Read eggon Eyohana 16 Bible Online

Eyohana 16 - eggon bible

Eyohana 16

¹Eyesu a lu mi le, Ame e lu e da gimi okyku o da gimi e tsu e gbu mbo.

²Moa á se gimi á sku eshki mo. Nga omba ó yi ó ba ba areyaŋ a mbo la a bga gimi, baŋ á ba a ka ma aŋa a kpo lo okyku Ahogbrẽ angyiŋ.

³Moa á kpo gimi edgu ayakplo he lo okyku ba moa a yi Ada o mbo le okyku ba moa a yi me mbo.

⁴Ame e lu he lo e da gimi okyku omba ba moa a kpo gimi edgu ayakplo he lo, o da gimi e tne aga e fu ma. Ame e lu odlo he lo e da gimi oriori mbo okyku ba ame e yi e wo ka la gimi.

⁵Ambo ohuhuhi ame é yi okro ba are la a hom me otum a wo ma, ambo arekyeŋ eshki bimi a zhĩ me okro ba ame e yi mbo.

⁶Ohuhuhi okyku ba ame e lu e da gimi e khwo nga, eso e tpi gimi ayi.

⁷Ame e lu adlidzi angyiŋ e da gimi, o raŋ o gre ba ame e yi, okyku eshi o wo ba ame e gre mbo le, agimi é hwiŋ Okpoghwo lo mbo. O wo ba ame e gre le, ame é daŋ a ba.

⁸Omba baŋ a ba bgu le, á tsa moarehwi obiŋ hi akpu mo eshri odlobi. Nga á da mo a ka odlodzi ta la ombgu ba Ahogbrẽ a bmye.

⁹Moa a ta akpu eshri odlobi okyku eshi moa a bmi ba adlidzi pa la me mbo.

¹⁰Moa á ka odlodzi lo á bmye okyku eshi ame é yi ibu ba Ada, nga moa á ka me nga mbo.

¹¹Aŋa á da mo a ka ombgu ba Ahogbrẽ a bmye okyku eshi moa a sheŋ a sõ areŋ obiŋ hi ombgu bgu.

¹²Ayakplo a yi a ra nzenze ba ame e lu e da gimi, ambo o wo ewu o gre eshri bimi e ka lo e bmye.

¹³Ambo omba ba Ogbgaodzi ba adlidzi o ba le, ó tsa gimi adlidzi ba ekplo-yaŋ a mbo. Á lu odlo eshrishri eŋa angyiŋ mbo, ambo á lu ekplo baŋ a gno angyiŋ á ba a da gimi. Á lu odlo eshri ayakplo la á ba a kpo.

¹⁴Aŋa á da moare a ka me la ekekʼpo, okyku eshi aŋa á lu otum ba ame e hom ŋa angyiŋ á ba a da gimi.

¹⁵Ekployaŋ a mbo ba Adugu a wo la alo ma e wo e me angyiŋ. Okyku eka he ame e lu mi ma Ogbgaodzi lo á lu otum ba ame e hom ŋa angyiŋ ó ba o da gimi.

¹⁶Ambla fi nga agimi é ka me nga mbo, ambla fi nga agimi é sa é ka me.

¹⁷Moakyeŋ eshki moanwyeotum baŋ a zhĩ moahwõ a lu mi le, Ekplo baŋ a lu hi e wo eshi? A nyuŋ gi a lu mi le, Ambla fi ma agi é ka ŋa mbo, ma ambla fi nga ma agi é ka ŋa. Nga aŋa a sa a lu mi le, O wo eka he okyku eshi ame é yi okro ba Ada a wo ma.

¹⁸Moa a zhĩ a lu mi le, Eshi angyiŋ e wo ambla fi he lo? Agi e yi ekplo baŋ a lu odlo eshri lo mbo!

