Read eggon Oluka 4 Bible Online

Oluka 4 - eggon bible

Oluka 4

¹Eyesu a zgi Ordu a ba, nga a bli la Ogbgaodzi. Ogbgaodzi nga o daŋ a gre akla.

²Eshitaŋ e mbga ŋa ahe lo okyku elum ekʼpoenyi. Omba he lo aŋa a ri emakyeŋ mbo, okyku eka he embyle e kpo ŋa.

³Eshitaŋ e ba e nyuŋ ŋa e lu mi le, O wo boŋ o wo Anwye ba Ahogbrẽ angyiŋ le, o zhiŋ ézhim he e da lo e dzu agbrotsa.

⁴Ambo Eyesu a tno ma a lu mi le, Are á dzu ma okyku algori sha mbo.

⁵Ambla he nga, Eshitaŋ e sko Eyesu e shri e gre okrokyeŋ la o si taŋ, nga a tsa ŋa ereŋ andandandim ba obiŋ hi.

⁶Ambla he nga e nyuŋ ŋa e lu mi le, Ame é shri ekʼpo he lo é shri é doŋ, ta la angyiŋ he lo pyeŋ. Moa a shri ayakplo he lo pyeŋ a shri a ghwo abgo me, ame nga e wo la ekʼpo ma ba o shri lo o da areyaŋ a mbo ba ame e klo.

⁷Ayakplo he mvye á zhiŋ á dzu a boŋ, o wo boŋ o kʼpu obiŋ egi ayi me.

⁸Ambo Eyesu a tno Eshitaŋ ma a lu mi le, Odlo ba Ahogbrẽ o lu mi le, Aŋo o hlu Adigi-odne Ahogbrẽ boŋ sha eshko!

⁹Ambla he nga Eshitaŋ e sko ŋa e gre Orushalima. E shri Eyesu e zga ogzo ba Anyuŋ-akulu. Ogzo he lo o hlu o gre pyeŋ. Eshitaŋ e nyuŋ Eyesu e lu mi le, O wo boŋ o wo Anwye ba Ahogbrẽ le, o kso o ta egba obiŋ.

¹⁰Okyku eshi odlo ba Ahogbrẽ o lu mi le, Moa á da moanwyeadga ba Ahogbrẽ á ba a kpaŋ ŋo.

¹¹Nga alo o sa o lu mi le, Moa á ta ŋo á vu, okyku o da odga boŋ o yla ezhim mbo.

¹²Eyesu a tno Eshitaŋ ma a lu mi le, Odlo ba Ahogbrẽ o lu mi le, O wo odzi boŋ o mbga Adigi-odne, ta la Ahogbrẽ boŋ mbo.

¹³Ambla ba Eshitaŋ e mbga Eyesu ozhẽ-yaŋ a mbo e khwo nga, e kye e sku ŋa okyku omba ple.

¹⁴Omba he lo nga Eyesu a bla a gre obiŋ ba Egalili. Ekʼpo Ogbgaodzi e wo ka la ŋa. Oshpa baŋ a ba ogʼba obiŋ hi lo o ngla o tsu o gre ogʼba ba obiŋ hi mvye.

¹⁵A la a nye moare anwyeakulu mo nzenze, nga moa a tsom ŋa.

¹⁶Omba he lo Eyesu a gre osku ba Anazarata, okro baŋ a bmye ayi ma. Onda Asabat nga a gre eshki eka baŋ a la a yi. A kso okyku o tsi Akpa ba Ahogbrẽ.

¹⁷Moa a shri akpa ba Eshaya arehwĩ ba Ahogbrẽ a hom otum, a shri a daŋ. A hwile ashye akpa lo, nga a tsi okro la o lu mi le,

¹⁸Ogbgaodzi ba Adigi-odne o wo pa la me. Aŋa angyiŋ a sla me okyku o da me e nyum Oshpaodzadzi e ygi moaekŋe. A hom me otum okyku o da me e su odzudum e ygi moare la moa a klu mo aku. Nga e shaŋ moavgayi, Nga okyku o ngla moa la a kpo ewu.

¹⁹Nga okyku o da me e su eyi ba Ahogbrẽ á ba a shla moare, e ygi mo!

²⁰Ambla he nga, Eyesu a gbmyi ashye akpa lo nga a shri lo a da are la kpaŋ lo, nga a dzu obiŋ. Moare la a wo anwyeakulu lo pyeŋ a ka ŋa tsoŋ a gre eshri.

²¹Ambla he nga aŋa a zga esĩ a lu odlo pa la mo. A lu mi le, Okro he lo o bli anye a mo, eka bimi e gno moa a tsi lo he.

²²Moa pyeŋ a gno oraŋ ta la Eyesu. Nga moa a ka egbregbre odlo odzadzi baŋ a lu. Moa a zhĩ a lu mi le, Aŋa angyiŋ a wo anwye ba Oyusufu mbo?

