Read eggon Otum 2 Bible Online

Otum 2 - eggon bible

Otum 2

¹Onda olum ba Epentakos, moare la a bmi ba adlidzi mvye a pla a shki okrokyeŋ.

²Moa a dzu nga, moa a gno anyuŋ akyuŋ a zgi ahrẽ a ba. Alo a kpo eka ba ogbga la o wo oshye o gre eshri o la o hlu. Akyuŋ lo a ba a bli odne moa a shki ma lo.

³Emakyeŋ eka embli ovo e ngla odne lo, nga e kpo otum eshri areyaŋ a mbo eshki lo.

⁴Moa mvye a bli la Ogbgaodzi, nga moa a lu elom andandandim. Ogbgaodzi lo angyiŋ o shri ekʼpo he lo o da mo.

⁵MoaEyahuda, ta la moa la a lu Ahogbrẽ ma a zgi ebiŋ andandandim obiŋ hi a ba Orushalima omba he lo.

⁶Omba ba moa a gno akyuŋ he lo, eshki mvye e ka egbregbre, okyku eshi moa la a lu Ahogbrẽ ma a lu elom moare andandandim, nga moare la a ba, a la a gno lo,

⁷moa a ka egbregbre a gre eshri nga moa a lu mi le, Moare la a lu odlo he lo mvye, moa a wo moarehwi ba Egalili angyiŋ!

⁸Moa a kpo anyu a gno elom bi mvye?

⁹Agi e zgi Apatiya, ta la Emediya, ta la Elam, ta la Emesopataniya, ta la Eyahuda, ta la Akapadokiya, ta la Obontu, ta la Asiya,

¹⁰ta la Efragiya, ta la Ebamfiliya, ta la Amasla, ta la obiŋ ba Elibiya osuksu ta la Esirini. Agikyeŋ nga e zgi Oroma e ba.

¹¹MoaEyahuda pa la moa la a wo moaEyahuda mbo la a zhiŋ a sõ ozhẽ moaEyahuda a wo ma. Moakyeŋ eshki bi, moa a zgi Ekreta, moakyeŋ moa a zgi Arabiya. Ambo agi egu he lo mvye e gno ayakplo moa a la a lu eshri anyuŋ ayakplo ba Ahogbrẽ a ba a kpo!

¹²Moa mvye a ka egbregbre a gre eshri nga, moa a la a zhĩ emo a lu mi le, Ekplo la e kpo he e wo okũ eshi angyiŋ?

¹³Moakyeŋ a lu odlo ototno eshri moare la a bmi ba adlidzi a lu mi le, Moa a wyo la ami anab a la a kpo ayi.

¹⁴Ambla he nga Ebitru a kso angyeŋ pa la moa la a nyum oshpa okʼpoakyeŋ, nga a lu odlo osheshye eshki a lu mi le, Agimi Eyahuda ta la areyaŋ a mbo la a dzu Orushalima, agimi e ngli e gno ekplo ame e klo o lu o da gimi ohuhuhi.

¹⁵Moarehwi bimi e ka mo hi, moa a wa ajige angyiŋ a kpo ayi eka bimi e lu mbo. Omba o wo amgbaŋ atronyi ba endigiŋ sha ayga.

¹⁶Ohe lo o kpo okyku o bli ekplo ba Ojoel arehwĩ ba Ahogbrẽ a hom otum a lu angyiŋ.

¹⁷Ahogbrẽ a lu mi le, Ekplo ba ame é ba e kpo amom-abgo ekpyembyeŋ, Ame é shri Ogbgaodzi me, é da moare pyeŋ. Moanwye-alom bimi, ta la moanwye-alashle bimi, moa á lu ayakplo egbregbre. Moa ola anwye bimi, moa á ka okoka ba egbregbre ayakplo, Moa atsoŋ adigimi, moa á ndze ondze.

¹⁸Ame é shri Ogbgaodzi me é shri é da awaghrẽ me moalalom, pa la moalashle. Omba he lo, la Ogbgaodzi me nga moa á lu ayakplo ba egbregbre.

¹⁹Ame é kpo ayakplo ba egbregbre ahrẽ, ta la obiŋ hi. Moa á ka amanzhli ta la ovo, ta la odzo nzenze.

²⁰Olum ó hwĩ evbu, Ohwa nga ó zhiŋ ó dzu obme eka amanzhli, Ohe lo ó kpo ayga, anyuŋ Onda ba Adigi-odne lo ó ba o ba.

²¹Omba he lo areyaŋ a mbo la a ghwo obiŋ okro Adigi-odne Aŋa á gro.

²²Agimi arehwĩ ba Esrayila, agimi e ngli e gno odlo he lo! Eyesu ba Anazarata a wo arehwĩ ba Ahogbrẽ a daŋ a kpo ayakplo egbregbre andandandim okyku o tsa gimi. Agimi e yi eka he lo, okyku baŋ a kpo ekployaŋ a mbo ahe ka la gimi.

²³Ahogbrẽ a yi, ambo a sheŋ a hwim eso baŋ, baŋ á shri Eyesu á da gimi, ambo agimi e shri ŋa e da moarehwi ba odlobi a gŋe ŋa egŋe aki.

²⁴Ambo Ahogbrẽ a kso ŋa ongybi. Aŋa a sko ewu ba eku a sku ŋa. Eku e kpo e gbu e kom ŋa mbo ku-ku.

