Read eggon Oluka 19 Bible Online

Oluka 19 - eggon bible

Oluka 19

²Osku he lo alomakyeŋ a wo ma, eshko baŋ e ri Azaka. A wo andakʼpo moa la a yga ewaŋ, nga a wo la angyiŋ nzenze ma.

³Eshki e wo ma nzenze. Aŋa nga a klo o ka Eyesu, ambo a ka ŋa a gbu mbo okyku eshi a hlu mbo.

⁴Okyku eka he, a knye a yi a vre anva okyku o daŋ a ka Eyesu omba baŋ a bre a yi.

⁵Omba ba Eyesu a bre a yi nga, a ka Azaka esĩ anva lo ongyeŋ nga a bzi ŋa a lu mi le, Azaka, o gile shoshoŋ, ame é yi odne boŋ anye hi.

⁶Azaka a gile nga a yga Eyesu la ovyevye.

⁷Moare pyeŋ la a ka ŋa a nyi agla a lu mi le, Are he lo a gre odne ba are odlobi!

⁸Moa a gre odne a khwo nga, Azaka a kso a nyuŋ Eyesu a lu mi le, Andakʼpo o ngli o gno! Ame é gʼba angyiŋ me aha nga é shri é da moaekŋe. O wo ba ame e kpgo arekyeŋ le, ame é nyiŋ ema lo é daŋ engyi enyi.

⁹Eyesu a tno ma a lu mi le, Oshla o gre o ba odne he lo anye. Are he lo a mbo a wo a ba ogu ba Ebrahim.

¹⁰Eyesu a tno ma a lu mi le, Anwye Arehwĩ a ba okyku o klo nga o shla moaedlobi.

¹¹Omba ba Eyesu a wo osusku ta la osku Orushalima, a ta egŋe eshri Enaira, a da moare la a wo ka la ŋa. Moare a ka ma Oreŋ Ahogbrẽ o wo osusku a mo.

¹²Eyesu a ta egŋe a lu mi le, Andakʼpokyeŋ a wo ma, a gre oskukyeŋ ogyugyuŋ okyku o da mo a shri oreŋ a daŋ. Omba baŋ a ba nga le, á ri oreŋ baŋ.

¹³Omba baŋ á kso nga, a bzi moawaghrẽ baŋ okʼpo, nga a shri Enaira a da ayaŋ a mbo eshki mo. A nyuŋ mo a lu mi le, Agimi e la e kpo egbmo ta la alo, okyku o da gimi e hwiŋ otama o tsa ba ame e ba.

¹⁴Moare obiŋ ba andakʼpo he lo a klo ŋa mbo. Okyku eka he, ambla baŋ a sheŋ a gre a khwo nga, moa a hom otum a lu ŋa okũ a lu mi le, Agi e klo boŋ o dzu areŋ bi mbo.

¹⁵Omba ba andakʼpo he lo a hwiŋ oreŋ a khwo nga a bla a ba obiŋ baŋ. Ambla baŋ a ba nga, a da mo a bzi moawaghrẽ baŋ okʼpo lo, okyku o da mo a shri ekplo moa a hwiŋ a daŋ a ka.

¹⁶Awaghrẽ ba ori a ba a lu mi le, Andakʼpo, ame e hwiŋ Enaira okʼpo e ta Enaira okyeŋ boŋ o shri o da me.

¹⁷Areŋ a lu mi le, Ame e shko ŋo e gre eshri. Aŋo o wo awaghrẽ adzi. Ame é doŋ ó ri ekʼpo esku okʼpo, okyku eshi aŋo o tsa me adlidzi ekplo la e wo ple.

¹⁸Awaghrẽ ba oha a ba a lu mi le, Andakʼpo, ame e hwiŋ Enaira etno e ta Enaira ekyeŋ boŋ o shri o da me.

¹⁹Areŋ a nyuŋ awaghrẽ he lo a lu mi le, Ame é doŋ o ri ekʼpo eshri esku etno.

²⁰Awaghrẽ ahwõ a shri Enaira ekyeŋ a ba a lu mi le, Andakʼpo, o ka Enaira boŋ o shri o da me lo e wo ahe. Ame e kpmye ŋo alo ala oknye e shri e zga ma dzi.

²¹Ame e kpo eyli boŋ e gre eshri, okyku eshi aŋo o wo are la a gbu eyli angyiŋ. O ka, aŋo o la o sko ekplo la e wo e boŋ mbo, nga aŋo o la o yla algo okro boŋ o fu mbo.

²²Areŋ a nyuŋ awaghrẽ he lo a lu mi le, Aŋo o wo awaghrẽ abi. Ame é sõ ŋo ombgu la odlo boŋ o lu. Aŋo o yi ba ame e wo are la a gbu eyli, nga e la e sko ekplo la e wo e me mbo, nga e la e yla algo okro ba ame e fu mbo.

²³O wo eka he le, okyku eshi aŋo o shri amgbaŋ ba ame e shri e doŋ lo o zga abanki mbo? E mbi ohuhuhi ba ame e ba, e yga lo la otama.

