Read eggon Oluka 7 Bible Online

Oluka 7 - eggon bible

Oluka 7

¹Ambla ba Eyesu a lu odlo eka he pa la moare a khwo nga, a zhiŋ ogbu a gre Akafanahum.

²Andakʼpo moanwyeakyuŋ moaOroma a wo la anwye-odne akyeŋ ma baŋ a klo nzenze. Anwye he lo a no olo ma-me nga a wo anyu eku.

³Omba baŋ a gno oshpa ba Eyesu eka he nga, a hom moandakʼpo moaEyahuda otum ma moa a yi a da Eyesu a ba a shaŋ anwye-odne baŋ.

⁴Moa a ba okro Eyesu nga moa a vẽ ŋa a lu mi le, O ka, o raŋ o gre boŋ o kpo o ghwo la alom he lo.

⁵Aŋa a la a klo moarehwi ba Eyahuda, nga ababgo baŋ a mbdzi anwyeakulu okyku gi.

⁶Okyku eka he Eyesu a gre pa la mo. Omba he lo, a wo osusku ta la odne ba andakʼpo moanwyeakyuŋ he lo a dzu ma. Andakʼpo he lo a hom moakyeŋazba otum okro Eyesu. Moa a nyuŋ Eyesu a lu mi ma andakʼpo moanwyeakyuŋ a lu mi le, Andakʼpo, o kpo eŋo ewuekyeŋ nga mbo, ame e tse ma boŋ o zga odga odne me mbo.

⁷Ame e tse ma ba ame e ba egi ayi boŋ mbo. O hwile anyu o lu odlo nga anwye-odne me á shaŋ.

⁸Ame a mbo, ame e wo abgo moandakʼpo la a gre me, nga ame e wo la moanwyeakyuŋ abgo me. O wo ba ame e nyuŋ ahi ma a yi, aŋa a la a yi, nga o wo ba ame e nyuŋ a mi ma a ba, a la a ba. Nga o wo ba ame e nyuŋ awaghrẽ ma a kpo eka he, aŋa a la a kpo.

⁹Eyesu a ka egbregbre nzenze omba baŋ a gno eka he. Okyku eka he nga a zhiŋ a lu odlo pa la moare la a lu ŋa ma a lu mi le, Ame e ka arekyeŋ la a bmi ba adlidzi eka alom he lo okrokyeŋ mbo ku-ku. Obiŋ ba Esrayila a mbo, ame e ka arekyeŋ mbo!

¹⁰Moare ba moa a hom mo otum moa a bla a gre odne ba andakʼpo lo nga moa a hwiŋ anwye-odne lo a sheŋ a shaŋ bgu.

¹¹Onda ba oha nga, Eyesu a gre osku ba moa a bzi lo ma Enayi. Moanwyeotum baŋ pa la moare nzenze a gre ka la ŋa.

¹²Omba baŋ a gbu anyuŋ ayizhẽ ba osku lo nga, a tsa moare la a wu okũ eku ozhẽ. Moa a zgi edzi la okom lo. Anwye la a kpu he lo, a wo anwye akyakyeŋ angyiŋ ba ashe-eshaku he lo. Moare ba osku he lo nzenze a ba a wo ma ka laŋa.

¹³Omba ba Adigi-odne a ka ŋa a ka ŋa ayiekŋe. Okyku eka he a nyuŋ ashe lo a lu mi le, O wu okũ mbo.

¹⁴Ambla he nga Eyesu a gre a yi a tka akpati ba moa a shri okom lo a ghwo ma. Moare la a shri akpati a tspi. Eyesu a nyuŋ anwye lo a lu mi le, Ola anwye, ame e lu e doŋ, o kso o zgi!

¹⁵Anwye la a kpu he lo a kso nga a la a kpla egba. Ambla he nga Eyesu a shri ŋa a da anaŋ.

¹⁶Areyaŋ a mbo a kpo eyli, okyku eka he nga moa a hlu Ahogbrẽ eshko a lu mi le, Anyuŋ arehwĩ ba Ahogbrẽ a hom otum a ba okro bi! Ahogbrẽ a ba okyku o shla moarehwi baŋ angyiŋ!

¹⁷Oshpa ba Eyesu o gom o ngla obiŋ ba Eyahuda pyeŋ ta la akekaŋ ba obiŋ hi lo.

