Read eggon Otum 7 Bible Online

Otum 7 - eggon bible

Otum 7

¹Anyuŋ-andakʼpo olu ba Ahogbrẽ a zhĩ Estifanu a lu mi le, Alo o wo eka he lo angyiŋ?

²Estifanu a tno ma a lu mi le, Agimi anáŋ ta la agimi adigi! Agimi e ngli e gno odlo me! Ahogbrẽ ba esesla a ba okro Adigi Ebrahim omba baŋ a wo obiŋ ba Emesopataniya ayga Ebrahim a kso a gre Aharaŋ.

³Ahogbrẽ a nyuŋ ŋa a lu mi le, Ebrahim, o kso o dzu moa-odne boŋ ta la obiŋ boŋ o zga nga, o yi obiŋ ba ame é ba e tsa ŋo.

⁴Ebrahim a kso a sku obiŋ ba Akladiya nga a gre Aha-raŋ. Ambla ba adaŋ Ebrahim a kpu Aharaŋ nga, Ahogbrẽ a da Ebrahim a kso a sku Aharaŋ a ba obiŋ bimi e wo ma ohuhuhi.

⁵Ahogbrẽ a shri okrokyeŋ a shri a da Ebrahim mbo, aŋa a shri ba obiŋ a mbo okrokyeŋ a shri a daŋ mbo. Ambo Ahogbrẽ a hwim a lu mi ma aŋa a shri obiŋ a da Ebrahim, nga ma alo o dzu ogu baŋ, ta la ogu moanwye ban. Omba ba Ahogbrẽ a hwim eka he ta la Ebrahim, Ebrahim a wo moanwye ma mbo.

⁶Ahogbrẽ a nyuŋ Ebrahim a lu mi le, Moanwye boŋ, moa á dzu moazhẽ obiŋ moahwõ. Moa á dzu moawaghrẽ, nga moa á kpo mo ewu okyku eyi endgaenyi.

⁷Ahogbrẽ a lu mi le, Ame é sõ moarehwi la a ba a kpo mo ewu ombgu. Ambla he moa á zgi obiŋ lo á ba, nga á hlu me eshko okro he lo.

⁸Ahogbrẽ nga a shri odaŋ a da Ebrahim ma a sheŋ ongyum ó ba o dzu esi ba ohwihwim lo. Ebrahim nga a sheŋ Eshaku ongyum ambla baŋ a kpo asati akyeŋ. Eshaku a sheŋ Eyakubu ongyum, Eyakubu nga a sheŋ moadigi otsko lo ongyum.

⁹Moadigi a kpo efpu ba Oyusufu, okyku eka he moa a shri ŋa a gbmo obiŋ ba Amasla. Ambo Ahogbrẽ a wo ka la ŋa.

¹⁰Nga a kpaŋ ŋa ewu baŋ mvye. Omba ba Oyusufu a gre egi ayi Efirauna, anyuŋ-areŋ ba Amasla, Ahogbrẽ a shri odlodzi, ta la okaobmye a shri a da Oyusufu. Efirauna a da Oyusufu a dzu ogomna obiŋ ba Amasla mvye, ta la odne oreŋ.

¹¹Omba he lo nga agu embyle a kpo obiŋ ba Amasla, ta la Akana. Moadigi a wo la algo ma mbo.

¹²Omba ba Eyakubu a gno ba algo a wo ma obiŋ ba Amasla, a da moadigi a gre obiŋ ba Amasla. Ohe lo angyiŋ o yi o wo odzi moa a gre Amasla ba ori.

¹³Omba moa a sa a bla a gre odgo oha nga, Oyusufu a shri eŋa a tsa moanáŋ, nga Efirauna a mbo a ba a yi moa-odne ba Oyusufu.

¹⁴Okyku eka he, Oyusufu a hom otum a kom adaŋ Eyakubu, a lu mi ma aŋa pa la moa-odne baŋ mvye, ma moa a ba obiŋ ba Amasla. Moarehwi la a gre obiŋ ba Amasla lo mvye a wo ekʼpoefoha la atno.

¹⁵Eyakubu a gile a gre obiŋ ba Amasla. Ahe lo angyiŋ, aŋa pa la moadigi a kpu.

¹⁶Ambla moa a kpu, moa a shri mo a gre a yi a ngybi osku ba Eshekem. Moa a ngybi mo engu ba Ebrahim a gbmo okro ogu ba Ahamo.

¹⁷Omba ba omba o bli ba Ahogbrẽ a klo o bli ohwihwim baŋ a hwim ta la Ebrahim nga, a da embre bi e ta ma-ma obiŋ ba Amasla.

¹⁸Ambo ambla fi nga, anyuŋ-areŋ la a klo Oyusufu he lo a kpu, nga anyuŋ-areŋ ahe la a yi Oyusufu mbo a vre emgbakyiŋ oreŋ.

¹⁹Ahe lo a bile moarehwi bi, nga a kpo moadigi ewu. A da mo a se moanwye mo a zgi odne mo omgbybi, okyku o da mo a kpu.

