Read eggon Otum 27 Bible Online

Otum 27 - eggon bible

Otum 27

¹Omba ba moa a hwim ba agi é ba e yi obiŋ ba Etali nga moa a shri Oblus pa la moaprusuna ahwõ, a shri a ghwo abgo ba Ojuliyo, andakʼpo moanwyeakyuŋ ba Oroma ba ogʼba moa a bzi lo ma Ogʼba ba Ekeza.

²Agi e gre amgblami ba Adramitiyum. Amgblami lo a wo ozhẽ ba o yi anyu-ami andandandim ba obiŋ ba Asiya, nga a ba o yi oyi. Alo-makyeŋ moa a bzi ŋa ma Aristaku, aŋa a wo a ba obiŋ ba Amasidoniya. Aŋa a zgi Etasolonika. A wo ka la gi.

³Onda oha nga, agi e gbu Esidoŋ. Ojuliyo a kpo a ghwo la Oblus, nga a bmi a daŋ a yi a ka moakyeŋazba okyku o da mo a kpo a ghwo a ŋa la ekplo baŋ a klo.

⁴Omba ba agi e zgi ahe lo ogbga o la o hlu osheshye egi ayi bi. Okyku eka he agi e ngʼba e sõ akaŋ ba anwye-obiŋ ba Esapru, agba ba ogbga o hlu ma mbo.

⁵Agi e bmyi anyuŋ ondzu lo. Alo o wo osusku ta la Esilusiya, ta la Ebamfiliya, nga agi e ba Emira obiŋ ba Elisiya.

⁶Ahe lo andakʼpo moanwyeakyuŋ a hwiŋ amgblami la a zgi Alaksandriya a ba, alo a yi Etali. A da gi e gre ma.

⁷Agi e la e dzi dze-dze okyku elum oshushku. Agi e kpo ewu ozhẽ e gre eshri. Agi e kpo-kpo nga, agi e gbu osku ba Esinidu. Ogbga o hlu osheshye nzenze. Okyku eka he anvaŋ a wo ma ba agi e bre e yi mbo. Okyku eka he agi e ngʼba e sõ akaŋ ba anwye-obiŋ ba Ekreta. Ogbga o hlu ahe lo mbo. Agi e sõ akaŋ ba obiŋ Esalmoni.

⁸Agi e sõ akaŋ anyuŋ-ondzu, agi e kpo ewu nzenze, ambo ambla nga agi e gbu osku moa a bzi lo ma Anyu-ami Adzadzi. Alo a gyuŋ ta la osku ba Elasiya mbo.

⁹Agi e tpi omba ayi ahe lo nzenze, okyku eka he o zgi ahe o yi o wo ewu o gre eshri. Omba he lo nga, omba ba olum Onyuŋ-okpo o sheŋ o bre o gre bgu. Oblus a ghwo ebra pa la mo a lu mi le,

¹⁰Agimi arehwĩ ame e ka odzi bi o zgi ahe o yi o wo ewu o gre eshri. Anzho la a wo amgblami ta la amgblami lo á tpi ayi, nga moare a mbo á kpu.

¹¹Andakʼpo moanwyeakyuŋ a bmi ta la ekplo ba andakʼpo ba amgblami pa la moa ba amgblami lo a lu, ambo a tla ekplo ba Oblus a lu.

¹²Anyu-ami he lo a wo adzi moa a dzu a dum ma omba ogbga o bʼbu ahe lo mbo. Okyku eka he, moare nzenze a klo bi e yi Efoniki o wo ba alo o kpo o gbu le. Anyu-ami he lo a wo obiŋ ba Ekreta, alo a zhiŋ ayi a ka ero la olum-ore, ta la osu la olum-ore. Moa a klo a dzu ahe lo omba ba ogbga o bʼbu.

¹³Ogbga o la o zgi egi ero o la o hlu dze, moare nga a la a ka ma o dzu mbo ma moa a kpo a gbu moa a yi Efoniki eka moa a zga eso. Okyku eka he moa a se evgo-amgbaŋ, nga moa a sõ akaŋ ba Ekreta.

¹⁴Ambla fi nga, ogbga la o shye nzenze, moa a bzi lo ma Ogbga ba Osu la olum-ore, alo o hlu o zgi anwye-obiŋ lo o ba.

¹⁵Alo o hlu amgblami. Alo o kpo o gbu ba moa a zga amgblami kye ozhẽ ogbga lo mbo. Agi e kpo e gbu nga mbo. Okyku eka he agi e kyu abgo nga, e da ogbga o hlu lo.

¹⁶Agi e tspi omba bi e gbu egi ero ba anwye-obiŋ ba Akawuda. Ahe lo agi e zga gble nga e da anwye amgblami a gro.

¹⁷Moa a se lo, nga moa a bʼbu anyuŋ amgblami ondzi. Moa a la a kpo eyli ma o dzu mbo ma amgblami a yi endase ba akaŋ ba Elibiya. Okyku eka he, moa a gile ashye oknye, nga moa a da ogbga o mu amgblami.

¹⁸Ogbga o hlu nzenze. Okyku eka he, onda oha nga moa a tslo anzho la a wo amgblami a ygi ami.

¹⁹Onda oha nga, moa a tslo anzho otum ba amgblami a ygi ami ababgo mo.

²⁰Elum oshushku agi e ka olum o mbo le eyi enzo mbo. Ogbga nga o hlu nzenze. Nga agi e da eso bi e dzu okyekyeŋ ba agi é ba e jygi.

