Read eggon Eyohana 6 Bible Online

Eyohana 6 - eggon bible

Eyohana 6

¹Ambla he nga Eyesu a bla a gre atam ba Egalili. Moa a la a bzi lo ma Etebiriya.

²Moare nzenze moa a lu ŋa ma okyku eshi moa a ka anyuŋ ayakplo ba egbregbre baŋ a kpo, ta la eka baŋ a shaŋ moare.

³Eyesu a gre a yi a vre aku nga a dzu ma pa la moanwyeotum baŋ.

⁴Oriabgo ba Apaska moaEyahuda o wo osusku omba he lo.

⁵Eyesu a zhiŋ ayi nga a ka moare nzenze, moa a ba okro baŋ. Nga Eyesu a nyuŋ Efilibu a lu mi le, Agi é hwiŋ algo ayaŋ la á tse moare nzenze eka he ma, ba agi é ba e gbmo?

⁶A lu eka he okyku o mbga Efilibu o ka angyiŋ. Ambo aŋa a sheŋ a yi eka ekplo baŋ á ba a kpo.

⁷Efilibu a tno ma a lu mi le, O wo ba moa a klo o da moare a hwiŋ algo a tsa fifi le, o wo le moa a gbmo algo la a gre Enaira ekʼpoenyi dne.

⁸Akyeŋ eshki moanwyeotum ba Eyesu, eshko baŋ e ri Andru, aŋa a wo anáŋ Esima Ebitru. A nyuŋ Eyesu a lu mi le,

⁹Anwye-kyeŋ ahe lo a wo agbrotsa atno ta la atsa aha ma. Ambo a kpo a ghwo?

¹⁰Eyesu a nyuŋ mo a lu mi le, Agimi e da moare a dzu obiŋ. Asoso a wo okro he lo nzenze. Moare mvye nga a dzu obiŋ. Moarealom a wo eka ezbietno.

¹¹Eyesu a sko agbrotsa lo a khwo nga a vye la Ahogbrẽ, nga a shri lo a gʼba moare la a dzu obiŋ. A kpo ekakahelo ta la atsa. Are-yaŋ a mbo a hwiŋ ekplo la e tse ŋa ma a ri.

¹²Ambla ba moa a ri algo a wyo nga, Eyesu a nyuŋ moanwyeotum baŋ a lu mi le, Agimi e pla ekplo la e ra e shki ibu, agimi e da lo e tpi ayi mbo.

¹³Moa a pla lo nga moa a bli aksu otsko la agbrotsa ba moare a taŋ a ra.

¹⁴Moare la a ka anyuŋ ayakplo egbregbre ba Eyesu a kpo. Moa a lu mi le, Adlidzi angyiŋ, aŋa a wo arehwĩ ba Ahogbrẽ a hom ŋa otum okyku o daŋ a ba obiŋ hi!

¹⁵Eyesu a yi ba moare a klo o ba o vu ŋa okyku o daŋ a dzu anyuŋ-areŋ mo omgbybi. Okyku eka he a bla a vre aku aŋa ambambga.

¹⁶La olum-ore moanwyeotum baŋ moa a gile a gre atam.

¹⁷Moa a gre amgblami nga moa a bmyi ongre a bla a gre Akafanahum. Okyukyku o sheŋ o hwĩ, ambo Eyesu a bla a a ba okro mo a wo mbo.

¹⁸Omba he lo nga ogbga ogbu o la o hlu osheshye nga o tpi ami lo.

¹⁹Moanwyeotum a sheŋ a dzi amgblami eka emil etra o mbo le emil enyi bgu. Omba he lo, moa a ka Eyesu a dzi ami nga a la a ba osusku pa la mo. Eyli e kpo mo e gre eshri.

²⁰Eyesu a nyuŋ mo a lu mi le, Agimi e kpo eyli mbo, ame angyiŋ!