²⁰Omba he lo angyiŋ moa a mbre Omusa. Aŋa a wo ozba a gre eshri. Moa a shri ŋa a ghre odne okyku eha etra.

²¹Omba ba moa a shri ŋa a ghre edzi, anwye Efirauna alashle a hwiŋ ŋa, nga a daŋ a dzu anwye baŋ nga a la a vgi ŋa.

²²Moa a nye ŋa ayakplo egbregbre ba obiŋ ba Amasla. Omusa a dzu la ekʼpo ibu odlo ta la ayakplo baŋ a kpo.

²³Omba ba Omusa a wo eyi ekʼpoenyi, aŋa a klo o yi o ka moanáŋ moanwye Esrayila.

²⁴O dzu nga, aŋa a ka alom ba Amasla a la a kpo ambgu ta la anáŋ. Alom lo a kpo a gre anáŋ. Omusa a gre a yi a kpo a ghwo la anáŋ nga a bga alom Amasla.

²⁵Aŋa a la a ka ma o dzu o mbo, ma moanáŋ a ka a bmye ba Ahogbrẽ a klo o daŋ a kpo a ghwo a mo okyku o da mo a hwiŋ odzudum. Ambo moa a ka a bmye mbo.

²⁶Onda oha nga, Omusa a ka moanáŋ aha a kpo ambgu, aŋa a klo o shla mo, nga a gre a yi a nyuŋ mo a lu mi le, Agimi e wo moanáŋ angyiŋ, ambo okyku eshi agimi e la e kpo ambgu ta la egimi?

²⁷Ambo are la a wo oshye a gre a mu Omusa a gre agba nga a zhĩ ŋa a lu mi le, Ayi angyiŋ a doŋ ekʼpo o boŋ o sõ gi ombgu?

²⁸Aŋo o klo o bga me eka boŋ o bga alom Amasla ore?

²⁹Omba ba Omusa a gno eka he nga, a knye a sku obiŋ ba Amasla nga a knye a gre obiŋ ba Emediya. Ahe lo a kyu ashe nga a mbre moanwye aha.

³⁰Ambla ba eyi ekʼpoenyi e bre e gre nga, anwyeadga ba Ahogbrẽ a zgi embli ovo akla la a ri ovo osusku ta la Aku ba Esinayi. Aŋa a da Omusa a ka ŋa.

³¹Omusa a ka egbregbre ekplo baŋ a ka. Okyku eka he aŋa a gre osusku okyku o ka ekplo la e kpo lo. Omba he lo aŋa a gno enzi ba Adigi-odne.

³²Adigi-odne a kpla egba ka la ŋa a lu mi le, Ame angyiŋ e wo Ahogbrẽ moadigimi, Ahogbrẽ ba Ebrahim ta la Eshaku, ta la Eyakubu. Eyli e kpo Omusa e gre eshri nga, aŋa a ka akla lo a gbu mbo.

³³Ahogbrẽ a nyuŋ ŋa a lu mi le, Omusa, o hwro akpadga boŋ, okyku eshi okro boŋ o tspi ma he o wo okro ba esesla angyiŋ.

³⁴Ame e ka eka moarehwi me a kpo ewu obiŋ ba Amasla. Ame e gno okũ mo, okyku eka he ame e ba okyku o shla mo. Omusa, o ba. Ame é hom ŋo otum é doŋ o yi obiŋ ba Amasla.

³⁵Omusa he lo angyiŋ, moarehwi ba Esrayila moa a tla ŋa. Moa a zhĩ ŋa a lu mi le, Ayi a doŋ ekʼpo a doŋ o ri ekʼpo eshri bi nga o sõ gi ombgu? Aŋa angyiŋ Ahogbrẽ a daŋ a ri ekʼpo nga a dzu areoshla, nga anwyeadga ba Ahogbrẽ baŋ a ka ŋa akla la a ri ovo angyiŋ, a kpo a ghwo la ŋa.

³⁶Aŋa angyiŋ a se moarehwi ba Esrayila obiŋ ba Amasla. Aŋa a kpo ayakplo egbregbre obiŋ ba Amasla, ta la anyuŋ-ondzu ba Obme, ta la akla okyku eyi ekʼpoenyi.

³⁷Omusa lo angyiŋ a nyuŋ moarehwi ba Esrayila a lu mi le, Ahogbrẽ á hom arekyeŋ otum á daŋ a ba, eka baŋ a da me e ba. Aŋa a wo a ba ogu moarehwi bimi.

³⁸Aŋa angyiŋ a la a dzi pa la moarehwi ba Esrayila akla. Aŋa a wo ma pa la moadigi, ta la anwyeadga ba Ahogbrẽ la a lu odlo ka la ŋa Aku ba Esinayi. Aŋa á yga odlo ba Ahogbrẽ la o shri eso o da gi, okyku o daŋ a lu lo a da gi.

³⁹Ambo moadigi a tla o gno ŋa. Moa a hre ŋa a ta egi ehwõ, nga moa a klo o bla o yi obiŋ ba Amasla.

