Read eggon Otum 15 Bible Online

Otum 15 - eggon bible

Otum 15

¹Moarekyeŋ a zgi Eyahuda a ba Antakiya nga moa a nye moanáŋ a lu mi le, Agimi e hwiŋ oshla mbo o wo le moa a sheŋ gimi ongyum eka ba odaŋ ba Omusa o lu ayga dne.

²Oblus ta la Abarnaba, moa a kʼpi ohwa ta la mo a kla ohe lo a gre eshri. Okyku eka he moa a hwim a lu mi ma Oblus ta la Abarnaba, ta la moakyeŋ ba Antakiya lo a yi Orushalima nga, a lu a da moa la a nyum oshpa pa la moandakʼpo eshri odlo he lo.

³Eshki ba Ekristi osku ba Antakiya angyiŋ a hom mo otum. Moa a sõ Efonisha ta la Asamariya. Moa a tsu oshpa a da mo eka moa la a wo moaEyahuda mbo a zhiŋ a lu Ahogbrẽ ma. Moanáŋ a gno oraŋ ta la oshpa he lo nzenze.

⁴Omba moa a gbu Orushalima nga, Eklisiya e yga mo la ovyevye. Moa la a nyum oshpa pa la moandakʼpo a mbo mvye. Moa a lu ayakplo ba Ahogbrẽ a kpo pa la mo a da mo.

⁵Ambo moakyeŋ eshki moa la a bmi ba adlidzi, la a wo a ba ogu moaEfarisi, moa a kso nga a lu mi le, O dzu omgbybi ba moa a sheŋ ongyum, nga moa a kpaŋ odaŋ ba Omusa.

⁶Moa la a nyum oshpa, pa la moandakʼpo a shki otsotse okyku o mbli odlo he lo o ka.

⁷Ambla moa a kla odlo he lo nzenze nga, Ebitru a kso angyeŋ nga a lu mi le, Agimi anáŋ, agimi e sheŋ e yi, ba Ahogbrẽ a sla me ogbyigbyi okyku o da me e nyum Oshpaodzadzi e ygi moa la a wo moaEyahuda mbo, okyku o da mo a gno nga a bmi ba adlidzi.

⁸Ahogbrẽ la a yi eso moarehwi, a tsa oklo baŋ okyku moa la a wo moaEyahuda mbo omba baŋ a bli mo la Ogbgaodzi baŋ, eka baŋ a kpo ka la gi.

⁹Aŋa a sko mo ka la gi a zga okyekyeŋ. A kyu mo abgo odlobi mo okyku moa a bmi ba adlidzi.

¹⁰Okyku eshi agimi e klo e mbga Ahogbrẽ e ka, nga e klo e shri oshri e zga mo eshri? Ohe lo moadigi a mbo ka la gi e kpo e gbu bi e shri lo mbo!

¹¹O wo eka he mbo! Agi e bmi ba adlidzi nga agi e hwiŋ oshla okpoghwo ba Eyesu Ekristi. Eka he moa a mbo a la a hwiŋ oshla okpoghwo ba Eyesu Ekristi.

¹²Moa-eshki mvye a dzu tki nga moa a ngli a gno oshpa ba Oblus ta la Abarnaba a la a lu. Moa a lu eka ba Ahogbrẽ a shri ekʼpo a da mo nga, moa a kpo ayakplo egbregbre egi ayi moa la a wo moaEyahuda mbo.

¹³Ambla moa a lu odlo a khwo nga, Eyakubu a kso a lu odlo a lu mi le, Agimi anáŋ e ngli e gno!

¹⁴Esima a sheŋ a sla a da gimi e ka, eka ba Ahogbrẽ a klo moa la a wo moaEyahuda mbo nga baŋ a da moakyeŋ eshki mo a dzu moarehwi baŋ.

¹⁵Odlo moarehwi ba Ahogbrẽ a hom otum o lu o bli eka he lo. Akpa ba Ahogbrẽ a lu mi le,

¹⁶Ahogbrẽ a lu mi le, Ambla he nga, ame é bla é ba. Ame é sa é kso odne ba Adawuda la o kypi. Ayakplo la a tpi ayi mvye, ame é bla alo é ba, Nga ame é bla alo é mbdzi.

¹⁷Nga moare ahwõ mvye moa á klo Ahogbrẽ. Moarehwi mvye moa ame e sla mo okyku o da mo a dzu moa ame.

¹⁸Ahogbrẽ a su ohe lo ogbyigbyi a mo.

¹⁹Eyakubu a lu mi le, Eka ame e ka, o raŋ o gre bi e kpo moa la a wo moaEyahuda mbo la a zhiŋ a lu Ahogbrẽ ma ewu mbo.

