Read eggon Eyohana 11 Bible Online

Eyohana 11 - eggon bible

Eyohana 11

¹Alomakyeŋ a wo ma, eshko baŋ e ri Eliyazaru. Aŋa a wo arehwĩ ba osku ba Ebetanya nga a no olo. Ebetanya angyiŋ e wo osku ba Emeri ta la anáŋ Amata a dzu ma.

²Emeri he lo angyiŋ a shri awargi a ygi adga ba Adigi-odne nga a khwa lo la amasẽ eshri baŋ. Anáŋ la a ri Eliyazaru a no olo.

³Moanáŋ-alashle a hom otum a kom Eyesu a lu mi le, Adigi-odne, akyeŋoazba ba adlidzi a no olo.

⁴Omba ba Eyesu a gno eka he nga a lu mi le, Eliyazaru a no olo, ambo á kpu mbo. Ohe lo o kpo okyku o da mo a hlu Ahogbrẽ eshko angyiŋ. Olo he lo ó ba o wo ozhẽ ba Ahogbrẽ á da moare á hlu Anwye baŋ eshko.

⁵Eyesu a wo la oklo ma okyku Amata ta la anáŋ Emeri, ta la Eliyazaru.

⁶Omba baŋ a gno oshpa ba Eliyazaru a no olo nga, a kpo elum eha okro baŋ a wo ma ayga.

⁷Ambla he nga a nyuŋ moanwyeotum baŋ a lu mi le, E da gi e yi obiŋ ba Eyahuda nganga.

⁸Moa a tno ŋa ma a lu mi le, Andakʼpo, omba o dga o dzu a wo mbo moaEyahuda a klo o tra ŋo ézhim, aŋo o klo o yi a mi lo nganga?

⁹Eyesu a tno ma a lu mi le, Olum okyeŋ o wo la awa otsko mbo? Okyku eka he o wo ba are a dzi olulum angyiŋ le, aŋa a sheŋ evgo mbo okyku eshi a ka ayimom ba obiŋ hi.

¹⁰Ambo o wo baŋ a dzi okyukyku angyiŋ le, aŋa a sheŋ evgo okyku eshi ayimom a wo ka la ŋa mbo.

¹¹Eyesu a lu eka he a khwo nga a sa a lu mi le, Akyegiazba Eliyazaru a ndze enu, ambo ame é yi é vro ŋa enu.

¹²Moanwyeotum a tno ŋa ma a lu mi le, O wo baŋ a ndze enu angyiŋ le, Adigi-odne, aŋa á kso.

¹³Ambo Eyesu a sko a zga ba Eliyazaru a sheŋ a kpu, ambo moa a ka ma o dzu mbo ma aŋa a nyuŋ enu ba adlidzi angyiŋ.

¹⁴Eyesu nga a sa a lu a da mo a lu mi le, Eliyazaru a kpu adlidzi.

¹⁵Ame e vye e gre eshri ba ame e wo ma ka la ŋa mbo okyku gimi, okyku o da gimi e bmi ba adlidzi. E da gi e yi okro baŋ.

¹⁶Otoma la a wo Ahli a nyuŋ moanwyeotum la a kpo otum ka la ŋa a lu mi le, Agimi e da gi pyeŋ e yi ta la Andakʼpo, okyku o da gi e kpu otsotse ka la ŋa!

¹⁷Omba ba Eyesu a gbu nga, a ka moa a sheŋ a kpo elum enyi moa a ngybi Eliyazaru bgu.

¹⁸O zgi Ebetanya o yi Orushalima o gbu emil eha mbo.

¹⁹Nga moaEyahuda nzenze moa a ba okyku o shko Amata ta la Emeri eku ba animo, nga okyku o gbu mo eso obiŋ.

²⁰Omba ba Amata a gno ba Eyesu a ba nga, a knye a gre a yi a tsa ŋa ozhẽ, ambo Emeri a dzu eŋa odne.

²¹Amata nga a nyuŋ Eyesu a lu mi le, Adigi-odne, aŋo o wo ahe e mbi, anime a kpu mbo!