²¹Moa a bmi a yga ŋa a dzu amgblami, nga ambla fi nga amgblami a gbu okro ba moa a yi.

²²Onda oha nga eshki la e shki ongre ohwõ ba atam lo, moa a ka amgblami akyekyeŋ sha a ra a dzu okro he lo. Moa a yi zhezheŋ ba Eyesu a gre pa la moanwyeotum baŋ amgblami la a sheŋ a gre mbo, okyku eshi moa a dzu ŋa a zga egi ambla.

²³Amgblami ahwõ a zgi Etebiriya a ba akaŋ la a wo osusku ta la okro ba moare a taŋ agbrotsa ambla ba Adigi a vye Ahogbrẽ okyku lo.

²⁴Omba ba moare a ka eka ba Eyesu, pa la moanwyeotum baŋ moa a wo ahe mbo, moa a gre amgblami a zhiŋ ogbu a gre Akafanahum okyku o yi o klo Eyesu.

²⁵Omba ba moare a hwiŋ Eyesu ongre ba atam ohwõ, moa a nyuŋ ŋa a lu mi le, Andakʼpo, aŋo o ba ahe ombayaŋ?

²⁶Eyesu a tno mo ma a lu mi le, Ame e lu adlidzi angyiŋ e da gimi, agimi e klo me okyku bimi e taŋ agbrotsa, nga bimi e la e hwiŋ ekployaŋ a mbo bimi e la e klo okro me angyiŋ. Agimi e klo me okyku otum me ba ekʼpo angyiŋ mbo.

²⁷O raŋ o gre ba agimi e kpo otum okyku algo la á vre mbo, ambo agimi e kpo otum okyku algo la a shri eso ba gbagbu-amo a shri a di. Anwye Arehwi á shri edgu algo he lo á shri á di. Okyku eshi Ahogbrẽ la a wo Ada a sheŋ a bmi ka la ŋa bgu.

²⁸Moa a zhĩ a lu mi le, Agi é kpo eshi okyku o kpo otum Ahogbrẽ?

²⁹Eyesu a tno mo ma a lu mi le, Otum ba Ahogbrẽ a klo bimi e kpo, a klo bimi e bmi ba adlidzi ta la are baŋ a hom ŋa otum.

³⁰Moa a tno ŋa ma a lu mi le, Ekplo egbre-gbreyaŋ aŋo ó ba o kpo okyku o da gi e ka nga e bmi ba adlidzi ka la ŋo? Aŋo ó kpo eshi?

³¹Moadigi a taŋ amana akla eka ba Odlo Ahogbrẽ o lu mil e, Aŋa angyiŋ a shri amana a zgi Ongyeŋ a ba a da mo a taŋ.

³²Eyesu a nyuŋ mo a lu mi le, Ame e lu adlidzi angyiŋ e da gimi, ekplo ba Omusa a shri a da gimi, alo angyiŋ e wo agbrotsa la a zgi Ongyeŋ a ba mbo, Adugu angyiŋ a wo la a shri agbrotsa ba adlidzi a zgi Ongyeŋ a ba.

³³Agbrotsa ba Ahogbrẽ a la a shri a di, aŋa angyiŋ a wo are la a zgi Ongyeŋ a ba, nga a shri eso a da moarehwi ba obiŋ hi mvye.

³⁴Moa a tno ŋa ma a lu mi le, Andakʼpo, aŋo o shri edgu agbrotsa he lo o da gi ombamba mvye.

³⁵Eyesu a nyuŋ mo a lu mi le, Ame angyiŋ e wo agbrotsa ba eso. Areyaŋ a mbo la a ba okro me bgu le, embyle é kpo ŋa nga mbo ku-ku, nga are la a bmi pa la me, oŋo ó kpo ŋa ku-ku mbo.

³⁶Ame e lu e da gimi, agimi e sheŋ e ka me ambo agimi e bmi ba adlidzi mbo.