²⁴Areŋ a nyuŋ moare la a wo ka la ŋa a lu mi le, Agimi e ngʼga Enaira he lo e sku awaghrẽ ba ototno, nga e shri lo e da awaghrẽ la a wo la Enaira okʼpo ma!

²⁵Moare a nyuŋ areŋ a lu mi le, Andakʼpo, a sheŋ a wo la Enaira okʼpo ma bgu!

²⁶Areŋ lo a tno ma a lu mi le, Ame e lu e da gimi, Areyaŋ a mbo la a wo la emakyeŋ ma, moa á shri á ta ŋa ma. Ambo are la a wo la emakyeŋ ma mbo, ofi baŋ a wo la alo ma a mbo, moa á yga lo á sku ŋa abgo.

²⁷Eshri moafpu me la a klo ba ame e dzu areŋ mo mbo, e shri mo e ba e bga egi ayi me!

²⁸Ambla ba Eyesu a lu odlo he lo a khwo, a dzu moare a zga a gre Orushalima.

²⁹A ba osusku ta la anwye esku ahakyeŋ moa a bzi lo ma Ebefagi, ta la Ebetanya, a wo osusku ta la Orushalima. Omba moa a gbu osusku ta la Akũ ba Olivi, a hom moanwyeotum baŋ aha otum okyku o da mo a bre a yi, nga a lu mi le,

³⁰Agimi e yi anwye osku la a wo egi ayi bimi hi. Agimi e gre bgu le, agimi e ka ashrishrikyeŋ moa a vre lo a ka mbo, moa a dze lo ekpazhi. E ngla lo e shri e kom me.

³¹O wo ba arekyeŋ a zhĩ gimi a lu mi le, Ayi a da gimi e ngla lo? E tno ŋa ma e lu mi le, Adigi a klo lo.

³²Moaha lo a gre nga moa a hwiŋ ekployaŋ a mbo eka ba Eyesu a lu a da mo.

³³Omba ba moa a ngla ashrishri lo nga, moare odne a zhĩ a lu mi le, Ayi a da gimi e ngla lo?

³⁴Moa a tno ma a lu mi le, Adigi a klo lo.

³⁵Moa a ngla ashrishri lo a shri a kom Eyesu. Moa a shki aknye ashriskri nga moa a da Eyesu a vre lo a dzu ma.

³⁶Nga moa a shri aknye mo a ngla a ta ozhẽ, okyku o daŋ a bre a yi.

³⁷Omba baŋ a gbu osusku ta la Orushalima, okro ba ozhẽ o gile Akũ ba Olivi, moare nzenze a lu ŋa ma, nga moa a la a vye Ahogbrẽ nga a hlu ŋa eshko angyangyeŋ okyku ayakplo egbregbre ba moa a ka.

³⁸Moa a hlu Ahogbrẽ eshko a lu mi le, Ahogbrẽ a kpo a ghwo la Areŋ la a ba eshko ba Adigi-odne! Opyapyaŋ o dzu Ongyeŋ, nga e da gi e hlu Ahogbrẽ eshko!

³⁹MoaEfarisikyeŋ a zgi eshki a zhĩ Eyesu a lu mi le, Andakʼpo, o shrom moare la a lu ŋo ma o da mo a dzu tki!

⁴⁰Eyesu a tno mo ma a lu mi le, Ame e lu e da gimi, o wo moa a dzu tki a mbo, ézhim é hlu me eshko angyangyeŋ.

⁴¹Eyesu a gbu osusku ta la Orushalima. A ka lo nga a gbu ogbrẽ,

⁴²a lu mi le, Aŋo o yi eka moare a la a klo opyapyaŋ e mbi, aŋo o kpo eka he mbo! Ambo ohuhuhi, aŋo o ka opyapyaŋ lo nga mbo!

⁴³Ambo omba o yi ó ba, ba moafpu ŋo á ba a hwom ŋo a ghwo.

⁴⁴Nga moa á kypi ŋo á ygi obiŋ, nga moa á bga moarehwi boŋ, moa á dzu emakyeŋ á zga ku-ku mbo. Ohe lo o kpo okyku boŋ o ka o bmye omba ba Ahogbrẽ a ba okyku o shla ŋo mbo!

⁴⁵Eyesu a gre Anyuŋ-akulu eshyẽ nga a kyku moare la a kpo egbmo ma eshyẽ.

⁴⁶A nyuŋ mo a lu mi le, Moa a ta Akpa Ahogbrẽ a lu mi le, Moa á bzi odne me okro moa á fa olu ma, ambo agimi e zhiŋ lo e da lo a dzu emvygi moasi!

⁴⁷Eyesu a nye moare Anyuŋ-akulu elelum. Anyuŋ-andakʼpo olu ba Ahogbrẽ pa la moa la a nye odaŋ, pa la moandakʼpo ba obiŋ a klo o bga ŋa.

⁴⁸Ambo moa a hwiŋ ozhẽ okyku o bga ŋa mbo, okyku eshi areyaŋ a mbo a la a ngli atuŋ a gno odlo baŋ a la a lu. Moa a bmi a da ekplokyeŋ ba Eyesu a nye mo e bre e yi mbo.