¹⁸Moanwyeotum ba Eyohana moa a lu ekployaŋ a mbo a daŋ. Eyohana a bzi moaha nga,

¹⁹a hom mo otum okro ba Adigi-odne okyku o da mo a zhĩ Eyesu a lu mi le, Aŋo angyiŋ o wo are ba Eyohana a nyum oshpa ma aŋa á ba le, agi e ka ayi ozhẽ okyku arekyeŋ ondundum?

²⁰Omba ba moa a ba okro Eyesu nga, moa a nyuŋ ŋa a lu mi le, Eyohana la a kpo abaptisma a hom gi otum a lu mi ma agi e zhĩ, ma aŋo angyiŋ o wo are baŋ a nyum oshpa ma aŋa á ba le, ma agi e dzu e ka ayi ozhẽ okyku arekyeŋ ondundum?

²¹Omba he lo nga Eyesu a shaŋ moare nzenze la a no olo pa la moa la a kpo ewu. A shaŋ moare ba egbgabi e la e kpo mo ewu, nga a shaŋ moavgayi nzenze.

²²Eyesu a tno moanwyeotum ba Eyohana ma a lu mi le, Agimi e bla e yi nga e nyum ayakplo bimi e ka nga e gno, e daŋ. Agimi e lu e daŋ eka ba ame e shaŋ moavgayi, pa la moa la a buŋ adga, pa la moa la a gbu eshru, pa la moa la a som atuŋ, nga e kso moa la a kpu, nga e nyum oshpa e ygi moaekŋe.

²³Are la a fu eha me mbo le, a wo la owlama ma nzenze!

²⁴Ambla moanwyeotum a zhiŋ ogbu a gre a khwo nga, Eyesu a lu odlo eshri Eyohana a ygi moare. A lu mi le, Omba ba agimi e gre akla okyku o ka Eyohana, agimi e zga eso ba o ka eshi angyiŋ? Agimi e zga eso ba o ka ogbga o la o hlu embgu agdzu angyiŋ?

²⁵Agimi e gre okyku o ka eshi angyiŋ? Agimi e gre okyku o ka arekyeŋ la a ygi anzho bibibli angyiŋ? Adlidzi angyiŋ moare la a ygi anzho la a wo egbmo nzenze, ta la odzudzu ba ognoraŋ, moa a wo esakpa moareŋ angyiŋ!

²⁶Agimi e lu e da me, agimi e zga aga ba o ka eshi? Arehwĩ ba Ahogbrẽ a hom otum? Ame e lu e da gimi, are bimi e ka lo a gre arehwĩ ba Ahogbrẽ a hom otum a mbo nganga.

²⁷O wo eka he lo angyiŋ okyku eshi Eyohana he lo angyiŋ a wo are ba odlo ba Ahogbrẽ o lu mi le, Ahogbrẽ a lu mi le, E ka anwyeadga me. Ame é daŋ a ba a sku ŋo okyku o daŋ a yi a vu okro abgo okyku ŋo.

²⁸Eyesu a lu mi le, Ame e lu e da gimi, Eyohana a wo la anyuanyuŋ a gre areyaŋ a mbo ba moa a mbre ŋa obiŋ hi. Ambo are la a wo otsitsi Oreŋ Ahogbrẽ, a sa a wo anyuanyuŋ a gre Eyohana a mbo nganga.

²⁹Moare pyeŋ pa la moa la a yga ewaŋ moa a gno odlo baŋ a lu he lo. Moahi lo angyiŋ moa a bmi ta la odlodzi ba Ahogbrẽ, nga Eyohana angyiŋ a kpo mo abaptisma.

³⁰Ambo moaEfarisi, pa la moa la a nye odaŋ, moa a tla aga ba Ahogbrẽ a wo la alo okyku mo. Nga moa a tla o da Eyohana a kpo mo abaptisma.

³¹Ame e ta egŋe ekayaŋ eshri moarehwi ba ekplu hi? Edgu eda mo e wo anyu?

³²Moa a wo eka moanwye la a la a kpo ekpyle asaŋ ekyku. Eshki ekyeŋ e nyuŋ ehwõ e lu mi le, Agi e bmmi ama okyku o da gimi e zhga ara, ambo agimi e zhga ara mbo! Agi e fu abmo eku ambo agimi e wu okũ mbo!

³³Eyohana la a kpo abaptisma a ba, a la a nyom eshri baŋ algo nga a wa ami anab mbo. Ambo agimi e sko ŋa e zga adro!

³⁴Anwye Arehwĩ a ba a la a ri nga a wa, agimi e la e lu odlo ototno eshri baŋ, e lu mi le, E ka alom he a wo ambyela, ta la are la a wa ami anab la a no, nga a wo akyemoazba moa la a yga ewaŋ, pa la moaedlobi!