²²Ambo ame e yi, aŋo ó vẽ Ahogbrẽ ekployaŋ a mbo ohuhuhi, aŋa á shri lo á doŋ.

²³Eyesu a nyuŋ ŋa a lu mi le, Moa á kso anóŋ ongybi.

²⁴A tno ŋa ma a lu mi le, Ame e yi baŋ á ba a kso ongybi onda mi lo.

²⁵Eyesu a nyuŋ ŋa a lu mi le, Ame angyiŋ e wo Oksongybi ta la Eso. Areyaŋ a mbo la a bmi ba adlidzi pa la me, á hwiŋ eso o wo baŋ a kpu a mbo.

²⁶Areyaŋ a mbo la a wo ma, nga o wo baŋ a bmi ba adlidzi pa la me, á kpu nga mbo ku-ku. Aŋo o bmi ta la ohe lo ma?

²⁷A tno ma a lu mi le, Adigi-odne, ame e bmi! Ame e bmi boŋ angyiŋ o wo Emisiya, Anwye Ahogbrẽ, la a wo ma okyku o ba obiŋ hi.

²⁸Ambla ba Amata a lu eka he a khwo nga, a bla a gre a yi a bzi anáŋ Emeri esisi nga a nyuŋ ŋa a lu mi le, Andakʼpo a wo ahe, a zhĩ o ka boŋ.

²⁹Omba ba Emeri a gno eka he nga, a kso shoshoŋ nga a zgi a gre okyku o tsa ŋa ozhẽ.

³⁰Eyesu a gre a ba anwye osku a wo mbo, aŋa a tspi okro ba Amata a yi a ka ŋa.

³¹MoaEyahuda la a wo odne lo ta la Emeri nga a gbu ŋa eso obiŋ a ka baŋ a zgi a yi edzi moa a zgi a lu ŋa ma. Moa a ka ma o dzu mbo le ma Emeri a yi o wu okũ akaŋ ongybi.

³²Omba ba Emeri a gbu okro ba Eyesu a wo ma nga, a gbyle a kʼpu obiŋ egi ayi baŋ, nga a lu mi le, Adigi-odne, aŋo o wo ahe e mbi, anime a kpu mbo!

³³Eyesu a ka ŋa a wu okũ nga, moaEyahuda la a ba ka la ŋa a mbo a wu okũ. Eso nga e byli ŋa nga o wo ŋa ayi ekaekŋe.

³⁴Eyesu a zhĩ mo a lu mi le, Agimi e ngybi ŋa ayaŋ? Moa a tno ŋa ma a lu mi le, Adigi-odne, o ba o ka.

³⁵Eyesu nga a wu okũ.

³⁶MoaEyahuda a lu mi le, Aŋa a klo Eliyazaru a gre eshri.

³⁷Moa-kyeŋ eshki mo a zhĩ a lu mi le, Aŋa angyiŋ a hwile ayi avgayi mbo? Aŋa a kpo a gbu baŋ a nyom ŋa eku mbo?

³⁸Eso e sa e byli Eyesu, nga a gre ongybi lo. Ongybi lo o wo ehwla ba moa a kʼpa lo onmwre angyiŋ, nga moa a shki lo la ayaŋ.

³⁹Eyesu a lu mi le, Agimi e byiŋ ayaŋ e sku anyu ongybi lo! Amata anáŋ alom la a kpu lo a tno ma a lu mi le, Adigi-odne, onyuŋ ó tsom okro, okyku eshi o kpo elum enyi ba moa a ngybi ŋa a mo!

⁴⁰Eyesu a tno ŋa ma a lu mi le, Ame e lu e doŋ boŋ ó ba o ka ekʼpo ba Ahogbrẽ o wo boŋ o bmi ba adlidzi mbo?

⁴¹Moa a byiŋ ayaŋ a sku anyu ongybi lo a khwo nga Eyesu a ka ongyeŋ nga a lu mi le, Ame e vye la ŋo Ada, okyku boŋ o ngli atuŋ o gno me.