³⁷Areyaŋ a mbo ba Adugu a shri ŋa a da me, á ba okro me. Ame é nyom arekyeŋ la a ba okro me ku-ku nga mbo.

³⁸Okyku eshi ame e zgi Ongyeŋ e ba okyku o kpo ekplo ba are la a hom me otum a klo, ame e ba okyku o kpo ekplo ba ame e klo angyiŋ mbo.

³⁹Are la a hom me otum lo a klo ba ame e da akyeŋ eshki moarehwi baŋ a shri a da me a tsu a gbu mbo, ambo ame e nyuŋ mo e kpaŋ adzadzi okyku o da mo a kso ongybi olum ba amom-abgo.

⁴⁰Eka he angyiŋ Adugu a klo, okyku o da moare mvye la a ka Anwye lo nga a bmi ka la ŋa a hwiŋ eso ba gbagbu-amo, nga ame é shri eso é da mo olum mi lo.

⁴¹MoaEyahuda nga a zga esi a la a lu ahihĩ odlo eshri baŋ okyku baŋ a lu mi le, Ame angyiŋ e wo agbrotsa la a zgi Ongyeŋ a ba.

⁴²MoaEyahuda a zhĩ a lu mi le, Alom he angyiŋ a wo Eyesu anwye ba Oyusufu mbo? Agi e yi adaŋ, ta la anaŋ zhezheŋ. Aŋa a kpo anyu a ba a lu ohuhuhi a lu mi ma aŋa a zgi Ongyeŋ angyiŋ a ba?

⁴³Eyesu a nyuŋ mo a lu mi le, Agimi e kyu enyiagla bimi e la e nyi ta la egimi hi abgo.

⁴⁴Arekyeŋ a kpo a gbu baŋ a ba okro me ku-ku mbo, o wo le Ada la a hom me otum a daŋ a ba okro me dne, nga ame é daŋ a kso ongybi olum ba amom-abgo.

⁴⁵Moarehwi ba Ahogbrẽ a hom otum, moa a ta engla akpa a lu mi le, Moare mvye, Ahogbrẽ á nye mo. Areyaŋ a mbo la a gno odlo ba Ahogbrẽ nga a la a kpaŋ lo le, a ba okro me.

⁴⁶Ambo arekyeŋ a ka Ada a ka mbo. Are he lo la a zgi okro Ahogbrẽ a ba, aŋa akyakyeŋ sha a ka Ada a ka.

⁴⁷Ame e lu adlidzi angyiŋ e da gimi, areyaŋ a mbo la a bmi ba adlidzi a wo la eso ba gbagbu-amo.

⁴⁸Ame angyiŋ e wo agbrotsa ba eso.

⁴⁹Moadigimi a taŋ amana akla, ekaka-helo a mbo moa a kpu.

⁵⁰Ambo agbrotsa moa a shri a zgi Ongyeŋ a ba he lo, areyaŋ a mbo la a taŋ lo le, á kpu nga mbo.

⁵¹Ame angyiŋ e wo agbrotsa ba eso la a zgi Ongyeŋ a ba. Areyaŋ a mbo la a taŋ edgu agbrotsa he lo le, á dzu ma gbagbu-amo. Ebyi egʼba me angyiŋ e wo agbrotsa ba ame é ba e shri é daŋ. Ame é shri lo é shri é di okyku o da moarehwi ba obiŋ hi a hwiŋ eso.

⁵²Odlo he lo o da moaEyahuda a kʼpi ohwa a gre eshri. Moa a zhĩ a lu mi le, Aŋa á kpo anyu á ba a shri ebyi egʼba baŋ á da gi é taŋ?

⁵³Eyesu a tno mo ma a lu mi le, Ame e lu adlidzi e da gimi, o wo ba agimi e taŋ ebyi egʼba nga e wa amanzhli ba Anwye Arehwi mbo le, agimi é hwiŋ eso mbo ku-ku.

