Read eggon Eyohana 2 Bible Online

Eyohana 2 - eggon bible

Eyohana 2

¹Ambla ba elum eha nga, moa a kpo abgo anwyeshe osku ba Akana obiŋ ba Egalili. Omba he lo, anaŋ Eyesu a ba okyku o ri abgo.

²Nga moa a da Eyesu pa la moanwyeotum baŋ a mbo a gre okyku o ri abgo.

³Ambla ba ami anab a khwo nga, anaŋ Eyesu a gre okro baŋ a nyuŋ ŋa a lu mi le, O ka, ami anab a khwo.

⁴Eyesu a tno anaŋ ma a lu mi le, Ashe, aŋo o dzu tki ayga, omba me o kpo a wo mbo.

⁵Anaŋ Eyesu a nyuŋ moanwye-odne lo a lu mi le, Ekployaŋ a mbo baŋ a lu a da gimi, agimi e kpo lo.

⁶MoaEyahuda, moa a wo la edgu odzudzukyeŋ ba moa a la a ndza adga ta la abgo omba orialgo. Okyku eka he, moa a shri ashyẽ afĩ a shki okyku lo. Ashyẽ akyeŋ a sko eka agalo ekʼpoeha, o mbo le ekʼpoetra.

⁷Eyesu a nyuŋ moanwye-odne a lu mi le, Agimi e bli ashyẽ afĩ he lo la amihĩ. Moa a bli lo slu la amihĩ.

⁸Ambla fi nga aŋa a nyuŋ mo a lu mi le, Agimi e kpo ami lo e shri e kom andakʼpo ba eshki. Moa a kpo lo a kom ŋa.

⁹Nga andakʼpo he lo a vu amihĩ la a zhiŋ a dzu ami anab a ka. A yi okro ba moa a shri ami anab lo ma mbo, ambo moanwye-odne la a fu ami a bli ashyẽ, moa a yi.

¹⁰Ambla he nga aŋa a bzi alom anwyeshe lo, nga a lu mi le, Areyaŋ a mbo a la a shri ami anab adzi angyiŋ a shri a da moazhẽ ori, nga ambla ba moa a wa a wyo nga, moa a la a shri ami anab la a wo ekayaŋ a mbo a shri a ba. Aŋo o kpo eshi o shri ami anab adzi o ghre nga o yi o se lo ohuhuhi ayga?

¹¹Ohi lo angyiŋ o wo ekplo egbregbre ba oriori ba Eyesu a zga esi a kpo osku ba Akana obiŋ ba Egalili. A da moare a ka ekʼpo baŋ ahe lo. Moanwyeotum baŋ nga a bmi ba adlidzi osheshye ka la ŋa.

¹²Ambla ba moa a kso ahe nga, Eyesu ta la anaŋ pa la moanáŋ, pa la moanwyeotum baŋ, moa a gre Akafanahum. Moa a dzu ahe lo okyku elum ple.

¹³Omba ba oriabgo moaEyahuda o wo osusku a mo. Abgo lo moa a bzi lo ma Apaska. Okyku eka he Eyesu a gre Orushalima.

¹⁴Eyesu a gre Anyuŋ-akulu eshyẽ nga, a ka moare a la a shri andu ta la ékylu, ta la áklungu, moa a la a shri a gbmo. Nga a ka moa a la a nyiŋ amgbaŋ a dzu obiŋ eteblo mo, a la a nyiŋ amgbaŋ.

¹⁵Eyesu a kpo omgbom nga a se andu, ta la ékylu a sku Anyuŋ-akulu lo. Nga a zhiŋ eteblo moare la a la a nyiŋ amgbaŋ a ta obiŋ, nga amgbaŋ mo a sla ayi.

¹⁶Eyesu a nyuŋ moare la a shri áklungu a gbmo a lu mi le, E se lo e sku okro he. E da odne Adugu o dzu ekyku mbo!

¹⁷Moanwyeotum baŋ moa a tne aga ekplo ba Odlo Ahogbrẽ o lu mi le, Ahogbrẽ, ame e wo la oklo ma eso me okyku odne boŋ o gre eshri.

¹⁸MoaEyahuda a ba okro baŋ nga moa a zhĩ ŋa a lu mi le, Aŋo ó kpo ekplo egbregbreyaŋ angyiŋ okyku o tsa gi ba Ahogbrẽ angyiŋ a shri ekʼpo a doŋ o kpo eka he?

¹⁹Eyesu a tno mo ma a lu mi le, Agimi é kypi Anyuŋ-akulu hi, nga ame é sa é bla alo é mbdzi elum etra.

²⁰Moa a gno eka he nga moa a zhĩ ŋa a lu mi le, Aŋo ó mbdzi Anyuŋ-akulu hi elum etra? O ka, moa a mbdzi lo eyi ekʼpoenyi la efĩ!

²¹Omba ba Eyesu a lu odlo eshri Anyuŋ-akulu, a lu odlo eshri egʼba baŋ angyiŋ.

²²Okyku eka he omba ba Eyesu a kso ongybi, moanwyeotum baŋ a tne aga eka baŋ a lu odlo he lo, nga moa a bmi ba adlidzi ta la Odlo Ahogbrẽ, ta la ekplo ba Eyesu a lu.

²³Omba ba Eyesu a wo Orushalima omba abgo ba Apaska, moare nzenze a bmi ba adlidzi ka la ŋa okyku ayakplo egbregbre baŋ a la a kpo.

²⁴Ambo Eyesu a bmi ba adlidzi ta la moare mbo okyku eshi aŋa a yi eso mo.

²⁵O wo eheŋ-ekyeŋ ba arekyeŋ angyiŋ a tsa ŋa edgu eda moarehwi mbo okyku eshi aŋa a yi edgu aga la a wo eso mo.