²⁰O raŋ o gre bi e ta mo akpa e lu mi le, Agimi e taŋ ebyi ololo mbo, okyku eshi alo e wo eshre. Nga agimi e kpo ayakplo eshre mbo. Nga agimi e taŋ ebyi moa a kplu lo oto mbo, mbo. Nga agimi e wa amanzhli mbo.

²¹Moa a la a tsi odaŋ Omusa ombamba mvye anwyeakulu moaEyahuda onda Asabatyaŋ a mbo. Nga moa a la a nyum oshpa lo oskuyaŋ a mbo.

²²Okyku eka he moa la a nyum oshpa ta la moandakʼpo lo, ta la Eklisiya pyeŋ, moa a hwim moa a ba a sla moakyeŋ eshki mo, a da mo a yi Antakiya ta la Oblus, ta la Abarnaba. Moa a sla alom moa a bzi ŋa ma Eyahuda, eshko baŋ e ba oha e ri Abasaba, ta la Esila. Moarehwi aha he lo, moanáŋ a bmi pa la mo a gre eshri.

²³Moa a hom moahi lo otum la akpa he lo. Moa a ta ma a lu mi le, Agi la e nyum oshpa, ta la moandakʼpo, agi e wo moanigimi. Agimi e shko moanáŋ, moa la a wo moaEyahuda mbo la a wo osku ba Antakiya, ta la Esiriya, ta la Esilisiya.

²⁴Agi e gno ma moakyeŋ eshki bi, a gre a shri eyi odlo a fu, nga a lu odlo la o tpi gimi eso ayi. Agi angyiŋ e hom mo otum e da mo a gre a yi a lu eka he mbo.

²⁵Okyku eka he agi e shki nga e sla moarekyeŋ nga e hom mo otum okro bimi. Moa a ba pa la moakyegiazba ba adlidzi, Abarnaba ta la Oblus.

²⁶Moahi lo, moa a bmi o kpo ewu okyku otum ba Eyesu Ekristi Adigi.

²⁷Eyahuda, ta la Esila, moa bi e hom mo otum okro bimi, moa á lu eka ekplo bi e ta akpa e da gimi.

²⁸Ogbgaodzi o tsa gi nga agi e ka tki, alo o wo odzi bi e shri ewukyeŋ e zga ozhẽ bimi mbo. Ambo agi e shri odaŋ he e shri e da gimi. Agi e ka alo ó kpo ó ghwo la gimi.

²⁹Agimi e ri algo ololo mbo. Agimi e wa amanzhli mbo. Agimi e taŋ ebyi moa a kplu lo oto sha. Nga agimi e kpo ayakplo eshre mbo. O wo bimi e kpaŋ odaŋ he lo le, agimi e tspi adzadzi. Ondanda dne a mo.

³⁰Moanwyeadga lo, moa a gre Antakiya. Moa a pla moa la a bmi ba adlidzi mvye a shki nga, moa a shri akpa lo a da mo.

³¹Omba ba moare a tsi akpa lo nga, moa a gno oraŋ nzenze, okyku eshi oshpa ba moa a shri a ba, o shĩ mo.

³²Eyahuda, ta la Esila, moa a wo moarehwi ba Ahogbrẽ a hom mo otum angyiŋ. Moa a lu odlo pa la moanáŋ nzenze, nga moa a gbu mo eso obiŋ.

³³Ambla moa a kpo elum fi pa la moanáŋ osku ba Antakiya, moanáŋ a gno oraŋ pa la mo. Moa a bmi moa a da mo a bla a yi okro moa la a hom mo otum. [

³⁴Ambo Esila a zga eso o bla a yi nga mbo. Aŋa a klo o dzu ahe lo.]

³⁵Oblus ta la Abarnaba, moa a dzu Antakiya okyku omba ple. Moare nzenze pa la mo moa a la a nye moare, nga moa a la a nyum oshpa ba odlo ba Adigi-odne.

³⁶Ambla fi nga Oblus a nyuŋ Abarnaba a lu mi le, E da gi e yi esku ba agi e la e nyum oshpa ba Adigi-odne nga e ka moanáŋ, okyku o da gi e ka eka moa a wo.

³⁷Abarnaba a klo o da Eyohana Amarku a dzi pa la mo.

³⁸Ambo Oblus a tne aga ma alo o wo odzi moa a shri ŋa mbo, okyku eshi aŋa a dzu pa la mo ma-me moa a kpo otum mo a khwo mbo. A ygi ozhẽ Ebamfiliya a ba eŋa odne.

³⁹Moa a kʼpi ohwa a kla ohe lo nzenze nga moaha he lo a gʼba emo. Abarnaba nga a sko Amarku a vu ozhẽ a gre Esapru.

⁴⁰Oblus a sko Esila, nga moanaŋ a vẽ Ahogbrẽ okyku o daŋ a kpaŋ mo.

⁴¹A sõ Esiriya ta la Esilisiya okyku o shĩ moanáŋ ba Eshki ba Ekristi andandandim.