Read eggon Oluka 5 Bible Online

Oluka 5 - eggon bible

Oluka 5

¹Ondakyeŋ nga, Eyesu a tspi akaŋ atam ba Ajanasarata. Omba he lo moare a shki a fye emo okyku o yi o gno odlo Ahogbrẽ.

²A ka amgblami aha akaŋ atam lo. Moa la a kpo atsa a dzu amgblami a zga, nga a ndza ekyeŋ atsa mo.

³Eyesu a vre a gre amgblami ba Esima, nga a da Esima a tpi lo a sku akaŋ atam lo ple. Eyesu a dzu amgblami nga a nye moare.

⁴Ambla baŋ a nye moare a khwo nga, a nyuŋ Esima a lu mi le, Aŋo pa la moa la a kpo otum ka la ŋo, o tpi amgblami o yi eyi ami, nga e shri ekyeŋ bimi e ndba e ygi ami nga e vu atsa.

⁵Esima a tno ma a lu mi le, Andakʼpo, agi e kpo atsa ba okyukyukyku, ambo agi e vu emakyeŋ mbo. Ambo o wo boŋ o lu eka he bgu le, ame é shri ekyeŋ é ndba é ygi é ka.

⁶Moa a ndba ekyeŋ a ygi ami nga moa a vu atsa nzenze. Ekyeŋ mo e klo e dle.

⁷Okyku eka he moa a bzi moa la a kpo atsa pa la mo ámgblami ahwõ, okyku o da mo a ba a kpo a ghwo la mo. Moa a ba a bli amgblami aha la atsa ma-me ámgblami a klo o dumayi ami.

⁸Ambla ba Esima Ebitru a ka eka ekplo la e kpo nga, a ba a kʼpu obiŋ egi ayi Eyesu nga a nyuŋ ŋa a lu mi le, O kye o sku me, Adigi-odne, okyku eshi ame e wo are odlobi angyiŋ!

⁹Aŋa, pa la moa la a wo ka la ŋa pyeŋ, moa a ka egbregbre ta la edgu atsa ba moa a vu. A wo nzenze a gre eshri.

¹⁰Eyakubu, ta la Eyohana moa a wo ta la Esima omba he lo. Moa a mbo a ka egbregbre ekakahelo. Eyakubu, ta la Eyohana, moa a wo moanwye Azabadi. Eyesu a nyuŋ Ebitru a lu mi le, O kpo eyli mbo, o zga omba he nga, aŋo ó vu moarehwi.

¹¹Moa a dzu ámgblami mo a zga akaŋ atam lo nga, moa a dzu ekployaŋ a mbo a zga nga moa a lu Eyesu ma.

¹²Ombakyeŋ nga Eyesu a wo oskukyeŋ, alomakyeŋ ba eshru e hwro ŋa egʼba pyeŋ a wo ma. Omba baŋ a ka Eyesu nga a kʼpu obiŋ a vẽ ŋa a lu mi le, Andakʼpo, o wo boŋ o bmi le, aŋo o kpo o gbu boŋ o shaŋ me!

¹³Eyesu a ndba obgo a tka ŋa, nga a lu mi le, Ame e bmi, aŋo o shaŋ! Ebuebu nga alom lo a shaŋ.

¹⁴Eyesu a shĩ alom lo a lu mi le, Ambo o lu o da arekyeŋ a wo mbo! O yi okro andakʼpo olu ba Ahogbrẽ, nga o daŋ a mbga ŋo a ka, nga o shri oshriondba o shri o di eka odaŋ ba Omusa o lu. O kpo ohe lo okyku o tsa areyaŋ a mbo boŋ o shaŋ.

¹⁵Ekakahelo a mbo, oshpa otum Eyesu o ngla o tsu o gre. Moare nzenze a ba okyku o da mo a gno onyenye baŋ, nga okyku o daŋ a shaŋ mo edgu elolo moa a la a no.

¹⁶Ambo aŋa a gre ekro la e wo yoŋ okyku o daŋ a fa olu.

¹⁷Ondakyeŋ nga, omba ba Eyesu a nye moare, moa-Efarisikyeŋ, pa la moarekyeŋ la a nye odaŋ, moa a wo ma. Moa a zgi esku andandandim ba obiŋ ba Egalili, ta la esku obiŋ ba Eyahuda, ta la Orushalima a ba. Eyesu a bli la ekʼpo ba Adigi-odne omba he lo okyku o shaŋ moare la a no olo.

¹⁸Moarekyeŋ, moa a shri alomakyeŋ la a mom egʼba a shri ŋa akpakpa baŋ a ba. Moa a klo ozhẽ ba o shri ŋa o yi odne ba Eyesu a wo ma, okyku o shri ŋa o zga egi ayi Eyesu.

¹⁹Eshki e gre eshri, okyku eka he moa a hwiŋ ozhẽ-okyeŋ ba o shri ŋa o yi mbo. Okyku eka he nga, moa a shri ŋa a vre eshri aku, nga moa a fa ewyle ma. Moa a shri ŋa akpakpa baŋ nga moa a gile ŋa a sõ ewyle a zga egi ayi Eyesu.

