Read eggon Otum 4 Bible Online

Otum 4 - eggon bible

Otum 4

¹Omba ba Ebitru ta la Eyohana a la a lu odlo pa la moare nga, moandakʼpo olu ba Ahogbrẽ, ta la andakʼpo moa-nwyeakyuŋ la a la a kʼpu Anyuŋ-akulu pa la moaEsaduki a ba okro mo.

²Eso e tpi mo ayi e gre eshri, okyku eshi moa la a nyum oshpa aha he lo a la a nye moare a lu mi ma Eyesu a kso ongybi, okyku eka he onyenye he lo o tsa ba moare la a sheŋ a kpu á ba a kso.

³Ohe lo a kpo olum-ore angyiŋ, okyku eka he moa a vu mo a klu aku a bli onda oha.

⁴Ambo moare nzenze la a gno oshpa lo moa a bmi ba adlidzi. Moa a hwiŋ moare eka ezbietno.

⁵Onda oha nga, moandakʼpo moaEyahuda pa la moandakʼpo obiŋ, pa la moa la a nye odaŋ a pla emo a shki Orushalima.

⁶Moa a yi a ka anyuŋ-andakʼpo olu ba Ahogbrẽ moa a bzi ŋa ma Anas, ta la Akayafa, ta la Eyohana, ta la Alaksanda, pa la moahwõ la a wo ba ogu ba anyuŋ-andakʼpo olu ba Ahogbrẽ.

⁷Moa a da moa la a nyum oshpa a tspi egi ayi mo nga moa a zhĩ mo a lu mi le, Agimi e kpo anyu e kpo eka he? Eshi edgu ekʼpo lo agimi e wo alo ma? Agimi e kpo otum la eshko ayi angyiŋ?

⁸Ebitru a bli la Ogbgaodzi, okyku eka he a tno mo ma a lu mi le, Agimi andakʼpo moare, pa la moandakʼpo obiŋ,

⁹o wo ba moa a zhĩ gi anye he okyku bi e kpo e ghwo abuŋadga hi nga e daŋ a shaŋ le,

¹⁰agimi mvye é yi, nga moarehwi ba Esrayila a mbo mvye á yi okyku ba alom la a tspi egi ayi bimi hi, a shaŋ ekʼpo ba Eyesu Ekristi ba Anazarata angyiŋ. Aŋa angyiŋ agimi e gŋe ŋa egŋe aki, nga Ahogbrẽ a daŋ a kso ongybi.

¹¹Eyesu angyiŋ a wo a ba Akpa ba Ahogbrẽ a lu mi le, Ezhim bimi la e mbdzi aku e tla lo e ta eka ba alo e wo la ekplokyeŋ mbo, E zhiŋ e dzu ezhim la e wo la owlama e gre pyeŋ.

¹²Ozhẽ oshla o wo okro Eyesu sha. Arekyeŋ a wo ma obiŋ hi mbo ku-ku ba Ahogbrẽ a shri a di ba agi e kpo e gbu bi e hwiŋ oshla okro baŋ.

¹³Moandakʼpo la a sõ ombgu a ka egbregbre a gre eshri ba Ebitru ta la Eyohana moa a lu odlo la eyli mbo. Moa a sa a ka egbregbre moa a lu mi ma moahi lo a wo moa la a yi engla angyiŋ mbo. Moa a ka a bmye ba moahi lo a wo moakyeŋazba ba Eyesu.

¹⁴Ozhẽ-okyeŋ moa a lu odlo o bga moanwyeotum lo o wo ma mbo, okyku eshi alom moa a shaŋ ŋa he lo a tspi okro he lo ta la Ebitru, ta la Eyohana.

¹⁵Okyku eka he moa a nyuŋ moanwyeotum lo ma moa a zgi a sku akuombgu, nga moa a hwim odlo ta la emo.

¹⁶Moa a zhĩ emo a lu mi le, Agi nga é kpo eshi pa la moa edgu moarehwi hi? E ka, areyaŋ a mbo la a dzu Orushalima a sheŋ a yi moanwyeotum angyiŋ a kpo ekplo egbregbre he, agi e kpo e gbu ba agi e dzu evom mbo.

¹⁷O wo ba agi e klo o da odlo mo he lo o gbu atuŋ mbo le, o raŋ o gre bi e shĩ mo okyku o da mo a nyum oshpa Eyesu a da arekyeŋ nga mbo.

¹⁸Moa a hwim odlo a khwo nga, moa a bla moanwyeotum lo a bzi, nga moa a shĩ mo a lu mi le, Agi e klo bimi e tsi etku Eyesu, o mbo le e nyum oshpa baŋ ondakyeŋ nga mbo.

