Read eggon Oluka 17 Bible Online

Oluka 17 - eggon bible

Oluka 17

¹Eyesu a nyuŋ moanwyeotum baŋ a lu mi le, O dzu omgbybi ba ayakplo la a bile moare, a ba a kpo. Ambo a ba eshri are la a da lo a kpo abgo baŋ!

²O raŋ o gre ba moa a dze edgu are he lo eghwo oto nga moa a shri ŋa a ndbi a ta anyuŋ-ondzu o sku baŋ a da akyeŋ eshki moanwye afifi he lo a tsu a gbu.

³Agimi e nyuŋ e kʼpu! O wo ba anóŋ a kpo ŋo odlobi le, o shrom ŋa, nga o wo baŋ a ghwo obiŋ le, o kyu ŋa abgo.

⁴O wo baŋ a ta akpu egi ayi boŋ engyi efoha a mbo olum le, ombayaŋ a mbo baŋ a ba a ghwo obiŋ okro boŋ le, o raŋ o gre boŋ o kyu ŋa agbo.

⁵Moa la a nyum oshpa a nyuŋ Adigi-odne a lu mi le, O wo boŋ o bmi le, o ta gi obmi ba adlidzi ma.

⁶Adigi-odne a tno ma a lu mi le, O wo bimi e wo la obmi ba adlidzi la o wo etsitsi eka eyi ba amastad sha a mbo, agimi e kpo e gbu bimi e nyuŋ esĩ aki hi e lu mi le, O gʼbu la emgbʼbo nga o yi o kũ anyuŋ-ondzu! Ó kpo ó gbu.

⁷O wo ba akyeŋ eshki bimi a wo la anwye-odne la a lbi agbi, o mbo le a kpaŋ ékylu le, omba baŋ a zgi akla a ba odne, aŋo o nyuŋ ŋa o lu mi le, O ba shoŋ o ri algo boŋ?

⁸O wo eka he angyiŋ mbo! Ambo aŋo o nyuŋ ŋa o lu mi le, O yi o shri algo me o shri o ba, nga o sko ataŋ oknye o ghwo nga le o dzu o bli me. Ambla he nga aŋo o kpo ó gbu boŋ o yi o ri nga o wa.

⁹O wo ozhẽ ba moa a shko anwye-odne okyku baŋ a kpo ayakplo eka moa a lu?

¹⁰O wo ozhẽ okyekyeŋ angyiŋ ka la gimi. Omba bimi e kpo ekployaŋ a mbo ba moa a klo bimi e kpo e khwo bgu le, agimi e lu mi le, Agi e wo moanwye-odne angyiŋ, agi e kpo egʼba otum bi sha angyiŋ e khwo.

¹¹Omba ba Eyesu a wo ozhẽ o yi Orushalima nga, a sõ agʼbaha obiŋ ba Esamariya ta la Egalili.

¹²Omba baŋ a yi anwye oskukyeŋ, a ri a sheŋ moaeshru okʼpo. Moa a zhiŋ a tspi ogyugyuŋ,

¹³nga moa a lu angyangyeŋ a lu mi le, Adigi Eyesu! O ka gi ayiekŋe!

¹⁴Eyesu a ka mo nga a nyuŋ mo a lu mi le, Agimi e yi e da moandakʼpo olu ba Ahogbrẽ a mbli gimi a ka. Omba moa a wo ozhẽ a la a yi nga, moa a shaŋ.

¹⁵Akyeŋ eshki mo okʼpo lo, omba baŋ a ka baŋ a shaŋ nga, a bla a ba nga a vye Ahogbrẽ angyangyeŋ.

¹⁶A kŋe a lom obiŋ egi ayi Eyesu nga a vye la ŋa. Alom he lo a wo arehwĩ ba Asamariya angyiŋ.

¹⁷Eyesu a zhĩ a lu mi le, Moare okʼpo moa a shaŋ mo mbo? Moatronyi ahwõ a kpo anyu?

¹⁸Moa a mbo a bla a ba okyku o vye la Ahogbrẽ mbo? Azhẽ he lo sha angyiŋ a ba?

¹⁹Eyesu a nyuŋ ŋa a lu mi le, O kso nga o yi eŋo, obmi ba adlidzi boŋ o shaŋ ŋo.

²⁰MoaEfarisikyeŋ a zhĩ Eyesu omba ba Oreŋ Ahogbrẽ ó ba o ba. A tno ma a lu mi le, Oreŋ Ahogbrẽ ó ba ozhẽ bimi é ba e ka lo angyiŋ mbo.

²¹Arekyeŋ á su á lu mi le, E ka, o wo ahe, o mbo le o wo a mi, angyiŋ mbo! Okyku eshi Oreŋ Ahogbrẽ o wo ésõ bimi angyiŋ.

²²Ambla he nga a nyuŋ moanwyeotum baŋ a lu mi le, Omba o yi ó ba, ba agimi é ba e klo o ka olum okyeŋ eshki ba omba ba Anwye Arehwĩ, ambo agimi é ka lo mbo.

²³Moakyeŋ á ba a lu mi le, O ka a mi, o mbo le o ka ahe! Ambo agimi e zgi e yi e klo okro mbo.

²⁴Eka ba ayimom ba angyum obgu a la a shka ayi ongyeŋ, nga ba ayimom a tra, ekakahelo Anwye Arehwĩ á ba a wo onda baŋ mi lo.

²⁵Ambo o dzu omgbybi baŋ á ba a kpo ewu nzenze ori, nga moarehwi ba omba he lo á tla ŋa.

²⁶Eka moa a kpo omba ba Onuhu, ekakahelo angyiŋ moa á ba a kpo omba ba Anwye Arehwĩ.

²⁷Omba mi lo, areyaŋ a mbo a la a ri nga a wa, moarealom, pa la moashe a kyu eble ma-me a gbu onda ba Onuhu a gre anyuŋ amgblami. Ambla he nga ami a ba a jygi mo pyeŋ.

²⁸Omba mi lo ó wo eka ba omba ba Olotu angyiŋ. Areyaŋ a mbo a la a ri nga a wa nga a gbmo anzho nga a la a bla alo a shri a gbmo. Moa a la a fu anzho nga moa a mbdzi adne.

²⁹Onda ba Olotu a zhiŋ ogbu a sku osku ba Osodom nga, ovo la o vu ŋaŋaŋla o ygi osku nga o jygi lo pyeŋ.

³⁰Ó kpo ekakahelo angyiŋ onda ba Anwye Arehwĩ á ba a gnyu á ba.

³¹O raŋ o gre ba are la a wo eshri aku baŋ le, a gile a yi odne eshyẽ okyku o tslo anzho baŋ mbo. Ekakahelo are la a wo agbi le, a bla a yi odne mbo.

³²Agimi e tne aga eshri ba Olotu!

³³Areyaŋ a mbo la a klo o shla eshri baŋ le, é yla. Nga are la a shri eso baŋ a ndba le, á shla lo.

³⁴Okyukyku onda mi lo, moarealom aha á lom amgbla akyekyeŋ nga moa á sko akyeŋ á ra akyeŋ á zga.

³⁵Moashe aha á kpga algo, moa á sko akyeŋ, nga á ra akyeŋ á zga. [

³⁶Moarealom aha a wo agbi le, moa á sko akyeŋ á ra akyeŋ á zga.]

³⁷Moanwyeotum a zhĩ ŋa a lu mi le, Adigi-odne, ayaŋ a mo? Eyesu a tno mo ma a lu mi le, Ashrom a la a pla a shki okro ba okom o lom ma.