²⁵Adawuda a lu odlo eshri baŋ a lu mi le, Ame e ka Adigi egi ayi me ombamba mvye, Aŋa a wo obgori me. Okyku eka he eso é ngʼba me mbo.

²⁶Okyku eka he nga eso e gbu me obiŋ, nga ame e la e gno oraŋ. Ame la egʼba la é ba e kpu hi, ame e wo la okayiozhẽ ma,

²⁷Okyku eshi aŋo ó da me e kpu e dga obiŋ hi pa la moa-hwõ mbo, Aŋo ó bmi ó da anwye-odne boŋ ba esesla a vre mbo.

²⁸Aŋo o sheŋ o tsa me ozhẽ ba eso, Nga egi ayi boŋ ame é hwiŋ ovye.

²⁹Agimi anáŋ o dzu omgbybi ba ame e lu ekployaŋ a mbo zhezheŋ eshri adigi Adawuda e da gimi. Aŋa a kpu nga moa a ngybi ŋa. Agi e yi engu baŋ ma-me e bli olum anye he.

³⁰Aŋa a wo arehwĩ ba Ahogbrẽ a hom otum angyiŋ, nga a yi ekplo ba Ahogbrẽ a hwim ka la ŋa. Ahogbrẽ a hwim a lu mi ma aŋa á da arekyeŋ ogu ba Adawuda á dzu areŋ eka ba Adawuda a wo.

³¹Adawuda a yi ekplo ba Ahogbrẽ a hwim baŋ á ba a kpo, okyku eka he a lu odlo eka ba Emisiya á ba a kso ongybi angyiŋ omba baŋ a lu mi le, Aŋa a daŋ a kpu a dga obiŋ hi mbo, Egʼba baŋ e vrẽ ku-ku mbo.

³²Ahogbrẽ a kso Eyesu he lo ongybi. Agi e wo egŋe eshri ohe lo.

³³Moa a kso ŋa a daŋ a yi a dzu obgori ba Ahogbrẽ, nga a yga Ogbgaodzi okro baŋ eka ba Adaŋ a sheŋ a hwim. Ekplo bimi e ka nga e gno ohuhuhi, Ogbgaodzi angyiŋ o shri o da gi.

³⁴Ambo Adawuda a vre a gre Ongyeŋ mbo, ambo aŋa a lu mi le, Ahogbrẽ a nyuŋ Adime-odne a lu mi le, Aŋo o dzu obgori me

³⁵O tsa ba ame e da moafpu ŋo á ba a tsi a gbu egi ayi boŋ.

³⁶Agimi arehwĩ ba Esrayila, o raŋ o gre bimi e ka e bmye ba agimi e gŋe Eyesu he lo egŋe aki. Aŋa angyiŋ Ahogbrẽ a daŋ a dzu Adigi ta la Emisiya!

³⁷Omba moare a gno eka he nga alo o so mo ayi, nga moa a zhĩ Ebitru pa la moa la a nyum oshpa ahwõ a lu mi le, Agimi anáŋ agi e kpo anyu a mo?

³⁸Ebitru nga a tno mo ma a lu mi le, Areyaŋ a mbo eshki bimi a ghwo obiŋ odlobi baŋ, nga a da mo a kpo ŋa abaptisma eshko ba Eyesu Ekristi okyku o da mo a kyu ŋa abgo odlobi. Nga Ahogbrẽ á shri Ogbgaodzi á shri lo á daŋ ototno.

³⁹Okyku eshi Ahogbrẽ a hwim ka la gimi, pa la moanwye bimi, pa la moa la a wo ogyugyuŋ, pa la moare ba Adigi Ahogbrẽ a bzi mo.

⁴⁰Ebitru a nyum oshpa a ygi mo a khwo nga, a shĩ mo a lu mi le, Agimi e ghwo obiŋ okyku o da ewu moare á ba a kpo e tka gimi mbo!

⁴¹Moare nzenze eshki lo a gno oshpa lo nga moa a bmi ba adlidzi, nga moa a kpo mo abaptisma. Moa la a zhiŋ onda he lo a wo ezbietra.

⁴²Moa a dzu pa la moa la a nyum oshpa okyku o da mo a nye mo odlo Ahogbrẽ. Moa a la a ri ekpom otsotse nga moa a la a ri algo nga a la a fa olu otsotse.

⁴³Moa la a nyum oshpa a kpo ayakplo egbregbre nzenze, alo a da areyaŋ a mbo a ka egbregbre.

⁴⁴Moare la a bmi ba adlidzi mvye, moa a ri ekpom la e wo osheshye, nga moa a la a gʼba anzho moa a wo alo ma otsotse ta la emo.

⁴⁵Moa a la a shri anzho moa a wo alo ma a shri a gbmo, nga a la a shri amgbaŋ a ba nga a da mo a gʼba lo otsotse ta la emo, eka ekplo areyaŋ a mbo a klo.

⁴⁶Olum ondayaŋ a mbo moa a la a pla emo a shki Anyuŋ-akulu, nga moa a la a ri algo otsotse adne emo, moa a la a ri algo lo la ovyevye nga eso e gbu mo obiŋ.

⁴⁷Moa a la a hlu Ahogbrẽ eshko nga, moare a la a klo mo. Nga olum ondayaŋ a mbo Ahogbrẽ a la a tsa moare a da mo a ghwo obiŋ nga, Ahogbrẽ a da moare a ghwo obiŋ ombamba pyeŋ. Moare la a lu Ahogbrẽ ma nga a ta ma-ma.