Read eggon Otum 16 Bible Online

Otum 16 - eggon bible

Otum 16

¹Oblus a gre Edabe ta la Elistra. Alomakyeŋ la a bmi ba adlidzi a wo Elistra, eshko baŋ e ri Etimoti. Anaŋ a wo a ba Eyahuda, nga aŋa a bmi ba adlidzi. Ambo adaŋ a wo a ba Egrise.

²Moanáŋ mvye osku ba Elistra ta la Ekoniyom, moa a klo Etimoti a gre eshri.

³Oblus a klo o da Etimoti a dzi ka la ŋa. Okyku eka he aŋa a sko ŋa nga a sheŋ ŋa ongyum. A kpo eka he okyku eshi moaEyahuda la a wo ekro he lo moa a yi ba adaŋ Etimoti a wo a ba Egrise angyiŋ.

⁴Omba moa a la a dzi oklo esku he lo nga, moa a su odaŋ moa la a nyum oshpa pa la moandakʼpo a hwim Orushalima moa a ba a kpo otum ta la lo. Moa a nyuŋ mo ma moa a kpaŋ lo.

⁵Obmi ba adlidzi ba Eklisiya lo o ta ma-ma. Moa a tspi osheshye nga moa a sa a ta ma-ma elulum.

⁶Moa a sõ egʼba obiŋ ba Efragiya ta la Egalasiya, Ogbgaodzi o bmi o da mo a nyum oshpa obiŋ ba Asiya ku-ku mbo.

⁷Omba moa a gbu akaŋ ba Omisiya, moa a klo o yi obiŋ ba Ebitaniya, ambo Ogbgaodzi ba Eyesu o bmi pa la mo mbo.

⁸Okyku eka he moa a sõ Omisiya nga moa a gre Otrosa.

⁹Onda he lo okyukyku nga, Oblus a ka okoka. Okoka he lo, aŋa a ka alom ba Amasidoniya nga a vẽ ŋa a lu mi le, Aŋo o ba Amasidoniya okyku o kpo o ghwo la gi!

¹⁰Ambla ba Oblus a ka okoka he lo nga, agi e vu anzho abgo e khwo nga e gre Amasidoniya. Agi e ka tki, Ahogbrẽ a klo bi e yi e nyum Oshpaodzadzi e ygi moarehwi ba Amasidoniya.

¹¹Agi e gre amgblami Otrosa nga e gre Esomatra, agi e zgi ahe lo e gre Eniyapoli onda oha.

¹²Agi e zgi Eniyapoli e gre Efilibi, osku he lo o gyuŋ la anyuŋ-ondzu. Osku he lo o wo ori anwye ogʼba obiŋ ba Amasidoniya. MoaOroma a la a ri ekʼpo ahe lo. Agi e kpo elum oshushku ahe lo.

¹³Onda Asabat nga, agi e zgi e gre akaŋ ondzu. Agi e la e ka ma agi e hwiŋ anwyeakulu moaEyahuda ma. Agi e dzu obiŋ e lu odlo pa la moashe la a pla a shki ahe lo.

¹⁴Akyeŋ eshki moashe he lo a yga oshpa. Eshko baŋ e ri Elidiya. Aŋa a wo a ba Etatira. Aŋa a la a shri aknye moa a ghwo lo etu a gbmo. A wo are la a hlu Ahogbrẽ eshko. Adigi-odne nga a hwile ŋa eso okyku o daŋ a gno oshpa ba Oblus a nyum.

¹⁵Aŋa pa la moa-odne baŋ moa a kpo mo abaptisma. Elidiya a nyuŋ gi a lu mi le, Agimi e ba e tum odne me, o wo bimi e ka ame e lu Adigi-odne ma adlidzi. Aŋa a rba gi a da gi e gre odne baŋ.

¹⁶Ondakyeŋ nga, omba bi e yi okro o fa olu, agi e ri e sheŋ anwyeshekyeŋ la a wo awaghrẽ ozhẽ. Ogbgabi o la o kpo otum ka la ŋa nga aŋa a la a ka akikiyi. Aŋa a la a hwiŋ amgbaŋ nzenze a la a shri a da moadaŋ-odne okyku eha baŋ la a klo.

¹⁷Anwyeshe he lo a la a lu Oblus ka la gi ma, nga a la a ta akhi a lu mi le, Moarehwi hi, moa a wo moawaghrẽ ba Ahogbrẽ la a wo esesla a gre mvye! Moa a la a nyum oshpa a tsa gimi eka bimi é ba e hwiŋ oshla!

¹⁸Anwyeshe he lo a la a kpo eka he okyku elum eshushku. Ambla he nga, eso e tpi Oblus ayi nga a zhiŋ a nyuŋ ogbgabi a lu mi le, Eshko Eyesu Ekristi ame e lu e doŋ, o zgi o sku anwyeshe lo. Ogbgabi lo o zgi o sku anwyeshe lo embambaŋ.

¹⁹Omba moadaŋ-odne a ka ba ozhẽ o hwiŋ amgbaŋ mo o kpu nga, moa a vu Oblus ta la Esila, nga moa a kom mo a dra a shri a gre egi ayi moandakʼpo okro moare la a shki ma.

