Read eggon Oluka 22 Bible Online

Oluka 22 - eggon bible

Oluka 22

¹Omba moa a ri abgo ba agbrotsa la a nyom mbo, o wo osusku a mo. Moa a bzi abgo he lo ma Apaska.

²Moandakʼpo olu ba Ahogbrẽ pa la moa la a nye odaŋ, moa a klo ozhẽ okyku o vu Eyesu o bga, ambo moa a kpo eyli moarehwi.

³Ambla he nga Eshitaŋ e gre eso Eyahuda la a ri Eskariyoti. A wo akyeŋ eshki moanwyeotum otsko.

⁴Eyahuda a zgi a gre okro moandakʼpo olu ba Ahogbrẽ pa la moandakʼpo moanwyeakyuŋ la a la a kʼpu Anyuŋ-akulu. A hwim pa la mo eka baŋ á ba a vu Eyesu á shri á da mo.

⁵Moa a gno oraŋ ta la Eyahuda a gre eshri, nga moa a hwim okyku o hre ŋa amgbaŋ.

⁶Eyahuda a bmi pa la mo. Okyku eka he nga, a klo ozhẽ okyku o daŋ a vu Eyesu a shri a da mo esisi.

⁷Onda ba Oriabgo ba Agbrotsa la a nyom mbo o kpo. Omba he lo moa a la a bga anwye ékylu ba Apaska.

⁸Eyesu a hom Ebitru, ta la Eyohana otum a lu mi le, E yi e nyuŋ algo bi ba Apaska e kpo okyku o da gi e ri.

⁹Moa a zhĩ ŋa a lu mi le, Aŋo o klo bi e ri lo ayaŋ?

¹⁰A nyuŋ mo a lu mi le, Agimi e ngli atuŋ e gno! O wo bimi e gre osku lo bgu le, agimi é ka arekyeŋ la a shri eshyẽ ami. E lu are he lo ma e yi odne baŋ a gre lo.

¹¹E nyuŋ are ba odne he lo e lu mi le, Are la a nye a zhĩ a lu mi le, Okro ba ame pa la moanwyeotum me é ba e ri abgo ba Apaska o wo ayaŋ?

¹²Á tsa gimi aku ba ongyeŋ ba moa a shri anzho odzuma a shki ma. E nyuŋ aku he lo e vu abgo.

¹³Moa a gre a khwo nga moa a hwiŋ ekployaŋ a mbo eka ba Eyesu a lu a da mo. Ambla he nga moa a kpo algo ba Apaska.

¹⁴Omba lo o kpo nga, Eyesu pa la moa la a nyum oshpa baŋ moa a gre a yi a dzu amgbla ba orialgo.

¹⁵Nga a nyuŋ mo a lu mi le, Ame e zga eso okyku o ri abgo ba Apaska ka la gimi ayga o tsa ba ewu é hwiŋ me!

¹⁶Ame e lu adlidzi angyiŋ e da gimi, ame é ri lo mbo o wo le onda ba moa á ka eshyẽ lo a bmye Oreŋ Ahogbrẽ dne a mo.

¹⁷Ambla he nga, Eyesu a sko etku ami, a vye la Ahogbrẽ nga a lu mi le, Agimi e sko etku ami he lo e wa otsotse.

¹⁸Ame e lu e da gimi, ame é wa etku ami he lo mbo, o wo le onda ba Oreŋ Ahogbrẽ o ba dne a mo.

¹⁹Ambla he nga a sko agbrotsa a khwo nga a vye la Ahogbrẽ, nga a kplu lo, a shri a da mo nga a lu mi le, Alo a dzu egʼba me angyiŋ, [ba moa a shri lo a di okyku gimi. Agimi e tne aga me omba bimi e kpo ohe lo.

²⁰Ambla he nga a sko etku ami a shri a da mo. Omba ba moa a taŋ agbrotsa a khwo nga, a lu mi le, Etku ami hi e dzu ohwihwim olohe ba Ahogbrẽ. Alo o bli eshri amanzhli me ba moa a zhiŋ a ygi a bi okyku gimi.]

²¹Agimi e ka! Are la a yla me, aŋa a mbo a wo okro amgbla ba orialgo pa la me!

²²E ka, Anwye Aíehwĩ á kpu eka ba Ahogbrẽ a sheŋ a hwim eso baŋ. Ambo o wo ekplo ba ayiekŋe angyiŋ ta la are la a yla ŋa hi lo!

²³Ambla he nga, moa a zhĩ emo a lu ma ayi eshki mo á ba a kpo edgu ekplo he lo!

²⁴Moanwyeotum a sla emo a kla are la a ba a wo la ekʼpo a gre mo pyeŋ.

²⁵Eyesu a nyuŋ mo a lu mi le, Moareŋ ba obiŋ hi, moa a la a ri ekʼpo eshri moarehwi mo. Nga moa a bzi mo la a ri ekʼpo ma moakyeŋazba moare.

