Read eggon MoaOroma 13 Bible Online

MoaOroma 13 - eggon bible

MoaOroma 13

¹O raŋ o gre ba areyaŋ a mbo a kpaŋ moandakʼpo ba obiŋ hi, okyku eshi ekʼpo e wo ma ta la obibmi ba Ahogbrẽ angyiŋ, nga moandakʼpo la a wo ma he lo, Ahogbrẽ angyiŋ a sla mo.

²Areyaŋ a mbo la a dzĩ ekʼpo mo le, a dzĩ ekʼpo ba Ahogbrẽ a shri a da mo. Areyaŋ a mbo la a la a dzĩ ekʼpo mo le, moa á sõ ŋa ombgu.

³Moare la a la a kpaŋ odaŋ moa a kpo eyli moareŋ mbo, ambo moa la a kpaŋ odaŋ mbo moa a kpo eyli moareŋ. O wo boŋ o klo o dzu pyapyaŋ ta la are la a ri ekʼpo, o kpaŋ odaŋ. O wo boŋ o kpaŋ odaŋ bgu le, á ka ŋo la oklo.

⁴Okyku eshi aŋa a wo awaghrẽ ba Ahogbrẽ angyiŋ, nga aŋa a la a kpo otum okyku o doŋ o hwiŋ opyapyaŋ angyiŋ. Ambo o wo boŋ o kpo ayakplobi le, o dzu omgbybi boŋ o kpo eyli baŋ, okyku eshi aŋa a wo ekʼpo ma baŋ a da are ewu. Are la a ri ekʼpo a wo awaghrẽ ba Ahogbrẽ angyiŋ, nga a la a da are la a kpaŋ odaŋ mbo ewu, eka ba odaŋ Ahogbrẽ o lu.

⁵Okyku eka he o raŋ o gre bimi e kpaŋ odaŋ moandakʼpo ba obiŋ hi. O wo eka he okyku o gro olom ba Ahogbrẽ sha mbo, ambo okyku o dzu opyapyaŋ.

⁶Okyku eka he angyiŋ, agimi e hre ewaŋ. Moa la a ri ekʼpo moa a la a kpo otum Ahogbrẽ angyiŋ omba ba moa a la a kpo otum mo.

⁷Agimi e hre ekployaŋ a mbo la e raŋ e gre e da mo. Agimi e hre ewaŋ ba otum ba agimi e la e kpo, ta la ewaŋ ba angyiŋ ba gimi e wo la alo ma. Nga agimi e fa olbi e da mo, nga e ka mo la ekekʼpo.

⁸Agimi e ri arekyeŋ okŋe ekplokyeŋ mbo, o wo le e da lo e dzu oklo sha ibu bimi. Areyaŋ a mbo la a la a klo areyaŋ a mbo, aŋa a bli odaŋ ba Omusa.

⁹Odaŋ lo o lu mi le, Aŋo o ta ekpa mbo, aŋo o bga ebga mbo, aŋo o si esi mbo, nga aŋo o gro ayi mbo. Odaŋ he lo mvye ta la odaŋ ohwõ, moa a zhiŋ lo a zga ódaŋ okyekyeŋ la o lu mi le, O klo a ba ekpazhi boŋ eka boŋ o klo eshri boŋ.

¹⁰Areyaŋ a mbo la a klo a ba ekpazhi baŋ le, á kpo ŋa ekplokyeŋ la e tpi ŋa eso ayi mbo. O wo boŋ o wo la oklo ma le, o dzu eka boŋ o la o kpaŋ odaŋ mvye.

¹¹O raŋ o gre bimi e kpo eka he lo, okyku eshi agimi e sheŋ e yi omba lo. O raŋ o gre bimi e vro enu ohuhuhi, okyku eshi omba ba agi é ba e hwiŋ oshla o wo osusku a mo. Alo o gyuŋ eka ba omba ba agi e zga esĩ e bmi ba adlidzi mbo.

¹²Okyukyku o kpo okhwokhwo a mo, ayi nga a kpo okrokre a mo. O raŋ o gre bi e kyu ayakplobi ba evbu bi e la e kpo abgo. O raŋ o gre bi e tslo anzho eko nga e ta eko ayimom.

¹³O raŋ o gre bi e nyuŋ e dzu adzadzi, eka ba moarehwi la a yi ekplo moa a kpo. Agi e dzu eka moa la a wa ajige nga a kpo ayi mbo. Agi e dzu eka moa la a kpo eshre mbo. Agi e dzu eka moa la a kpo ayakplobi mbo. Agi e dzu eka moa la a klo ambgu nga a la a ta efpu ta la emo mbo.

¹⁴Agimi e tslo anzho eko ba Adigi Eyesu Ekristi, nga e da ogroayi ba egʼba o ri oshye bimi mbo.