Read eggon Otum 10 Bible Online

Otum 10 - eggon bible

Otum 10

¹Osku ba Esizariya, alomakyeŋ a wo ma, eshko baŋ e ri Okoniliyu. Aŋa a wo akapteŋ ba ogʼba moanwyea-kyuŋ ba Oroma. Moa a bzi mo ma, Moanwyeakyuŋ ba ogʼba Etaliya.

²Aŋa a wo are la a kpo eyli Ahogbrẽ. Aŋa pa la moa-odne baŋ mvye, moa a la a hlu Ahogbrẽ eshko. Aŋa a la a zga gble nzenze okyku o kpo o ghwo moaEyahuda la a kpo ekŋe, nga a fa olu ombamba mvye.

³Olulum onda-kyeŋ, omba amgbaŋ atra, Okoniliyu a ka okoka. Ibu okoka he lo, aŋa a ka anwyeadga ba Ahogbrẽ a gre a ba odne baŋ nga a nyuŋ ŋa a lu mi le, Okoniliyu!

⁴A ka anwyeadga ba Ahogbrẽ lo dzo la eyiyli nga a zhĩ a lu mi le, Eshi angyiŋ, Andakʼpo? Anwyeadga ba Ahogbrẽ a tno ma a lu mi le, Ahogbrẽ a gno olu boŋ, a gre eso a ghre eka boŋ o la o kpo o ghwo la moa-agrogro mbo.

⁵Okyku eka he, ohuhuhi, aŋo o hom moareakyeŋ otum o da mo a yi Ojopa nga a bzi alomakyeŋ ba eshko baŋ e ri Esima Ebitru a daŋ a ba.

⁶Aŋa a tum odne ba Esima la a fu akpa. Odne lo o wo osusku tala anyuŋ-ondzu.

⁷Ambla ba anwyeadga ba Ahogbrẽ a zhiŋ ogbu a gre a khwo nga, Okoniliyu a bzi moanwye odne baŋ aha, ta la anwyeakyuŋ akyeŋ, la a kpo eyli Ahogbrẽ. A wo eshki moa la a kpo a ghwo a ŋa.

⁸A lu ekplo la e kpo a da mo a khwo nga, a hom mo otum a da mo a gre Ojopa.

⁹Onda oha omba moa a wo ozhẽ ba o yi Ojopa, moa a gbu osusku a mo nga, Ebitru a vre a gre eshri aku ongyeŋ olulum okyku o fa olu.

¹⁰Embyle e kpo ŋa nga a klo o ri algo. Omba moa a yi a kpo algo ayga, Ahogbrẽ a tsa ŋa amakyeŋ.

¹¹A ka Ongyeŋ o hwile, nga ashye emakyeŋ eka anyuŋ amgbalga, moa a gile lo emvygi enyi a da lo a ba obiŋ.

¹²Edgu ebyi andandandim ba obiŋ hi e wo ashye ema lo eshyẽ. Edgu ebyi la e klu obiŋ ta la awunu akla a mbo.

¹³Enzi e nyuŋ Ebitru e lu mi le, Ebitru, o kso nga o bga lo o taŋ!

¹⁴

¹⁵Ambo Ebitru a tno ŋa ma a lu mi le, Adigi-odne, o kpo o gbu mbo ku-ku! Ame e taŋ ema la e wo eshre e ka mbo. Enzi lo e sa e lu e daŋ, e lu mi le, O bzi emakyeŋ ba Ahogbrẽ a sko lo a zga edzi o da lo e dzu eshre mbo.

¹⁶O kpo eka he lo engyi etra o khwo nga, moa a bla lo a shri a gre Ongyeŋ.

¹⁷Ebitru a ka egbregbre nzenze ta la edgu ekplo ba Ahogbrẽ a tsa ŋa. Omba he lo, moare ba Okoniliyu a hom mo otum a ba nga, moa a tsa mo odne ba Esima a wo ma. Moa a gre nga moa a tspi ayizhẽ.

