Read eggon Otum 9 Bible Online

Otum 9 - eggon bible

Otum 9

¹Ma-me o gbu omba he lo, Eshawlu a la a kpo moanwyeotum ba Ahogbrẽ ewu nzenze. A gre okro anyuŋ-anda-kʼpo olu ba Ahogbrẽ

²okyku o daŋ a yga akpekpa la a tsa moa a shri ekʼpo a shri a daŋ, okyku o daŋ a yi anwyeakulu andandandim moaEyahuda osku ba Adamasku, okyku o daŋ a vu moare la a lu Eyesu ma, moarealom pa la moashe nga okyku o shri mo o ba Orushalima.

³Omba baŋ a yi Adamasku, omba baŋ a gbu osusku ta la Adamasku nga, ayimom a gnyu a zgi ahrẽ a ba a tra egi ayi baŋ laŋ.

⁴Eshawlu a tsi a gbu obiŋ nga, enzi e zgi ongyeŋ e nyuŋ ŋa e lu mi le, Eshawlu, Eshawlu! Okyku eshi aŋo o la o kpo me ewu?

⁵Eshawlu a zhĩ a lu mi le, Adigi, aŋo o wo ayi angyiŋ? Enzi lo e tno ma e lu mi le, Ame angyiŋ e wo Eyesu boŋ o la o kpo ŋa ewu.

⁶O kso o yi osku eshyẽ, moa á lu ekplo boŋ ó ba o kpo á da ŋo ma.

⁷Moare la a dzi ta la Eshawlu moa a gno enzi lo nga moa a tspi tki. Moa a gno enzi, ambo moa a ka are la a lu odlo lo mbo.

⁸Eshawlu a kso obiŋ nga, a hwile ayi baŋ ambo a ka emakyeŋ mbo. Moa a shri ŋa obobgo a shri a gre osku ba Adamasku eshyẽ.

⁹Elum etra a ka a gbu mbo. Elum etra he lo, a ri mbo nga a wa mbo.

¹⁰Osku Adamasku he lo, anwyeotumakyeŋ a wo ma, eshko baŋ e ri Ahananiya. Aŋa a ka okoka. Ibu okoka he lo, Adigi-odne a bzi ŋa nga a tsa ŋa a lu mi le, Ahananiya! Ahananiya a tno a lu mi le, Adigi-odne, o ka, ame e wo ahe.

¹¹Adigi-odne a nyuŋ ŋa a lu mi le, Aŋo o yi ozhẽ moa a bzi lo ma Ozhẽ la o wo kye, nga o klo odne ba Eyahuda okyku eshi alom ba Atarsu moa a bzi ŋa ma Eshawlu, a ba a wo odne he lo. Aŋa a fa olu.

¹²Omba baŋ a ka okoka lo, a ka are la eshko baŋ e ri Ahananiya baŋ a ba okyku o shri abgo o shki ŋa eshri, okyku o da ayi baŋ a hwile.

¹³Ahananiya a tno Adigi-odne ma a lu mi le, Adigi-odne, moare nzenze a lu edgu odlo andandandim eka ba alom he lo a la a kpo moarehwi boŋ ewu osku ba Orushalima.

¹⁴O ka, aŋa a yga ekʼpo okro moandakʼpo olu ba Ahogbrẽ a ba okyku o vu moare mvye la a bmi ba adlidzi ka la ŋo.

¹⁵Adigi-odne a nyuŋ ŋa a lu mi le, Aŋo o yi, okyku eshi ame e sla ŋa okyku o daŋ a kpo otum okyku me, okyku o daŋ a nyum oshpa me a ygi moa la a wo moaEyahuda mbo, pa la moanyuŋ-areŋ, pa la moarehwi ba Esrayila.

¹⁶Nga, ame é tsa ŋa ewu baŋ á ba a kpo okyku me.

¹⁷Ahananiya a gre odne lo nga, a shri abgo baŋ a shki eshri Eshawlu nga a lu mi le, Anime Eshawlu, Adigi-odne Eyesu eshrishri eŋa angyiŋ a hom me otum. Aŋa angyiŋ aŋo o ka ozhẽ omba boŋ o ba ahe. Aŋa a hom me otum okyku o da me e hwile ŋo ayi, nga moa a bli ŋo la Ogbgaodzi.

¹⁸Ambla fi nga angʼbu emakyeŋ eka angʼbu atsa a zgi ayi ba Eshawlu a ygi obiŋ, nga a ka okro. A kso nga moa a kpo ŋa abaptisma.

¹⁹Ambla baŋ a ri algo nga, a hwiŋ oshye. Eshawlu a dzu pa la moanwyeotum osku ba Adamasku elum ple.

²⁰A gre anwyeakulu andandandim moaEyahuda nga a nyum oshpa eshri Eyesu, ma Eyesu a wo Anwye Ahogbrẽ.

²¹Moare la a gno oshpa ba Eshawlu a nyum mvye, moa a ka egbregbre nga a zhĩ a lu mi le, Alom he angyiŋ a wo la a la a bga moare la a bmi ba adlidzi ta la eshko Eyesu Orushalima mbo? Aŋa a ba ahe okyku o daŋ a vu mo a yi a kom moandakʼpo olu ba Ahogbrẽ mbo?