²⁰Moa a shri mo a ba okro moandakʼpo ba Oroma nga moa a lu mi le, Moare hi a wo moaEyahuda angyiŋ. Agi e ka, moa a la a som osku bi ayi.

²¹Moa a la a nye edgu odzudzu la o wo ondundum ta la odaŋ bi. Agi e wo moaOroma angyiŋ agi e kpaŋ lo e gbu mbo!

²²Eshki nga e kaŋ eshri e bga pa la moa la a klo odlo ta la Oblus ta la Esila. Moandakʼpo a dle aknye ba Oblus ta la Esila, nga moa a da mo ekʼpo a da mo a yla mo andzu.

²³Ambla moa a yla mo andzu nzenze nga, moa a shri mo a ygi aku. Moa a shri mo a ygi aku a khwo nga, moa a da are la a kʼpu a klu ayizhẽ adzadzi.

²⁴Ambla ba are la a kʼpu a hwiŋ odaŋ eka he a khwo nga, are la a kʼpu lo a shri mo a ndbi a ygi enjygu aku ba egishyẽ, nga a ta mo edzu la anyuŋ agbu okõ.

²⁵Ekpatspe okyukyku nga, Oblus ta la Esila moa a la a fa olu nga moa a fu abmo a la a hlu Ahogbrẽ eshko. Moahwõ moa a shri mo a ygi aku pa la mo nga, moa a la a ngli a gno.

²⁶Omba fi nga obiŋ o suŋ nzenze. Aku lo nga a suŋ ahwim lo mvye. Ebuebu nga ayizhẽ mvye a hwile, aslika nga ba moa a ta moare mvye a ngla.

²⁷Are la a kʼpu nga a kso, a ka ayizhẽ ba aku lo a wo ayimom. A la a ka ma moare mvye a zgi a knye. Okyku eka he a se akõ baŋ nga a klo o bga eŋa.

²⁸Ambo Oblus a lu odlo angyangyeŋ a lu mi le, O bga eŋo mbo! Agi mvye e wo ma!

²⁹Are la a kʼpu lo a bzi arekyeŋ a daŋ a shri ovo a shri a ba, nga a knye la ovo lo nga a la a she jgijgi. A knye a gre aku eshyẽ nga a kʼpu obiŋ egi ayi ba Oblus ta la Esila.

³⁰A ka eka he nga a se mo a sku aku lo, nga a zhĩ mo a lu mi le, Agimi andakʼpo, ame é kpo eshi okyku o da me e hwiŋ oshla?

³¹Moa a tno ma a lu mi le, Aŋo o bmi ba adlidzi ta la Adigi Eyesu. O wo boŋ o bmi ba adlidzi bgu le, aŋo pa la moa-odne boŋ, agimi é hwiŋ oshla.

³²Nga moa a nyum oshpa ba odlo Adigi-odne a ygi ŋa pa la moa la a wo odne baŋ mvye.

³³Okyukyku he lo, are la a kʼpu mo, a fu ami a ndza mo ero moa a taŋ mo andzu, nga moa a kpo ŋa pa la moa-odne baŋ abaptisma.

³⁴A da Oblus ta la Esila a gre odne baŋ nga, a shri algori a da mo. Aŋa pa la moa-odne baŋ moa a wo la ovye ma nzenze, okyku eshi moa a bmi ba adlidzi ta la Ahogbrẽ.

³⁵Endigiŋ onda oha nga, moandakʼpo ba Oroma a hom otum a kom moanwye api la a kʼpu, a lu mi le, Agimi e kyu moare mi abgo e da mo a yi.

³⁶Are la a kʼpu aku lo a nyuŋ Oblus a lu mi le, Moandakʼpo a hom otum a ba ma agi e kyu ŋo ta la Esila abgo e da gimi e yi gimi.

³⁷Ambo Oblus a nyuŋ moanwye api la a kʼpu a lu mi le, Moa a hwiŋ gi la ombgukyeŋ mbo, ambo moa a taŋ gi andzu egi ayi moare. Agi e wo moarehwi ba Oroma angyiŋ! Moa a shri gi a ygi aku a khwo nga, moa a klo o se gi shu? Alo o kpo o gbu mbo! Moandakʼpo ba Oroma lo a ba ababgo mo nga a se gi a sku aku lo.

³⁸Moanwye api la a kʼpu, a nyiŋ amgboŋ odlo a da moandakʼpo ba Oroma. Omba moa a gno ba Oblus ta la Esila moa a wo moarehwi ba Oroma nga, eso e kpla mo e gbu.

³⁹Okyku eka he, moa a gre a yi a ghwo obiŋ a da mo. Nga moa a se mo a sku aku lo, nga moa a da mo a zgi a sku osku lo.

⁴⁰Oblus ta la Esila, moa a zgi a khwo nga moa a vu ozhẽ a gre odne Elidiya. Moa a ka moanáŋ ahe lo, moa a shi mo a khwo nga, moa a kso a sku osku he lo.