Read eggon Oluka 14 Bible Online

Oluka 14 - eggon bible

Oluka 14

¹Onda Asabat nga Eyesu a gre odne alom ba Efarisikyeŋ okyku oriabgo. Alom he lo a wo andakʼpo eshki moaEfarisi. Moare a la a kʼpu Eyesu omba he lo.

²Aloma-kyeŋ ba adga ta la abgo baŋ a nyom, a ba okro Eyesu.

³Eyesu a zhĩ moa la a nye odaŋ pa la moaEfarisi a lu mi le, Odaŋ bi o bmi ba moa a shaŋ moa la a no olo onda Asabat le o bmi mbo?

⁴Ambo moa a tno ŋa ma mbo. Eyesu a da alom he lo a ba nga a shaŋ ŋa nga á daŋ a zhiŋ ogbu a gre eŋa.

⁵Ambla he nga a lu pa la mo a lu mi le, O wo ba akyeŋ eshki bimi a wo la anwye, o mbo le endga ma, nga ba alo e tsi e gre arizha onda ba Asabat le, aŋo ó se lo onda Asabat mbo?

⁶Ambo moa a tno ŋa ma a gbu mbo.

⁷Eyesu a ka eka moareabze moa a bzi mo okyku oriabgo a sla ekro ba moandakʼpo angyiŋ a dzu ma, okyku eka he a ta egŋe a ygi mo.

⁸A lu mi le, O wo ba arekyeŋ a bzi ŋo okyku oriabgo ba anwyeshe le, o gre o yi o sla okro moandakʼpo angyiŋ o dzu ma mbo, okyku eshi o dzu mbo arekyeŋ la a wo ekʼpo a gre ŋo a yi á ba.

⁹Nga adaŋ-odne ba oriabgo la a bzi gimi aha lo pyeŋ a kpo a gbu baŋ a nyuŋ ŋo a lu mi le, Aŋo o kso o da are he lo a dzu ma. Aŋo ó gbu anzi omba moa a doŋ o dzu emgbakyiŋ moaekŋe.

¹⁰Ambo ombayaŋ a mbo ba moa a bzi ŋo okyku oriabgo le, ó gre le, o dzu emgbakyiŋ moaekŋe angyiŋ. Aŋo o dzu o bli adaŋ-odne la a kpo abgo angyiŋ o daŋ a lu mi le, Alom, o ba o dzu okro ba ekʼpo hi. Ohe lo ó da moare mvye la a wo ma á ka ŋo la anyuanyuŋ.

¹¹Okyku eshi areyaŋ a mbo la a la a sko eshri baŋ a zga la ekʼpo, moa á sko ŋa á zga akplokyeŋ mbo, nga areyaŋ a mbo la a sko eshri baŋ a zga akplokyeŋ mbo, moa á sko ŋa á zga la ekʼpo.

¹²Ambla he nga Eyesu a nyuŋ adaŋ-odne la a kpo abgo lo a lu mi le, O wo boŋ o kpo abgo le, aŋo o bzi moakyeŋoazba, pa la moanóŋ, pa la moa-ogu boŋ, pa la moangyiŋ ba ekpazhi boŋ mbo, okyku eshi moahi lo á bla á kpo ŋo odlodzi boŋ o kpo mo.

¹³Omba boŋ o kpo abgo le, o bzi moaekŋe pa la moa la a buŋ adga, pa la moa la a shla adga, pa la moavgayi,

¹⁴nga Ahogbrẽ á shri owlama á shri á doŋ, okyku eshi moahi lo a wo la ozhẽ-okyeŋ ba o bla alo o kpo ŋo ma mbo. Ahogbrẽ á shri owlama á doŋ omba ba moa á kso moaodlodzi ongybi.

¹⁵Akyeŋ eshki moare la a dzu obiŋ okro oriabgo a gno eka he nga, a nyuŋ Eyesu a lu mi le, Moare la á ba a dzu otsotse okro oriabgo ba Oreŋ Ahogbrẽ, moa á gno oraŋ a gre eshri!

¹⁶Eyesu a tno ŋa ma a lu mi le, Alomakyeŋ a wo ma. A kpo anyuŋ abgo nga a bzi moare nzenze okyku lo.

¹⁷Omba ba omba o kpo a da anwye-odne baŋ a gre okyku o bzi moare o da mo a ba okyku eshi moa a nyuŋ ekployaŋ a mbo a vu abgo bgu.

