Read eggon Oluka 2 Bible Online

Oluka 2 - eggon bible

Oluka 2

¹Omba ba Agustu a wo Ekeza, anyuŋ andakʼpo ba obiŋ Oroma, a jygu odaŋ ma areyaŋ a mbo la a wo obiŋ baŋ a da mo a ta eshko baŋ okyku otsutsi.

²Omba ba moa a kpo otsutsi he lo, Ekwarinu angyiŋ a wo ogomna ba Esiriya.

³Okyku eka he nga, areyaŋ a mbo a gre osku baŋ okyku o da mo a ta eshko baŋ okyku otsutsi lo.

⁴Oyusufu a kso osku ba Anazarata obiŋ ba Egalili nga a gre osku ba Ebetalami obiŋ ba Eyahuda. Moa a mbre Adawuda anyuŋ-areŋ osku he lo angyiŋ. Oyusufu a gre osku he lo okyku eshi a wo a ba ogu ba Adawuda angyiŋ.

⁵A gre ta la anwyeshe baŋ Emeri, okyku o da mo a ta eshko baŋ. Omba he lo Emeri a wo onyi.

⁶Omba ba moa a wo Ebetalami nga, omba ba Emeri á ba a mbre o wo osusku a mo.

⁷A mbre anwye ondba baŋ, nga a shki ŋa la aknye nga a shri ŋa a lom obiŋ aku ebme, okyku eshi okro o wo ma mbo.

⁸Okyukyku he lo, moakyeŋ la a kpaŋ ékylu a kʼpu ékylu mo aklakyeŋ osusku ta la Ebetalami.

⁹Anwyeadga ba Ahogbrẽ a ba okro mo. Ayimom ba Ahogbrẽ nga a tra mo. Eyli e kpo mo nzenze.

¹⁰Anwyeadga lo a nyuŋ mo a lu mi le, Agimi e kpo eyli mbo! Ame e shri Oshpaodzadzi angyiŋ e kom gimi. Alo ó shri ovye nzenze ó kom moarehwi pyeŋ.

¹¹Okyukyku hi, osku ba Adawuda, moa a mbre gimi Areoshla, Ekristi, Adigi-odne.

¹²Ekplo he é tsa gimi, agimi é gre bgu le, agimi é ka anwye lo. Moa a shki ŋa aknye nga a shri ŋa a lom aku ebme.

¹³Ebuebu nga moanwyeadga ba Ahogbrẽ nzenze a gile a ba. Ta la anwyeadga he lo, moa a fu abmo a hlu Ahogbrẽ eshko a lu mi le,

¹⁴Ohlueshko okyku Ahogbrẽ la a wo Ongyeŋ ekpyemgbyeŋ! Nga opyapyaŋ o dzu pa la moarehwi baŋ a gno oraŋ pa la mo!

¹⁵Ambla ba moanwyeadga he lo a zhiŋ ogbu a gre Ongyeŋ a khwo nga, moa la a kpaŋ ékylu a lu pa la emo a lu mi le, E da gi e yi Ebetalami e yi e ka ekplo la e kpo nga ba Ahogbrẽ a lu a da gi hi.

¹⁶Moa a zhiŋ ogbu hu a gre nga, moa a yi a ka Emeri ta la Oyusufu, ta la anwye lo, a lom aku ebme.

¹⁷Omba moa la a kpaŋ ékylu a ka anwye lo nga, moa a lu ekplo ba anwyeadga a lu eshri anwye lo, a da Emeri ta la Oyusufu.

¹⁸Moare pyeŋ la a gno oshpa ekplo ba moa la a kpan ékylu he lo a lu, moa a ka egbregbre a gre eshri.

¹⁹Emeri a ka egbregbre nzenze nga a tne aga eshri lo ogyugyuŋ.

²⁰Moa la a kpaŋ ékylu a zhiŋ ogbu a yi nga, moa a fu abmo a hlu Ahogbrẽ eshko, okyku eshi ekplo ba moa a gno nga a sa a ka, e wo eka ba anwyeadga lo a lu a da mo.

²¹Ambla ba asati akyeŋ a kpo nga, omba o sheŋ anwye lo ongyum nga o glo ŋa eshko o bli. Moa a glo ŋa eshko a daŋ a ri Eyesu. Anwyeadga ba Ahogbrẽ a shri eshko he lo a di ayga moa a kpo onyi baŋ.

²²Omba o kpo nga Oyusufu ta la Emeri, moa a shri ŋa a gre Orushalima okyku o da mo a shri ŋa a ndba egi ayi ba Adigi-odne, nga a kpo eshrlu eka ba odaŋ Omusa o lu.

²³Adigi-odne a jygu odaŋ a lu mi le, Anwye-alalom ba ondbayaŋ a mbo, á dzu a me.

²⁴Moa a gre okyku o shri oshriondba o shri o di, eka odaŋ ba Adigi-odne o lu. Alo o lu mi le, Moa a shri aklungu aha, o mbo le enu eha a shri a ndba. Oyusufu ta la Emeri moa a gre okyku o bli odaŋ he lo.

²⁵Alomakyeŋ a la a dzu Orushalima, eshko baŋ e ri Esimiyo. A wo arehwĩ ba eda edzi, nga a wo are la a kpo eyli Ahogbrẽ. A ka ayi ozhẽ okyku omba ba moaEsrayila á ba a hwiŋ oshla. Ogbgaodzi o wo ka la ŋa.