³⁵Moare pyeŋ la a yga Ahogbrẽ eso mo, moa a ka adlidzi baŋ a bmye.

³⁶Alom ba Efarisikyeŋ a da Eyesu a ba odne baŋ okyku o da mo a ri algo otsotse. Eyesu a gre odne lo nga a dzu obiŋ okyku o da mo a ri algo otsotse.

³⁷Ashekyeŋ ba odlobi a wo osku he lo. A gno oshpa ba Eyesu a wo odne alom ba Efarisi a ri algo. Okyku eka he a shri embzu ba alabasta, e bli la awargi slu la a shka efpi.

³⁸A ba a tspi egi okũ Eyesu, osusku ta la adga baŋ, nga a wu okũ nga a bga adga Eyesu la amanyiayi baŋ. Ambla he nga a khwa amanyiayi lo la amasẽ eshri baŋ. Ashe lo a shri anyu baŋ a tka adga ba Eyesu nga a zhiŋ awargi a ygi adga lo.

³⁹Omba ba alom ba Efarisi la a bzi ŋa okyku o da mo a ri algo otsotse a ka eka he nga, a lu eso baŋ a lu mi le, Alom hi a wo arehwĩ ba Ahogbrẽ a hom otum adlidzi angyiŋ e mbi, a kpo a gbu baŋ a yi edgu ashe la a tka ŋa he. E mbi, aŋa a kpo a gbu baŋ a yi edgu odlobi ba ashe lo a la a kpo!

⁴⁰Eyesu a lu odlo ka la ŋa a lu mi le, Esima, ame e wo la ekplokyeŋ okyku o lu o da ŋo. Esima a tno ma a lu mi le, Andakʼpo ame e bmi aŋo o lu.

⁴¹Eyesu a lu mi le, Moare aha a wo ma. Moa a ri are la a shri amgbaŋ a di okŋe. Akyeŋ a ri okŋe ba Enaira ekʼpoetno nga ahwõ a ri okŋe ba Enaira etno.

⁴²Akyeŋ a mbo eshki mo a hre okŋe lo a gbu mbo. Alom la a shri amgbaŋ a di okŋe nga a kyu moaha lo pyeŋ abgo. Eka boŋ a ka, areyaŋ angyiŋ á ba a vye alom he lo a gre?

⁴³Esima a tno ma a lu mi le, Eka ba ame e ka, are ba moa a shri amgbaŋ nzenze a daŋ angyiŋ á ba a vye alom lo á gre. Eyesu a tno ŋa ma a lu mi le, Aŋo o tno ma eka lo angyiŋ.

⁴⁴Ambla he nga, a zhiŋ a ka ashe lo nga a nyuŋ Esima a lu mi le, Aŋo o ka ashe he e ma? Ame e ba odne boŋ, ambo aŋo o ka o shri amihĩ o da me okyku o da me e ndza abgo me mbo. Ambo aŋa a ndza adga me la amanyiayi baŋ, nga a khwa lo la amasẽ eshri baŋ.

⁴⁵Aŋo o yga me la ovyevye mbo, ambo ashe he lo a la a khwa adga me ba anyanye ba ame e ba ahe.

⁴⁶Aŋo o shri awargi o di okyku o khwa eshri me mbo, ambo ashe he lo a khwa adga me la awargi la a shka efpi.

⁴⁷Ame e lu e doŋ, ekplo ba ashe he lo a kpo, a kpo lo okyku baŋ a wo la oklo ma nzenze. Oklo nzenze he lo o tsa ba moa a sheŋ a kyu ŋa abgo odlobi nzenze baŋ a kpo bgu. Areyaŋ a mbo ba moa a kyu ŋa abgo odlobi ple baŋ a kpo, are he lo a wo la oklo ple sha angyiŋ.

⁴⁸Ambla he nga Eyesu a nyuŋ ashe lo a lu mi le, Moa a kyu ŋo abgo odlobi boŋ.

⁴⁹Moahwõ la a wo eteblo pa la mo, moa a la a lu ta la emo a lu mi le, Aŋa a wo ayi angyiŋ la a kpo a gbu baŋ a kyu moare abgo odlobi a mbo?

⁵⁰Ambo Eyesu a nyuŋ ashe lo a lu mi le, Obmi ba adlidzi boŋ o wo la alo ma o shla ŋo. O yi eŋo la esõ-egbubiŋ.