Read eggon Otum 1 Bible Online

Otum 1 - eggon bible

Otum 1

¹Anime Etiyofolu, Akpa me ba oriori, ame e ta oshpa ba akplo mvye ba Eyesu a la a kpo nga a la a nye. Ohe lo o zga esi omba baŋ a zga esi otum baŋ

²ma-me o tsa onda baŋ a gre Ongyeŋ. Omba baŋ a gre Ongyeŋ a wo mbo, a nye moa la a nyum oshpa baŋ a sla, la ekʼpo ba Ogbgaodzi.

³Ambla baŋ a kso ongybi a khwo nga, a dzu obiŋ hi elum ekʼpoenyi. Omba he lo, Eyesu a da moa la a nyum oshpa baŋ a ka ŋa engyi oshushku. Okyku eka he moa la a nyum oshpa baŋ a bmi ba adlidzi zhezheŋ baŋ a kso ongybi. Moa a ka ŋa nga a sa a nye mo ayakplo eshri Oreŋ ba Ahogbrẽ.

⁴Omba ba moa la a nyum oshpa lo mvye a pla emo a shki nga, Eyesu a shri odaŋ a da mo a lu mi le, Agimi e dzu Orushalima o tsa ba Adugu á shri ekplo la é kpo é ghwo gimi á shri á ba eka baŋ a sheŋ a hwim. Ame e sheŋ e lu lo e da gimi bgu.

⁵Eyohana a la a kpo moare abaptisma la amihĩ, ambo ambla fi nga moa á kpo gimi abaptisma la Ogbgaodzi.

⁶Omba moa a la a nyum oshpa a shki otsotse nga, moa a zhĩ Eyesu a lu mi le, Aŋo ó bla oreŋ ba Eyahuda ó shri ó da mo omba he angyiŋ?

⁷Eyesu a tno mo ma a lu mi le, Onda lo, ta la omba lo, Adugu sha la ekʼpo baŋ a yi lo. Alo o wo ekplokyeŋ bimi e yi mbo.

⁸Ambo agimi é hwiŋ ekʼpo omba ba Ogbgaodzi ó gile eshri bimi, nga agimi é dzu moa la a zgi egŋe me osku ba Orushalima ta la obiŋ Eyahuda, ta la Esamariya, ta la okroyaŋ a mbo obiŋ hi.

⁹Ambla baŋ a lu eka he a khwo nga, moa a sko ŋa a gre Ongyeŋ. Moa la a nyum oshpa a la a ka ŋa dzo omba baŋ a yi, ambo moa a dzu nga moa a ka etabro e ba e shki ŋa.

¹⁰Ambla baŋ a sheŋ a gre a khwo a mbo, moa la a nyum oshpa baŋ a la a ka ahrẽ dzo. Omba he lo nga, moare aha la a ygi ariga akyle a gnyu mi a zgi, nga moa a tspi osusku pa la mo.

¹¹Moa a zhĩ a lu mi le, Agimi arehwĩ ba Egalili, okyku eshi agimi e tspi ahe e la e ka ahrẽ? Eka bimi eka ba moa a sko Eyesu a gre Ongyeŋ, ekakahelo, aŋa á ba a sa á zgi Ongyeŋ lo a ba.

¹²Moa la a nyum oshpa a bla a zgi Aku Olivi a bla a gre Orushalima. O zgi akũ lo o yi Orushalima, alo a wo ogbu emil ekyeŋ sha.

¹³Moa a bla a gre Orushalima a khwo nga, moa a bla a gre aku moa a pla emo a shki ma. Ebitru ta la Eyohana, ta la Eyakubu, ta la Andru, ta la Efilibu, ta la Otoma, ta la Abatalamawu, ta la Amatiyu, ta la Eyakubu anwye Alafus, ta la Esima anwye obiŋ, ta la Eyahuda anwye Eyakubu.

¹⁴Moa a pla emo a shki otsotse okyku o da mo a fa olu ombamba mvye. Moashekyeŋ ta la anaŋ Eyesu, ta la moanáŋ Eyesu a mbo a wo ma otsotse pa la mo.

¹⁵Ambla elum fi nga moare la a bmi ba adlidzi ta la Eyesu moa a shki eshki. Moa a wo eka endgaekyeŋ la ekʼpoeha. Ebitru a kso nga a nyuŋ mo a lu mi le,

¹⁶Agimi anáŋ o dzu omgbybi ba odlo ba Ogbgaodzi o da Adawuda a lu eshri Eyahuda, o bli. Eyahuda he lo angyiŋ a klo a da mo a vu Eyesu.

¹⁷Eyahuda he lo, a wo akyeŋ eshki bi. Moa a sla ŋa okyku o da gi e kpo otum otsotse.

¹⁸La amgbaŋ ba Eyahuda a yga okyku otum obi baŋ a kpo nga, a gre a yi a gbmo agbi ta la lo. A kpu agbi he lo angyiŋ. Ahe lo, akpyki baŋ a gom nga anye baŋ pyeŋ a zgi edzi.

¹⁹Moarehwi la a dzu Orushalima mvye a gno oshpa ekplo la e kpo. Okyku eka he, la olom mo moa a bzi agbi lo ma Akladama, o dzu, Agbi ba Amanzhli.

²⁰Moa a ta Akpa ba Ohlueshko a lu mi le, Moa a da odne baŋ o dzu ototno, Moa a da arekyeŋ a dzu ma mbo. Moa a sa a ta a lu mi le, Moa a da arekyeŋ a nyiŋ otum baŋ a sko a kpo.

²¹Okyku eka he o dzu omgbybi ba arekyeŋ a nyiŋ ŋa okyku o da gi e zgi egŋe ba Eyesu Adigi-odne a kso ongybi. O dzu omgbybi ba are he lo a wo akyeŋ eshki moare la a dzi ka la gi omba mvye bi e la e dzi ta la Adigi Eyesu. O zga esi omba ba Eyohana a nyum Oshpaodzadzi nga a kpo abaptisma, nga a dzu ka la gi ma-me o tsa onda ba moa a sko Eyesu a gre Ongyeŋ.

²³Moa a sla moarehwi aha moa a bzi mo Oyusufu, ta la Amataya. Ashko aha ahwõ ba Oyusufu a ri Abasaba, ta la Ajasta.

²⁴Moa a fa olu a lu mi le, Adigi-odne aŋo o yi eso moarehwi mvye. Aŋo Adigi-odne, o tsa gi are boŋ o klo eshki moarehwi aha hi,

²⁵okyku o daŋ a sko otum ba onyumoshpa ba Eyahuda a dzu a zga nga a gre okro baŋ a wo ba alo.

²⁶Ambla moa a fa olu a khwo nga, moa a fye emvye okyku o da mo a sla arekyeŋ eshki moarehwi aha he lo. Moa a sla Amataya. Moa a shri ŋa a pu pa la moa la a nyum oshpa okʼpoakyeŋ lo.