Read eggon Eyohana 20 Bible Online

Eyohana 20 - eggon bible

Eyohana 20

¹Endigigiŋ onda Aladi bibibli, Emeri Amagadaliya a gre ongybi lo nga a ka moa a sheŋ a byiŋ ayaŋ a sku anyu ongybi lo.

²Aŋa a knye a gre okro Esima Ebitru ta la anwyeotumakyeŋ, ahi lo angyiŋ a wo a ba eso ba Eyesu. Emeri a nyuŋ mo a lu mi le, Moa a sko Adigi-odne a sku ongybi, nga agi e yi okro moa a shri ŋa a zga ma mbo!

³Ambla he nga Ebitru ta la anwyeotum he lo moa a zgi a gre ongybi lo.

⁴Moaha he lo a knye oŋe, ambo anwyeotum ahwõ a knye a gre Ebitru nga a gbu ongybi lo a sku ŋa.

⁵A gbyle nga a ka aknye la a wo akyekyle, ambo a gre ongybi lo eshyẽ mbo.

⁶Esima Ebitru a ba nga a gre ongybi lo eshyẽ. Aŋa a ka aknye la a wo akyekyle a lom ma eshyẽ,

⁷ta la oknye ba moa a bʼbu Eyesu eshri. Oknye he lo o lom ta la aknye la a wo akyekyle lo mbo, ambo o dzu dzẽ.

⁸Ambla he nga anwyeotum ahwõ la a ba ori, a gre ongybi lo eshyẽ, a ka nga a bmi ba adlidzi.

⁹Ekakahelo a mbo, moa a ka Odlo ba Ahogbrẽ la o lu ma o dzu omgbybi baŋ á ba a kso ongybi a bmye mbo.

¹⁰Ambla he nga moanwyeotum lo a bla a gre odne.

¹¹Emeri a tspi akaŋ ongybi lo nga a wu okũ. Omba baŋ a la a wu okũ nga, a gbyle nga a kpyi eyi a ka ongybi lo eshyẽ.

¹²A ka moanwyeadga ba Ahogbrẽ aha. Moa a ygi ariga akyle. Moa a dzu okro ba moa a shri okom Eyesu a shri a zga ma. Akyeŋ a dzu egi eshri, nga ahwõ a dzu egi adga.

¹³Moanwyeadga ba Ahogbrẽ a zhĩ ŋa a lu mi le, Ashe, okyku eshi aŋo o wu okũ? A tno mo ma a lu mi le, Okyku eshi moa a sko Adugu-odne a yi a zga okrokyeŋ. Ame e yi okro moa a shri ŋa a zga ma mbo!

¹⁴Ambla baŋ a lu eka he a khwo nga, a zhiŋ nga a ka Eyesu a tspi okro lo. Ambo a yi ba are lo a wo Eyesu mbo.

¹⁵Eyesu a zhĩ ŋa a lu mi le, Ashe, okyku eshi aŋo o wu okũ? Aŋo o klo ayi angyiŋ? Emeri a ka ma o dzu mbo ma alom lo a wo areagbi angyiŋ. Okyku eka he a vẽ a lu mi le, Andakʼpo o wo boŋ o sko ŋa o yi o ghre le, o tsa me okro boŋ o shri ŋa o zga ma, okyku o da me e yi e sko ŋa.

¹⁶Eyesu a nyuŋ Emeri a lu mi le, Emeri! Emeri a zhiŋ a gre egi baŋ, nga a lu odlo la olom ba Eyahuda a lu mi le, Eraboni, o dzu, Are la a nye.

¹⁷Eyesu a nyuŋ Emeri a lu mi le, O tka me mbo okyku eshi ame e bla e gre okro Ada a wo mbo. Ambo aŋo o yi okro moanime o nyuŋ mo o lu mi le, Ame é bla é yi okro Adugu la a wo Adigimi a mbo, aŋa a wo Ahogbrẽ me, nga a sa a wo Ahogbrẽ bimi a mbo.

¹⁸Emeri Amagadaliya a nyuŋ moanwyeotum baŋ, baŋ a ka Adigi-odne, nga baŋ angyiŋ a hom ŋa otum.

¹⁹La olum-ore pyi onda Aladi, moanwyeotum moa a ple emo a shki aku nga, moa a klu ayizhẽ okyku eshi moa a kpo eyli moaEyahuda. Omba he lo nga, Eyesu a gnyu a ba a tspi agʼbaha mo nga a lu mi le, Opyapyaŋ ba eso o dzu ka la gimi.

²⁰Ambla baŋ a lu odlo eka he pa la mo a khwo nga, a tsa mo abgo baŋ ta la evom baŋ. Moanwyeotum a kpo ovye a gre eshri omba ba moa a ka Adigi-odne.

²¹Eyesu a lu pa la mo a lu mi le, Opyapyaŋ ba eso o dzu ka la gimi. Eka ba Ada a hom me otum angyiŋ, ame a mbo e hom gimi otum.

²²A lu odlo eka he a khwo nga a hlu ayaŋ baŋ a ygi mo nga a lu mi le, Agimi e yga Ogbgaodzi.

²³O wo bimi e kyu moare abgo odlobi mo le, moa á kyu mo abgo odlobi mo, ambo o wo bimi e kyu mo abgo odlobi mo mbo le, moa á kyu mo abgo odlobi mo mbo.

²⁴Akyeŋ eshki moanwyeotum, eshko baŋ e ri Otoma, eshko ba oha baŋ e ri Ahli. A wo pa la mo omba ba Eyesu a ba mbo.

²⁵Moanwyeotum ahwõ a nyuŋ ŋa a lu mi le, Agi e ka Adigi-odne! Otoma a tno mo ma a lu mi le, O wo ba ame e ka ero okusa abgo baŋ nga ba ame e ghwo evgo me ma, nga ba ame e ghwo obgo me evom baŋ mbo le, ame é bmi ba adlidzi mbo.

²⁶Ambla ba asati akyeŋ nga, moanwyeotum a shki otsotse odne, Otoma nga a wo otsotse pa la mo. Ayizhẽ pyeŋ moa a klu lo, ambo Eyesu a gre aku lo eshyẽ nga a tspi agʼbaha mo. A nyuŋ mo a lu mi le, Opyapyaŋ ba eso o dzu ka la gimi.

²⁷A nyuŋ Otoma a lu mi le, Aŋo o ghwo evgo boŋ ma nga o ka abgo me, nga o ghwo obgo boŋ evom me. O kyu ofueha abgo nga o bmi ba adlidzi!

²⁸Otoma a tno ma a lu mi le, Aŋo o wo Adugu-odne ta la Ahogbrẽ me!

²⁹Eyesu a sa a zhĩ ŋa a lu mi le, Aŋo o bmi ba adlidzi okyku boŋ o ka me angyiŋ? Moa la a bmi ba adlidzi pa la me, ambo ba moa a ka me ondakyeŋ mbo, moa a wo la ovye ma nzenze!

³⁰Eyesu a kpo anyuŋ ayakplo egbregbre nzenze egi ayi moanwyeotum baŋ, ambo moa a ta lo akpa hi mbo.

³¹Moa a ta ayakplo hi okyku o da gimi e ka e bmye ba Eyesu angyiŋ a wo Emisiya, Anwye Ahogbrẽ, nga okyku o da gimi e hwiŋ eso eshko baŋ okro obmi ba adlidzi.