Read eggon Oluka 10 Bible Online

Oluka 10 - eggon bible

Oluka 10

¹Ambla he nga, Adigi-odne a sla moarehwi ekʼpoefoha nga a hom mo otum. A hom mo ahahaha, okyku o da mo a yi oskuyaŋ a mbo ta la okroyaŋ a mbo baŋ a zga eso ba o yi.

²Eyesu a nyuŋ mo a lu mi le, Algo ba oyoyla a wo ma nzenze, ambo moare la a wo ma okyku o yla lo a gaŋ mbo. Okyku eka he e fa olu okyku o da are-agbi a shri moare a shri a ba a ta ma okyku oyoyla.

³Agimi e yi! Ame é hom gimi otum eka ba ékylu e yi okro ba ebuakam.

⁴Agimi e sko abre amgbaŋ ba o shri amgbaŋ ma mbo. Agimi e sko abre mbo nga e shri akpadga mbo. Agimi e tspi e shko arekyeŋ ozhẽ mbo ku-ku.

⁵Ombayaŋ a mbo bimi e gbu odnekyeŋ le, agimi e zga esi e nyuŋ moa-odne lo e lu mi le, Opyapyaŋ ba eso o dzu ta la odne he lo.

⁶O wo ba arekyeŋ ba odlodzi a wo ma le, edgu oshko he lo o dzu ŋa la owlama, ambo o wo ba arekyeŋ ba odlodzi a wo ma mbo le, alo o bla o ba ibu bimi.

⁷Agimi e dzu odne he lo nga e ri e wa, eka ba moa a shri a da gimi. Okyku eshi o dzu omgbybi ba moa a shri ohre a da are la a kpo otum. E dzi adne moare wayawaya mbo.

⁸Ombayaŋ a mbo ba agimi e gre osku le, o wo moare ba osku he lo a yga gimi la ovyevye le, agimi e ri ekployaŋ a mbo ba moa a shri a da gimi.

⁹Nga agimi e shaŋ moare osku lo, nga e lu e da moare e lu mi le, Oreŋ Ahogbrẽ o ba osusku ka la gimi.

¹⁰Ambo ombayaŋ a mbo bimi e gre osku, o wo ba moarehwi ba osku lo a yga gimi la ovyevye mbo le, agimi e yi anyuŋ-ezhẽ nga e lu mi le,

¹¹Agi e ndza abgo e sku gimi, ambo agimi e tne aga e ka, Oreŋ Ahogbrẽ o ba osusku ka la gimi a mo!

¹²Ame e lu e da gimi, Onda Ombgu tli le, Ahogbrẽ á ka Osodom a mbo ayiekŋe á gre edgu osku he lo.

¹³Aŋo Okoroziŋ, ta la Ebetseda! A ba eshri bimi! O wo ba moa a kpo edgu ayakplo ba egbregbre ba moa a kpo hi Ataya ta la Esidoŋ angyiŋ, e mbi, moare a sheŋ a dzu obiŋ nga a ygi ashezhga aknye nga a fa otutuŋ a ygi egʼba, okyku o tsa ba moa a ghwo obiŋ odlobi mo bgu!

¹⁴Olum Onda Ombgu ba Ahogbrẽ, Ahogbrẽ á ka Ataya ta la Esidoŋ la ayiekŋe la a gre ayiekŋe baŋ á ba a ka okyku gimi.

¹⁵Aŋo Akafanahum! Aŋo o klo o si eŋo o yi Ongyeŋ? Ambo, moa á shri ŋo á ta enzheovo!

¹⁶Nga a nyuŋ moanwyeotum baŋ lo a lu mi le, Areyaŋ a mbo la a yga odlo bimi le, a yga odlo me angyiŋ, nga areyaŋ a mbo la a tla gimi le, a tla me angyiŋ, nga areyaŋ a mbo la a tla me angyiŋ, a tla are la a hom me otum.

¹⁷Moarehwi ekʼpoefoha a ba la ovye nzenze nga moa a lu mi le, Adigi-odne, egbgabi a mbo moa a gno gi omba bi e kyku mo la eshko boŋ!

¹⁸Eyesu a tno mo ma a lu mi le, Ame e ka Eshitaŋ a mbo e gile e zgi ongyeŋ e ba obiŋ hi eka ayimom ba angyum-ogbu.

¹⁹Agimi e ngli e gno! Ame e shri ekʼpo e da gimi, okyku o da gimi e dzi amabi, ta la enaŋ a mbo, nga ame e da gimi ekʼpo la e gre ekʼpo pyeŋ ba Afpu bimi. Ekplokyeŋ é kpo gimi mbo ku-ku.

²⁰Ambo, agimi e kpo ovye okyku ba egbgabi a mbo e gno gimi mbo! Ambo, agimi e kpo ovye okyku ba moa a sheŋ a ta ashko bimi Ongyeŋ bgu.

²¹Omba he lo nga, Ogbgaodzi o bli Eyesu la ovye. A lu mi le, Aŋo Ada, Adigi-odne ba Ongyeŋ pa la ba obiŋ hi! Ame e vye la ŋo nzenze okyku boŋ o hwile eshyẽ odlo boŋ okyku moa la a yi engla mbo. Ohe lo aŋo o ghre moa la a wo okaobmye la o gyu ogyuŋ, pa la moa la a yi engla. Eka he a mi la, Ada, aŋo o kpo ekplo boŋ o klo nga o gno oraŋ ta la lo angyiŋ.