¹⁹Ambo Ebitru ta la Eyohana a tno mo ma a lu mi le, Eka bimi e ka, oyaŋ o wo odzi egi ayi Ahogbrẽ, agi e fa olbi e da gimi angyiŋ le, e fa olbi e da Ahogbrẽ?

²⁰Agi e kpo e gbu bi e tspi o lu odlo eshri ekplo bi e ka nga e gno mbo.

²¹Moandakʼpo la a sõ ombgu a shĩ mo, nga moa a kyu moanwyeotum lo abgo. Moa a hwiŋ ozhẽ-okyeŋ moa a kpo mo ewu mbo, okyku eshi moare nzenze a vye Ahogbrẽ okyku ekplo la e kpo.

²²Abuŋadga moa a shaŋ ŋa he lo, a kpo eka eyi ekʼpoenyi.

²³Ambla moa a kyu Ebitru ta la Eyohana abgo nga, moa a gre okro moanáŋ nga moa a lu a da mo eka ba moandakʼpo olu ba Ahogbrẽ, pa la moandakʼpo obiŋ a lu a da mo.

²⁴Moa a lu a da mo a khwo nga, mo mvye a shki otsotse nga a fa olu a vẽ Ahogbrẽ a lu mi le, Adigi, aŋo o wo la o kpo Ongyeŋ ta la obiŋ hi, ta la anyuŋ ondzu, ta la ekployaŋ a mbo la e dzu ma!

²⁵Aŋo o da Ogbgaodzi o tsa Adawuda o daŋ a lu mi le, Okyku eshi moaevbu a kpo efpu, Okyku eshi moare a kpo a gbu moa a kpyi ŋo mbo?

²⁶Moareŋ ba obiŋ hi a fu eshri, Nga moa la a ri oreŋ a hwim Eshri Adigi-odne, ta la Emisiya baŋ.

²⁷Adlidzi angyiŋ, Ehirudu, ta la Obuntu Ebilatu moa a fu eshri osku he angyiŋ pa la moa la a wo moaEyahuda mbo, ta la moarehwi ba Esrayila eshri Eyesu Anwye-odne boŋ ba esesla, a boŋ o daŋ a dzu Emisiya.

²⁸Moa a ka eshri a bga, okyku o kpo ekplo boŋ la ekʼpo boŋ o sheŋ o zga ba alo é ba e kpo.

²⁹Adigi-odne o wo boŋ o bmi le, o gno eka ba moa a klo o ta gi eyli, nga o da gi moanwye boŋ e nyum oshpa boŋ la oshye eso.

³⁰O wo boŋ Ahogbrẽ o bmi le, o ndba obgo boŋ o shaŋ moa elolo, nga o da gi ekʼpo okyku o da gi e kpo ayakplo egbregbre eshko Eyesu anwye esesla boŋ.

³¹Ambla moa a fa olu a khwo nga, okro moa a shki ma lo o suŋ. Ahogbrẽ a bli mo la Ogbgaodzi nga moa a nyum oshpa Ahogbrẽ la oshye-esõ.

³²Moare la a bmi ba adlidzi mvye, moa a kaŋ eshri a bga osheshye. Arekyeŋ a kom ekplo baŋ a wo alo ma ambambga mbo. Moa a la a gʼba ekployaŋ a mbo moa a wo alo ma otsotse.

³³La ekʼpo egregre moanwyeotum a nyum oshpa eka ba Adigi Eyesu a kso ongybi, nga Ahogbrẽ a shri owlama nzenze a da mo mvye.

³⁴Arekyeŋ eshki mo a wo ekŋe mbo ku-ku. Moare la a wo agbi o mbo le a wo adne ma, moa a shri lo a gbrŋo nga moa a shri amgbaŋ lo a shri a ba.

³⁵Moa a shri lo a da moa la a nyum oshpa, nga moa a shri ekployaŋ a mbo ba areyaŋ a mbo a klo a shri a daŋ.

³⁶Alomakyeŋ a wo ma eshko baŋ e ri Oyusufu. A wo a ba ogu ba Elivi. Moa a mbre ŋa obiŋ ba Esapru. Moa la a nyum oshpa a la a bzi ŋa ma Abarnaba, o dzu, Are la a la a shĩ moare.

³⁷Aŋa a shri agbi baŋ a wo alo ma a shri a gbmo nga a shri amgbaŋ a shri a da moa la a nyum oshpa.