²⁶Okro bimi o wo ondundum. O dzu omgbybi ba are la a wo ekʼpo a gre pyeŋ eshki bimi, a dzu eka anwye afifi, nga o dzu omgbybi ba andakʼpo a sa a dzu eka anwye-odne.

²⁷Ayaŋ angyiŋ a wo ekʼpo a gre, are la a dzu amgbla ba orialgo okyku o ri algo le, are la a shri algo a ndba amgbla ba orialgo? Are la a dzu amgbla ba orialgo a wo ekʼpo a gre. Ambo ame e wo ka la gimi eka ba are la a shri algo a la a ndba angyiŋ.

²⁸Agimi angyiŋ e dzu pa la me ombayaŋ a mbo ba moa a mbga me.

²⁹Nga eka ba Adugu a shri ekʼpo a da me okyku o da me e ri ekʼpo, ekakahelo ame é ba e kpo ka la gimi.

³⁰Agimi é ri nga é wa amgbla ba orialgo me Oreŋ me. Nga agimi é dzu emgbakyiŋ oreŋ okyku o sõ egu otsko ba Esrayila ombgu.

³¹Esima, Esima! O ngli atuŋ o gno! Eshitaŋ e yga ekʼpo okyku o mbga ŋo eka ba areagbi a la a sla eyi esekʼpa a la a sku asusku.

³²Ambo ame e sheŋ e fa olu okyku ŋo Esima, okyku o da obmi ba adlidzi boŋ o sheŋ o nye ozhẽ mbo. Ambla boŋ o bla o ba okro me le, aŋo o shĩ moanóŋ.

³³Ebitru a tno ma a lu mi le, Adigi-odne, ame e wo la eso ekyekyeŋ okyku o yi aku ka la ŋo, o mbo le o kpu ka la ŋo!

³⁴Eyesu a tno Ebitru ma a lu mi le, Ebitru, a me e lu e doŋ, anye hi aŋo ó dzu evom me engyi etra ayga engo é tko.

³⁵Ambla he nga Eyesu a nyuŋ mo a lu mi le, Agimi e ka, omba ba ame e da gimi e zgi e gre otum, agimi e shri abre amgbaŋ ta la emgbu, ta la akpadga a mbo mbo, ekplokyeŋ e sheŋ gimi e nye omba hi lo? Moa a tno ma a lu mi le, Ekplokyeŋ e sheŋ gi e nye mbo.

³⁶Eyesu a nyuŋ mo a lu mi le, Ambo ohuhuhi areyaŋ a mbo la a wo la abre amgbaŋ, o mbo le emgbu o raŋ o gre baŋ a sko lo. Areyaŋ a mbo la a wo la akõ ma mbo le, a shri ariga baŋ a gbmo nga a yi a gbmo akõ.

³⁷Ame e lu e da gimi eka he okyku eshi odlo Ahogbrẽ o lu mi le, Moa á tsi ŋa a ghwo eshki moa la a gre abgo. O dzu omgbybi ba ohe lo o bli eshri me. Ekplo moa a ta eshri me, e la e bli angyiŋ.

³⁸Moanwyeotum a nyuŋ ŋa a lu mi le, Adigi-odne, o ka! Akõ aha a wo ahe! A tno mo ma a lu mi le, O tse ma bgu!

³⁹Eyesu a zhiŋ ogbu a gre Akũ ba Olivi eka baŋ a la a kpo. Moanwyeotum nga a gre ka la ŋa.

⁴⁰Omba baŋ a ba okro lo nga a nyuŋ mo a lu mi le, Agimi e fa olu okyku o da gimi e tsu e gbu ombambga mbo.

⁴¹Ambla he a kye a gre la odzodzõ eka moa a ta ezhim a gbu ma, nga a kʼpu obiŋ nga a fa olu.

⁴²A fa olu a lu mi le, Adugu, o wo boŋ o bmi le, o sko ewu he lo o sku me. O kpo ekplo ba ame e klo angyiŋ mbo, ambo ekplo boŋ o klo. [

⁴³Anwyeadga ba Ahogbrẽ a zgi Ongyeŋ a ba nga a kũ ŋa.

⁴⁴Okyku eso e bmye ŋa nga a zga ayi ngre a fa olu ma-me ekyim e zgi egʼba baŋ eka anyuŋ ekyi amanzhli e ygi obiŋ.]

⁴⁵Ambla baŋ a fa olu a khwo nga, a bla a gre okro moanwyeotum nga a hwiŋ mo enu okyku eshi eso e tpi mo ayi e gre eshri.

⁴⁶Eyesu a nyuŋ mo a lu mi le, Agimi e ndze enu okyku eshi? Agimi e kso e fa olu okyku o da gimi e tsu e gbu obile mbo.

⁴⁷Omba baŋ a la a kpla egba nga, moare nzenze a gbu. Eyahuda la a wo akyeŋ eshki moanwyeotum otsko a gre ozhẽ nga moahwõ a lu ŋa ma. A ba okro Eyesu nga a shri anyu baŋ a shri a tka a ba Eyesu.