²²Adugu a sheŋ a shri ekployaŋ a mbo a da me. Arekyeŋ a yi are la a wo Anwye lo mbo o wo le Ada sha. Arekyeŋ a yi are la a wo Ada mbo o wo le Anwye, pa la are ba Anwye lo a klo baŋ a yi ŋa sha.

²³Ambla he nga Eyesu a zhiŋ a lu pa la moanwyeotum baŋ sha a lu mi le, Agimi e raŋ eshri e gre eshri eka bimi e hwiŋ ozhẽ e ka edgu ayakplo hi!

²⁴Ame e lu e da gimi, moarehwi nzenze ba Ahogbrẽ a hom mo otum, pa la moareŋ, moa a klo o ka edgu ayakplo bimi e la e ka he, ambo moa a hwiŋ ozhẽ mbo. Nga moa a klo o gno edgu ayakplo bimi e la e gno, ambo moa a gno mbo.

²⁵Ambla he nga, arekyeŋ la a nye odaŋ a ba okyku o kpyi Eyesu. A zhĩ a lu mi le, Andakʼpo, ame é kpo eshi okyku o da me e hwiŋ eso ba gbagbu-amo?

²⁶Eyesu a tno ŋa ma a lu mi le, Akpa ba Ahogbrẽ a lu eshi? Okaobmye boŋ o wo ekayaŋ odlo lo?

²⁷A tno ma a lu mi le, O dzu omgbybi boŋ o klo Adigi-odne Ahogbrẽ boŋ la eso boŋ pyeŋ, la oshye egʼba boŋ pyeŋ, la aga boŋ pyeŋ, nga o klo a ba ekpazhi boŋ eka boŋ o klo eshri boŋ.

²⁸Eyesu a tno ŋa ma a lu mi le, Otnoma boŋ hi o wo eka lo angyiŋ. Aŋo o kpo eka he lo bgu le, ó hwiŋ eso ba gbagbu-amo.

²⁹Ambo are la a nye odaŋ he lo a klo o da Eyesu a ka ŋa baŋ a wo shasha angyiŋ eshri ozhiozhĩ he lo, okyku eka he a zhĩ ŋa a lu mi le, Ayi angyiŋ a wo a ba ekpazhi me?

³⁰Eyesu a tno ma a lu mi le, Alomakyeŋ a gile a zgi Orushalima a yi Ejeriko, nga moasi a kpo ogʼga ka la ŋa. Nga moa a zhga ŋa egʼba a ta. Moa a dzu ŋa a zga anyu eku.

³¹Omba he lo andakʼpo olu ba Ahogbrẽ a ba a sõ ozhẽ he lo. Omba baŋ a ka alom he lo nga, a ngʼba a sõ eŋa agba ozhẽ shu a bre a gre.

³²Alomakyeŋ ba Elivi a ba a sõ ozhẽ lo nga, a mʼmi ŋa ayi nga a ngʼba a sõ eŋa agba ozhẽ shu a bre a gre.

³³Ambo alom ba Asamariya a mbo a sõ ozhẽ he lo. Omba baŋ a ba a bre a yi nga, a ka alom he lo nga a wo ŋa ayiekŋe.

³⁴A gre okro baŋ nga a zhiŋ awargi, ta la ami anab a tsiŋ ŋa ekro ba moa a fa ŋa ero ma, nga a bʼbu ŋa ero lo. A sko ŋa a zga ashrishri baŋ a shri ŋa a gre odnekyeŋ nga a kpo a ghwo la ŋa.

³⁵Onda oha nga a shri eyiamgbaŋ eha a da are-odne lo nga a lu mi le, Aŋo o kpo o ghwo la alom hi nga ekployaŋ a mbo boŋ o tpi ayi eshri baŋ o gre ekplo ame e shri e doŋ, omba ame é ba, ame é nyiŋ lo é doŋ.

³⁶Nga Eyesu a zhĩ a lu mi le, Eka boŋ o ka, areyaŋ angyiŋ eshki moatra he lo a wo a ba ekpazhi ba alom ba moasi a kpo ogʼga ka la ŋa?

³⁷Are la a nye odaŋ a tno ŋa ma a lu mi le, Are la a kpo a ghwo la ŋa he lo angyiŋ a wo a ba ekpazhi baŋ. Eyesu a tno ŋa ma a lu mi le, Aŋo a mbo o yi o kpo ekakahelo.

³⁸Omba ba Eyesu, pa la moanwyeotum baŋ a wo ozhẽ a yi nga, moa a gbu anwye oskukyeŋ. Ashekyeŋ a wo ma, eshko baŋ e ri Amata. A yga Eyesu odne mo la ovyevye.

³⁹Amata a wo la anáŋ ma, eshko baŋ e ri Emeri. Aŋa angyiŋ, a dzu eŋa egi ayi ba Adigi-odne nga a ngli atuŋ a gno onyenye baŋ.

⁴⁰Ambo Amata a kpo olom okyku otum la o wo ma nzenze baŋ a la a kpo. Okyku eka he nga a ba a lu mi le, Adigi-odne, aŋo o ka eka ba anime a dzu ka la ŋo nga, a dzu otum a ta me sha a da me e la e kpo mbo? O lu o daŋ a ba a kpo a ghwo la me!

⁴¹Ambo Adigi-odne a tno ŋa ma a lu mi le, Amata, Amata! Aŋo o la o da ayakplo nzenze a kpo ŋo ewu eso!

⁴²Ambo ekplokyeŋ sha moa a klo. Emeri a sla ekplo la e wo shasha, nga moa á ngʼga lo á sku ŋa mbo ku-ku.