Read eggon Otum 17 Bible Online

Otum 17 - eggon bible

Otum 17

¹Moa a kso Efilibi nga, moa a gre Amfiboli ta la Apoloniya, nga moa a bre a gre Etasolonika. Ahe lo anwyeakulu moaEyahuda a wo ma.

²Oblus a gbu Etasolonika nga a gre anwyeakulu moaEyahuda eka baŋ a la a kpo. A kpo elum Asabat etra a la a nye moare odlo Ahogbrẽ.

³Aŋa a la a sla lo a da mo a ka nga, a tsa mo eka ba o dzu omgbybi ba Emisiya á ba a kpo ewu nga moa á kso ŋa ongybi. Oblus a nyuŋ mo a lu mi le, Eyesu ba ame e la e lu odlo eshri baŋ he lo a mi, a wo Emisiya he lo.

⁴Moakyeŋ eshki mo moa a bmi ba adlidzi nga moa a lu Oblus ta la Esila ma. Moa-Egrise la a hlu Ahogbrẽ eshko, ta la moashe moandakʼpo a mbo a lu mo ma.

⁵Ambo moaEyahuda a kpo efpu, nga moa a pla moanwye egbga ba ozhẽ a da mo a sla moare ba osku lo ayi. Nga moa a gre odne Ejaso okyku o da mo a vu Oblus ta la Esila a shri a kom moare.

⁶Ambo moa a hwiŋ mo ahe mbo. Okyku eka he, moa a vu Ejaso pa la moanáŋ a dra obiŋ a shri a kom moandakʼpo. Moa a shri mo a ba nga moa a lu mi le, O ka moarehwi hi a la a sla okro ayaŋ a mbo! O ka moa a ba osku bi ohuhuhi a mo.

⁷Ejaso a shri mo a ghre odne baŋ. Moa a la a pre odaŋ ba anyuŋ-areŋ bi. Moa a la a lu mi ma anyuŋ-areŋ-akyeŋ a wo ma, eshko baŋ e ri Eyesu.

⁸Moa a lu odlo eka he a khwo nga, alo o som eshki pa la moandakʼpo ba osku lo ayi nzenze.

⁹Moandakʼpo a vu Ejaso pa la moahwõ la a wo ka la ŋa engre nga moa a kyu mo abgo a da mo a gre.

¹⁰Okyukyku nga, moanáŋ a knye la Oblus ta la Esila a shri a gre Eberiya. Moa a gbu ahe lo nga, moa a gre anwyeakulu moaEyahuda.

¹¹Moare ahe lo a yga mo la ovyevye a gre eka moa a yga mo osku ba Etasolonika. Moare a ngli a gno oshpa lo adzadzi. Okyku eka he, elulum moa a klo aga Akpekpa ba Ahogbrẽ okyku o da mo a ka adlidzi ba odlo ba Oblus a la a lu.

¹²Moare nzenze a bmi ba adlidzi. Moashe moandakʼpo ba Egrise nzenze, pa la moarealom nzenze ba Egrise a bmi ba adlidzi.

¹³Ambo omba moaEyahuda la a wo osku ba Etasolonika a gno eka ba Oblus a nyum oshpa ba Ahogbrẽ osku ba Eberiya nga, moa a knye a ba nga moa a som eshki ayi.

¹⁴Moanáŋ a ka eka he nga, moa a knye la Oblus a shri a gre akaŋ anyuŋ-ondzu. Ambo Esila ta la Eti-moti, moa a ra a dzu Eberiya.

¹⁵Moare a shri Oblus ma-me a shri a gre osku ba Atanese ayga a ygi a ba. Oblus a hom mo otum okro Esila ta la Etimoti ma moa a ba a zhiŋ a sheŋ ŋa Atanese shoshoŋ.

¹⁶Omba ba Oblus a wo osku ba Atanese a la a dzu a bli Esila ta la Etimoti, eso e tpi ŋa ayi e gre eshri omba baŋ a ka okpko o wo osku lo nzenze.

¹⁷Oblus a la a hwro odlo pa la moaEyahuda, pa la moa la a wo moaEyahuda mbo la a lu Ahogbrẽ ma, anwyeakulu moaEyahuda, nga a la a hwro odlo pa la moare la a ba okyku o gno odlo baŋ okro moare la a shki ma.

¹⁸MoaEpekuriya, ta la moaOsotoki moa la a nye mo egu eha he lo, moa a kla odlo ta la Oblus. Moakyeŋ a lu mi le, Alom hi la evbu eshri, a la a klo o lu eshi? Moakyeŋ a lu mi le, Aŋa a la a lu odlo eshri ahogbrẽ moazhẽ. Moa a lu eka he okyku eshi Oblus a lu odlo eshri Eyesu ta la oksongybi baŋ.

