Read eggon Eyohana 8 Bible Online

Eyohana 8 - eggon bible

Eyohana 8

¹[Ambla he nga areyaŋ a mbo a zgi a gre eŋa odne, ambo Eyesu a zgi a gre Aku ba Olivi.

²Onda oha endigigiŋ nga, a bla a gre Anyuŋ-akulu. Moare mvye moa a tspi a ta ŋa a kpaŋ. Aŋa a dzu obiŋ nga a nye mo.

³Moa la a nye odaŋ, pa la moaEfarisi, moa a shri ashekyeŋ moa a vu ŋa baŋ a ri eshra a shri a ba, nga moa a daŋ a tspi egi ayi mo mvye.

⁴Moa a nyuŋ Eyesu a lu mi le, Andakʼpo, moa a vu ashe he omba baŋ a la a ri eshra.

⁵Omusa a lu odaŋ bi a lu mi le, O dzu omgbybi ba moa a bga edgu ashe he lo la ézhim. Aŋo o ka anyu eshri ashe he lo?

⁶Moa a ba a lu ta la Eyesu eka he okyku o kpyi ŋa nga okyku o vu ŋa ombgu. Ambo Eyesu a kʼpu obiŋ a ta engla la evgo baŋ.

⁷Omba ba moa a la a zhĩ odlo nga, Eyesu a kso a nyuŋ mo a lu mi le, Eshki bimi, are la a kpo odlobi a ka mbo, a zga esi a tra ashe he lo ezhim.

⁸Eyesu a sa a kʼpu obiŋ nganga a ta engla obiŋ.

⁹Omba ba moa a gno odlo eka he nga, moa a gre emo akya-kyakyeŋ. Andakʼpo ekpyemgbyeŋ a gre ori, nga moa a dzu Eyesu ta la ashe lo a zga otsotse okro lo.

¹⁰A kso nga a zhĩ ashe lo a lu mi le, Ashe, moare lo a wo ayaŋ a mo? Arekyeŋ la a vu ŋo ombgu a ra a wo ahe nga mbo?

¹¹Ashe lo a tno ma a lu mi le, Andakʼpo, arekyeŋ a ra nga mbo. Eyesu a nyuŋ ŋa a lu mi le, Ame a mbo e sõ ombgu e ri ŋo mbo. Aŋo o yi eŋo, ambo o sa o kpo odlobi nga mbo.]

¹²Eyesu a lu pa la mo nganga a lu mi le, Ame angyiŋ e wo Ayimom ba Obiŋ hi. Areyaŋ a mbo la a lu me ma á hwiŋ ayimom ba eso, nga aŋa á dzi evbu nga mbo.

¹³MoaEfarisi a nyuŋ ŋa a lu mi le, Aŋo o lu odlo eshri boŋ angyiŋ ohuhuhi, okyku eshi ekplo boŋ o lu e tsa gi akplokyeŋ mbo.

¹⁴Eyesu a tno mo ma a lu mi le, O wo eka he angyiŋ mbo. O wo ba ame e lu odlo ba eshri me a mbo, ekplo ame e lu e wo adlidzi angyiŋ okyku eshi ame e yi okro ba ame e zgi lo e ba, nga ame e sa e yi okro ba ame é ba e yi. Ambo agimi e yi okro ame e zgi lo e ba, o mbo le ba ame é ba e yi mbo.

¹⁵Agimi e la e sõ moare ombgu la oyioyi ba arehwĩ, ambo ame e la e sõ arekyeŋ ombgu mbo.

¹⁶Ame e sõ moare ombgu e mbi, ame é sheŋ ombgu la adlidzi, okyku eshi ame e wo ambambga angyiŋ otum he lo mbo, Ada la a hom me otum a wo pa la me.

¹⁷Moa a ta odaŋ bimi a lu mi le, O wo ba egŋe eha e bmi ta la emo le, e wo adlidzi angyiŋ.

¹⁸Ame e lu odlo okyku eshri me, nga Ada la a hom me otum a mbo, a la a lu odlo okyku me.

¹⁹Moa a zhĩ ŋa a lu mi le, Adoŋ a wo ayaŋ angyiŋ? Eyesu a tno mo ma a lu mi le, Agimi e yi me mbo nga e ka e yi Adugu a mbo mbo. Agimi e yi me e mbi, agimi e yi Adugu a mbo ko-ko.

²⁰Eyesu a lu odlo hi mvye omba baŋ a nye moare Anyuŋ-akulu okro ba akpati moa la a yga amgbaŋ a wo ma. Arekyeŋ a vu ŋa ku-ku mbo, okyku eshi omba baŋ o bli a wo mbo.

²¹Eyesu a nyuŋ mo a lu mi le, Ame é yi a mi lo, agimi é klo me, ambo agimi é kpu la odlobi bimi. Agimi e kpo e gbu bimi e ba okro ba ame e yi lo mbo.

