Read eggon Eyohana 9 Bible Online

Eyohana 9 - eggon bible

Eyohana 9

¹Omba ba Eyesu a yi nga, a ka alomakyeŋ ba moa a mbre ŋa avgayi.

²Moanwyeotum baŋ a ka avgayi lo nga moa a zhĩ a lu mi le, Andakʼpo, okyku odlobi ba ayi angyiŋ moa a mbre alom he lo avgayi? Okyku odlobi baŋ angyiŋ le, okyku odlobi moadaŋ.

³Eyesu a tno mo ma a lu mi le, Ovgayi baŋ a vga hi, o wo okyku odlobi baŋ mbo, okyku odlobi moadaŋ angyiŋ mbo, ambo okyku o da mo a tsa ekʼpo ba Ahogbrẽ eshri baŋ.

⁴O raŋ o gre bi e kpo otum ba are la a hom me otum, okyku eshi olum o yi o ra. Okyukyku o yi ó hwĩ. Omba mi lo arekyeŋ á kpo á gbu baŋ a kpo otum mbo.

⁵Omba ba ame e yi e wo obiŋ hi, ame angyiŋ e wo Ayimom ba Obiŋ hi.

⁶Ambla ba Eyesu a lu eka he a khwo nga, a ta akyi obiŋ nga a bmwre obiŋ lo nga a shri lo a khwa ayi alom lo.

⁷Nga a nyuŋ alom lo a lu mi le, O yi o ndza ayi boŋ atam ba Esiloyom. Alo o dzu Ohomotum angyiŋ la anyu mo. Alom lo a gre a yi a ndza ayi baŋ nga a ba nga a la a ka.

⁸Moaekpazhi baŋ pa la moare la a ka ŋa baŋ a la a vẽ algo ayga, moa a zhĩ a lu mi le, Alom hi angyiŋ a la a dzu obiŋ a la a vẽ algo ayga mbo?

⁹Moakyeŋ moa a lu mi le, Aŋa angyiŋ. Ambo moakyeŋ moa a lu mi le, Aŋa angyiŋ mbo, ambo a zgi ŋa ozgi angyiŋ. Alom lo a tno ma a lu mi le, Ame angyiŋ.

¹⁰Moare a zhĩ ŋa a lu mi le, Ayi boŋ a kpo anyu a hwile?

¹¹A tno mo ma a lu mi le, Alomakyeŋ ba moa a bzi ŋa ma Eyesu angyiŋ a bmwre obiŋ a shri a khwa me ayi, nga a nyuŋ me ma ame e yi e ndza ayi me atam ba Esiloyom. Ame e gre e yi e ndza nga ame e shaŋ.

¹²Moa a zhĩ ŋa a lu mi le, Alom he lo a wo ayaŋ? Aŋa a tno ma a lu mi le, Ame e yi mbo.

¹³Moa a sko alom la a vga ayi ayga he lo a shri a gre okro moaEfarisi.

¹⁴Onda ba Eyesu a bmwre obiŋ lo nga a hwile ayi avgayi hi o wo onda Asabat angyiŋ.

¹⁵MoaEfarisi a bla a zhĩ alom he lo eka baŋ a hwiŋ okaokro lo. Aŋa a nyuŋ mo a lu mi le, Alom lo a shri amwre a shri a khwa ayi me nga ame e ndza ayi e khwo nga, ame e ka ohuhuhi.

¹⁶Moa-Efarisikyeŋ a lu mi le, Alom la a kpo ohi lo a zgi okro ba Ahogbrẽ angyiŋ a ba mbo, okyku eshi a kpaŋ odaŋ ba Asabat mbo. Ambo moakyeŋ eshki mo moa a lu mi le, Are ba odlobi a kpo anyu a kpo ayakplo egbregbre eka he? Ambla he nga eshki moare e gʼba eŋa.

¹⁷MoaEfarisi a sa a zhĩ alom lo nganga a lu mi le, Aŋo o lu ma aŋa angyiŋ a hwile ayi boŋ? Aŋo o tne aga eshi eshri baŋ? Aŋa a tno mo a lu mi le, Alom he lo a wo arehwĩ ba Ahogbrẽ a hom otum angyiŋ.

¹⁸MoaEyahuda a bmi ba adlidzi ba alom lo a vga ayi ayga, nga baŋ a sa a shaŋ mbo. Moa a gno okro moadaŋ anwye lo ayga moa a bmi ba adlidzi.

¹⁹Moa a zhĩ moadaŋ anwye lo a lu mi le, Anwye bimi angyiŋ a wo ahi? Agimi e lu mi ma moa a mbre ŋa avgayi? O wo eka he le, a kpo anyu a ka ohuhuhi?