¹⁹Okyku eka he, moa a shri Oblus a ba aku eshki ba Ariyobga nga moa a nyuŋ ŋa a lu mi le, Agi e klo e gno onyenye olehe boŋ o la o lu odlo eshri lo he.

²⁰Ayakploabze boŋ o la o lu, moa a dzu ahe angyiŋ ka la gi. Agi e klo boŋ o sla lo o da gi e ka e bmye.

²¹Moarehwi ba Atanese mvye ta la moazhẽ la a dzu Atanese, moa a klo o la o lu ayakplo ahe nga o ngli o gno ayakplo ahe. Moa a la a klo edgu ayakplo he lo a gre eshri.

²²Oblus a kso aku eshki ba Ariyobga nga a lu mi le, Agimi arehwĩ ba Atanese! Ame e ka, agimi e wo moarehwi la a lu ahogbrẽ ma osheshye angyiŋ.

²³Omba ba ame e la e dzi oklo osku bimi nga, ame e ka okro bimi e la e hlu ahogbrẽ eshko ma, nga ame e ka moa a ta engla ezhim olo ba ahogbrẽ-akyeŋ e lu mi le, Okyku ahogbrẽ ba moa a yi ŋa mbo. Ahogbrẽ he lo a mi agimi e la e hlu ŋa eshko, ambo agimi e yi ŋa mbo, ame e ba okyku o nyum oshpa baŋ angyiŋ e ygi gimi.

²⁴Ahogbrẽ la a kpo obiŋ hi ta la ekployaŋ a mbo, aŋa angyiŋ a wo Adigi-odne ba Ongyeŋ ta la obiŋ hi. Aŋa a la a dzu Anyuŋ-akulu moa a mbdzi lo la abgo mbo.

²⁵Aŋa a klo ekplokyeŋ moare a kpo mbo, okyku eshi aŋa angyiŋ a shri ayaŋ, ta la ekployaŋ a mbo a shri a da moarehwi.

²⁶Aŋa a kpo moare obiŋ hi mvye ibu arekyekyeŋ sha nga a da mo a dzu okroyaŋ a mbo obiŋ hi. Aŋa eshrishri eŋa a sheŋ a sla omba, ta la ekplu ekro moare á ba a dzu ma.

²⁷Aŋa a kpo eka he okyku o da mo a klo ŋa. Nga le okyku o da mo a hwiŋ ŋa, omba moa a klo ŋa. Ambo Ahogbrẽ a wo ogyugyuŋ ka la gi ku-ku mbo,

²⁸okyku eshi Agi e la e dzu ka la ŋa angyiŋ, Agi e la e dzi ka la ŋa angyiŋ. Alo o wo eka moarehwi bimi la a ta odlo egŋe a ta a lu mi le, Agi a mbo e wo moanwye baŋ angyiŋ.

²⁹Okyku ba agi e wo moanwye baŋ, o raŋ o gre ba agi e ka eka ba Ahogbrẽ a wo ekplokyeŋ eka agbro ezanariya ta la azurfa angyiŋ mbo, o mbo le ezhim mbo. Ahi lo a wo akplo moa a sẽ angyiŋ la eda arehwĩ.

³⁰Ahogbrẽ a dzu moare a zga omba moa a yi mbo. Ambo ohuhuhi aŋa a shĩ moare ayaŋ a mbo ma moa a zhiŋ ogbu a sku ayakplobi.

³¹Ahogbrẽ a sheŋ a sla onda baŋ á ba a sõ moarehwi obiŋ hi mvye ombgu ba adlidzi. Are baŋ a sla angyiŋ á ba a sõ moare ombgu. A sheŋ a tsa areyaŋ a mbo ohe lo oksongybi baŋ a daŋ a kso!

³²Omba ba moare a gno ba Oblus a tsi etku oksongybi nga, moakyeŋ a lu ega a ygi ŋa. Ambo moakyeŋ a nyuŋ ŋa a lu mi le, Agi e klo boŋ o lu odlo he lo o da gi e gno nganga.

³³Nga Oblus a kso a sku eshki.

³⁴Moarekyeŋ a bmi ba adlidzi ta la odlo ba Oblus a lu nga moa a lu ŋa ma. Eshki mo ahe lo, alomakyeŋ a wo ma eshko baŋ e ri Ediyonisiyu, aŋa a wo a ba aku eshki ba Ariyobga, ta la ashekyeŋ moa a bzi ŋa Adamari, ta la moakyeŋ.