¹⁸Moa a ta enzi nga moa a zhĩ a lu mi le, Azhẽkyeŋ moa a bzi ŋa ma Esima Ebitru a wo odne he?

¹⁹Ebitru a la a tne aga ekplo la e kpo nga Ogbgaodzi o nyuŋ ŋa o lu mi le, O ngli o gno! Moarehwi atra a tspi ayizhẽ a klo ŋo.

²⁰Okyku eka he, o nyuŋ anzho o vu abgo nga o zgi o yi pa la mo, okyku eshi ame angyiŋ e hom mo otum. O ngli mbo.

²¹Ebitru a gile a gre nga a nyuŋ mo a lu mi le, Ame angyiŋ agimi e klo me. Agimi e ba okyku eshi?

²²Moa a tno ma a lu mi le, Andakʼpo Okoniliyu angyiŋ a hom gi otum. Aŋa a wo arehwĩ adzadzi angyiŋ. Aŋa a la a hlu Ahogbrẽ eshko, nga moaEyahuda a fa olbi a daŋ nzenze. Anwyeadga ba Ahogbrẽ a nyuŋ ŋa a lu mi ma aŋa a bzi ŋo okyku o doŋ o ba o yi odne baŋ, okyku o doŋ o lu ekplo la e wo ma o daŋ a gno.

²³Ebitru a da moare atra lo a gre odne eshyẽ nga a da mo a lom odne baŋ a bli endigiŋ. Onda oha aŋa a nyuŋ anzho a vu abgo nga a gre pa la mo. Moakyeŋ eshki moanáŋ ba Ojopa a mbo a gre ka la ŋa otsotse.

²⁴Onda oha nga aŋa a gbu Esizariya, osku ba Okoniliyu a wo ma. Okoniliyu a dzu a bli ŋa. A bzi moanáŋ pa la moakyeŋazba la a wo osusku.

²⁵Omba ba Ebitru a ba nga, Okoniliyu a gre a yi a tsa ŋa ozhẽ nga a kʼpu obiŋ egi ayi baŋ.

²⁶Ambo Ebitru a daŋ a kso. A nyuŋ ŋa a lu mi le, Aŋo o kso, ame e wo arehwĩ angyiŋ.

²⁷Ebitru a la a kpla egba ta la Okoniliyu omba baŋ a yi odne. A yi a hwiŋ moare nzenze ma eshyẽ.

²⁸A nyuŋ mo a lu mi le, Agimi e sheŋ e yi ba arehwĩ ba Eyahuda, ba ozhẽ baŋ a sõ o nyom ŋa okyku o daŋ a kaŋ a bga pa la moa la a wo moaEyahuda mbo. Ambo Ahogbrẽ a tsa me a lu mi ma ame e shrlu arekyeŋ mbo.

²⁹Okyku eka he omba boŋ o hom otum okyku me, ame e ngli ku-ku mbo. Ame e zhĩ ŋo, okyku eshi aŋo o bzi me?

³⁰Okoniliyu a tno ma a lu mi le, Omba he, eka he la olulum la amgbaŋ atra, omba ba ame e fa olu odne me, nga arekyeŋ la a ygi aknye la a shka ayi leleleŋ a ba a tspi egi ayi me.

³¹A nyuŋ me a lu mi le, Okoniliyu! Ahogbrẽ a gno olu boŋ, nga a gre eso a ghre eka boŋ o la o kpo o ghwo la moa-agrogro mbo.

³²O hom arekyeŋ otum Ojopa, o da mo a bzi alom ba eshko baŋ e ri Esima Ebitru. Aŋa a tum odne ba Esima la a fu akpa. Odne lo o wo osusku ta la anyuŋ-ondzu.