¹⁸Ambo moa pyeŋ a klo elom andandandim. Are ba oriori a nyuŋ anwye-odne lo a lu mi le, Aŋo o bmi le, o da me e yi e ka agbi alahe ba ame e gbmo. Ame e vẽ ŋo, o da eso e tpi ŋo ayi mbo.

¹⁹Akyeŋ nga a nyuŋ anwye-odne a lu mi le, O ka, ame e gbmo andu okʼpo omba hi, okyku eka he ame e yi e mbga mo e ka, ame e vẽ ŋo o da eso e tpi ŋo ayi mbo.

²⁰Ahwõ nga a lu mi le, Ame e kyu ashe alahe ayga, okyku eka he, ame é yi é gbu mbo.

²¹Anwye-odne lo a gre odne nga a yi a lu eka ekplo la e kpo a da adaŋ-odne. Eso e tpi ŋa ayi e gre eshri. Okyku eka he a nyuŋ anwye-odne baŋ a lu mi le, Aŋo o yi anyuŋezhẽ ta la anwyezhẽ ba osku lo shoshoŋ nga o bzi moaekŋe, pa la moa la a buŋ adga, pa la moavgayi, pa la moa la a shla adga.

²²Ambla he nga anwye-odne lo a lu mi le, Andakʼpo, ame e kpo ekplo boŋ o lu, ambo okro o yi o ra okyku moare nganga.

²³Okyku eka he nga, alom lo a nyuŋ anwye-odne a lu mi le, Aŋo o yi anyuŋezhẽ ta la anwyezhẽ ba agbi, nga o shri moare o shri o ba okyku o da odne me o bli la moarehwi.

²⁴Ame e lu e doŋ arekyeŋ eshki moarehwi ba moa a bzi mo, á ri abgo me he lo mbo ku-ku!

²⁵Moare nzenze a la a lu Eyesu ma. A zhiŋ a nyuŋ mo a lu mi le,

²⁶Areyaŋ a mbo la a klo o lu me ma le, o dzu omgbybi baŋ a tla adaŋ, ta la anaŋ, ta la ashe baŋ, pa la moanwye baŋ, pa la moanáŋ, ta la eshri baŋ a mbo.

²⁷Areyaŋ a mbo la a bmi a kpo ewu okyku me mbo le, a tse ma baŋ a lu me ma mbo.

²⁸O wo ba akyeŋ eshki bimi a zga aga ba o mbdzi odne le, a dzu obiŋ shu a mbga a ka eka ekplo la e ba e sko, nga okyku o daŋ a ka eka amgbaŋ baŋ a wo la alo ma okyku otum lo.

²⁹O wo baŋ a kpo eka he ayga mbo le, á kpo á gbu baŋ a hwiŋ amgbaŋ la á ba a tse otum lo mbo. O wo baŋ a zga esi a khwo ayga ba otum lo o tspi le, areyaŋ a mbo la a ka lo á nyuŋ are he lo ega.

³⁰Eyesu a lu mi le, Alom he lo a zga esi ba o mbdzi odne, ambo a kpo lo a gbu mbo!

³¹A sa a lu mi le, O wo ba areŋ a zgi la moarealom ezbiokʼpo okyku o yi o ta eko ta la areŋ ba oskukyeŋ la a wo la moarealom ezbiekʼpoeha ma le, areŋ he lo á dzu obiŋ á tne aga adzadzi okyku o ka o wo ba oshye baŋ o tse ma okyku o ta eko he lo.

³²O wo baŋ a ka baŋ a siŋ ma le, á hom otum a kom areŋ mi omba baŋ a yi a wo ogyugyuŋ okyku o da mo a nyuŋ a kpo.

³³Eyesu a sa a lu mi le, Ekakahelo angyiŋ, akyeŋ eshki bimi a kpo a gbu baŋ a dzu anwyeotum me mbo o wo le a dzu ekployaŋ a mbo baŋ a wo la alo ma a zga ayga dne.

³⁴Eŋe e raŋ, ambo o wo ba oraŋ lo o kpu le, ekplokyeŋ la e nyuŋ lo e kpo e gbu e wo ma mbo.

³⁵Eŋe he lo e wo edzi okyku o shri o ygi agbi, o mbo le ekro dne a mo. Moa á shri lo á ygi a bi. Okyku eka he, o wo boŋ o wo la atuŋ ma le, o ngli o gno!