Read eggon Eyohana 13 Bible Online

Eyohana 13 - eggon bible

Eyohana 13

¹Omba he lo, olum Oriabgo ba Apaska o ra olum okyeŋ. Eyesu a yi ba omba o sheŋ o bli baŋ á dzu obiŋ hi á zga nga á yi okro ba Ada. A klo moa la a wo a baŋ obiŋ hi, nga oklo baŋ a wo la alo ma okyku mo, o wo okyku ma-me o tsa onda amom-abgo.

²Eyesu pa la moanwyeotum baŋ moa a wo okro oriabgo. Omba he lo Eshitaŋ e sheŋ e da Eyahuda Eskariyoti anwye Esima, a sheŋ a zga eso baŋ a ba a yla Eyesu bgu.

³Eyesu a yi ba Ada angyiŋ a shri ekʼpo lo mvye a shri a daŋ. A yi baŋ a zgi okro Ahogbrẽ angyiŋ a ba, nga baŋ á ba a bla á yi okro Ahogbrẽ.

⁴Okyku eka he Eyesu a kso a hwro ariga agre baŋ nga a kpmye otawal osi baŋ.

⁵A zhiŋ amihĩ a ygi atku ba o ndza abgo, nga a zga esi o ndza moanwyeotum baŋ adga nga a shri otawal baŋ a shri a kpmye osi, a shri a khwa mo adga.

⁶Omba baŋ a gbu eshri Esima Ebitru nga, Ebitru a zhĩ ŋa a lu mi le, Adigi-odne, aŋo o ndza adga me a mbo ko-ko?

⁷Eyesu a tno ŋa ma a lu mi le, Aŋo o yi ekplo ba ame e kpo ohuhuhi mbo, ambo aŋo ó yi lo ambla fi.

⁸Ebitru a tno ŋa ma a lu mi le, Aŋo ó ndza adga me ko mbo ku-ku! Eyesu a tno ŋa ma a lu mi le, O wo ba ame e ndza ŋo adga mbo le, aŋo ó dzu anwyeotum me nga mbo.

⁹Esima Ebitru a tno ma a lu mi le, Adigi-odne, o ndza adga me sha angyiŋ mbo, ambo o ndza eshri me, ta la adga me a mbo ko-ko!

¹⁰Eyesu a tno ŋa ma a lu mi le, Areyaŋ a mbo la a sheŋ a nglo bgu le, a mre erum mbo. Okyku eka he, o wo eheŋ-ekyeŋ baŋ a nglo nganga mbo, o wo le a ndza adga dne a mo. Agimi mvye e wo shasha o wo le akyekyeŋ sha eshki bimi a wo shasha mbo.

¹¹Eyesu a sheŋ a yi are la á ba a yla ŋa, okyku eka he angyiŋ a lu mi le, Agimi mvye e wo shasha, o wo le akyekyeŋ sha eshki bimi a wo shasha mbo.

¹²Ambla baŋ a ndza mo adga a khwo nga, a ygi ariga agre baŋ a khwo nga a gre a yi a dzu okro baŋ eteblo. Nga a zhĩ mo a lu mi le, Agimi e ka ekplo ame e kpo ohuhuhi ka la gimi e bmye?

¹³Agimi e la e bzi me Andakʼpo, ta la Adigi-odne. O wo eka he lo angyiŋ, agimi e ta akpu mbo.

¹⁴Ame e wo Adigimi-odne, ta la Andakʼpo bimi, ambo ame e ndza adga bimi ohuhuhi. Okyku eka he agimi a mbo e ndza egimi adga.

¹⁵Ame e tsa gimi ozhẽ otsa angyiŋ, okyku o da gimi e kpo eka ba ame e kpo ka la gimi.

¹⁶Ame e lu e da gimi, awaghrẽ-akyeŋ a wo la ekʼpo a gre adaŋ-odne mbo, nga anwyeadga a wo la ekʼpo a gre are la a hom ŋa otum mbo.

¹⁷Agimi e yi adlidzi ba lo, ambo agimi é gno oraŋ e gre eshri o wo bimi e kpo otum ta la adlidzi he lo!

¹⁸Ame e lu odlo eshri bimi pyeŋ angyiŋ mbo, ame e yi moare ba ame e sheŋ e sla. Ambo o dzu omgbybi ba Odlo Ahogbrẽ o bli. O lu mi le, Are la a ri algo me angyiŋ a zhiŋ a sa a klo adga me.

