Read eggon Oluka 20 Bible Online

Oluka 20 - eggon bible

Oluka 20

¹Ondakyeŋ nga, omba ba Eyesu a wo Anyuŋ-akulu a la a nye moare nga a la a nyum oshpa, moadakʼpo olu ba Ahogbrẽ, pa la moa la a nye odaŋ pa la moandakʼpo moa a ba okro Eyesu.

²Moa a nyuŋ ŋa a lu mi le, O lu o da gi, la ekʼpo ayi aŋo o kpo ayakplo egbregbre eka he? Ayi a shri ekʼpo he lo a doŋ?

³Eyesu a tno mo ma a lu mi le, Ohuhuhi e da me a mbo e zhĩ gimi akplokyeŋ. Agimi e tno me ma.

⁴Eyohana a la a kpo abaptisma la ekʼpo Ahogbrẽ le, la ekʼpo arehwĩ?

⁵Ambla he nga, moa a sla emo a kla a lu mi le, Agi é tno ma é lu la eshi? O wo bi e tno ma e lu ma Eyohana a hwiŋ ekʼpo baŋ okro Ahogbrẽ angyiŋ le, á lu mi le, O wo eka he bgu le, okyku eshi agimi e bmi ba adlidzi ta la Eyohana mbo?

⁶Ambo o wo bi e lu mi le, Aŋa a hwiŋ lo okro ba arehwĩ angyiŋ le, eshki hi é tra gi ézhim, okyku eshi moa a bmi ba adlidzi ba Eyohana a wo arehwĩ ba Ahogbrẽ a hom otum angyiŋ.

⁷Okyku eka he nga, moa a tno ma a lu mi le, Agi e yi okro baŋ a hwiŋ ekʼpo he lo ma mbo.

⁸Eyesu a tno mo ma a lu mi le, Ame a mbo é lu ekplokyeŋ eshri ekʼpo ame e la e kpo ayakplo hi, é da gimi mbo.

⁹Ambla he nga Eyesu a ta egŋe he a ygi moare. A lu mi le, Alomakyeŋ a wo la agbi ma. A shri lo a ghwo moarekyeŋ abgo, nga a kso odne a gre a yi a dga egi ehwõ ma-me.

¹⁰Omba ba moa a yla algo agbi nga, a hom awaghrẽ baŋ otum okro moare he lo, okyku o daŋ a yga ogʼba baŋ a shri a kom ŋa. Ambo moare he lo a bga awaghrẽ lo andzu nga moa a kyku ŋa a daŋ a gre la abgo ototno.

¹¹Areagbi a da awaghrẽ ahwõ a sa a gre. Moa a sa a bga ahe lo a mbo andzu, moa a kpo ŋa efye nga moa a kyku ŋa a daŋ a gre la abgo ototno.

¹²A da awaghrẽ ba otra a gre. Moare he lo a zhga ŋa egʼba, nga moa a kyku ŋa.

¹³Areagbi lo nga a zhĩ a lu mi le, Ame é kpo eshi a mo? Ame é da anwye me ba eso me a yi okro mo. Ame e yi zhezheŋ moa á ka olbi baŋ!

¹⁴Ambo omba ba moare he lo a ka ŋa nga, moa a lu ta la emo a lu mi le, O ka, ahe lo angyiŋ a wo anwye baŋ. Okyku eka he, agi e bga ŋa nga le okyku o da agbi lo a dzu la gi!

¹⁵Okyku eka he nga, moa a se anwye lo a sku agbi nga moa a bga ŋa a ta okom. Eka bimi e ka, areagbi á kpo moare he lo eshi?

¹⁶Eyesu a lu mi le, Areagbi á ba a bga moare he lo, nga á shri agbi á ghwo abgo moare alahe. Ambo omba ba moare a gno eka he nga, moa a lu mi le, O wo eka he tsitsi a mbo mbo!

¹⁷Eyesu a ka mo nga a lu mi le, Eshyẽ ba odlo hi e wo eshi? Akpa ba Ahogbrẽ a lu mi le, Ezhim ba moa la a mbdzi a tla lo a ta eka ba alo e wo la ekplokyeŋ mbo, E zhiŋ e dzu ezhim la e wo la owlama e gre pyeŋ.

¹⁸Areyaŋ a mbo la á tsu a gbu ezhim lo, é tsoŋ ŋa agbu. Nga o wo ba ezhim lo é gbu arekyeŋ le, é sha are he lo rerereŋ.

¹⁹Moa la a nye odaŋ, pa la moandakʼpo olu ba Ahogbrẽ, moa a klo o vu Eyesu omba he lo, okyku moa a ka a tspi ba Eyesu a ta egŋe he lo eshri mo angyiŋ. Ambo moa a kpo eyli moare.

²⁰Okyku eka he moa a dzu ŋa a zga okyku o da mo a hwiŋ omba la o wo odzi ayga. Moa a fu moarekyeŋ ashum okyku o da mo a kpo eka ba moa a wo la adlidzi ma, nga okyku o kpyi Eyesu la ozhiozhĩ, nga o vu ŋa o yi okro moandakʼpo ta la Ogomna.

²¹Moare la a kpyi ŋa he lo, moa a nyuŋ ŋa a lu mi le, Andakʼpo, agi e yi ba ayakplo boŋ o la o nye a wo adlidzi angyiŋ. Agi e yi boŋ o kpo eyli arehwĩ mbo, nga boŋ o nye adlidzi ba odlo Ahogbrẽ okyku moarehwi.

