Read eggon Eyohana 21 Bible Online

Eyohana 21 - eggon bible

Eyohana 21

¹Ambla he nga Eyesu a da moanwyeotum baŋ a sa a ka ŋa atam ba Etebiriya. Eka baŋ a ra a tspa pa la mo a mi.

²Esima Ebitru ta la Otoma ba eshko baŋ ehwõ e ri Ahli, ta la Enataniyelu, ahi lo a zgi Akana obiŋ ba Egalili, ta la moanwye ba Azabadi, ta la moanwyeotumakyeŋ aha ba Eyesu a wo pa la mo.

³Esima Ebitru a nyuŋ moahwõ a lu mi le, Ame e yi e kpo atsa. Moahwõ a mbo a nyuŋ ŋa a lu mi le, Agi a mbo é yi ka la ŋo. Moa a gre a yi a gre amgblami. Okyukyku he lo moa a vu emakyeŋ tsi a mbo mbo.

⁴Omba ba etne e zgi nga, Eyesu a ba a tspi akaŋ atam lo, ambo moanwyeotum a yi baŋ a wo Eyesu angyiŋ mbo.

⁵A zhĩ mo a lu mi le, Agimi ola anwye, agimi e vu emakyeŋ mbo? Moa a tno ŋa ma a lu mi le, Agi e vu emakyeŋ mbo ku-ku.

⁶A nyuŋ mo a lu mi le, Agimi e ndba ekyeŋ bimi e ta agba ba obgori ba amgblami nga agimi é vu atsa. Moa a ndba ekyeŋ a ygi a khwo nga moa a dra lo a gbu nga mbo okyku ba atsa a wo ma nzenze.

⁷Anwyeotum la a wo a ba eso Eyesu a nyuŋ Ebitru a lu mi le, Alom he lo a wo Adigi-odne angyiŋ! Omba ba Esima Ebitru a gno ba alom lo a wo Adigi-odne angyiŋ nga, a sko ariga agre baŋ a kpmye egʼba nga a gre ami. Omba he lo a ygi emakyeŋ egʼba baŋ mbo.

⁸Moahwõ eshki moanwyeotum moa a gre oshyi amgblami, nga moa a dra ekyeŋ la atsa a bli lo. A zga okro he lo a yi oshyi a wo eka abgo endgaeha sha.

⁹Omba ba moa a gbu oshyi nga moa a ka ovo o shum, nga moa a ka atsa ta la agbrotsa a shki ovo lo.

¹⁰Eyesu a nyuŋ mo a lu mi le, Agimi e fa atsa bimi e vu ohuhuhi e shri e ba.

¹¹Esima Ebitru a gre amgblami nga a dra ekyeŋ a ba oshyi. E bli la anyuŋ atsa endga la ekʼpoetno la atra. O ba alo a wo nzenze, ambo ekyeŋ e dle mbo.

¹²Eyesu a nyuŋ mo a lu mi le, Agimi e ba e ri algo. Akyeŋ a mbo eshki moanwyeotum a kpo a gbu baŋ a zhĩ ŋa la ma aŋa a wo ayi mbo okyku eshi moa a yi baŋ a wo Adigi-odne angyiŋ.

¹³Eyesu a gre nga a sko agbrotsa a shri a da mo, nga a sa a shri atsa a da mo.

¹⁴Ohe lo angyiŋ o wo odgo otra ba Eyesu a shri eŋa a tsa moanwyeotum ambla ba moa a kso ŋa ongybi.

¹⁵Ambla ba moa a ri algo a khwo nga, Eyesu a nyuŋ Esima Ebitru a lu mi le, Esima, aŋo anwye Eyohana, aŋo o klo me o gre moahwõ? Ebitru a tno ma a lu mi le, E, Adigi-odne. Aŋo a mbo o yi ba ame e klo ŋo. Eyesu a nyuŋ ŋa a lu mi le, O kpaŋ anwye ékylu me.

¹⁶Eyesu a sa a zhĩ Ebitru a lu mi le, Esima, aŋo anwye Eyohana, aŋo o klo me? Ebitru a tno ma a lu mi le, E, Adigi-odne, aŋo a mbo o yi ba ame e klo ŋo. Eyesu a nyuŋ ŋa a lu mi le, O kpaŋ ékylu me.

¹⁷Eyesu a sa a zhĩ ŋa odgo otra a lu mi le, Esima, aŋo anwye Eyohana, aŋo o klo me? Alo o kpo Ebitru ewu eso okyku ba Eyesu a zhĩ ŋa odgo otra a lu mi le, Aŋo o klo me? Ebitru a tno ŋa ma a lu mi le, Adigi-odne, aŋo o yi ekployaŋ a mbo, aŋo o yi ba ame e klo ŋo! Eyesu a nyuŋ ŋa a lu mi le, O kpaŋ ékylu me.

¹⁸Ame e lu adlidzi angyiŋ, omba boŋ o wo ola anwye aŋo o kpo ekployaŋ a mbo boŋ o klo, nga o gre ibuyaŋ a mbo boŋ o klo. Ambo omba boŋ ó tsoŋ le, aŋo ó ndba abgo boŋ nga arehwõ angyiŋ á ba a kpo lo okyku ŋo, nga moa á shri ŋo á yi okro boŋ o klo o yi lo mbo.

¹⁹Omba ba Eyesu a lu odlo hi, a ta egŋe eshri edgu eku ba Ebitru á ba a kpu angyiŋ, nga okyku o da mo a hlu Ahogbrẽ eshko. Ambla he nga Eyesu a nyuŋ Ebitru a lu mi le, O lu me ma!

²⁰Ebitru a zhiŋ nga a ka anwyeotum lo ahwõ, ahi lo angyiŋ a wo a ba eso Eyesu. Aŋa angyiŋ a dzu a fki Eyesu omba ba moa a ri abgo ba Apaska. Aŋa angyiŋ a zhĩ a lu mi le, Adigi-odne, ayi angyiŋ á ba a yla ŋo?

²¹Omba ba Ebitru a ka ŋa nga, a zhĩ Eyesu a lu mi le, Adigi-odne, eshi é ba e kpo ta la alom hi?

²²Eyesu a tno ŋa ma a lu mi le, O wo ba ame e klo baŋ a dzu ma ma-me o tsa onda ba ame é ba le, aŋo o wo eshi eshri lo? Aŋo o lu me ma.

²³Okyku eka he oshpa lo o ngla eshki moare la a lu Eyesu ma ba anwyeotum he lo á ba a kpu mbo. Ambo Eyesu a lu eka he angyiŋ mbo, a lu mi le, O wo ba ame e klo baŋ a dzu ma ma-me o tsa onda ba ame é ba le, aŋo o wo eshi eshri lo?

²⁴Aŋa angyiŋ a wo anwyeotum la a lu odlo he lo nga a ta lo. Agi e yi baŋ a lu adlidzi angyiŋ.

²⁵Ayakplo nzenze ba Eyesu a kpo a wo ma. Moa a ta lo akyekyekyeŋ pyeŋ e mbi, eka ame e ka, obiŋ hi pyeŋ a mbo o tse ma ba moa a hwiŋ ibu o yga akpekpa he lo ma mbo.