²⁰Omba ba Eyesu a ka eka obmi ba adlidzi moare he lo o wo nzenze nga, a nyuŋ alom la a mom egʼba lo a lu mi le, Aŋo akyemeazba, ame e kyu ŋo abgo odlobi boŋ.

²¹Ambla he nga moa la a nye odaŋ, pa la moaEfarisi moa a lu ta la emo a lu mi le, Ayi a tpi eshko Ahogbrẽ ayi eka he? Arekyeŋ a wo la ekʼpo ma ba o kyu moare abgo odlobi mbo, o wo le Ahogbrẽ sha!

²²Eyesu a ka aga mo a bmye. Okyku eka he a nyuŋ mo a lu mi le, Okyku eshi agimi tne aga ba ototno eka he?

²³Eshi e wo ohli e gre ba o lu mi le, Ame e kyu ŋo abgo odlobi boŋ le, ba o lu mi le, O sko akpakpa boŋ o yi eŋo?

²⁴Okyku eka he ame é tsa gimi ba Anwye Arehwĩ a wo la ekʼpo ma obiŋ hi okyku o kyu moare abgo odlobi. Ambla he nga a nyuŋ alom la a mom egʼba a lu mi le, Ame e lu e doŋ, o kso o sko akpakpa boŋ o yi eŋo odne!

²⁵Ebuebu nga a kso egi ayi mo pyeŋ, a sko akpakpa ba moa a shri ŋa a lom ma, a gre eŋa odne nga a hlu Ahogbrẽ eshko.

²⁶Moa pyeŋ a ka egbregbre akplo a gre eshri! Eyli e bli mo eso, nga moa a hlu Ahogbrẽ eshko a lu mi le, Agi e ka ayakplo egbregbre anye he!

²⁷Ambla he Eyesu a zgi edzi nga a ri a sheŋ alom la a yga ewaŋ. Eshko baŋ e ri Eliwu. A hwiŋ ŋa aku moa a yga ewaŋ. Eyesu a nyuŋ ŋa a lu mi le, O lu me ma.

²⁸Eliwu a kso a dzu ekployaŋ a mbo a zga nga a lu Eyesu ma.

²⁹Eliwu a yi a kpo anyuŋ abgo odne baŋ okyku Eyesu. Moare nzenze la a yga ewaŋ a wo ma pa la mo otsotse.

³⁰MoaEfarisikyeŋ, pa la moabze la a nye odaŋ eshki moaEfarisi, moa a lu ahihĩ eshri Eyesu egi ayi moanwyeotum baŋ. Moa a lu mi le, Okyku eshi agimi e la e ri e la e wa pa la moa la a yga ewaŋ, pa la moare odlobi!

³¹Ambo Eyesu a tno mo ma a lu mi le, Moare la a wo oshye a yi aku agum mbo, o wo le moa la a no dne.

³²Ame e ba okyku o klo moare odlodzi angyiŋ okyku o da mo a ghwo obiŋ mbo, ambo ame e ba okyku o klo moare odlobi angyiŋ okyku o da mo a ghwo obiŋ.

³³Moarekyeŋ a lu ta la Eyesu a lu mi le, Moanwyeotum Eyohana a la a nyom eshri algo, nga a la a fa olu ombamba pyeŋ, ambo moanwyeotum boŋ a la a wa a la a ri.

³⁴Ambo Eyesu a tno mo ma a lu mi le, Eka bimi e ka, agimi e kpo e gbu bimi e nyom moare la a gre oriabgo anwyeshe o ri algo omba anwyealom anwyeshe a wo pa la mo? O kpo o gbu mbo ku-ku!

³⁵Ambo omba ó yi ó ba ba moa á ba a sko anwyealom he lo. Omba he lo, moa á hwiŋ algo oruri mbo.

³⁶Eyesu a sa a ta egŋe pa la mo a lu mi le, Arekyeŋ a la a fa ashye oknye ba ariga ahe, a shri a shum ariga agbyi mbo. O wo baŋ a kpo eka he lo le, o dzu eka baŋ a dle ariga ahe, nga ashye ariga ahe he lo á ka á yga ariga agbyi mbo.

³⁷Moa a la a shri ami anab la a wo ahe a ygi akpa agbyi mbo. O wo ba arekyeŋ a mbga a ka le, ami anab ahe á gom akpa lo. Ami lo á ygi a bi nga akpa á dle.

³⁸O mbo! O raŋ a gre moa a shri ami anab la a wo ahe a shri a ygi akpa ahe.

³⁹Eyesu a lu mi le, Arekyeŋ a gno oraŋ o wa ami anab la a wo ahe ambla baŋ a wa ami la a wo agbyi mbo, okyku eshi moare a la a lu mi le, Ami agbyi a wo adzi a gre.