Read eggon Eyohana 4 Bible Online

Eyohana 4 - eggon bible

Eyohana 4

¹MoaEfarisi a gno oshpa ma Eyesu a la a hwiŋ moare nga a la a kpo mo abaptisma a gre ba Eyohana.

²Ambo Eyesu eshrishri eŋa a kpo arekyeŋ abaptisma mbo, o wo le moanwyeotum baŋ dne a kpo moare abaptisma.

³Omba ba Eyesu a gno odlo moa la a lu eshri baŋ eka he nga, a kso a sku obiŋ ba Eyahuda nga a bla a gre obiŋ ba Egalili.

⁴Omba baŋ a yi nga, o dzu omgbybi baŋ a sõ obiŋ ba Asamariya.

⁵A gbu oskukyeŋ moa a bzi lo ma Esaka, o wo obiŋ ba Asamariya. O gyuŋ ta la agbi ba Eyakubu a shri a da anwye baŋ Oyusufu mbo.

⁶Arizha ba Eyakubu a kʼpa a wo agbi he lo. O khwo Eyesu nzenze, okyku eka he a dzu akaŋ arizha okyku o dzu o vbu. A gbu ahe lo la olum o vu eshri.

⁷Ashekyeŋ ba Asamariya a ba okyku o fu ami arizha lo, nga Eyesu a nyuŋ ŋa a lu mi le, O fu ami o da me e wa.

⁸Omba he lo moanwyeotum baŋ a gre Esaka okyku o gbmo algori o shri o ba.

⁹Ashe ba Asamariya a tno ŋa ma a lu mi le, Eshi e kŋe me e bga ka la ŋo? Aŋo o wo Arehwi ba Eyahuda, nga ame e wo ashe ba Asamariya. Okyku eshi aŋo o vẽ ami pa la me? MoaEyahuda a shrlu emo ta moa Asamariya, okyku eka he moa a kpo a gbu moa a pu atku o wa ami mbo.

¹⁰Eyesu a tno ashe lo ma a lu mi le, Ekplo ayiekŋe, aŋo o yi ekplo ba Ahogbrẽ a la a shri a di e mbi, nga aŋo o yi are la a vẽ ŋo okyku amihĩ hi e mbi, aŋo o kpo o gbu boŋ o vẽ ŋa okyku ami-hĩ la a wo la eso ma, nga aŋa á shri lo á doŋ.

¹¹Ashe lo a tno ma lu mi le, Andakʼpo, aŋo o wo obukati ba o fu ami ma mbo, nga arizha lo a mbo a gyuŋ nzenze. Aŋo ó hwiŋ amihĩ la a wo la eso ma ayaŋ?

¹²Aŋo o ka, adigi Eyakubu angyiŋ a shri arizha he lo a shri a da gi. Aŋa, pa la moanwye baŋ ta la ewla baŋ moa a la a wa ami ba arizha he lo angyiŋ. Eka boŋ o ka, aŋo o wo anyuanyuŋ o gre Eyakubu?

¹³Eyesu a tno ashe he lo ma a lu mi le, Areyaŋ a mbo la wa ami boŋ o lu hi, oŋo ó sa ó kpo ŋa nganga.

¹⁴Ambo areyaŋ ambo la a wa ami ba ame angyiŋ é shri é daŋ, oŋo ó kpo ŋa ku-ku nga mbo. Okyku eshi ami ba ame é shri é daŋ he lo á dzu eyi-ami angyiŋ eso baŋ, nga á dzu ami la a wo la eso ma, nga á shri eso ba gbagbu á shri á daŋ.

¹⁵Ashe lo a vẽ Eyesu a lu mi le, Andakʼpo, aŋo o bmi le, o shri edgu ami he lo o shri o da me, okyku o da oŋo o kpo me nga mbo, nga okyku o da me e ba e fu ami ahe nga mbo!

¹⁶Eyesu a tno ŋa ma a lu mi le, O wo eka he bgu le, o yi o bzi alom boŋ o daŋ a ba ka la ŋo.

¹⁷Ashe lo a tno Eyesu ma a lu mi le, Ame e wo la alom ma mbo. Eyesu a tno ŋa ma a lu mi le, Aŋo o lu adlidzi angyiŋ boŋ o wo alom ma mbo.

