Read eggon Eyohana 19 Bible Online

Eyohana 19 - eggon bible

Eyohana 19

¹Ambla he nga Ebilatu a da mo a bga Eyesu andzu.

²Moanwyeakyuŋ a ngybi azhli ba ezga a shri a zga ŋa eshri. Nga moa a ygi ŋa ariga la a wo abme mlemle.

³Nga moa a kye a ba okro baŋ nga moa a nyuŋ ŋa a lu mi le, Aŋo Anyuŋ-areŋ moaEyahuda, o ri edzi obiŋ hi! Moa a gre nga moa a taŋ ŋa andzu.

⁴Ebilatu a zgi edzi nga a nyuŋ eshki a lu mi le, Agimi e gno, ame é shri ŋa é ba okro bimi okyku o da gimi e yi ba ame e hwiŋ akpukyeŋ okro baŋ mbo.

⁵Eyesu a zgi edzi la azhli ba ezga eshri baŋ ta la ariga la a wo abme mlemle egʼba baŋ. Ebilatu a nyuŋ mo a lu mi le, E ka! Alom lo a wo ahi!

⁶Omba ba moandakʼpo olu ba Ahogbrẽ pa la moa la a kʼpu a ka ŋa nga, moa a ta akhi a lu mi le, E gŋe ŋa egŋe aki! E gŋe ŋa egŋe aki! Ebilatu a nyuŋ mo a lu mi le, O wo eka he bgu le, agimi e vu ŋa e gŋe ŋa egŋe aki. Ambo ame e hwiŋ akpukyeŋ ka la ŋa moa a bga ŋa mbo.

⁷MoaEyahuda a tno ma a lu mi le, Agi e wo la odaŋ la o bmi moa a bga ŋa okyku baŋ a sko eshri baŋ a zga Anwye Ahogbrẽ.

⁸Omba ba Ebilatu a gno eka he nga, eyli e kpo ŋa e ta ma-ma.

⁹A bla a gre ekpazhi baŋ nga a zhĩ Eyesu a lu mi le, Aŋo o zgi ayaŋ o ba? Ambo Eyesu a tno ŋa ma mbo ku-ku.

¹⁰Ebilatu a nyuŋ ŋa a lu mi le, Aŋo o tno me ma mbo? O ka, ame e wo la ekʼpo ma ba ame e kyu ŋo abgo, nga ame e sa e wo la ekʼpo ma ba ame e gŋe ŋo egŋe aki.

¹¹Eyesu a tno ŋa ma a lu mi le, Aŋo o wo la ekʼpo eshri me, okyku eshi Ahogbrẽ angyiŋ a shri lo a shri a doŋ. Okyku eka he are la a vu me a shri a doŋ angyiŋ a kpo anyuŋ odlobi la o gre pyeŋ.

¹²Omba ba Ebilatu a gŋo eka he nga, a zga eso ba o kyu ŋa abgo. Ambo MoaEyahuda a ta akhi a lu mi le, O wo boŋ o kyu ŋa abgo tli le, aŋo o wo akyeŋazba ba Ekeza angyiŋ mbo! Areyaŋ a mbo la a sko eŋa a zga anyuŋ-areŋ le a wo afpu Ekeza angyiŋ!

¹³Omba ba Ebilatu a gno edgu odlo he nga, a da Eyesu a zgi edzi, nga Ebilatu a dzu emgbakyiŋ ba osõmbgu la e wo ibu ba moa a bzi lo la olom moaEyahuda ma Egabata.

¹⁴Ohe lo o kpo olulum onda oha ba moa á ri abgo ba Apaska. Ebilatu a nyuŋ moaEyahuda a lu mi le, E ka anyuŋ-areŋ bimi!

¹⁵Moa a ta akhi a lu mi le, E bga ŋa! E bga ŋa! E gŋe ŋa egŋe aki! Ebilatu a zhĩ mo a lu mi le, Agimi e klo ba ame e gŋe anyuŋ-areŋ bimi egŋe aki? Moandakʼpo olu ba Ahogbrẽ a tno ma a lu mi le, Ekeza sha angyiŋ a wo anyuŋ-areŋ bi!

¹⁶Ambla he nga Ebilatu a shri Eyesu a da mo okyku o gŋe ŋa egŋe aki. Okyku eka he moa a kʼpu Eyesu.

¹⁷A zgi la egŋe aki baŋ. Aŋa angyiŋ a shri lo a gre Okro ba Amgbatku Eshri. La olom moaEyahuda moa a la a bzi lo ma Oglogota.

¹⁸Moa a gŋe ŋa egŋe aki ahe lo angyiŋ. Moa a gŋe moare aha egŋe aki ka la ŋa. Ahwõ a wo evom ahwõ, ahwõ a wo evom ahwõ. Eyesu a wo agʼbaha mo.

¹⁹Ebilatu a ta engla a da mo a bre lo egŋe aki. A ta a lu mi le, Eyesu ba Anazarata Anyuŋ-areŋ moaEyahuda.

²⁰MoaEyahuda nzenze a tsi lo a ka, okyku eshi okro ba moa a gŋe Eyesu egŋe ma lo o gyuŋ ta la osku lo mbo. Moa a ta engla la olom moaEyahuda ta la olom moaOroma, ta la olom moaEgrise.

²¹MoaEyahuda la a wo moandakʼpo olu ba Ahogbrẽ, a nyuŋ Ebilatu a lu mi le, Aŋo e mbi o ta o lu mi le, Anyuŋ-areŋ moaEyahuda mbo, ambo e mbi aŋo o ta o lu mi le, Alom hi a lu mi le, Ame angyiŋ e wo Anyuŋ-areŋ moaEyahuda.

