Read eggon Eyohana 1 Bible Online

Eyohana 1 - eggon bible

Eyohana 1

¹Okũ oriori omba ba Ahogbrẽ a kpo obiŋ hi a wo mbo, Odlo o sheŋ o wo ma. Okro ba Ahogbrẽ a wo ma he lo, Odlo o wo ma ka la ŋa otsotse. Odlo nga o wo Ahogbrẽ angyiŋ.

²Odlo o wo ma ta la Ahogbrẽ angyiŋ okũ oriori.

³Ahogbrẽ a kpo ekployaŋ a mbo okro baŋ angyiŋ. Ahogbrẽ a kpo ekplokyeŋ mbo o wo le okro baŋ sha.

⁴Odlo o wo eso egʼba baŋ, nga eso he lo angyiŋ e shri ayimom e kom moare.

⁵Ayimom a la a tra evbu, nga evbu e kpo e gre ayimom lo mbo.

⁶Ahogbrẽ a hom anwye-odne baŋ akyeŋ otum. Aŋa a ri Eyohana.

⁷Aŋa angyiŋ a ba okyku o nyum oshpa o ygi moare eshri ba ayimom he lo. A ba okyku o nyum oshpa o da mo nga, okyku o da areyaŋ a mbo a gno oshpa nga a bmi ba adlidzi.

⁸Eyohana angyiŋ a wo ayimom lo mbo, ambo a ba okyku o zgi egŋe ba ayimom lo angyiŋ.

⁹Alo angyiŋ a wo ayimom ba adlidzi la a ba obiŋ hi, nga a la a tra moare mvye.

¹⁰Odlo lo o wo obiŋ hi. Ahogbrẽ a kpo obiŋ hi lo okro baŋ. Ambo ekakahelo obiŋ hi lo o tla ŋa.

¹¹A ba obiŋ baŋ, ambo moarehwi ba obiŋ baŋ moa a yga ŋa mbo.

¹²Ambo moakyeŋ a yga ŋa nga moa a bmi ba adlidzi ka la ŋa, okyku eka he a hwile mo ozhẽ okyku o da mo a dzu moanwye Ahogbrẽ.

¹³Moa a dzu moanwye Ahogbrẽ ibu ombrembre ba egʼba mbo, ozhẽ ombrembre ba moarehwi a mbo mbo. Ahogbrẽ ababgo baŋ a dzu Adimo.

¹⁴Odlo o zhiŋ o dzu arehwĩ, nga o dzu ka la gi. Agi e ka ayimom ba esesla baŋ. O wo la okpoghwo, ta la adlidzi nzenze ma. Ayimom ba esesla baŋ he lo, aŋa anwye akya-kyeŋ ba Ahogbrẽ a yga lo ibu Adaŋ angyiŋ.

¹⁵Eyohana a lu odlo eshri baŋ, nga a su a lu mi le, Aŋa angyiŋ ame e lu odlo eshri baŋ omba ba ame e lu mi le, Aŋa á ba ambla me, ambo a wo ekʼpo ma a gre me, okyku eshi aŋa a wo ma ayga moa a mbre me.

¹⁶Ibu okpoghwo baŋ la o sheŋ o nye mbo, a shri owlama a da gi mvye. Ombamba pyeŋ nga a la a shri owlama a ta gi ma-ma.

¹⁷Ahogbrẽ a da gi e hwiŋ odaŋ abgo ba Omusa, ambo a da gi e hwiŋ okpoghwo ta la adlidzi abgo ba Eyesu Ekristi.

¹⁸Arekyeŋ a ka Ahogbrẽ a ka ondakyeŋ mbo ku-ku. Arekyakyeŋ la a wo okyekyeŋ ta la Ahogbrẽ, nga baŋ a dzu egbaŋ ba Adaŋ, a ba a lu oshpa a da gi zhezheŋ.