¹⁸Ame e yi aŋo o kyu moare atno, nga are boŋ o wo ka la ŋa ohuhuhi a wo alom boŋ angyiŋ mbo. Aŋo o lu adlidzi angyiŋ o da me.

¹⁹Ashe lo a ka egbregbre nga a nyuŋ Eyesu a lu mi le, Ame e ka e bmye boŋ o wo arehwĩ ba Ahogbrẽ a hom otum angyiŋ.

²⁰Moadigi ba Asamariya, moa a hlu Ahogbrẽ eshko aku hi, ambo agimi Eyahuda e sa e sla Orushalima angyiŋ e zga okro bi e yi e hlu Ahogbrẽ eshko ma.

²¹Eyesu a tno ashe lo ma a lu mi le, Ame e lu adlidzi angyiŋ e doŋ, omba o yi ó ba ba arekyeŋ a mbo á ba a hlu Adigi eshko aku hi, o mbo le Orushalima a mbo mbo.

²²Ambo agimi Asamariya e yi ekplo bimi e la e hlu lo eshko mbo ku-ku. Ambo agi Eyahuda e yi are ba agi e la e hlu ŋa eshko, okyku eshi agi Eyahuda angyiŋ e shri oshla e shri e ba.

²³Omba o yi ó ba, o sheŋ o kpo bgu, ba moa la a lu Ahogbrẽ ma la adlidzi, moa á ba a hlu Adigi eshko la ayaŋ ba eso nga la adlidzi.

²⁴Ahogbrẽ a wo Ogbga angyiŋ, okyku eka he areyaŋ a mbo la a lu ŋa ma, a lu ŋa ma la eso baŋ la adlidzi.

²⁵Ashe he lo a nyuŋ Eyesu a lu mi le, ame e yi ba Emisiya are ba moa a bzi ŋa ma Ekristi á ba a ba. Omba baŋ a ba bgu le, á tsa gi ekployaŋ a mbo.

²⁶Eyesu a tno ŋa ma a lu mi le, Ame la e la e kpla egba ka la ŋo hi, ame angyiŋ e wo Emisiya lo.

²⁷Omba he lo moanwyeotum ba Eyesu a bla a ba, nga moa a ka egbregbre a gre eshri ba Eyesu a kpla egba ta la ashe lo. Arekyeŋ a mbo eshki mo a zhĩ ashe lo ekplo baŋ a klo mbo, nga moa a zhĩ Eyesu ekplo la e daŋ a la a kpla egba ta la ashe lo mbo.

²⁸Ambla he nga ashe lo a dzu eshyẽ baŋ a zga nga a gre osku a nyuŋ moare a lu mi le,

²⁹Agimi e ba e ka are la a lu ekployaŋ a mbo ba ame e kpo a da me. O dzu mbo le aŋa angyiŋ a wo Emisiya lo.

³⁰Moare a gno eka he nga moa a kso a gre okyku o ka Eyesu.

³¹Omba he lo nga moanwyeotum a vẽ Eyesu a lu mi le, Andakʼpo, o wo boŋ o bmi le, o yga emakyeŋ o ri.

³²Eyesu a tno mo ma a lu mi le, Ame e wo algorikyeŋ ma ba agimi e yi ekplokyeŋ eshri lo mbo.

³³Okyku eka he, moanwyeotum a zhĩ emo a lu mi le, Arekyeŋ a shri algori a kom ŋa e mbo?

³⁴Eyesu a tno mo ma a lu mi le, Algori me angyiŋ a wo o kpo otum eka ba are la a hom me otum a klo nga okyku o kpo otum baŋ o khwo.

³⁵Eyesu a nyuŋ mo a lu mi le, Agimi e wo la egŋe odlo ma nga e la e lu mi le, Ambla ba eha enyi nga le, moa á yla algo agbi. Algo a sheŋ a bmye bgu, a ra oyoyla dne a mo!

³⁶Are la a la a yla algo moa a hre ŋa, nga a la a pla algo lo a shki okyku eso ba gbagbu-amo. Okyku eka he are la a fu, ta la are la a yla, moa mvye moa a gno oraŋ.

³⁷Odlo he lo o wo adlidzi angyiŋ, okyku eshi moa a lu mi le, Akyeŋ a dzu ofufu, ahwõ nga a dzu oyoyla.