⁴⁸Ambo Eyesu a zhĩ Eyahuda a lu mi le, La edgu egŋe oklo hi aŋo o ba okyku o yla Anwye Arehwĩ?

⁴⁹Omba ba moanwyeotum la a wo ta la Eyesu a ka eka ekplo la é ba e kpo nga, moa a zhĩ a lu mi le, Adigi-odne, o da gi e hli mo la akõ bi mbo?

⁵⁰Akyeŋ eshki mo nga a hli otuŋ obgori ba awaghrẽ ba anyuŋ-andakʼpo olu ba Ahogbrẽ.

⁵¹Ambo Eyesu a tno ma a lu mi le, Agimi e kyu abgo a mo! Aŋa a tka otuŋ ba awaghrẽ lo nga a shaŋ ŋa.

⁵²Ambla he nga, Eyesu a nyuŋ moandakʼpo olu ba Ahogbrẽ, pa la moandakʼpo moanwyeakyuŋ la a kʼpu Anyuŋ-akulu lo, pa la moandakʼpo la a ba okyku o vu ŋa, a lu mi le, Agimi e ba la ákõ, ta la amgbu api eka ba ame e wo are la a gre abgo?

⁵³Ombayaŋ a mbo ba ame e wo ka la gimi Anyuŋ-akulu agimi e ka e klo ozhẽ okyku o vu me mbo. Ambo ekplu ba omba hi e wo okyku gimi ta la ekʼpo ba evbu.

⁵⁴Moa a vu Eyesu a khwo nga, moa a shri ŋa a gre odne ba anyuŋ-andakʼpo olu ba Ahogbrẽ. Ebitru a lu ŋa ma egi ambla ogyugyuŋ.

⁵⁵Esheshyẽ ba ekpazhi odne lo nga, moa a kpoŋ ovo ma. Ebitru a gre a yi a dzu ma pa la moare la a ghre ovo.

⁵⁶Omba ba akyeŋ eshki moanwyeshe ba odne lo a ka Ebitru a dzu obiŋ nga, a lu mi le, Alom he a mbo a wo ka la ŋa angyiŋ!

⁵⁷Ambo Ebitru a dzu evom gaŋ a lu mi le, Ashe, ame e yi ŋa mbo!

⁵⁸Ambla fi nga alomakyeŋ la a ka ŋa a tspi, a nyuŋ ŋa a lu mi le, Aŋo a mbo o wo eshki mo tli! Ambo Ebitru a tno ma a lu mi le, Alom, ame e wo eshki mo mbo ku-ku!

⁵⁹Ambla ba awa akyeŋ a kpo nga alomakyeŋ a ba a lu mi le, O wo zheŋ ba are he lo a wo eshki mo, okyku eshi aŋa a mbo a wo a ba Egalili angyiŋ!

⁶⁰Ambo Ebitru a tno ŋa ma a lu mi le, Alom! Ame e yi ekplo boŋ o la o lu odlo eshri lo mbo ku-ku! Omba ba Ebitru a wo odlo a lu nga, engo e tko.

⁶¹Adigi-odne a zhiŋ a ka Ebitru dzo. Omba he lo nga, Ebitru a tne aga odlo ba Adigi-odne a lu mi le, Aŋo ó dzu evom me engyi etra ayga engo é ba e tko anye hi.

⁶²Ambla he nga Ebitru a zgi a gre edzi nga a yi a wu okũ la o vu olo nzenze.

⁶³Moare la a kʼpu Eyesu, moa a lu ega a ygi ŋa nga moa a bga ŋa andzu.

⁶⁴Moa a shki ŋa ayi nga moa a zhĩ ŋa a lu mi le, O fu eha o ka! Ayi angyiŋ a yla ŋo andzu?

⁶⁵Moa a lu odlo ba odzi a ygi ŋa nzenze.

⁶⁶La endigiŋ nga, moandakʼpo moaEyahuda, pa la moandakʼpo olu ba Ahogbrẽ, pa la moa la a nye odaŋ, moa a pla emo a shki a khwo nga moa a shri Eyesu a gre okro mo.

⁶⁷Moa a zhĩ ŋa a lu mi le, Aŋo o lu o da gi, aŋo angyiŋ o wo Emisiya lo? Eyesu a tno mo ma a lu mi le, Ame é lu é da gimi a mbo, agimi é bmi pa la me mbo.

⁶⁸Nga o wo ba ame e zhĩ gimi odlo le, agimi é tno me ma mbo.

⁶⁹Ambo a zga omba he lo nga, Anwye Arehwĩ á dzu obgori ba Ahogbrẽ ba ekʼpo pyeŋ.

⁷⁰Moa mvye a zhĩ ŋa a lu mi le, Aŋo o wo Anwye ba Ahogbrẽ angyiŋ? A tno mo ma a lu mi le, Agimi angyiŋ e lu ba ame e wo Anwye Ahogbrẽ.

⁷¹Ambla he nga moa a lu mi le, Agi e klo moa-egŋekyeŋ e gre eka he nga mbo! Agi e sheŋ e gno odlo baŋ pyeŋ bgu!