⁴⁰Nga moa a nyuŋ Aharuna a lu mi le, Aŋo o kpo gi moahogbrẽ la á ba a tspi egi ayi bi. Agi e yi ekplo la e kpo ta la Omusa, alom la a se gi obiŋ ba Amasla mbo.

⁴¹Omba he lo nga, moa a mbdzi ambgu eka andu, nga moa a shri ofaodi ba ebyi a shri a da lo. Nga moa a kpo abgo okyku o hlu ekplo moa a mbdzi la abgo mo eshko.

⁴²Ambo Ahogbrẽ a dzu mo a zga, nga moa a hlu enzo la e wo ongyeŋ eshko eka ba moa a ta lo akpa moarehwi ba Ahogbrẽ a hom mo otum. Moa a ta a lu mi le, Agimi arehwĩ ba Esrayila! Agimi e la e bga ebyi Nga e la e fa e da me angyiŋ mbo, Omba bimi e wo akla Okyku eyi ekʼpoenyi lo.

⁴³Agimi e la e shri abro ba Omolko angyiŋ, Ta la ambgu ba eyi enzo ba Arefaŋ ahogbrẽ bimi. Moa angyiŋ a wo ambgu bimi e kpo okyku o hlu mo eshko. Okyku eka he, ame e da mo a vu gimi a yi obiŋ ba Ababila.

⁴⁴Moadigi a wo la abro okro ba emle Ahogbrẽ a dzu ma, omba moa a wo akla. Moa a kpo lo eka ba Ahogbrẽ a nye Omusa ma a kpo lo.

⁴⁵Ambla he nga moadigi la a yga lo okro moadimo, moa a shri lo a gre ta la Ojoshuwa omba ba moa a gre a yi a ri obiŋ lo abgo moarehwi ba Ahogbrẽ a kyku mo. Alo a dzu obiŋ hi lo, ma-me a gbu omba ba Adawuda a ri oreŋ.

⁴⁶Ahogbrẽ a gno oraŋ ta la Adawuda, okyku eshi Adawuda a vẽ Ahogbrẽ okyku o daŋ a mbdzi odne okyku Ahogbrẽ ba Eyakubu.

⁴⁷Ambo alo o kpo o gbu mbo, nga Osolomo angyiŋ a mbdzi odne Ahogbrẽ lo.

⁴⁸Moarehwi ba Ahogbrẽ a hom mo otum a lu mi ma Ahogbrẽ ba esesla a la a dzu adne ba moarehwi a mbdzi mbo.

⁴⁹Ahogbrẽ a lu mi le, Ongyeŋ angyiŋ O wo emgbakyiŋ oreŋ me, Nga obiŋ hi o wo okro odzudum me. Agimi é mbdzi me edgu odne yaŋ? Ame é dzu é dum okroyaŋ?

⁵⁰Ame angyiŋ e kpo ayakplo hi mvye mbo?

⁵¹E ka, agimi e shye eshri nzenze! Eso bimi e wo eka eso moa la a wo evbu. Agimi e klo e gno odlo Ahogbrẽ mbo ku-ku. Agimi e wo okyekyeŋ angyiŋ pa la moadigimi. Agimi a mbo e la e tla Ogbgaodzi!

⁵²Eshki moarehwi ba Ahogbrẽ a hom mo otum, moadigimi a kpo mo mvye ewu. Moa a dzu akyeŋ a zga mbo. Moa a bga moa la a ba ogbyigbyi okyku o su eka ba Areadlidzi á ba. Nga ohuhuhi agimi e njygu ŋa nga e bga ŋa.

⁵³Agimi angyiŋ e yga odaŋ ba Ahogbrẽ, ba moanwyeadga ba Ahogbrẽ a shri a ba, ambo agimi e bmi ta la lo mbo!

⁵⁴Omba ba moandakʼpo la a sõ ombgu a gno odlo ba Estifanu a lu nga, eso e tpi mo ayi, nga moa a taŋ azhga eshri baŋ.

⁵⁵Ambo Estifanu a bli la Ogbgaodzi. A ka Ongyeŋ, nga a ka ayimom ba esesla ba Ahogbrẽ, nga a ka Eyesu a tspi obgori ba Ahogbrẽ.

⁵⁶Aŋa a lu angyangyeŋ a lu mi le, E ka! Ame e ka Ongyeŋ o hwile, nga Anwye Arehwi a tspi obgori ba Ahogbrẽ!

⁵⁷Moare a ta akhi nga moa a tsom atuŋ mo, nga moa a knye a gre okro ba Estifanu.

⁵⁸Moa a se ŋa a sku osku lo a khwo nga moa a tra ŋa ézhim. Moare la a wo esi ba ohe lo, moa a hwro ariga a shri a da ola anwye moa a bzi ŋa ma Eshawlu a shri a zga.

⁵⁹Moa a la a tra Estifanu ézhim omba baŋ a fa olu nga a lu mi le, Adigi Eyesu, o yga eso me!

⁶⁰Aŋa a kʼpu obiŋ nga a ta enzi angyangyeŋ a lu mi le, Adigi-odne! Aŋo o da olbi odlobi he lo o dzu eshri mo mbo! Aŋa a lu eka he a khwo nga a kpu.