²²Ebilatu a tno mo ma a lu mi le, Ekplo ba ame e sheŋ e ta, ame é nyiŋ lo nga mbo.

²³Ambla moanwyeakyuŋ a gŋe Eyesu egŋe aki a khwo nga, moa a tslo aknye baŋ a gʼba lo egʼba enyi, nga ayaŋ a mbo eshki moa anyi lo a sko ogʼba baŋ. Moa a sko anyuŋ ariga la a wo ashye akyekyeŋ, moa a pme lo mbo.

²⁴Moanwyeakyuŋ lo a nyuŋ emo a lu mi le, Agi e dle lo mbo, ambo agi e fye emvye eshri lo okyku o da gi e ka are la á ba a ri lo. Ohe lo o kpo okyku o bli ekplo ba Odlo Ahogbrẽ o lu. O lu mi le, Moa á gʼba anzho me ta la emo. Moa á fye emvye okyku anyuŋ ariga me. Moanwyeakyuŋ a kpo eka he lo.

²⁵Anaŋ Eyesu ta la anáŋ anaŋ Eyesu alashle, ta la Emeri ashe Okilopa, ta la Emeri Amagadaliya, moa a tspi osusku ta la okro ba moa a gŋe Eyesu egŋe aki ma.

²⁶Eyesu a ka anaŋ, ta la anwyeotum la a wo a ba eso baŋ, moa a tspi ahe lo. Nga Eyesu a nyuŋ anaŋ a lu mi le, Ashe, o ka anwye boŋ he.

²⁷Nga a zhiŋ a nyuŋ anwyeotum he lo a lu mi le, O ka anoŋ. A zga omba he lo nga, anwyeotum he lo a daŋ a gre a yi a dzu ka la ŋa odne baŋ.

²⁸Eyesu a yi ba omba he lo ekployaŋ a mbo e sheŋ e bli bgu. Okyku o da ekplo ba Odlo Ahogbrẽ o lu e bli, a lu mi le, Oŋo o kpo me.

²⁹Eshyẽ ami e wo ahe lo. Ami abza la a wo amgbaŋ nzenze mbo a bli lo. Moa a ghwo asusku ami lo nga moa a tpi lo aki ba ehespo nga moa a shri lo a ghwo ŋa anyu.

³⁰Eyesu a wa lo a khwo nga a lu mi le, Alo o khwo Ambla he nga a gbyle eshri baŋ nga a kpu.

³¹MoaEyahuda a vẽ Ebilatu okyku o daŋ a bmi a da mo e buŋ adga moarehwi ba moa a gŋe mo egŋe aki okyku o da me a gile mo a ba obiŋ. Moa a kpo eka he okyku eshi olum onda he lo o wo Ojuma angyiŋ. Nga moa a klo ba ekom e dzu egŋe aki onda ba Asabat mbo, okyku eshi Asabat he lo a wo anyuanyuŋ angyiŋ.

³²Okyku eka he nga moanwyeakyuŋ a gre a yi a buŋ adga ba are ba oriori a khwo nga moa a gre a yi a buŋ adga are ba oha. Moa a gŋe mo egŋe aki ta le Eyesu otsotse.

³³Ambo omba ba moa a gbu okro Eyesu moé a hwiŋ ŋa a sheŋ a kpu bgu, okyku eka he moa a buŋ adga baŋ o ko mbo.

³⁴Ambo akyeŋ eshki moanwyeakyuŋ a fu Eyesu etazhi evom, nga ebuebu amanzhli, ta la ami a zgi.

³⁵Are la a ka ekplo la e kpo he lo, a zgi egŋe eshri lo. Agi e yi ba ekplo baŋ a lu he lo e wo adlidzi angyiŋ. Aŋa eshrishri eŋa a yi baŋ a lu adlidzi angyiŋ, okyku o da gimi a mbo e bmi ba adlidzi.

³⁶Ohe lo o kpo okyku o bli ekplo ba Odlo Ahogbrẽ o lu. O lu mi le, Moa á buŋ akʼpu baŋ akyeŋ a mbo mbo.

³⁷Odlo Ahogbrẽ o sa o lu okrokyeŋ o lu mi le, Moare á ka are ba moa a fu ŋa etazhi.

³⁸Ambla he nga Oyusufu la a wo a ba osku ba Arimatiya a yi a vẽ Ebilatu okyku o daŋ a sko okom Eyesu. Oyusufu a wo a la a lu Eyesu ma angyiŋ, ambo a ghre eshri baŋ okyku eyli ba moaEyahuda. Ebilatu a bmi a daŋ, okyku eka he Oyusufu a gre a yi a sko lo.

³⁹Enikodimo la a gre ibu ba Eyesu okyukyku ombakyeŋ, a gre ta la Oyusufu. A shri awargi la a shka efpi. Alo a wo alaba endgaekyeŋ. Moa a kpo lo la emri ta la aloso.[1]

⁴⁰Moarehwi aha he lo a sko okom Eyesu nga moa a bʼbu lo oknye okyekyle, moa a shri awargi a ygi oknye lo. MoaEyahuda a la a kpo ta la okom eka he ayga a ngybi lo.

⁴¹Agbikyeŋ a wo osusku ta la okro ba moa a gŋe Eyesu egŋe aki ma. Ongybi ba moa a ngybi arekyeŋ ma a ka mbo o wo agbi he lo.

⁴²Onda he lo o wo Ojuma angyiŋ. Onda oha nga o wo Asabat ba moaEyahuda. Okyku eka he moa a gre a yi a ngybi Eyesu ongybi la o wo osusku he lo.