Read eggon Oluka 3 Bible Online

Oluka 3 - eggon bible

Oluka 3

¹Eyi ba okʼpoetno ba Etebiriyu la a wo Ekeza a ri ekʼpo nga, Obuntu Ebilatu angyiŋ a wo ogomna ba obiŋ ba Eyahuda omba he lo. Ehiridu a ri ekʼpo obiŋ ba Egalili omba he lo. Anáŋ ba moa a bzi ŋa ma Efilibu angyiŋ a ri ekʼpo ogʼba obiŋ-okyeŋ ba moa a bzi lo ma Eturiya, ta la obiŋ ba Atakonata. Elisani nga a ri ekʼpo ogʼba obiŋ ba Abilana omba he lo.

²Anas ta la Akayafa moa angyiŋ a wo moandakʼpo olu ba Ahogbrẽ. Omba he lo angyiŋ Ahogbrẽ a lu odlo ta la Eyohana anwye Azakariya, akla.

³Okyku eka he nga Eyohana a zgi a la a su akaŋ ondzu ba Ordu obiŋ ba Eyahuda a lu mi le, Agimi e kyu ayakplobi abgo okyku o da me e kpo gimi abaptisma. Ahogbrẽ nga á kyu gimi abgo odlobi bimi.

⁴Eshaya arehwĩ ba Ahogbrẽ a hom otum a ta eka he angyiŋ akpa baŋ. A ta a lu mi le, Arekyeŋ a la a su osu akla a la a lu mi le, E nyuŋ ozhẽ Adigi-odne e kpo okyku ŋa. E kpo ozhẽ la o wo tsoŋ okyku o daŋ a dzi ma!

⁵E nyuŋ amgblu la a wo ma e tse shasha. E nyuŋ akukũ la a wo ma e tse. E nyuŋ ezhẽ la e lom e ndba adzadzi Ezhẽ la e waŋ mbo, e waŋ lo adzadzi.

⁶Okyku o da areyaŋ a mbo obiŋ hi a ka oshla ba Ahogbrẽ!

⁷Moarehwi nzenze a ba okro ba Eyohana okyku o daŋ a kpo mo abaptisma. Eyohana a nyuŋ mo a lu mi le, Agimi emabi! Ayi a lu a da gimi ba agimi e kpo e gbu ba o gro ombgu ba Ahogbrẽ la ó ba o ba?

⁸O wo eka he bgu le, agimi e kpo ayakplo la á ba a tsa bimi e nyiŋ edgu odzudzu bimi. Ambo agimi e dzu tki nga e lu mi le, Ebrahim angyiŋ a wo Adigi nga o khwo mbo. Ame e lu adlidzi e da gimi, Ahogbrẽ a kpo a gbu baŋ a zhiŋ ézhim he a da lo e dzu moanwye okyku Ebrahim!

⁹Ogyu o wo ma okyku o kplu asi aki emgbʼbo, okyku eshi esi akiyaŋ a mbo la e fu agbro mbo le, moa á kplu lo á ygi ovo.

¹⁰Moare a zhĩ Eyohana a lu mi le, O wo eka he bgu le, agi é kpo eshi a mo?

¹¹Eyohana a tno ma a lu mi le, Areyaŋ a mbo la a wo la ariga aha le, a kyu akyeŋ abgo a shri a da are la a wo la ariga ma mbo. Are la a wo la algo ma le, a pu lo pa la moahwõ la a wo la alo ma mbo.

¹²Moa la a yga ewaŋ-akyeŋ a wo ahe. Moa a ba okyku o da Eyohana a kpo mo abaptisma, moa a zhĩ Eyohana a lu mi le, Andakʼpo, agi é kpo anyu a mo?

¹³Eyohana a tno mo ma a lu mi le, Agimi e yga ewaŋ e bre ekplo ba odaŋ o lu mbo.

¹⁴Moanwyeakyuŋ-akyeŋ a mbo a zhĩ a lu mi le, Agi é kpo eshi? Eyohana a nyuŋ mo a lu mi le, Agimi e ngʼga emakyeŋ okro arekyeŋ mbo, nga e kpgo moare mbo. E vu eso e ta akpyli ta la ekplo moa a hre gimi.

¹⁵Omba he lo, okayiozhẽ moare o ta ma-ma, nga moa a ka egbregbre ta la Eyohana. Moa a fu eha ma o dzu mbo ma Eyohana angyiŋ a wo Emisiya lo.

¹⁶Ambo Eyohana a nyuŋ mo pyeŋ a lu mi le, Ame e la e kpo gimi abaptisma la amihĩ, ambo are la a gre me la ekʼpo á ba. Ame e tse ma ku-ku ba ame e gbyle e ngla akpadga baŋ mbo. Aŋa á kpo gimi abaptisma ta la Ogbgaodzi, ta la ovo.