¹⁹Eyesu a yi ba moa a klo o zhĩ ŋa odlo eshri lo, okyku eka he a nyuŋ mo a lu mi le, Ame e lu mi ma ambla fi ma agimi é ka me mbo, nga ma ambla fi ma agimi é ka me. Agimi e la e zhĩ he lo angyiŋ ta la egimi?

²⁰Ame e lu adlidzi angyiŋ e da gimi, agimi é wu okũ ambo obiŋ hi ó gno oraŋ. Agimi é wo la esõ-etpiayi, ambo é zhiŋ é dzu ognoraŋ.

²¹Omba ba ashe a mbre le, a la a gno oraŋ mbo okyku eshi omba ewu baŋ angyiŋ o wo he lo. Ambo ambla baŋ a mbre anwye a khwo bgu, aŋa a la a gre eso ewu baŋ a kpo a ghre, okyku eshi aŋa a gno oraŋ ba moa a mbre anwye a ba edzi.

²²O wo eka he angyiŋ ka la gimi. Ohuhuhi agimi e gno oraŋ mbo, ambo ame é ka gimi nganga, omba he lo ovye ó bli eso bimi. Edgu ovye he lo, arekyeŋ a kpo a gbu baŋ a ngʼba lo a sku gimi a gbu mbo.

²³Omba mi lo o ba bgu le, agimi é vẽ me ekplokyeŋ mbo. Ame e lu adlidzi angyiŋ e da gimi, okyku eshi agimi e wo moanwyeotum me angyiŋ, Ada á shri ekployaŋ a mbo ba agimi e vẽ ŋa á da gimi.

²⁴Ma-me o ta ohuhuhi, agimi e vẽ ekplokyeŋ eshko me mbo. Agimi e vẽ, agimi é hwiŋ, okyku o da gimi e bli la ovye.

²⁵Ame e lu odlo he lo e da gimi la egŋe nzenze. Ambo omba ó yi ó ba ba ame é ba e kpo otum la egŋe nga mbo. Ambo ame é lu odlo pendeŋ angyiŋ eshri Ada ka la gimi a mo.

²⁶Omba mi lo o ba bgu le, agimi é vẽ ŋa eshko me, ambo ame e lu ba ame angyiŋ é ba e vẽ ŋa okyku gimi mbo,

²⁷okyku eshi Ada a klo gimi. A la a klo gimi okyku eshi agimi e la e klo me, nga agimi e bmi ba adlidzi ba ame e zgi okro ba Ahogbrẽ angyiŋ e ba.

²⁸Ame e zgi okro Ahogbrẽ angyiŋ e ba obiŋ hi, nga ohuhuhi ame é dzu obiŋ hi é zga nga é bla é yi okro ba Ada.

²⁹Moanwyeotum baŋ nga a nyuŋ ŋa a lu mi le, O ka a mo, o bli boŋ o yi o lu odlo pendeŋ nga la egŋe mbo ayga hi.

³⁰Agi e yi ohuhuhi boŋ o yi ekployaŋ a mbo, aŋo o klo ba arekyeŋ a zhĩ ŋo ekplokyeŋ eshri ba odlo lo mbo. Ohe lo o tsa gi o da gi e bmi ba adlidzi boŋ o zgi okro Ahogbrẽ angyiŋ o ba.

³¹Eyesu a zhĩ a lu mi le, Ohuhuhi agimi e bmi ba adlidzi?

³²Omba o yi ó ba, o sheŋ o ba bgu, agimi mvye moa á sla gimi ayi, areyaŋ a mbo á yi eŋa odne baŋ, nga agimi é dzu me é zga ambambga. Ambo ame e wo ambambga angyiŋ mbo okyku eshi Ada a wo pa la me.

³³Ame e lu ohe lo e da gimi okyku o da gimi e hwiŋ opyapyaŋ ba eso okro me. O ka, obiŋ hi ó kpo gimi ewu, ambo agimi e ghwo eso! Ame e sheŋ e kpo e gre obiŋ hi bgu!