⁴²Ame e yi boŋ o la o ngli atuŋ o gno me ombamba pyeŋ, ambo ame e lu eka he okyku moarehwi la a wo ahe, okyku o da mo a bmi ba adlidzi boŋ angyiŋ o hom me otum.

⁴³Ambla baŋ a lu eka he a khwo nga, a bzi la enzi egagre a lu mi le, Eliyazaru o zgi!

⁴⁴Alom la a kpu lo a zgi la aknye moa a ngybi ŋa la alo. Alo a kpmye abgo baŋ, ta la adga baŋ, ta la eyayi baŋ. Eyesu a nyuŋ mo a lu mi le, E ngla ŋa nga e daŋ a yi eŋa.

⁴⁵MoaEyahuda nzenze la a ba a ka Emeri nga a ka ekplo ba Eyesu a kpo, moa a bmi ba adlidzi ka la ŋa.

⁴⁶Moa-kyeŋ eshki mo, moa a gre a yi a lu a da moaEfarisi eka ekplo ba Eyesu a kpo.

⁴⁷MoaEfarisi pa la moandakʼpo olu ba Ahogbrẽ a gre a yi a ka moandakʼpo la a sõ ombgu nga a zhĩ mo a lu mi le, Agi é kpo eshi eshri ayakplo egbregbre ba alom hi a la a kpo he?

⁴⁸O wo ba agi e kyu ŋa abgo e zga ototno eka he, areyaŋ a mbo á bmi ba adlidzi ka la ŋa nga moandakʼpo ba Oroma á kpo ekplokyeŋ, nga á kypi Anyuŋ-akulu bi, nga á bga gi Eyahuda!

⁴⁹Akyeŋ eshki mo eshko baŋ e ri Akayafa, aŋa angyiŋ a wo anyuŋ-andakʼpo olu ba Ahogbrẽ eyi he lo. A nyuŋ moare a lu mi le, Agimi e yi ekplokyeŋ mbo ba!

⁵⁰Eka bimi e ka, o raŋ o gre ba arekyekyeŋ sha á kpu, o sku moare ba Eyahuda pyeŋ a kpu mbo?

⁵¹Ambo a lu ohe lo ba eso baŋ angyiŋ mbo. Ambo okyku baŋ angyiŋ a wo anyuŋ-andakʼpo olu ba Ahogbrẽ eyi he lo. Aŋa a lu ohe lo eka ba are ba Ahogbrẽ a hom otum omba baŋ a lu ma Eyesu á ba a kpu okyku moaEyahuda.

⁵²Aŋa á kpu okyku moaEyahuda sha angyiŋ mbo, ambo okyku o daŋ a pla moanwye ba Ahogbrẽ la a som ayi pyeŋ a shki.

⁵³A zga onda he lo a yi osu, moandakʼpo ba Eyahuda a klo ozhẽ okyku o bga Eyesu.

⁵⁴Okyku eka he Eyesu a dzi eyayi moare ba obiŋ ba Eyahuda mbo, ambo a kso nga a gre eŋa oskukyeŋ aklakyeŋ moa a bzi lo ma Efrayimu. A dzu ahe lo pa la moanwyeotum baŋ.

⁵⁵Oriabgo ba Apaska moaEyuhuda a la a ri o wo osusku a mo. Moare nzenze a zgi ahe lo a vre a gre Orushalima okyku o da mo a nyuŋ a kpo okyku oriabgo ba Odzuesesla, o tsa ba moa a ri abgo lo.

⁵⁶MoaEyahuda a klo Eyesu, moa a pla emo a shki Anyuŋ-akulu nga a zhĩ emo a lu mi le, Agimi e ka anyu, aŋa á ba oriabgo he lo a mi?

⁵⁷Moandakʼpo olu ba Ahogbrẽ, pa la moaEfarisi a jygu odaŋ a lu mi le, Areyaŋ a mbo la a yi okro ba Eyesu a wo ma a ba a lu okyku o da mo a vu ŋa.