³⁸Agimi e ka, ame e hom gimi otum okyku o da gimi e yi e yla algo agbi ba gimi e lbi mbo. Moahwõ angyiŋ a lbi agbi nga agimi e kpo otumokyeŋ ma ayga e yi e yla lo mbo.

³⁹Moare nzenze osku ba Asamariya, moa a bmi ba adlidzi ta la Eyesu okyku ba ashe he lo a lu mi le, Aŋa a lu ekployaŋ a mbo ba ame e kpo a da me.

⁴⁰Okyku eka he nga omba ba moaAsamariya a ba okro baŋ, moa a vẽ ŋa okyku o daŋ a ta abyi osku mo. Eyesu a kpo elum eha ahe lo.

⁴¹Moare nzenze a gno oshpa baŋ nga moa a bmi ba adlidzi.

⁴²Nga moa a nyuŋ ashe he lo a lu mi le, Agi e bmi ba adlidzi ohuhuhi okyku ekplo boŋ o lu o da gi angyiŋ mbo, ambo okyku ba agi ababgo bi e gno odlo baŋ, nga agi e ka e bmye zhezheŋ baŋ a wo Areoshla ba adlidzi ba obiŋ hi.

⁴³Ambla ba Eyesu a kpo elum eha ahe lo nga, a bre a gre obiŋ ba Egalili.

⁴⁴Eyesu eshrishri eŋa a lu mi le, Are ba Ahogbrẽ a hom otum moare a la a ka ŋa la olbi obiŋ baŋ mbo.

⁴⁵Omba ba Eyesu a gbu Egalili nga, moare a vye la ŋa. Moa a mbo, moa a gre abgo ba Apaska osku ba Orushalima nga moa a ka ekployaŋ a mbo baŋ a kpo omba he lo.

⁴⁶Eyesu a bla a gre osku ba Akana obiŋ ba Egalili. Ahe lo angyiŋ Eyesu a zhiŋ amihĩ a da lo a dzu ami anab. Andakʼpo-kyeŋ ba ogomnati a ba. Anwye baŋ a wo osku ba Akafanahum a la a no.

⁴⁷Omba baŋ a gno ba Eyesu a zgi obiŋ ba Eyahuda a ba obiŋ ba Egalili nga, a ba a vẽ ŋa okyku o daŋ a yi Akafanahum nga a shaŋ anwye baŋ la a no nga a wo anyu eku a mo.

⁴⁸Ambo a nyuŋ andakʼpo he lo a lu mi le, Agimi e bmi ta la ekplokyeŋ mbo o wo le agimi e klo e ka anyuŋ ayakplo ba otum ba egbregbre ayga dne.

⁴⁹Andakʼpo ba ogomnati a tno Eyesu ma a lu mi le, Andakʼpo, o ba o da gi e yi ayga, o mbo le anwye me lo á kpu.

⁵⁰Eyesu a nyuŋ ŋa a lu mi le, Aŋo o yi eŋo, anwye boŋ á shaŋ! Alom lo a bmi ba adlidzi ta la odlo ba Eyesu nga a zhiŋ ogbu a gre eŋa.

⁵¹Omba baŋ a yi odne nga, moanwye-odne baŋ moa a tsa ŋa ozhẽ nga a lu oshpa a daŋ a lu mi le, Anwye boŋ a kpo oshyeoshaŋ a mo!

⁵²A zhĩ mo a lu mi le, Ombayaŋ angyiŋ anwye lo a fa adzi? Moanwye-odne a tno ŋa ma a lu mi le, Omba ba amgbaŋ akyeŋ ore angyiŋ ogbga la o bʼbu ŋa egʼba o kyu ŋa abgo.

⁵³Adaŋ anwye lo a ka tki, nga a ka a bmye ba Eyesu a lu odlo omba he lo angyiŋ a lu mi le, Anwye boŋ á shaŋ. Okyku eka he alom he lo pa la moa-odne baŋ moa a bmi ba adlidzi ta la Eyesu.

⁵⁴Ohe lo, o wo ekplo egbregbre ba oha angyiŋ ba Eyesu a kpo omba baŋ a zgi obiŋ ba Eyahuda a ba Egalili.