Read eggon Otum 20 Bible Online

Otum 20 - eggon bible

Otum 20

¹Ambla ba eso e gbu moare obiŋ nga, Oblus a bzi moa la a bmi ba adlidzi mvye nga a lu odlo okyku o shĩ mo, nga a shri oyiamo a da mo. Nga a kso a gre Amasidoniya.

²A sõ egʼba obiŋ andandandim, nga a la a nyum oshpa engyi oshushku a shĩ mo. Ambla he nga a ba Egrise.

³A dzu Egrise eha etra. A vu eŋa abgo, a klo o ba o yi Esiriya, a mbo a gno ma moaEyahuda a fu eshri okyku o vu ŋa. Okyku eka he a zga eso ba o sõ Amasidoniya.

⁴Esopate, anwye Ebiru, aŋa a zgi Eberiya. Aristaku, ta la Esakundu, moa a zgi Etasolonika, moa a gre ka la ŋa. Egayu a zgi Edabe, Etimoti, ta la Etikiku, ta la Otrofimu moa a zgi obiŋ ba Asiya. Moahi lo a mbo a gre ta la Oblus.

⁵Moa a gre a yi a dzu a bli gi osku ba Otrosa.

⁶Agi e gre amgblami osku ba Efilibi ambla bi e ri Abgo ba Agbrotsa la a nyom mbo. Ambla ba elum etno nga agi e yi e hwiŋ mo osku ba Otrosa. Agi e kpo asati akyeŋ ahe lo.

⁷Onda Asati olum-ore nga, agi e shki nga e ri algo ba ekpom. Omba he lo Oblus a lu odlo pa la moare ma-me a bli ekpatspe okyukyku okyku eshi a zga eso ba o yi onda oha.

⁸Emgbuovo nzenze e wo aku ongyeŋ ba agi e shki ma lo.

⁹Ola anwyekyeŋ a wo ma, eshko baŋ e ri Oyutiku, a dzu ataga. Omba ba Oblus a lu odlo a bla a lu nga, enu e vu Oyutiku nga a ndze, nga a zgi odne ongyeŋ ba otra lo a sheŋ obiŋ. Moa a si ŋa a ka nga a sheŋ a kpu bgu.

¹⁰Ambo Oblus a gile nga a gre nga a yi a bʼbi ŋa nga a lu mi le, Agimi e ngʼba eso mbo, a yi a wo ayi!

¹¹Ambla he nga, a sa a vre a gre odne ongyeŋ nga a buŋ agbrotsa nga moa a taŋ. Oblus a lu odlo pa la moare ma-me o tsa ba etne e zgi ayga a kso.

¹²Moa a sko ola anwye lo la eso ma a shri a gre odne. Moa a hwiŋ opya-pyaŋ ba eso nzenze.

¹³Agi e gre amgblami e zgi Otrosa e gre Aso. Oblus a dzi ka la a gi mbo. Agi e gre e yi e sko ŋa osku ba Aso. A da gi e gre amgblami nga, aŋa a dzi adga.

¹⁴Aŋa a hwiŋ gi osku ba Aso nga agi e sko ŋa amgblami nga agi e gre Emitilini.

¹⁵Agi e kso ahe lo nga, agi e gbu Okiyo olum onda o ba oha. Onda oha nga agi e ba Osamo, nga onda oha nga agi e gbu Emilitu.

¹⁶Oblus a klo a sõ osusku ta la Afisu okyku o daŋ a tpi omba ayi obiŋ ba Asiya mbo. Aŋa a kpo omvro okyku o daŋ a gbu Orushalima shoshoŋ. A klo okyku o daŋ a gbu onda ba Epentakos.

¹⁷Oblus a hom otum a zgi Emilitu a kom moandakʼpo ba Eklisiya ba Afisu, a lu mi ma moa a ba a tsa ŋa ozhẽ.

¹⁸Omba moa a ba nga a nyuŋ mo a lu mi le, Agimi e sheŋ e yi eka ame e kpo otum ka la gimi omba ba ame e wo obiŋ ba Asiya.

¹⁹La eso ble-ble, ta la oghwo-esõ ame e kpo otum me eka ba anwye-odne ba Adigi-odne. Ame e kpo ewu nzenze okyku eshi omba he lo moaEyahuda a la a fu eshri me.

