Read eggon Otum 12 Bible Online

Otum 12 - eggon bible

Otum 12

¹Omba he lo, Ehirudu anyuŋ-areŋ a zga esi o kpo moakyeŋ eshki moare la a bmi ba adlidzi ewu.

²A da mo a bga Eyakubu anáŋ Eyohana la akõ.

³Omba baŋ a ka moaEyahuda a gno oraŋ ta la ekplo baŋ a kpo a gre eshri nga a da mo a vu Ebitru. Omba he lo o wo omba moa a ri abgo ba Agbrotsa la a nyom mbo.

⁴Ambla moa a vu ŋa, moa a shri ŋa a ta aku. Moa a shri ŋa a ghwo abgo ba egʼba enyi ba moanwyeakyuŋ anyianyi, okyku o da mo a kʼpu ŋa. Ehirudu a zga eso ba o se Ebitru a da moaEyahuda ambla ba moa a ri abgo ba Apaska a khwo.

⁵Okyku eka he moa a dzu Ebitru a zga aku, ambo Eklisiya moa a la a fa olu a vẽ Ahogbrẽ osheshye okyku ŋa.

⁶Okyukyku ba ayi a kre nga, ba Ehirudu á ba a se moarehwi nga, Ebitru a la a ndze enu agʼbaha moanwyeakyuŋ la a kʼpu ŋa. Moa a ta ŋa aslika, nga moanwyeakyuŋ a tspi ayi-zhẽ aku lo a la a kʼpu.

⁷Anwyeadga ba Ahogbrẽ a gnyu nga a ba a tspi okro lo, nga ayimom a tra enjygu aku lo. Anwyeadga ba Ahogbrẽ a kne Ebitru ehwre nga a daŋ a kso nga a nyuŋ ŋa a lu mi le, O kso shoshoŋ! Nga aslika lo a ngla a sku abgo baŋ.

⁸Nga anwyeadga lo a nyuŋ ŋa a lu mi le, O kpmye omgbla akpa boŋ nga o ghwo akpadga boŋ. Ebitru a kpo eka he a khwo nga, anwyeadga ba Ahogbrẽ a nyuŋ ŋa a lu mi le, O sko anyuŋ ariga boŋ o ta egʼba nga o lu me ma.

⁹Ebitru a lu ŋa ma nga a zgi aku lo, ambo aŋa a yi ba ekplo ba anwyeadga a la a kpo e wo adlidzi mbo. Aŋa a la a ka ma o dzu mbo, ma aŋa a la a ka okoka angyiŋ.

¹⁰Moa a bre ayizhẽ ba ori moa a kʼpu ma, ta la a ba oha, nga moa a gbu ayizhẽ ba edzi ekpyemgbyeŋ. Ahi lo moa a kpo lo la ahwre. Ahi lo a zhiŋ ayi a ka osku. Ayizhẽ he lo a hwile eŋa ababgo baŋ nga moa a zgi. Moa a dzi ozhẽ otsotse ple nga anwyeadga ba Ahogbrẽ a gnyu mi a blu.

¹¹Ambla he nga, Ebitru a ka ekplo la e kpo ka la ŋa a bmye, nga a lu mi le, Ame e ka e bmye ohuhuhi ba alo o wo adlidzi angyiŋ! Ahogbrẽ a hom anwyeadga baŋ a daŋ a ba a shla me ekʼpo ba Ehirudu, ta la ayakplo moaEyahuda a zga eso okyku o kpo pa la me mvye.

¹²A yi eka ba akplo lo a wo ma, okyku eka he a gre odne Emeri anaŋ Eyohana Amarku. Moare nzenze a pla emo a shki ahe lo nga a la a fa olu.

¹³Ebitru a tra evgo ayizhẽ edzi nga, anwyeshe-odne ba moa a bzi ŋa ma Oroda, a ba okyku o ka.

¹⁴A gno enzi Ebitru a tspi nga a gno oraŋ a gre eshri, nga anwyeshe lo a knye a bla a gre odne eshyẽ, a ka a hwile ayizhẽ mbo. A gre a yi a lu a da mo a lu mi ma Ebitru a wo ayizhẽ.

¹⁵Moa a tno anwyeshe lo ma a lu mi le, Aŋo o dro angyiŋ! Ambo a bmi a da mo mbo. Moa a nyuŋ ŋa a lu mi le, Amu baŋ angyiŋ aŋo o ka.

¹⁶Ebitru a la a bmmi ayizhẽ lo. Moa a hwile ayizhẽ nga moa a ka ŋa, nga moa a ka egbregbre nzenze.

¹⁷A tsa mo obgo moa a dzu tki, nga a lu a da mo eka ba Ahogbrẽ a se ŋa aku. A nyuŋ mo a lu mi le, Agimi e lu e da Eyakubu ta la moanáŋ ahwõ mvye. A lu eka he a khwo nga, a gre eŋa egi ehwõ.

¹⁸Endigiŋ onda oha nga, egʼba e shla moanwyeakyuŋ la a kʼpu Ebitru nzenze. Moa a kla odlo ta la emo. Moa a zhĩ emo a lu mi le, Eshi e kpo ta la Ebitru?

¹⁹Ehirudu a hlu mo ma moa a klo Ebitru, ambo moa a hwiŋ ŋa mbo. Okyku eka he aŋa a sõ mo ombgu ba eku. Ambla he nga, Ehirudu a zgi obiŋ ba Eyahuda nga a dzu Esizariya okyku omba ple.

²⁰Oklo o wo agʼbaha moarehwi ba Ataya ta la Esidoŋ, ta la Ehirudu mbo. Okyku eka he moa a da eshkikyeŋ e gre okyku o ka Ehirudu. Moa a zga esi a da Oblasta a kaŋ eshri a bga pa la mo. Aŋa angyiŋ a wo are la a la a kpaŋ odne ba Ehirudu. Ambla he nga, moa a gre okro Ehirudu okyku o da mo a nyuŋ a kpo, okyku eshi moa a la a hwiŋ algo obiŋ ba Ehirudu angyiŋ.

²¹Onda olum moa a sla lo nga, Ehirudu a ygi ariga oreŋ nga, a dzu emgbakyiŋ oreŋ nga a nyuŋ moare odlo.

²²Moare a tno ma angyangyeŋ a lu mi le, Aŋo o lu odlo hi, aŋo o wo arehwĩ angyiŋ mbo, ambo ahogbrẽkyeŋ angyiŋ!

²³Nga ebuebu, anwyeadga ba Ahogbrẽ a da Ehirudu a sheŋ obiŋ okyku baŋ a fa olbi a da Ahogbrẽ mbo. Nga akpadzidzi a ri ŋa nga a kpu.

²⁴Odlo Ahogbrẽ o la o ngla nga o ta ma-ma.

²⁵Abarnaba ta la Eshawlu moa a kpo otum mo a khwo Orushalima nga moa a bla a ba Antakiya. Moa a da Eyohana Amarku a gre pa la mo.