²¹Ambla moare a dzu embyle elum oshushku nga, Oblus a ka eka he nga a nyuŋ mo a lu mi le, Agimi e gno odlo me e mbi, Agimi e ngʼba e sku Ekreta ku-ku mbo. E mbi anzho bi la a yla hi, alo a yla e mbo.

²²Ambo ohuhuhi ame e vẽ gimi e kpo eyli mbo! Arekyeŋ eshki bimi á yla mbo, o wo le amgblami sha.

²³Okyku eshi okyukyku ore, anwyeadga ba Ahogbrẽ ba ame e la e lu ŋa ma, nga e la e hlu ŋa eshko, a ba okro me.

²⁴A nyuŋ me a lu mi le, Oblus, o kpo eyli mbo! O dzu omgbybi boŋ ó ba o tspi egi ayi ba Ekeza. Ahogbrẽ nga, odlodzi baŋ, a shri eso moare la a dzi ka la ŋo a shri a doŋ.

²⁵Okyku eka he, agimi e tspi gaŋ! Ame e la e bmi ba adlidzi ta la Ahogbrẽ ba ekployaŋ a mbo é ba e kpo eka moa a lu a da me.

²⁶Ambo, moa á zhiŋ gi á yi akaŋ anwye-obiŋ akyeŋ.

²⁷Okyukyku onda olum ekʼpo la anyi ogbga ogbu o la o mu amgblami bi anyuŋ-ondzu ba Emediteraniya. O la ekpatspe okyukyku nga, moa la a kpo otum amgblami, a ka a tspi ba agi e wo osusku ta la obiŋ.

²⁸Okyku eka he moa a shri ondzi a ta ami. Moa a dze ashye ahwre ma. Moa a mbga lo a ka nga, ogyuŋ lo o wo adga endga la ekʼpoeha. Ambla fi nga moa a sa a mbga a ka nganga, moa a hwiŋ adga ekʼpoetronyi.

²⁹Moa a la a ka ma, o dzu mbo, ma amgblami bi á kne ezhim, nga moa a kpo eyli. Okyku eka he moa a ndbi evgo-amgbaŋ enyi ami egi okũ ba amgblami, nga moa a fa olu a vẽ okyku olum.

³⁰Moa la a kpo otum amgblami, a klo o knye o sku amgblami. Moa a mu ela amgblami, moa a kpo eka moa a yi o se evgo-amgbaŋ egi ayi ba amgblami lo.

³¹Ambo Oblus a nyuŋ andakʼpo moa-nwyeakyuŋ pa la moanwyeakyuŋ a lu mi le, O wo moa la a kpo otum amgblami he a dzu amgblami lo mbo le, agimi é gro mbo.

³²Okyku eka he, moanwyeakyuŋ a sheŋ andzi moa a dze ela amgblami nga moa a da lo e sheŋ e gbu ami.

³³Ayi a kpo okre-kre a mo, okyku eka he Oblus a vẽ mo okyku o da mo a ri algo. A nyuŋ mo a lu mi le, Agimi e dzu embyle okyku elum okʼpo la anyi a mo.

³⁴Ame e vẽ gimi, o wo bimi e bmi le, e ri algo. O raŋ o gre bimi e ri algo okyku o da gimi e hwiŋ oshye. Amasẽ a mbo ba eshri bimi á yla mbo.

³⁵Ambla ba Oblus a lu eka he a khwo nga, a sko agbrotsa nga a vye Ahogbrẽ egi ayi mo nga, a kplu lo a zga esĩ a taŋ.

³⁶Moare a ghwo eso. Areyaŋ a mbo eshki mo a ri algo.

³⁷Agi are la e wo amgblami lo e wo endgaeha la ekʼpoefoha la afĩ.

³⁸Ambla ba areyaŋ a mbo a ri algo a wyo, moa a tslo esekʼpa a ygi ami okyku o fa olbi anzho la a wo amgblami lo a ra.

³⁹Omba ba ayi a kre, moa la a kpo otum amgblami a ka akaŋ obiŋ a bmye mbo. Ambo moa a ka obgo-ami ta la oshyi. Moa a ka eka he nga, moa a zga eso o shri amgblami o yi oshyi lo, o wo ba alo o kpo o gbu.

⁴⁰Okyku eka he moa a sheŋ evgo-amgbaŋ nga a ndbi lo a ygi ami, nga moa a ngla akiki moa la a tpi amgblami la lo. Ambla he nga, moa a si ashye oknye egi ayi ba amgblami okyku o da ogbga o mu amgblami o yi egi ayi, nga okyku o da lo o yi akaŋ ami.

⁴¹Ambo amgblami lo a knye a gre endase nga a tspi ma. Egi ayi ba amgblami lo e gre endase nga e zgi e gbu mbo. Anyuŋ ondza ami o gom egi okũ ba amgblami kushrukushru.

⁴²Moanwyeakyuŋ a klo ozhẽ okyku o bga moaprusuna okyku o da akyeŋ a mbo a ta ami a yi akaŋ nga a gro mbo.

⁴³Ambo andakʼpo moanwyeakyuŋ a klo o shla Oblus, okyku eka he a nyom moanwyeakyuŋ o da mo a kpo ekplo moa a klo o kpo lo. Ambo aŋa a lu a da moare mvye ma areyaŋ a mbo la a yi ami o ta, a ta egba nga a ta ami a yi akaŋ.

⁴⁴Moa la a ra nga moa a vre amgbla, o mbo le ashye amgbla nga a lu moahwõ ma ambla. Ozhẽ he lo angyiŋ, agi e kpo nga e gro mvye.