¹⁹MoaEyahuda la a wo Orushalima a hom moandakʼpo olu ba Ahogbrẽ, pa la moaElivi otum okro Eyohana. Moa a gre okro Eyohana nga a zhĩ ŋa a lu mi le, Aŋo o wo ayi angyiŋ?

²⁰Eyohana a da lo o kpo ŋa ewu mbo, ambo a tno ma a lu mi le, Ame angyiŋ e wo Emisiya mbo.

²¹Moa a sa a zhĩ ŋa a lu mi le, O wo eka he le, aŋo o wo ayi angyiŋ? Aŋo angyiŋ o wo Eliya? Eyohana a tno mo ma a lu mi le, Ame e wo Eliya angyiŋ mbo. Moa a sa a zhĩ ŋa a lu mi le, Aŋo angyiŋ o wo arehwĩ ba Ahogbrẽ a hom otum? Eyohana a tno mo ma a lu mi le, Ame e wo ŋa angyiŋ mbo.

²²Moa a sa a lu mi le, O lu o da gi, aŋo o wo ayi angyiŋ? Agi e klo o shri otnoma boŋ o shri o kom moa la a hom gi otum. O lu o da gi, aŋo o la o bzi eŋo ma ayi angyiŋ?

²³Eyohana a tno mo ma a lu mi le, Ame angyiŋ e wo Enzi la e la e su osu akla e la e lu mi le, E kpo ozhẽ la o wo tsoŋ okyku o da Adigi-odne a dzi ma. Eshaya arehwĩ ba Ahogbrẽ a hom otum, a sheŋ a lu eka he lo.

²⁴Moanwyeadga he lo, moaEfarisi angyiŋ a hom mo otum.

²⁵Moa a zhĩ Eyohana a lu mi le, O wo boŋ o wo Emisiya mbo, nga o wo Eliya mbo, nga o wo arehwĩ ba Ahogbrẽ a hom ŋo otum mbo, okyku eshi aŋo o la o kpo moare abaptisma?

²⁶Eyohana a tno mo ma a lu mi le, Ame e kpo moare abaptisma la amihĩ, ambo eshki bimi are ba agimi e yi ŋa mbo a tspi ka la gimi.

²⁷Aŋa á ba ambla me, ambo ame e tse ma ba ame e ngla akpadga baŋ mbo.

²⁸Ayakplo he lo mvye a kpo Ebetanya. Ebetanya e wo ongre ondzu ba Ordu. Ahe lo angyiŋ Eyohana a la a kpo moare abaptisma.

²⁹Onda ba oha nga Eyohana a ka Eyesu a ba okro baŋ, nga a lu mi le, E ka Anwye Ekylu ba Ahogbrẽ la a la a sko odlobi ba obiŋ hi mvye!

³⁰Aŋa angyiŋ ame e lu odlo eshri baŋ e lu mi le, Arekyeŋ á ba ambla me, ambo a wo ekʼpo ma a gre me, okyku eshi aŋa a wo ma ayga moa a mbre me.

³¹Ame e yi eka baŋ á ba a dzu mbo, ambo ame e ba e la e kpo moare abaptisma okyku o da areyaŋ a mbo ba Esrayila a yi ŋa.

³²Eyohana a zgi egŋe a lu mi le, Ame e ka Ogbgaodzi eka aklungu o gile eshri baŋ.

³³Omba he lo, ame e yi ŋa mbo, ambo Ahogbrẽ la a da me e kpo abaptimsa la amihĩ a nyuŋ me a lu mi le, Aŋo ó ka Ogbgaodzi ó gile eshri alom he lo. Alom he lo angyiŋ a la a kpo moare abaptisma la Ogbgaodzi.

³⁴Eyohana a sa a lu mi le, Ame e ka lo, ame e sa e lu e da gimi, adlidzi, aŋa a wo Anwye Ahogbrẽ angyiŋ.

³⁵Onda ba otra nga, Eyohana a shki ta la moanwyeotum baŋ aha.

³⁶Omba ba Eyohana a ka Eyesu a ba nga, a lu mi le, E ka Anwye Ekylu ba Ahogbrẽ!