¹⁷A wo la ofpo ma. Á jygu ashri esekʼpa nga, á shri akpatba á shri á ygi ovo la ó rum nga mbo!

¹⁸Eyohana a shĩ moare ezhẽ andandandim omba baŋ a la a nyum Oshpaodzadzi a ygi mo.

¹⁹Ambo Eyohana a shrom Ehirudu la a wo ogomna okyku baŋ a ngʼga Ehirudiya ashe anáŋ, nga a shrom ŋa okyku ayakplobi baŋ a kpo.

²⁰Ekplo ebikyeŋ baŋ a kpo la e gre pyeŋ, a da mo a vu Eyohana a ta aku.

²¹Ambla ba moa a kpo moare pyeŋ abaptisma nga, moa a kpo Eyesu abaptisma. Omba baŋ a la a fa olu nga, ongyeŋ o hwile.

²²Ogbgaodzi eka aklungu, o gile o tspi eshri baŋ. Enzi e gile e zgi ongyeŋ e ba e lu mi le, Aŋo angyiŋ o wo Anwye me ba eso me. Ame e la e gno oraŋ ka la ŋo nzenze.

²³Omba ba Eyesu a zga esi otum baŋ, a wo eka eyi ekʼpoetra. Moare a la a ka eka baŋ a wo anwye ba Oyusufu. Oyusufu a wo anwye Eheli.

²⁴Eheli a wo anwye ba Amatat. Amatat a wo anwye Eliwu. Eliwu a wo anwye Emelki. Emelki a wo anwye ba Ejanayi. Ejanayi nga a wo anwye Oyusufu.

²⁵Oyusufu a wo anwye ba Amatatiya. Amatatiya a wo anwye Emos. Emos a wo anwye Enahum. Enahum nga a wo anwye Esli. Esli a wo anwye ba Enagayi.

²⁶Enagayi a wo anwye ba Amat. Amat nga a wo anwye Amatatiya. Amatatiya a wo anwye Esimin. Esimin nga a wo anwye Ojosek. Ojosek a wo anwye ba Ojoda.

²⁷Ojoda a wo anwye ba Ojowana. Ojowana nga a wo anwye Eresa. Eresa a wo anwye Ezerubable. Ezerubable nga a wo anwye Eshetiyel. Eshetiyel a wo anwye Eneri.

²⁸Eneri a wo anwye ba Emelki. Emelki a wo anwye ba Adi. Adi nga a wo anwye Okosam. Okosam a wo anwye Elmadam. Elmadam a wo anwye Era.

²⁹Era nga a wo anwye Ojushuwa. Ojushuwa a wo anwye ba Eliyeza. Eliyeza nga a wo anwye Ojorim. Ojorim a wo anwye ba Amatat. Amatat nga a wo anwye ba Eliwu.

³⁰Eliwu a wo anwye Esimiyo. Esimiyo a wo anwye Eyahuda. Eyahuda nga a wo anwye ba Oyusufu. Oyusufu a wo anwye ba Ojonam. Ojonam a wo anwye Eliyakim.

³¹Eliyakim a wo anwye ba Emeliya. Emeliya a wo anwye Emena. Emena nga a wo anwye Amatata. Amatata a wo anwye ba Anataŋ. Anataŋ a wo anwye Adawuda.

³²Adawuda a wo anwye ba Ejese. Ejese nga a wo anwye Obed. Obed nga a wo anwye ba Obowaz. Obowaz a wo anwye Eshela. Eshela a wo anwye Enashoŋ.

³³Enashoŋ a wo anwye Aminadab. Aminadab nga a wo anwye Adimin. Adimin a wo anwye Arani. Arani nga a wo anwye ba Ehezro. Ehezro a wo anwye Eperez. Eperez a wo anwye Eyahuda.

³⁴Eyahuda nga a wo anwye ba Eyakubu. Eyakubu nga a wo anwye Eshaku. Eshaku a wo anwye ba Ebrahim. Ebrahim nga a wo anwye Etera. Etera a wo anwye ba Enahoro.

³⁵Enahoro nga a wo anwye Eserugu. Eserugu a wo anwye Eriyu. Eriyu a wo anwye Epelege. Epelege a wo anwye Ebera. Ebera a wo anwye Eshela.

³⁶Eshela nga a wo anwye Ekayina. Ekayina a wo anwye ba Afaksada. Afaksada nga a wo anwye Eshem. Eshem a wo anwye ba Onuhu. Onuhu nga a wo anwye ba Elamek.

³⁷Elamek a wo anwye ba Ematusela. Ematusela a wo anwye Enok. Enok nga a wo anwye ba Ejared. Ejared a wo anwye Amahalali. Amahalali a wo anwye ba Ekayina.

³⁸Ekayina nga a wo anwye ba Eno. Eno a wo anwye Esef. Esef nga a wo anwye ba Adamu. Adamu nga a wo anwye ba Ahogbrẽ.