²²MoaEyahuda a lu mi le, Aŋa a lu mi le, Agimi e kpo e gbu bimi e ba okro ba ame e yi lo mbo. Aŋa á bga eshri baŋ?

²³Eyesu a tno mo ma a lu mi le, Agimi e wo moarehwi ba obiŋ hi angyiŋ, ambo ame e zgi Ongyeŋ e ba. Agimi e wo moarehwi ba obiŋ hi, ambo ame e wo arehwĩ ba obiŋ hi mbo.

²⁴Okyku eka he lo angyiŋ ame e lu ma agimi é kpu la odlobi bimi. Agimi é kpu la odlobi bimi o wo ba agimi é bmi ba adlidzi ba Ame Angyiŋ La E Wo Ma, mbo le.

²⁵Moa a zhĩ Eyesu a lu mi le, Aŋo o wo ayi angyiŋ? Eyesu a tno ma a lu mi le, Ame e wo ekplo ba ame e sheŋ e lu e da gimi okũ oriori.

²⁶Ayakplo a wo ma nzenze ba ame e klo e lu nga e sheŋ ombgu eshri bimi. Are la a hom me otum, ekayaŋ a mbo a wo adlidzi angyiŋ. Ame e lu ekplo baŋ a lu a da me angyiŋ e la e da obiŋ hi.

²⁷Moa a ka a bmye baŋ a lu odlo eshri ba Ada angyiŋ mbo.

²⁸Eyesu a nyuŋ mo a lu mi le, Omba bimi é si Anwye Arehwĩ ongyeŋ, agimi é yi ba Ame Angyiŋ La E Wo Ma. Omba he lo agimi é yi ba ame e la e kpo ekployaŋ a mbo la eshrishri eme angyiŋ mbo, ambo ba ame e lu ekplo ba Ada a nye me.

²⁹Aŋa la a hom me otum nga, a wo pa la me. Aŋa a la a dzu me a zga mbo okyku eshi ame e kpo ekployaŋ a mbo la e gbu ŋa eso obiŋ.

³⁰Moare nzenze la a gno odlo ba Eyesu a lu he lo, moa a bmi ba adlidzi ka la ŋa.

³¹Eyesu nga a nyuŋ moaEyahuda la a bmi ba adlidzi ka la ŋa a lu mi le, O wo bimi e yga onyenye me, agimi e wo moanwyeotum me ba adlidzi.

³²Agimi é yi adlidzi lo le, adlidzi lo nga á da gimi é dzu moawaghrẽ nga mbo.

³³Moa a tno ŋa ma a lu mi le, Agi e wo moarehwi ba ogu ba Ebrahim angyiŋ, agi e dzu moawaghrẽ arekyeŋ ondakyeŋ ku-ku e ka mbo. Aŋo o klo o lu la eshi angyiŋ omba boŋ o lu mi le, Moa á shri odzudum á da gimi.

³⁴Eyesu a nyuŋ mo a lu mi le, Ame e lu adlidzi angyiŋ e da gimi, areyaŋ a mbo la a kpo odlobi le, aŋa a wo awaghrẽ ba odlobi angyiŋ.

³⁵Awa-ghrẽ a la a dzu pa la moa-odne ombamba mvye mbo, ambo anwye mo a la a dzu pa la mo ombayaŋ a mbo.

³⁶O wo ba Anwye a shri odzudum a da gimi le, agimi é hwiŋ odzudum ba adlidzi.

³⁷Ame e yi bimi e wo moare ba ogu ba Ebrahim angyiŋ, ambo agimi e klo o bga me okyku bimi e yga onyenye me mbo.

³⁸Ame e lu odlo eshri ekplo Adugu a tsa me, ambo agimi e la e kpo ekplo ba adigimi a tsa gimi.

³⁹Moa a tno ŋa ma a lu mi le, Ebrahim angyiŋ a wo Adigi. Eyesu a tno mo ma a lu mi le, Agimi e wo moanwye ba Ebrahim angyiŋ e mbi, agimi e kpo edgu otum baŋ a kpo.

⁴⁰Ame e lu adlidzi ba ame e gno okro ba Ahogbrẽ sha e la e da gimi. Ambo ekakahelo a mbo, agimi e klo e bga me. Ebrahim a kpo eka he mbo!

⁴¹Agimi e la e kpo ekplo ba adigimi a kpo angyiŋ. Moa a tno ŋa ma a lu mi le, Agi e wo moanwye ba eshra angyiŋ mbo. Agi e wo Ada akyakyeŋ sha angyiŋ e ma, aŋa eshrishri eŋa a wo Ahogbrẽ.