²²Aŋo Eyesu, o lu o da gi, ozhẽ odaŋ bi, o raŋ o gre ba agi e hre ewaŋ e da Ekeza le, la o raŋ o gre mbo?

²³Ambo Eyesu a ka a bmye ba moa a klo o kpyi ŋa, nga a nyuŋ mo a lu mi le,

²⁴Agimi e shri eyiamgbaŋ e da me e ka. A zhĩ mo a lu mi le, Eshri ayi ta la eshko ayi e wo eyiamgbaŋ lo? Moa a tno ma a lu mi le, Eshri ba Ekeza angyiŋ e wo ma.

²⁵Eyesu a tno mo ma a lu mi le, Okyku eka he, agimi e hre ekplo la e wo e ba Ekeza, e da Ekeza, nga e hre ekplo la e wo e ba Ahogbrẽ, e da Ahogbrẽ.

²⁶Moa a hwiŋ ozhẽ ba o vu ŋa mbo egi ayi moarehwi. Okyku eka he, moa a dzu emo tki nga, moa a ka egbregbre ta la otnoma baŋ.

²⁷MoaEsaduki a ba okro Eyesu. Moahi lo a bmi ta la oksongybi mbo. Moa a zhĩ Eyesu a lu mi le,

²⁸Andakʼpo, Omusa a ta odaŋ a da gi a lu mi le, O wo ba arekyeŋ a kyu ashe nga baŋ a kpu nga a dzu ashe a zga, nga baŋ a hwiŋ anwye mbo le, o raŋ o gre ba anáŋ are he lo a sko ashe-eshaku lo a kyu, okyku o daŋ a mbre moanwye a zga ogu ba are la a kpu.

²⁹Ombakyeŋ nga moanáŋ afoha a wo ma. Andakʼpo a kyu ashe, a hwiŋ anwye ayga a kpu mbo.

³⁰Ambla he, anáŋ ba ori a sko ashe-eshaku he lo.

³¹Ekakahelo e kpo ta la anáŋ ba oha, ma-me ta la a ba afoha a mbo. Moa a kpu nga, moa a dzu moanwye a zga mbo.

³²Ambla ekpyemgbyeŋ nga ashe lo a mbo a kpu.

³³Onda moa á ba a kso ongybi le, ashe he lo á dzu ashe ba ayi eshki mo? O ka, moare afoha angyiŋ a kyu ŋa!

³⁴Ambo Eyesu a tno mo ma a lu mi le, Moarealom, pa la moashe ba ekplu hi a la a kyu eble,

³⁵ambo moarealom, pa la moashe la a tse ma ba moa á ba a kso mo ongybi nga moa á ba a dzu ma omba mi lo, moa á kyu eble nga mbo.

³⁶Moa á dzu eka moanwyeadga ba Ahogbrẽ, moa á kpu mbo. Moa á dzu moanwye Ahogbrẽ a mo, okyku eshi moa a sheŋ a kso mo ongybi.

³⁷Omusa a mbo a sheŋ a wre lo pim eka ba moa á ba a kso areyaŋ a mbo ongybi. Okro ba moa a ta odlo eshri akla la a ri ovo, Omusa a lu odlo eshri Adigi-odne eka baŋ a wo Ahogbrẽ ba Ebrahim ta la Ahogbrẽ ba Eshaku ta la Ahogbrẽ ba Eyakubu.

³⁸Ohe lo o tsa ba Ahogbrẽ a wo Ahogbrẽ moa la a wo la eso ma, baŋ a wo Ahogbrẽ moa la a kpu angyiŋ mbo. Moa la a wo la eso ma pyeŋ, moa a hwiŋ lo okyku ŋa.

³⁹Moakyeŋ eshki moa la a nye odaŋ a lu angyangyeŋ a lu mi le, Andakʼpo! Aŋo o tno ma adzadzi!

⁴⁰Ambla he nga moa a kpo a gbu a zhĩ Eyesu odlokyeŋ nga mbo.

⁴¹Eyesu a nyuŋ mo a lu mi le, Ekayaŋ moa a lu ma Emisiya a wo a ba ogu ba Adawuda?

⁴²Okyku eshi Adawuda eshrishri eŋa a lu akpa ba Ohlueshko a lu mi le, Ahogbrẽ a nyuŋ Adime-odne a lu mi le, Aŋo o dzu obgori me,

⁴³O tsa ba ame e da moafpu ŋo á ba a tsu á gbu egi ayi boŋ.

⁴⁴Adawuda a mbo a bzi ŋa Adigi-odne. A kpo anyu a sa a dzu a ba ogu ba Adawuda?

⁴⁵Omba moare pyeŋ a la a ngli atuŋ a gno odlo baŋ a nyuŋ moanwyeotum baŋ, Eyesu a lu mi le,

⁴⁶E nyuŋ e kpo-kpo pa la moa la a nye odaŋ. Moa a la a klo o dzi la anyuŋ ariga mo, nga a klo o da moare a shko mo la anyuanyuŋ ekyku. Nga a la a sla ekro moandakʼpo a dzu ma anwyea-kulu, ta la okro moa a kpo abgo ma.

⁴⁷Moa a la a kpgo moashe-eshaku nga a ngʼga mo adne mo. Nga moa a la a fa olu la odzodzõ okyku o da moarehwi a ka mo. Egbre mo é vu olo é gre moahwõ.