³⁷Ambla ba moanwyeotum aha lo a gno eka he a khwo nga, moa a kso nga a lu Eyesu ma.

³⁸Omba ba Eyesu a zhiŋ a ka ba moa a lu ŋa ma nga, a zhĩ mo a lu mi le, Agimi e klo eshi? Moa a zhĩ ŋa a lu mi le, Aŋo Andakʼpo, aŋo o la o dzu ayaŋ?

³⁹A nyuŋ mo a lu mi le, E ba e ka. Moa a lu ŋa ma nga moa a gre a yi a ka okro baŋ a dzu ma. Moa a mom olum he lo mvye a kpo ka la ŋa. Omba ba ohe lo o kpo omba o wo eka ba amgbaŋ anyi ba olulum.

⁴⁰Akyeŋ eshki moaha la a gno ekplo ba Eyohana a lu, nga moa a lu Eyesu ma, eshko baŋ e ri Andru. A wo anáŋ Esima Ebitru.

⁴¹Ambla fi nga, Andru a hwiŋ anáŋ Esima nga a lu a daŋ a lu mi le, Agi e hwiŋ Emisiya. A dzu Ekristi.

⁴²Nga Andru a shri Esima a ba okro Eyesu. Eyesu a ka Esima nga a nyuŋ ŋa a lu mi le, Aŋo angyiŋ o wo Esima anwye Eyohana. Eshko boŋ é ri Ekefa. Eshko he lo e wo okyekyeŋ angyiŋ ta la eshko Ebitru. E dzu Ezhim.

⁴³Onda ba otra nga, Eyesu a zga eso ba o yi obiŋ ba Egalili. A ka Efilibu nga a nyuŋ ŋa a lu mi le, O ba o lu me ma!

⁴⁴Efilibu a wo a ba osku ba Ebetseda osku ba Andru ta la Ebitru.

⁴⁵Efilibu a ka Enataniyelu nga a lu oshpa a daŋ a lu mi le, Agi e ka are ba Omusa a ta oshpa baŋ akpa ba odaŋ, nga moarehwi ba Ahogbrẽ a hom otum a mbo a sa a ta oshpa baŋ. Aŋa angyiŋ a wo Eyesu anwye Oyusufu ba osku ba Anazarata.

⁴⁶Enataniyelu a zhĩ Efilibu a lu mi le, Ekplo-kyeŋ edzi e kpo e gbu ba alo e zgi osku ba Anazarata? Efilibu a nyuŋ ŋa a lu mi le, O ba o ka.

⁴⁷Omba ba Eyesu a ka Enataniyelu a ba okro baŋ nga, a lu odlo eshri baŋ a lu mi le, Alom he lo a wo arehwĩ ba Esrayila zhezheŋ. Ekplokyeŋ ba o fu oha eshri baŋ e wo ma mbo.

⁴⁸Enataniyelu a zhĩ a lu mi le, Aŋo o kpo anyu o yi me? Eyesu a tno ma a lu mi le, Ame e ka ŋo omba boŋ o dzu okũ anva, omba ba Efilibu a bzi ŋo a wo mbo.

⁴⁹Enataniyelu a nyuŋ Eyesu a lu mi le, Andakʼpo, aŋo o wo Anwye Ahogbrẽ angyiŋ! Aŋo o wo Anyuŋ-areŋ ba Esrayila!

⁵⁰Eyesu a nyuŋ ŋa a lu mi le, Aŋo o bmi ba adlidzi okyku ba ame e lu mi ma ame e ka ŋo okũ anva angyiŋ? Ame e lu e doŋ, aŋo o yi ó ka ayakplo la a wo egbregbre a gre eka he!

⁵¹Nga Eyesu a nyuŋ mo a lu mi le, Ame e lu adlidzi e da gimi, agimi é ka Ongyeŋ ó hwile, nga moanwyeadga ba Ahogbrẽ a ta oya eshri Anwye Arehwĩ!