⁵⁴Areyaŋ a mbo la a taŋ ebyi egʼba me, nga a wa amanzhli me le a wo la eso ba gbagbu-amo. Nga ame é shri eso é daŋ olum onda mi lo.

⁵⁵Okyku eshi ebyi egʼba me angyiŋ e wo algo ba adlidzi, nga amanzhli me angyiŋ a wo owa-wa ba adlidzi.

⁵⁶Areyaŋ a mbo la a taŋ ebyi egʼba me, nga a la a wa amanzhli me á dzu pa la me, ame nga é dzu ka la ŋa.

⁵⁷Ada la a wo eso ma angyiŋ a hom me otum, nga ame e wo la eso ma okyku ŋa. Ekakahelo, areyaŋ a mbo la a taŋ ebyi egʼba me, á hwiŋ eso okyku me.

⁵⁸Agbrotsa he lo angyiŋ a wo la a zgi Ongyeŋ a ba. A wo eka ba agbrotsa moadigimi a taŋ nga a kpu angyiŋ mbo. Are la a taŋ agbrotsa he lo á dzu ma gbagbu-amo.

⁵⁹Eyesu a lu odlo he lo omba baŋ a la a nye moare anwyeakulu osku ba Akafanahum.

⁶⁰Moanwyeotum baŋ nzenze moa a gno eka he nga moa lu mi le, Onyenye boŋ o nye moare hi, o wo ewu o gre eshri. Ayi a kpo a gbu baŋ a ka lo a bmye?

⁶¹Arekyeŋ a mbo a ka a lu a da Eyesu mbo, ambo aŋa a ka a bmye ba moanwyeotum baŋ a nyi agla eshri onyenye baŋ a la a nye moare. Okyku eka he Eyesu a zhĩ mo a lu mi le, Onyenye he lo o shla gimi egʼba?

⁶²O wo eka he le, eshi é ba e kpo o wo ba agimi é ka Anwye Arehwi a sa okũ a yi okro baŋ a dzu ma ayga?

⁶³Ogbgaodzi angyiŋ o la o shri eso o di. Ebyi egʼba sha e wo owlamakyeŋ mbo. Odlo ba ame e sheŋ e lu e da gimi o dzu Ogbgaodzi, ta la eso.

⁶⁴Ambo ekakahelo, moakyeŋ eshki bimi moa a bmi ba adlidzi mbo. Eyesu a sheŋ a yi moare la á ba a bmi ba adlidzi mbo okũ oriori. Nga a yi are la á ba a yla ŋa a mbo mvye.

⁶⁵Eyesu a lu mi le, Okyku eka he lo angyiŋ, ame e lu e da gimi e lu mi ma arekyeŋ a ba okro me a gbu mbo, o wo le Ada a hwile ŋa ozhẽ ayga dne.

⁶⁶Okyku eka he moare nzenze la a lu ŋa ma, moa a zhiŋ ogbu a dzu ŋa a zga, moa a tla o lu ŋa ma.

⁶⁷Nga Eyesu a nyuŋ moanwyeotum otsko a lu mi le, Agimi a mbo e klo e yi egimi?

⁶⁸Esima Ebitru a tno ŋa ma a lu mi le, Adigi-odne, agi é yi okro ayi? Aŋo sha o wo odlo ba eso ba gbagbu-amo.

⁶⁹Agi e bmi ba adlidzi nga e ka e bmye ba aŋo angyiŋ o wo ba Esesla Akyakyeŋ ba Ahogbrẽ.

⁷⁰Eyesu a tno mo ma a lu mi le, Ame e sla gimi otsko angyiŋ mbo? Ambo akyeŋ eshki bimi a wo areabi!

⁷¹Aŋa a ta egŋe he eshri ba Eyahuda anwye Esima Eskariyoti angyiŋ. Okyku eshi Eyahuda la a wo akyeŋ eshki moanwyeotum otsko angyiŋ, á ba a yla Eyesu.