³³Okyku eka he ame e hom otum okyku o doŋ o ba shoshoŋ. Ame e vye boŋ o ka o bmye nga o ba. Agi mvye e wo egi ayi ba Ahogbrẽ ohuhuhi. Agi e dzu okyku e gno ekplo ba Ahogbrẽ a klo boŋ o lu o da gi.

³⁴Ebitru a lu mi le, Ame e ka e bmye ohuhuhi ba Ahogbrẽ a sko gi mvye a zga okyekyeŋ angyiŋ.

³⁵Areyaŋ a mbo la a kpo eyli baŋ, nga la a kpo ayakplo la a wo shasha egi ayi baŋ bgu le, a wo a ba oguyaŋ a mbo, Ahogbrẽ á yga ŋa.

³⁶Agimi e yi otum ba Ahogbrẽ a hom a kom moarehwi ba Esrayila nga a su Oshpaodzadzi, o la o shri opyapyaŋ ba eso o shri o ba okro Eyesu Ekristi, aŋa angyiŋ a wo Adigi-odne moarehwi mvye.

³⁷Agimi e yi anyuŋ akplo la a kpo obiŋ ba Eyahuda, alo a zga esi Egalili, ambla abaptisma ba Eyohana a la a kpo.

³⁸Agimi e gno oshpa ba Eyesu Ekristi ba Anazarata eka ba Ahogbrẽ a bli ŋa la Ogbgaodzi, ta la ekʼpo. Aŋa a gre okroyaŋ a mbo nga a la a kpo odlodzi, nga a la a shaŋ moare ba ekʼpo ba egbgabi e kpo mo ewu, okyku Ahogbrẽ a wo ka la ŋa.

³⁹Agi e wo egŋe ba akplo pyeŋ baŋ a kpo obiŋ moaEyahuda ta la Orushalima. Moa a gŋe ŋa egŋe aki nga a bga ŋa.

⁴⁰Ambo Ahogbrẽ a kso ŋa ongybi. Onda otra Ahogbrẽ a daŋ a zgi.

⁴¹Moare mvye a ka ŋa mbo, ambo agi arehwĩ ba Ahogbrẽ a sla gi okyku o da gi e dzu egŋe baŋ e ka ŋa. Agi e wa nga e ri ka la ŋa ambla ba Ahogbrẽ a kso ŋa ongybi.

⁴²Nga aŋa a shĩ gi ma agi e nyum Oshpaodzadzi e ygi moare, nga e zgi egŋe baŋ angyiŋ Ahogbrẽ a sla okyku o daŋ a sõ ombgu eshri moa la a wo ayi, pa la moa la a kpu.

⁴³Moarehwi ba Ahogbrẽ a hom otum vye a lu eshri baŋ a lu mi ma areyaŋ a mbo la a bmi ba adlidzi ka la ŋa, moa a kyu ŋa abgo odlobi baŋ okro ekʼpo ba eshko baŋ.

⁴⁴Omba ba Ebitru a la a lu odlo nga, Ogbgaodzi o gile eshri moa la a gno oshpa lo mvye.

⁴⁵MoaEyahuda la a bmi ba adlidzi, moa la a zgi Ojopa a ba ta la Ebitru, a ka egbregbre ba Ahogbrẽ a shri Ogbgaodzi baŋ a shri a di ototno, a shri a da moa la a wo moaEyahuda mbo a mbo.

⁴⁶Okyku eshi moa a gno moa a lu odlo la enzi ehe, nga moa a hlu Ahogbrẽ eshko okyku esesla baŋ. Ebitru a lu mi le,

⁴⁷Moarehwi hi, moa a yga Ogbgaodzi eka bi a mbo e yga lo. Arekyeŋ a kpo a gbu baŋ a nyom mo o kpo abaptisma la amihĩ?

⁴⁸Ebitru a da mo a kpo mo abaptisma eshko ba Eyesu Ekristi. Nga moa a vẽ okyku o daŋ a dzu pa la mo okyku elum ple.