¹⁹Ame e lu odlo he lo e da gimi ohuhuhi, okyku o da gimi e yi lo ayga. Okyku eshi, okyku omba ba alo e kpo le, agimi e bmi ba adlidzi ba Ame Angyiŋ Le E Wo Ma.

²⁰Ame e la e lu adlidzi angyiŋ e da gimi, areyaŋ a mbo la a yga are ba ame e hom ŋa otum le, a yga me angyiŋ. Are la a yga me le, a yga are la a hom me otum.

²¹Ambla ba Eyesu a lu eka he a khwo nga, eso e byli ŋa nzenze nga a lu mi le, Ame e lu adlidzi angyiŋ e da gimi, akyeŋ eshki bimi á yla me.

²²Moanwyeotum a ka emo nga alo o so mo ayi, moa a yi are ba Eyesu a la a lu odlo eshri baŋ mbo.

²³Anwyeotum lo akyeŋ la a wo a ba eso Eyesu, a dzu a ta a ka Eyesu.

²⁴Esima Ebitru a tsa anwyeotum lo evgo nga a nyuŋ ŋa a lu mi le, O zhĩ ŋa, o lu mi le, Aŋo o lu odlo eshri ayi angyiŋ?

²⁵Nga anwyeotum a gbga a gre okro Eyesu nga a zhĩ ŋa a lu mi le, Adigi-odne, ayi angyiŋ?

²⁶Eyesu a tno mo ma a lu mi le, Are ba ame é ba e fu agbrotsa enyiŋ é shri é daŋ, aŋa angyiŋ a wo are he lo. Nga a sko agbrotsa a shri a fu lo enyiŋ nga a shri a ndba Eyahuda anwye Esima Eskariyoti.

²⁷Ambla ba Eyahuda a sko agbrotsa lo nga, Eshitaŋ e kpo otum eso baŋ. Eyesu a nyuŋ ŋa a lu mi le, O kpo ekplo boŋ o klo shoshoŋ!

²⁸Moahwõ a ka ekplo ba Eyesu a lu ka la ŋa a bmye mbo.

²⁹Abre amgbaŋ a wo abgo ba Eyahuda he lo angyiŋ. Moanwyeotum a ka ma o dzu mbo le, ma Eyesu a hom ŋa otum okyku o daŋ a yi a gbmo ayakplo ba moa a klo okyku oriabgo lo, o mbo le ma o dzu mbo ma Eyesu a daŋ a shri ekplokyeŋ a shri a kom moaekŋe angyiŋ.

³⁰Eyahuda a yga agbrotsa lo a khwo nga a zgi shoshoŋ. Omba he lo o wo okyukyku.

³¹Ambla ba Eyahuda a sheŋ a gre nga, Eyesu a lu mi le, ohuhuhi moa á ka ayimom esesla ba Anwye Arehwi. Moa a ka ayimom esesla ba Ahogbrẽ okyku ŋa angyiŋ.

³²O wo ba moa a ka ayimom esesla ba Ahogbrẽ okyku na angyiŋ le, Ahogbrẽ eshrishri eŋa a mbo á da mo a ka ayimom esesla ba Anwye Arehwi lo. Aŋa á ngli ku-ku mbo.

³³Agimi anwye me, ame é dzu ka la gimi nzenze nga mbo. Agimi é klo me. Ame e lu ekplo ba ame e lu pa la moaEyahuda angyiŋ ka la gimi ohuhuhi. Agimi e yi okro ba ame e yi lo e gbu mbo.

³⁴Ame e shri odaŋ olohe angyiŋ e shri e da gimi, agimi e klo egimi. Eka ba ame e klo gimi, agimi a mbo e klo egimi.

³⁵O wo ba agimi e wo la oklo ma okyku egimi le, moare mvye moa á yi ba agimi e wo moanwyeotum me.

³⁶Esima Ebitru a zhĩ Eyesu a lu mi le, Adigi-odne, aŋo ó yi ayaŋ? Eyesu a tno ŋa ma a lu mi le, Aŋo ó kpo ó gbu boŋ o lu me ma nga o yi okro lo ohuhuhi mbo, o wo le ambla dne aŋo ó ba o lu me ma.

³⁷Ebitru a zhĩ ŋa a lu mi le, Adigi-odne, eshi é ba e nyom me o lu ŋo ma ohuhuhi? Ame é shri eshri me é di okyku o kpu okyku ŋo!

³⁸Eyesu a zhĩ ŋa a lu mi le, Aŋo ó shri eshri boŋ ó di okyku o kpu okyku me adlidzi angyiŋ? Ame e lu adlidzi e doŋ, engo é tko ayga aŋo ó kpo evom me engyi etra mbo.