²⁰Agimi e yi eka ba ekployaŋ a mbo la e wo owlama ma, ba ame e kom lo okyku eshri me omba ba ame e la e nyum oshpa, nga e la e nye gimi eshki, ta la adne bimi mbo.

²¹MoaEyahuda, pa la moa-Egrise, ame e shĩ mo osheshye ma moa a zhiŋ ogbu a dzu odlobi mo a zga nga a lu Ahogbrẽ ma, nga a bmi ba adlidzi ta la Adigi Eyesu.

²²Ohuhuhi ame e yi Orushalima eka ba Ogbgaodzi o tsa me. Ame e yi Orushalima ohuhuhi, ambo ame e yi ekplo la é ba e kpo a mi lo pa la me mbo.

²³Ekplokyekyeŋ ame e yi, oskuyaŋ a mbo Ogbgaodzi o la o tsa me o lu ma aslika, ta la ewu, ma moa a dzu a bli me.

²⁴Ambo ame e sko eso me e da lo e dzu ekplokyeŋ mbo. Okyku eshi ame e klo o bli otum ba Adigi Eyesu a shri a da me, ba ame e kpo. Otum ozgi egŋe Oshpaodzadzi ba okpoghwo ba Ahogbrẽ.

²⁵Ame e gre okro bimi mvye e la e nyum oshpa ba Oreŋ Ahogbrẽ. Ame e sheŋ e yi, arekyeŋ eshki bimi á ka me ondakyeŋ nga mbo ku-ku.

²⁶Okyku eka he ame e lu e da gimi osheshye anye he, o wo arekyeŋ eshki bimi a bmi ba adlidzi mbo le, okyeŋ o wo o me ma ku-ku nga mbo.

²⁷Ame e kom ekplokyeŋ ba Ahogbrẽ a klo ba ame e lu e da gimi mbo ku-ku.

²⁸Agimi e nyuŋ egimi e ka ta la ékylu mvye ba Ogbgaodzi o shri o ghwo abgo bimi. Agimi e dzu moa la a kpaŋ moarehwi ba Ahogbrẽ. Moahi lo, aŋa a sla mo okro okpu-kpu ba Anwye baŋ a ba a kpu.

²⁹Ame e sheŋ e yi, ambla ba ame e sheŋ e gre le, ebuakam la e wlu ayi e gre eshri, moa á ba a gre agʼbaha bimi, moa á sla gimi ayi.

³⁰Moakyeŋ eshki bimi, moa á ba nga moa á sheŋ akpro nga, moa á som moa la a bmi ba adlidzi ayi á da mo a lu mo ma.

³¹Agimi e nyuŋ e ka, nga e tne aga e ka adzadzi, ame la amanyi ayi me nzenze e la e nye areyaŋ a mbo eshki bimi olulum, ta la okyukyku ma-me eyi etra.

³²Ambo ohuhuhi ame e shri gimi e ghwo abgo Ahogbrẽ, ta la oshpa ba okpoghwo baŋ. Aŋa a kpo a gbu baŋ a da gimi e tspi osheshye, nga a shri owlama baŋ a shri a zga ma okyku moare baŋ, a shri a da gimi.

³³Ame e gro ayi azurfa ta la ezanariya, ta la aknye arekyeŋ ku-ku mbo.

³⁴Agimi a mbo e sheŋ e yi ba ame la abgo me e kpo otum, nga ba ame e hwiŋ ekployaŋ a mbo ba moakyemeazba pa la me a klo.

³⁵Okro ayakplo nzenze ame e la e tsa gimi eka ba alo o dzu omgbybi bimi e kpo ngre eka he okyku o kpo o ghwo la moagogro. E tne aga odlo ba Eyesu eshrishri eŋa a lu ma oraŋ o wo ofoadi o gre oyayga.

³⁶Ambla ba Oblus a lu odlo a khwo nga, a gbile a kʼpu obiŋ pa la mo nga a fa olu.

³⁷Moa mvye a wu okũ omba moa a ta ŋa a kpmye nga, a shko ŋa nga a shri oyiamo a daŋ.

³⁸Odlo baŋ a lu ma moa a ka ŋa nga mbo ku-ku, o tpi mo eso ayi o gre eshri. Moa a dzi ŋa a gre okro amgblami.