⁴²Eyesu a nyuŋ mo a lu mi le, Ahogbrẽ angyiŋ a wo adigimi adlidzi e mbi, agimi e yga me okyku eshi ame e zgi okro ba Ahogbrẽ e ba. Ame e ba la eshrishri eme angyiŋ mbo, ambo aŋa a da me e ba.

⁴³Okyku eshi agimi e ka ekplo ba ame e lu e bmye mbo? Agimi e ka e bmye mbo okyku bimi e klo e ngli atuŋ e gno oshpa me mbo.

⁴⁴Agimi e wo moanwye ba adigimi Eshi-taŋ, nga agimi e klo e kpo ekplo ba adigimi lo a klo. Okũ oriori, a wo are la a bga ebga. A bmi ta la adlidzi ondakyeŋ mbo, okyku ba adlidzi a wo ka la ŋa mbo. Omba baŋ a la a sheŋ akpro le, a la a kpo ekplo baŋ a sheŋ a bga ta la alo angyiŋ, okyku eshi aŋa angyiŋ a wo asheŋakpro, nga aŋa angyiŋ a wo adaŋ ba akpro mvye.

⁴⁵Okyku ba ame e lu adlidzi angyiŋ, agimi e bmi pa la me mbo.

⁴⁶Areyaŋ eshki bimi a kpo a gbu baŋ a tsa ozhẽ ba ame e kpo odlobi? O wo ba ame e lu adlidzi bgu le, okyku eshi agimi e bmi ba adlidzi pa la me mbo?

⁴⁷Are la a zgi okro Ahogbrẽ angyiŋ a ba, a la a ngli atuŋ a gno odlo ba Ahogbrẽ. Okyku bimi e zgi okro ba Ahogbrẽ angyiŋ e ba mbo, agimi e ngli atuŋ e gno odlo baŋ mbo.

⁴⁸MoaEyahuda a tno Eyesu ma, nga a nyuŋ ŋa a lu mi le, Agi e ta akpu angyiŋ bi e lu mi ma aŋo o wo arehwĩ ba Asamariya, nga ma ogbgabi o kpo otum ka la ŋo?

⁴⁹Eyesu a tno ma a lu mi le, Ogbgabi o kpo otum pa la me mbo. Ame e ka Adugu la olbi, ambo agimi e la e ka me la olbi mbo.

⁵⁰Ame e klo olbi okyku eme angyiŋ mbo. Are la a klo lo a wo ma. Aŋa angyiŋ a la a sõ ombgu, nga a la a se me.

⁵¹Ame e lu adlidzi angyiŋ e da gimi, areyaŋ a mbo la a bmi ta la odlo me le, aŋa á kpu ku-ku mbo.

⁵²MoaEyahuda a nyuŋ Eyesu a lu mi le, Ohuhuhi angyiŋ agi e bmi ba adlidzi boŋ o kpo otum ta la ogbgabi. Aŋo o ka, Ebrahim a mbo a kpu, moarehwi ba Ahogbrẽ a hom mo otum a mbo a kpu, ambo aŋo o lu mi le, Areyaŋ a mbo la a bmi ta la odlo me le, aŋa á kpu ku-ku mbo.

⁵³Adigi Ebrahim a kpu. Eka boŋ o ka, aŋo o wo la ekʼpo o gre Ebrahim he lo? O ka, moarehwi ba Ahogbrẽ a hom mo otum a mbo a kpu. Aŋo o wo ayi angyiŋ?

⁵⁴Eyesu a tno mo ma a lu mi le, O wo ba ame e shri ekʼpo e shri e da eme le, e dzu ekplokyeŋ mbo. Adugu angyiŋ a la a shri ekʼpo a da me. Aŋa angyiŋ agimi e bzi ŋa ma Ahogbrẽ bimi.

⁵⁵Agimi e yi ŋa ondakyeŋ mbo, ambo ame e yi ŋa. O wo ba ame e lu mi ma ame e yi ŋa mbo le, ame é dzu asheŋakpro eka bimi. Ame e yi ŋa, nga ame e kpaŋ odlo baŋ.

⁵⁶Adigimi Ebrahim a ka ayi ozhẽ okyku o ka me. Omba baŋ a ka me nga a gno oraŋ.

⁵⁷MoaEyahuda moa a nyuŋ ŋa a lu mi le, Aŋo o ka, o kpo eyi ekʼpoetno a mbo mbo. Aŋo o kpo anyu o ka Ebrahim!

⁵⁸Eyesu a tno mo ma a lu mi le, Adlidzi ame e lu e da gimi, ame e wo ma ayayga moa a mbre Ebrahim, Ame Angyiŋ La E Wo Ma.

⁵⁹Ambla he nga, moa a tslo ézhim okyku o tra ŋa, ambo Eyesu a ghre nga a zgi a sku Anyuŋ-akulu.