²⁰Moadaŋ moa a tno ma a lu mi le, Agi e yi baŋ a wo anwye bi, nga moa a mbre ŋa avgayi.

²¹Ambo agi e yi eka baŋ a kpo nga a ka ohuhuhi mbo, nga agi e yi are la a hwile ŋa ayi mbo. Agimi e zhĩ ŋa ababgo bimi okyku eshi aŋa a yi eda a mo!

²²Moadaŋ a tno ma eka he okyku eshi moa a kpo eyli moaEyahuda. MoaEyahuda a lu mi ma areyaŋ a mbo la a zgi egŋe ma Eyesu a wo Emisiya angyiŋ le, moa á se ŋa eshki.

²³Okyku eka he lo angyiŋ moadaŋ a lu mi le, Aŋa a yi eda a mo, agimi e zhĩ ŋa!

²⁴Moa a bzi alom ba moa a mbre ŋa avgayi lo odgo oha nga moa a nyuŋ ŋa a lu mi le, Aŋo o hwim egi ayi Ahogbrẽ boŋ ó ba o lu adlidzi! Agi e yi ba alom he lo a wo are ba odlobi.

²⁵A tno mo ma a lu mi le, O wo ba are he lo a wo are ba odlobi le, ame e yi mbo. Ekplo ekyekyeŋ sha ame e yi, ayga ame e vga ayi, ambo ohuhuhi ame e ka.

²⁶Moa a zhĩ ŋa a lu mi le, Aŋa a kpo ŋo eshi, nga a kpo anyu a hwile ayi boŋ?

²⁷A tno mo ma a lu mi le, Ame e sheŋ e lu e da gimi bgu, ambo agimi e bmi mbo. Agimi e klo ba ame e lu la eshi? Agimi a mbo e klo e dzu moanwyeotum baŋ?

²⁸Moa a ta ogbukyu a daŋ nga moa a lu mi le, Aŋo o wo anwyeotum baŋ, ambo agi e wo moanwyeotum ba Omusa angyiŋ.

²⁹Agi e yi ba Ahogbrẽ a lu odlo ta la Omusa, ambo are he lo, agi e yi okro baŋ a zgi lo a ba mbo ku-ku!

³⁰Alom he lo a tno ma a lu mi le, Ekplo he lo e wo ekplo egbregbre angyiŋ! Agimi e yi okro baŋ a zgi lo a ba mbo, ambo aŋa angyiŋ a hwile me ayi!

³¹Agi e yi ba Ahogbrẽ a la a gno moaedlobi mbo. A la a gno moare la a fa olbi a daŋ, nga a kpo ayakplo baŋ a klo.

³²Ogbyigbyi moa a zga esi a kpo obiŋ hi, moa a gno ba arekyeŋ a hwile avgayi ayi mbo.

³³O wo ba alom he lo a zgi okro Ahogbrẽ angyiŋ a ba mbo le, aŋa a kpo a gbu baŋ a kpo ekplokyeŋ mbo.

³⁴Moa a tno ŋa ma a lu mi le, Moa a mbre ŋo la odlobi, nga moa a vgi ŋo la odlobi. Aŋo o klo o nye gi? Nga moa a kyku ŋa a sku anwyeakulu lo.

³⁵Eyesu a gno moa a kyku ŋa a sku anwyeakulu. Aŋa a hwiŋ ŋa nga a nyuŋ ŋa a lu mi le, Aŋo o bmi ba adlidzi ta la Anwye Arehwi?

³⁶Alom lo a tno ma a lu mi le, Andakʼpo, aŋa a wo ayi angyiŋ? O tsi ŋa o da me okyku o da me e bmi ba adlidzi ka la ŋa.

³⁷Eyesu a nyuŋ ŋa a lu mi le, Aŋo o sheŋ o ka ŋa bgu. Aŋa angyiŋ a wo are la a kpla egba ka la ŋo ohuhuhi.

³⁸Alom lo a gbyle obiŋ egi ayi Eyesu nga a lu mi le, Ame e bmi ba adlidzi, Adigi-odne!

³⁹Eyesu a nyuŋ mo a lu mi le, Ame e ba obiŋ hi okyku o sõ moare ombgu, nga okyku o da moavgayi a ka okro, nga okyku o da moa la a ka a sa a vga ayi.

⁴⁰MoaEfarisikyeŋ la a wo ma ka la ŋa a gno baŋ a lu eka he nga, moa a zhĩ ŋa a lu mi le, Aŋo o sko gi a mbo o zga moavgayi ko-ko?

⁴¹Eyesu a tno mo ma a lu mi le, O wo bimi e vga ayi le, agimi e wo la ombgu ma mbo. Ambo agimi e lu ma agimi e la e ka, okyku eka he o dzu eka ba agimi e wo la ombgu ma ma-me o ta ohuhuhi.