²²Oshpa ba Eshawlu la a nyum, o bli la ekʼpo Ogbgaodzi, nga otsotsa baŋ la a tsa ba Eyesu angyiŋ a wo Emisiya o wo zhezheŋ, nga moaEyahuda la a wo Adamasku a tno ŋa akplo-kyeŋ a gbu mbo.

²³Ambla elum nzenze e bre e gre nga, moaEyahuda a pla emo a shki nga moa a klo o bga Eshawlu.

²⁴Moare a lu a da Eshawlu eka ekplo moaEyahuda a klo o kpo ka la ŋa. MoaEyahuda a la a kʼpu ayizhẽ mvye ba ogli ba osku lo, okyukyku ta la olulum, okyku o da mo a bga Eshawlu.

²⁵Ambo ondakyeŋ okyukyku nga, moakyeŋazba ba Eshawlu a nyuŋ a kpo nga, moa a shri ŋa aksu a sõ ewyle la e wo ogli nga moa a gile ŋa a gre obiŋ.

²⁶Eshawlu a gre Orushalima nga a klo o kaŋ eshri o bga pa la moanwyeotum. Moa a bmi ha adlidzi baŋ a wo anwyoetum mbo. Mo mvye a kpo eyli baŋ.

²⁷Abarnaba a ba a kpo a ghwo a ŋa nga a shri ŋa a gre okro moa la a nyum oshpa, nga a lu a da mo eka ba Eshawlu a ka Adigi-odne ozhẽ, nga ba Adigi-odne a lu odlo ka la ŋa. Nga a lu a da mo eka ba Eshawlu a nyum oshpa ba Eyesu osku ba Adamasku la eso ekyekyeŋ.

²⁸Eshawlu a dzu pa la mo nga a gre ekro andandandim osku ba Orushalima nga a la a nyum oshpa ba Ahogbrẽ la eso ekyekyeŋ.

²⁹Eshawlu a nyum oshpa nga a kla odlo pa la moaEyahuda la a lu olom Egrise. Moa a klo o bga ŋa.

³⁰Omba moanáŋ a gno eka he nga, moa a sko Eshawlu a gre Esizariya nga moa a shri ŋa a gre Atarsu.

³¹Okyku eka he eshki ba Ekristi ba obiŋ Eyahuda mvye, ta la Egalili, ta la Asamariya, moa a hwiŋ odzudum omba he lo. Moa a nyum oshpa nga moa a ta ma-ma, okyku moa a dzu la eyli Adigi-odne eso mo, nga Ogbgaodzi o kpo o ghwo la mo.

³²Ebitru a la a dzi a gre ekro andandandim. Ondakyeŋ nga aŋa a gre o yi o ka moarehwi Ahogbrẽ la a wo osku ba Elida.

³³Osku he lo a ri a sheŋ alomakyeŋ moa a bzi ŋa ma Eniya. Aŋa a mom egʼba. Aŋa a kpo eyi efote a kso obiŋ a gbu mbo.

³⁴Ebitru a nyuŋ ŋa a lu mi le, Eniya, eshko ba Eyesu Ekristi, o shaŋ. O kso nga o nyuŋ amgbla olom ma boŋ o kpo. Nga Eniya a gba a kso.

³⁵Moarehwi mvye la a wo Elida ta la Esharoŋ, moa a ka ŋa nga moa a zhiŋ a lu Adigi-odne ma.

³⁶Osku ba Ojopa nga, ashekyeŋ a wo ma, eshko baŋ e ri Atabita. Aŋa a bmi ba adlidzi. Eshko lo la alom Egrise e ri Odokas, o dzu, etba. Aŋa a kpo odlodzi ombamba mvye, nga a la a kpo a ghwo la moa la a wo ekŋe.

³⁷Omba he lo aŋa a no nga a kpu. Moa a nglo okom lo nga moa a shri lo a zga aku ongyeŋ.

³⁸O zgi Ojopa o yi Elida o gyuŋ nzenze mbo. Omba moanwyeotum ba Ojopa a gno ba Ebitru a wo Elida nga, moa a hom moare aha otum okro baŋ a lu mi le, O wo boŋ o bmi le, o knye o ba okro bi oshoshoŋ.

³⁹Okyku eka he nga Ebitru a knye a gre a yi a ka mo. A gbu a khwo nga moa a shri ŋa a daŋ a gre aku lo ongyeŋ. Moashe-eshaku pyeŋ a ba a ta Ebitru a kpaŋ nga moa a la a wu okũ, nga moa a shri ariga ta la okotu ba Odokas a kpo omba baŋ a yi a wo ma, a shri a tsa ŋa.

⁴⁰Ambo Ebitru a da mo mvye a zgi a sku aku lo eshyẽ, a kʼpu obiŋ nga a fa olu. Ambla he a zhiŋ a gre okro okom lo nga a nyuŋ lo a lu mi le, Atabita, o kso! Aŋa a hwile ayi baŋ, omba baŋ a ka Ebitru nga a dzu okũ.

⁴¹Ebitru a gre osusku nga a kpo a ghwo a ŋa a daŋ a tspi angyeŋ. A bzi moa la a bmi ba adlidzi, pa la moashe-eshaku, nga a shri Atabita la eso ma a shri a da mo.

⁴²Oshpa he lo o ngla o bli Ojopa nga moare nzenze a bmi ba adlidzi ta la Adigi-odne.

⁴³Ambla he nga, Ebitru a dzu Ojopa okyku elum nzenze ta la alomakyeŋ moa a bzi ŋa ma Esima. Aŋa a la a fu akpa.