²⁶Ogbgaodzi o tsa Esimiyo o lu mi ma aŋa á kpu mbo, o wo le á ka Emisiya ba Adigi-odne a hwim ayga dne.

²⁷Ogbgaodzi o tsa Esimiyo o daŋ a gre Anyuŋ-akulu. Esimiyo a yga Eyesu omba moadaŋ a shri ŋa a gre Anyuŋ-akulu lo, okyku o kpo eka ba odaŋ lo o lu.

²⁸Esimiyo a yga anwye lo abgo baŋ a khwo nga a vye Ahogbrẽ a lu mi le,

²⁹Ohuhuhi, aŋo Ahogbrẽ, o bli ohwihwim boŋ. O kyu awaghrẽ boŋ abgo, nga o daŋ a yi la eso opyapyaŋ.

³⁰La ayi me, ame e ka oshla boŋ o shri o ba.

³¹Aŋo o kpo lo egi ayi moare pyeŋ.

³²Aŋa a wo ayimom okyku o tsa moa la a wo moaEyahuda mbo ozhẽ boŋ, Nga okyku o shri esesla o shri o kom moarehwi boŋ ba Esrayila.

³³Adaŋ anwye lo, ta la anaŋ, moa a ka egbregbre ayakplo ba Esimiyo a ba a lu eshri anwye lo.

³⁴Esimiyo a fa anyuadzi a ygi mo a khwo nga, a nyuŋ anaŋ anwye a lu mi le, Ahogbrẽ angyiŋ a sla anwye he lo. Okyku ŋa moare nzenze ba Esrayila moa á tsi á gbu, nga okyku ŋa moare nzenze ba Esrayila moa á vre. Á dzu egŋe la e zgi okro Ahogbrẽ e ba, nga moare nzenze á tla ŋa.

³⁵Moa á lu ayakplo la a wo eso mo eshri anwye he lo, á ba edzi. Eso é tpi ŋo ayi é gre eshri.

³⁶Ashe ba Ahogbrẽ a hom ŋa otum a wo ma. Eshko baŋ e ri Ana. Aŋa a wo anwye Ejanuwe angyiŋ, a wo arehwĩ ba ogu ba Asha. Ana a sheŋ a tsoŋ bgu. A kyu eble okyku eyi efoha sha.

³⁷A dzu ashe-eshaku okyku eyi ekʼpoefote la eyi enyi, nga a la a dzu Anyuŋ-akulu ombamba pyeŋ. A la a hlu Ahogbrẽ eshko la olulum ta la okyukyku. A la a nyom eshri baŋ algo, nga a la a fa olu.

³⁸Ombamba he lo a gbu, a ba a vye Ahogbrẽ nga, a lu odlo eshri anwye lo pa la moare la a ka ayi ozhẽ okyku omba ba Ahogbrẽ á ba a shla Orushalima.

³⁹Ambla moa a kpo ekployaŋ a mbo, eka ba odaŋ ba Adigi-odne o lu nga, moa a bla a gre osku mo Anazarata obiŋ ba Egalili.

⁴⁰Anwye lo a hlu nga, a dzu la oshye. A wo la okaobmye ma nzenze. Owlama ba Ahogbrẽ o wo ka la ŋa.

⁴¹Eyiyaŋ a mbo moadaŋ Eyesu moa a la a yi Orushalima okyku Oriabgo ba Apaska.

⁴²Omba ba Eyesu a kpo eyi otsko nga, a gre oriabgo pa la mo Orushalima eka ba moa a la a kpo.

⁴³Omba ba oriabgo lo o khwo nga, moa a wo ozhẽ ba o ba odne a mo, ambo Eyesu anwye lo a ra a dzu Orushalima. Moadaŋ a yi mbo ku-ku.

⁴⁴Moa a la a ka ma o dzu mbo ma a wo oluŋ pa la mo. Moa a dzi odzi ba olum okyeŋ ayga. Ambla he nga moa a sa a klo ŋa eshki moanimo, pa la moakyemoazba.

⁴⁵Moa a hwiŋ ŋa mbo. Okyku eka he, moa a bla a gre Orushalima okyku o klo ŋa.

⁴⁶Onda olum ba otra nga, moa a yi a hwiŋ ŋa Anyuŋ-akulu. A dzu obiŋ pa la moaEyahuda la a nye. A ngli atuŋ a la a gno odlo mo nga a la a zhĩ mo odlo.

⁴⁷Moare la a gno eka baŋ a la a tno mo ma pyeŋ, moa a ka egbregbre ta la edgu okaobmye baŋ a wo la alo ma.

⁴⁸Moadaŋ a ka egbregbre omba ba moa a ka ŋa. Anaŋ a nyuŋ ŋa a lu mi le, Anwye me, aŋo o kpo gi eka he okyku eshi? Adoŋ, pa la me agi e kpo ewu e la e klo ŋo ba anyanye.

⁴⁹Eyesu a tno mo ma a lu mi le, Okyku eshi agimi e kpo ewu e la e klo me? Agimi e yi ba alo o dzu omgbybi ba ame e dzu odne Adugu mbo?

⁵⁰Ambo moa a ka ekplokyeŋ baŋ a lu pa la mo a bmye mbo?

⁵¹Eyesu a sa a bla a gre Anazarata pa la mo. A dzu ahe lo nga a fa olbi a da mo. Anaŋ a sko ekployaŋ a mbo a shri a zga eso.

⁵²Eyesu a hlu la oshye ta la okaobmye, nga Ahogbrẽ, pa la moarehwi a mbo a la a gno oraŋ ka la ŋa.