Read eggon Otum 11 Bible Online

Otum 11 - eggon bible

Otum 11

¹Moa la a nyum oshpa, pa la moanáŋ obiŋ ba Eyahuda mvye, moa a gno moa la a wo moaEyahuda mbo a mbo a yga odlo Ahogbrẽ.

²Omba ba Ebitru a gre Orushalima, moa la a klo a sheŋ moa la a wo moaEyahuda mbo ongyum mo ayga moa a yga mo, moa a shrom ŋa.

³Moa a shrom ŋa a lu mi le, Aŋo Ebitru, aŋo o gre o yi o tum odne moa la a wo moaEyahuda mbo, moa la a sheŋ ongyum mbo, nga aŋo o gba o ri algo pa la mo!

⁴Okyku eka he, Ebitru a tsi oshpa ekployaŋ a mbo la e kpo a da mo.

⁵A lu mi le, Omba ba ame e fa olu osku ba Ojopa, ame e ka okoka. Ame e ka ashye emakyeŋ eka amgbalga, moa a gile lo emvygi enyi e zgi Ongyeŋ e ba obiŋ. Alo e ba e tspi osusku pa la me.

⁶Ame e mbli lo e ka nga, ame e ka ebyi la e kpo adga anyi, ta la ebyi akla nzenze, ta la ebyi la e klu obiŋ, ta la awunu akla ma.

⁷Nga enzi e nyuŋ me e lu mi le, Ebitru, o kso o bga lo o taŋ.

⁸Ambo ame e tno ma e lu mi le, Adigi, alo o kpo o gbu mbo ku-ku! Ame e taŋ ema la e wo eshre e ka mbo.

⁹Enzi e zgi Ongyeŋ e ba e sa e lu mi le, Aŋo o bzi emakyeŋ ba Ahogbrẽ a sko lo a zga edzi, o da lo e dzu eshre mbo.

¹⁰Alo o kpo eka he engyi etra o khwo nga, moa a bla lo a shri a gre Ongyeŋ.

¹¹Omba he lo moare atra ba Okoniliyu a hom mo otum okro me, moa a gbu odne ame e tum ma. Moa a zgi Esizariya a ba.

¹²Ogbgaodzi o tsa me ma ame e ngli mbo, ma ame e yi pa la mo shoshoŋ. Moanáŋ afĩ hi a gre Esizariya pa la me, agi mvye e gre odne ba Okoniliyu.

¹³Aŋa a lu a da gi ma aŋa a ka anwyeadga ba Ahogbrẽ a tspi odne baŋ nga a nyuŋ ŋa a lu mi le, Okoniliyu, o hom arekyeŋ o daŋ a yi Ojopa, nga a bzi alomakyeŋ moa a bzi ŋa Esima Ebitru a daŋ a ba.

¹⁴Aŋa á nyum oshpa á doŋ. Okro oshpa he lo, aŋo pa la moa-odne boŋ ó ba o hwiŋ oshla.

¹⁵Omba ame e lu odlo nga, Ogbgaodzi o gile eshri mo eka baŋ a kpo ka la gi okũ oriori.

¹⁶Ame nga e sa e tne aga ekplo ba Adigi a lu mi le, Eyohana a la a kpo abaptisma la amihĩ, ambo ame é kpo gimi abaptisma la Ogbgaodzi.

¹⁷Alo o wo zheŋ a mo, Ahogbrẽ a shri edgu ototno okyekyeŋ angyiŋ a shri a da moa la a wo moaEyahuda mbo, ka la gi, omba bi e bmi ba adlidzi ta la Adigi-odne Eyesu Ekristi. Ame e wo ayi angyiŋ ame e kpo ekʼpo ta la Ahogbrẽ!

¹⁸Ambla ba Ebitru a lu eka he nga, moa a kyu abgo o shrom ŋa nga moa a hlu Ahogbrẽ eshko a lu mi le, Ahogbrẽ a hwile ozhẽ okyku o da moa la a wo moaEyahuda mbo a mbo a ghwo obiŋ nga a hwiŋ oshla!

¹⁹Omba moa a bga Estifanu nga moa a la a kpo moa la a bmi ba adlidzi ewu, moanwyeotum a som ayi a gre ekro andandandim. Moakyeŋ a gre Efonisha, ta la Esapru, ta la Antakiya. Moa a la a nyum oshpa lo a ygi moaEyahuda sha.

²⁰Ambo moa la a bmi ba adlidzi la a zgi Esapru, ta la Esirini a gre Antakiya, moa a nyum oshpa a ygi moa la a wo moaEyahuda mbo a mbo mvye. Moa a nyum Oshpaodzadzi ba Adigi Eyesu a ygi mo.

²¹Ekʼpo Ahogbrẽ e wo pa la mo. Okyku eka he moare nzenze a bmi ba adlidzi nga a zhiŋ a lu Adigi ma.

²²Oshpa he lo o gbu Orushalima nga, moa a da Abarnaba a gre Antakiya.

²³Omba baŋ a gbu ma a ka eka ba Ahogbrẽ a shri owlama a da moare nga, a gno oraŋ a gre eshri, nga a shĩ mo ma moa a tspi gble, nga a kpo otum Adigi-odne la adlidzi, la eso mo mvye.

²⁴Abarnaba a wo arehwĩ owlama. Aŋa a bli la Ogbgaodzi nga a la a tspi gble ekployaŋ a mbo. Moarehwi nzenze a zhiŋ a lu Adigi ma.

²⁵Abarnaba a bre a gre Atarsu okyku o ka Eshawlu.

²⁶Ambla baŋ a ka ŋa nga, aŋa a daŋ a ba Antakiya ka la ŋa. Moa a kpo eyi ekyeŋ Antakiya, nga moa a la a nye moare nzenze la a lu Ekristi ma. Moa a nye eshki nzenze. Osku ba Antakiya moa a zga esi a bzi moare la a lu Eyesu ma moa-Ekristi.

²⁷Omba he lo angyiŋ moarehwi ba Ahogbrẽ a hom otum, moa a zgi Orushalima a gre.

²⁸Eshko ba akyeŋ eshki mo e ri Agabu. Ekʼpo Ogbgaodzi e tsa ŋa e daŋ a lu mi ma agu embyle á ba obiŋ hi mvye. Ohe lo o kpo omba ba Ekladiya a wo anyuŋ-areŋ.

²⁹Moanwyeotum a hwim ma areyaŋ a mbo eshki mo a klo ekplo baŋ a kpo a gbu okyku o da mo a yi a kpo a ghwo la moanáŋ la a wo obiŋ ba Eyahuda.

³⁰Moa a pla amgbaŋ nga moa a shri lo a da Abarnaba ta la Eshawlu okyku o da mo a shri lo a da moandakʼpo Eklisiya.