Read eggon Otum 6 Bible Online

Otum 6 - eggon bible

Otum 6

¹Eshki moanwyeotum e la e ta ma-ma. Okyku eka he ambla fi nga amgbu a kso agʼbaha moaEyahuda la a lu olom Egrise ta la moaEyahuda ba odne. MoaEyahuda la a lu olom Egrise a kpaŋ abile ma moaEyahuda ba odne a la a shri anzho a da moashe-eshaku mo mbo.

²Okyku eka he moa la a nyum oshpa otsko lo a pla moanwyeotum mvye a shki nga, moa a lu mi le, Alo o wo odzi ba agi e dzu otum Ahogbrẽ e zga nga e la e kla anzho mbo.

³Okyku eka he, agimi anáŋ, o raŋ o gre bimi e sla moanáŋ afoha, moa la ba Ogbgaodzi o kpo otum pa la mo, nga a wo la okaobmye ma. Agi e da moahi lo angyiŋ á ba a kpo otum o gʼba anzho lo.

⁴Agi e klo eka he okyku o da gi e hwiŋ anvaŋ okyku e fa olu nga e nyum oshpa.

⁵Moa-eshki mvye moa a gno oraŋ ta la ohwihwim moa la a nyum oshpa a shri a ba lo. Okyku eka he moa a sla Estifanu, aŋa a wo la obmi ba adlidzi ma, nga a bli la Ogbgaodzi. Nga moa a sa a sla Efilibu, ta la Opokro, ta la Enikano, ta la Etimo, ta la Apamina, ta la Eniklo la a zgi Antakiya. Alom he lo a wo a ba Eyahuda mbo, ambo aŋa a zhiŋ a sõ ozhẽ moaEyahuda.

⁶Moa-eshki a shri moahi lo a ndba moa la a nyum oshpa. Moa a fa olu nga moa a shki mo abgo eshri.

⁷Ambla ne nga, odlo Ahogbrẽ o ngla o ta ma-ma. Moa la a bmi ba adlidzi a ta ma-ma ombamba mvye osku ba Orushalima, nga moandakʼpo olu ba Ahogbrẽ nzenze a bmi ba adlidzi.

⁸Estifanu a wo arehwĩ ba Ahogbrẽ a wo ka la ŋa, nga ekʼpo Ahogbrẽ e wo ka la ŋa. Aŋa a la a kpo ayakplo egbregbre egi ayi moare.

⁹Ambo moarekyeŋ ba akulu moa a bzi lo ma Moarehwi moa a Shla mo a wo ma. Eshki mo, moaEyahuda la a zgi Esirini ta la Alaksandriya moa a wo a ba akulu he lo. Moahi lo pa la moaEyahuda la a zgi Esilisiya, ta la Asiya moa a zga esi o kla odlo ta la Estifanu.

¹⁰Ambo Ogbgaodzi o shri edgu okaobmyekyeŋ o shri o da Estifanu. Ambo moa a la a klo o gno odlo baŋ mbo.

¹¹Moa a hre moarekyeŋ amgbaŋ a da mo a zgi egŋe akpro-kpro eshri Estifanu a lu mi le, Agi e gno ba Estifanu la a lu odlo ototno eshri Omusa ta la Ahogbrẽ!

¹²Odlo he lo o tpi moare ta la moandakʼpo, ta la moa la a nye odaŋ eso ayi o gre eshri. Moa a ba a vu Estifanu a shri a gre okro moandakʼpo la a sõ ombgu.

¹³Moa a da moarekyeŋ a ba a zgi egŋe akpro-kpro eshri Estifanu a lu mi le, Alom hi bimi e ka ŋa he, aŋa a la a lu odlobi eshri Anyuŋ-akulu bi ta la Odaŋ ba Omusa.

¹⁴Agi e gno alom he lo, a lu mi le, Eyesu ba Anazarata á kypi Anyuŋ-akulu lo, nga á nyiŋ ayakplo moadigi a la a kpo nga ba Omusa a nye gi!

¹⁵Moadakʼpo la a sõ ombgu mvye nga, moa a nyom ayi a ka Estifanu, nga moa a ka ayi baŋ a shka ayi leleleŋ eka ayi ba anwyeadga ba Ahogbrẽ.