa a ka moa la a kpo eyli baŋ mvye ayiekŋe. A zga ekplu hi a yi ekplu ehwõ a la a kpo eka he lo.

⁵¹A ndba abgo baŋ ba esesla, A som ohwihwim moare la a la a ygi egʼba ayi.

⁵²A gile moanyuŋ-areŋ a sku oreŋ mo, A da moa la a wo eso ble-ble a vre.

⁵³A shri ayakplo la a wo adzi a da moare la a wo emakyeŋ ma mbo. Nga a kyku moangyiŋ la abgo ototno.

⁵⁴A bli ohwihwim baŋ a hwim pa la moadigi. Nga a ba okyku o kpo o ghwo la anwye-odne baŋ la a ri Esrayila.

⁵⁵A tne aga a ka Ebrahim ayiekŋe. Nga á ka moanwye ba Ebrahim a mbo ayiekŋe gbagbuamo!

⁵⁶Emeri a dzu ta la Alisabatu okyku eha etra. Ambla he nga a bla a gre odne.

⁵⁷Omba ba Alisabatu á mbre o kpo nga, a mbre anwyealom.

⁵⁸Moaekpazhi baŋ pa la moa-ogu baŋ moa a gno eka ba Alisabatu a raŋ eshri okro ba Adigi-odne, okyku eka he moa a kpo ovye nzenze ka la ŋa.

⁵⁹Omba ba anwye lo a kpo asati akyeŋ nga, moa a sheŋ ŋa ongyum. Moa a klo o glo ŋa eshko o daŋ a ri Azakariya, eshko adaŋ.

⁶⁰Ambo anaŋ a tla, ma eshko anwye lo é ri Eyohana!

⁶¹Ambo moare a nyuŋ ŋa a lu mi le, Ayi boŋ angyiŋ eshko baŋ e ri Eyohana?

⁶²Moa a ta abgo a lu odlo ta la adaŋ, moa a zhĩ ŋa eshko baŋ a klo o glo anwye lo.

⁶³Azakariya a da mo a shri alo a kom ŋa, nga a ta engla a lu mi le, Eshko anwye lo é ri Eyohana. Moare pyeŋ a ka egbregbre a gre eshri!

⁶⁴Omba he lo nga, Azakariya a kpla egba a gbu, nga a hlu Ahogbrẽ eshko.

⁶⁵Moaekpazhi baŋ pyeŋ moa a kpo eyli ekplo la e kpo. Oshpa ekployaŋ a mbo la e kpo e gbu atuŋ e tsu e gre obiŋ ba Eyahuda.

⁶⁶Moare pyeŋ la a gno oshpa he lo moa a zhĩ a lu mi le, Anwye he lo á dzu eshi edgu arehwĩ lo? Okyku eshi o wo zheŋ ba ekʼpo Ahogbrẽ e wo ka la ŋa.

⁶⁷Azakariya adaŋ anwye lo a bli la Ogbgaodzi, okyku eka he a ka a lu mi le,

⁶⁸Agimi e da gi e hlu Adigi-odne eshko. Aŋa a wo Ahogbrẽ ba Esrayila! A ba okyku o kpo o ghwo a moarehwi baŋ, nga o shla mo.

⁶⁹A da anyuŋ Areoshla a ba okyku gi. Aŋa angyiŋ a wo a ba ogu ba Adawuda, anwye-odne baŋ.

⁷⁰Ogbyigbyi Ahogbrẽ a da moarehwi ba esesla ban a hom otum a lu eka he lo.

⁷¹Aŋa a hwim baŋ á ba a shla gi abgo moafpu gi, Ka la abgo moa la a klo gi mbo.

⁷²A lu ma aŋa á ka moadigi ayiekŋe, Nga aŋa á bli ohwihwim ba esesla baŋ a hwim.

⁷³A hwim osheshye ta la adigi Ebrahim, Nga a kʼpi ashum ma aŋa á shla gi abgo moafpu gi, Nga á da gi ozhẽ okyku o da gi e hlu ŋa eshko la eyli mbo. Okyku o da gi e dzu la esesla, ta la okpo odlodzi egi ayi baŋ, Omba ba agi e wo obiŋ hi lo pyeŋ.

⁷⁴

⁷⁵

⁷⁶Aŋo Anwye me, moa á bzi ŋo Arehwĩ ba esesla ba Ahogbrẽ la a gre pyeŋ, a ba Ahogbre a hom ŋa otum. Aŋo ó gre Adigi-odne ori, Okyku o nyuŋ ozhẽ o kpo okyku ŋa.

⁷⁷Okyku o doŋ o lu o da moare ba moa á ba a hwiŋ oshla, Okyku eshi Ahogbrẽ a kyu mo abgo odlobi mo.

⁷⁸Okyku eshi, Ahogbrẽ bi a la a ka gi ayiekŋe, nga a wo eso ble-ble. Aŋa á da ayimom ba oshla á tra gi.

⁷⁹Á da lo a zgi ongyeŋ a tra areyaŋ a mbo la a wo ozhẽ ba eku, Okyku o daŋ a tsa gi ozhẽ la o wo pyapyaŋ.

⁸⁰Anwye lo a hlu la oshye eso. A dzu akla ma-me o tsa omba baŋ a zgi esi otum baŋ egi ayi moaEsrayila.