²³Eyesu a nyuŋ mo a lu mi le, Ame e yi zhezheŋ ba agimi é ba e sko odlo he lo é ba e lu eshri me é lu mi le, Anyuŋ elikita, o shaŋ eshri boŋ. Ame e yi bimi é ba e lu pa la me é lu mi le, Aŋo o kpo edgu ayakplo ba agi e gno ma aŋo o kpo osku ba Akafanahum, o kpo lo osku boŋ a mbo ko-ko.

²⁴Eyesu a lu odlo a ta ma-ma a lu mi le, Ame e lu e da gimi, Moarehwi ba osku ba are ba Ahogbrẽ a hom ŋa otum, moa a la a ka ŋ a la anyuanyuŋ mbo.

²⁵Agimi e ngli atuŋ e gno odlo me. Omba ba Eliya a wo ma, ogbu o ba mbo okyku eyi etra la ogbu. Omba he lo, agu embyle a kpo obiŋ pyeŋ. Moashe-eshaku nzenze a wo ma obiŋ ba Esrayila omba he lo.

²⁶Ambo moa a da Eliya a knye a gre okro ba akyeŋ eshki mo mbo. Ambo moa a daŋ a knye a gre okro ashe-eshaku osku ba Azarafa. O wo ogʼba obiŋ Esidoŋ.

²⁷Moaeshru a wo ma nzenze obiŋ Esrayila omba ba Elisha arehwĩ ba Ahogbrẽ a hom ŋa otum. Ambo akyeŋ eshki mo a da mo a shaŋ mbo, o wo le Anama alom ba Esiriya dne, a da Elisha a shaŋ ŋa.

²⁸Moare la a wo anwyeakulu a gno eka he a khwo nga, moa a kso la olom.

²⁹Moa a kso nga a se Eyesu a sku osku mo, nga moa a shri ŋa a vre eshri akũ ba osku mo o wo ma. Moa a klo o mu ŋa o zgi ogla o ta obiŋ.

³⁰Ambo aŋa a hwile moare a ygi nga a gre eŋa.

³¹Eyesu a zgi ahe lo a gre osku ba Akafanahum obiŋ Egalili. Onda Asabat nga a nye moare.

³²Moare a ka egbregbre ta la edgu onyenye baŋ, okyku eshi a nye mo la osheshye.

³³Eshki he lo nga, alomakyeŋ ba ogbgabi o kpo ŋa ewu a wo ma, a ta enzi angyangyeŋ a lu mi le,

³⁴Eshi! Aŋo o klo eshi ka la gi? Aŋo Eyesu ba Anazarata! O klo o bga gi? Ame e yi ŋo zhezheŋ, aŋo o wo Anwyeadga ba esesla ba Ahogbrẽ angyiŋ!

³⁵Eyesu a nyuŋ ogbgabi lo a lu mi le, O dzu tki, nga o zgi o sku ŋa! Ogbgabi lo o sheŋ alom lo obiŋ egi ayi mo o khwo nga o zgi o sku ŋa. O ta ŋa etsa mbo ku-ku.

³⁶Areyaŋ a mbo a ka egbregbre, nga moa a lu odlo ta la emo a lu mi le, Eshi edgu odlo o wo ohi? La oshye ta la ekʼpo, alom he lo a la a jygu egbgabi odaŋ nga e zgi!

³⁷Oshpa ba otum Eyesu nga o ngla o tsu o gre ogʼba ba obiŋ hi.

³⁸Eyesu a kso okro ba eshki a gre odne ba Esima. Anaŋ ashe Esima a no olo. Ogbga o bʼbu ŋa egʼba nzenze. Moa a lu oshpa a da Eyesu.

³⁹A gre a yi a tspi akaŋ amgbla ba ashe lo a lom ma, nga a shrom ogbga. O zgi o sku ŋa nga, ebuebu a kso a shri algo a da mo a ri.

⁴⁰Ambla ba olum o sheŋ o gbu, moare ba moakyemoazba a la a no olo edgu andandandim, moa a shri mo a ba okro Eyesu. A tka mo la abgo baŋ nga moa a shaŋ.

⁴¹Egbgabi e zgi egʼba moare nzenze nga e ta enzi angyangyeŋ e lu mi le, Aŋo angyiŋ o wo Anwye Ahogbrẽ! Moa a yi ba Eyesu angyiŋ a wo Emisiya. Okyku eka he, aŋa a bmi a da mo a lu akplokyeŋ mbo.

⁴²La ayiakre nga, Eyesu a zgi a sku osku lo nga a gre okrokyeŋ la o wo yoŋ. Moare a la a klo ŋa. Omba moa a hwiŋ ŋa nga, moa a klo o nyom ŋa o daŋ a kso a sku mo mbo.

⁴³Ambo a nyuŋ mo a lu mi le, O dzu me omgbybi angyiŋ ba ame e yi e nyum oshpa ba Oreŋ Ahogbrẽ esku ehwõ ko-ko. Ahogbrẽ a da me e ba okyku lo angyiŋ.

⁴⁴Okyku eka he Eyesu a nyum oshpa ánwyeakulu ba obiŋ ba Egalili.