Read eggon MoaOroma 14 Bible Online

MoaOroma 14 - eggon bible

MoaOroma 14

¹Agimi e nyuŋ e kpo-kpo ta la are ba obmi ba adlidzi baŋ o wo lgelge. Agimi e kla odlo ka la ŋa eshri aga baŋ mbo.

²Obmi ba adlidzi ba areabze o sko o ri ekployaŋ a mbo a zga akplokyeŋ mbo. Ambo are ba obmi ba adlidzi baŋ o wo lgelge, a la a taŋ ayeya sha.

³O raŋ o gre ba are la a ri ekployaŋ a mbo, a dzĩ are la a ri mbo ku-ku mbo. Are la a taŋ ayeya sha a dzĩ are la a ri ayakplo pyeŋ mbo ku-ku, okyku eshi Ahogbrẽ a sko lo a zga akplokyeŋ mbo.

⁴Aŋo o ri ayi angyiŋ boŋ o sõ awaghrẽ arekyeŋ ombgu? Adaŋ-odne angyiŋ á ba a sõ ŋa ombgu. Aŋa á gro, okyku eshi Ahogbrẽ a kpo a gbu baŋ a daŋ a gro.

⁵Abze a la a sko olumobze a da lo o dzu onyuonyuŋ o gre elum ehwõ, ambo abze a sko elum lo mvye a da lo o dzu okyekyeŋ angyiŋ. Areyaŋ a mbo a tne aga adzadzi eso baŋ a ka.

⁶Are la a sko olumobze a zga la onyuonyuŋ, a la a kpo lo okyku o hlu Ahogbrẽ eshko angyiŋ. Are la a ri ekployaŋ a mbo, a ri lo okyku o hlu Ahogbrẽ eshko angyiŋ. Okyku aŋa a vye la Ahogbrẽ okyku algo lo. O wo ba arekyeŋ a tla o ri emakyeŋ le, aŋa a kpo lo okyku o hlu Ahogbrẽ eshko angyiŋ, nga a vye la Ahogbrẽ.

⁷Arekyeŋ a wo ma la eso okyku eŋa sha mbo, arekyeŋ a kpu okyku eŋa sha mbo. O wo ba agi e wo ma le, agi e wo ma okyku Ahogbrẽ angyiŋ.

⁸Nga o wo ba agi e kpu le, agi e kpu okyku Ahogbrẽ angyiŋ. O wo ba agi e wo ma la eso, o mbo le e kpu, agi e wo moarehwi ba Ahogbrẽ angyiŋ.

⁹Ekristi nga a kpu, nga a sa a kso ongybi okyku o daŋ a dzu Ahogbrẽ moare la a wo la eso ma, pa la moa la a kpu.

¹⁰Okyku eshi aŋo o la o sõ anóŋ ombgu? Okyku eshi aŋo o la o dzĩ anóŋ? Agi pyeŋ é tspi egi ayi emgbakyiŋ ba ombgu ba Ahogbrẽ.

¹¹Akpa Ahogbrẽ a lu mi le, Ahogbrẽ a lu mi le, Eka ba ame e wo ma, areyaŋ a mbo á ba a kʼpu egi ayi me. Areyaŋ a mbo á lu ababgo baŋ ba ame e wo Ahogbrẽ.

¹²Areyaŋ a mbo eshki bi, á lu ekployaŋ a mbo baŋ a kpo ababgo baŋ á ba a da Ahogbrẽ.

¹³Okyku eka he, agimi e da gi e kyu oso egi embgu abgo. Ekplo la e raŋ e gre boŋ o kpo, alo o raŋ o gre boŋ o kpo ekplokyeŋ la e da anóŋ a ta akpu mbo, o mbo le a kpo odlobi mbo.

¹⁴Eka ba odzudzu me ta la Adigi Eyesu, o da me e ka e bmye ba ekplokyeŋ eshrishri eŋa e wo odlobi mbo. Ambo o wo ba arekyeŋ a sko ekplokyeŋ a zga la eshre le, alo é zhiŋ é dzu ekplo ba eshre egi ayi baŋ.

¹⁵O wo boŋ o da anóŋ a tse a gbu okyku ekplokyeŋ boŋ o ri le, o dzu eka boŋ o wo oklokyeŋ ma okyku ŋa mbo. Ambo aŋo o da algori boŋ o ri a da arekyeŋ ba Ekristi a kpu okyku ŋa a tsu a gbu mbo!

¹⁶Ambo aŋo o da ekplokyeŋ boŋ o sko lo o zga la anyuanyuŋ e shri otsuogbu e ba mbo.

¹⁷Okyku eshi Oreŋ ba Ahogbrẽ o wo okyku oruri ta la owowa angyiŋ mbo. Ambo alo o wo odlodzi ta la opyapyaŋ ta la ovye, ayakplo hi lo, Ogbgaodzi angyiŋ o shri lo o di.

¹⁸Areyaŋ a mbo la a kpo otum ba Ekristi eka he angyiŋ le, Ahogbrẽ pa la moarehwi a mbo, moa á gno oraŋ ka la ŋa.

¹⁹Okyku eka he agi é zga gble é kpo ayakplo la a shri opyapyaŋ a ba nga a la a shĩ gi.

²⁰Ambo o wo odzi boŋ o tpi otum Ahogbrẽ ayi okyku algori mbo. Aŋo o kpo o gbu boŋ o ri ekployaŋ a mbo, ambo o wo odzi mbo boŋ o ri ekplo la é ba e da anóŋ a tsu a gbu odlobi.

²¹Ekplo la e raŋ e gre, aŋo o taŋ ebyi mbo, nga o wa ami anab la a no mbo, nga o kpo ekplokyeŋ la é ba e da anóŋ a tse a gbu mbo.

²²Aŋo ó kpo otum ta la ekplo ba Ahogbrẽ boŋ a tsa ŋo eshri odlo he lo, eso boŋ sha. Are la a fu esõ eha ekplo baŋ a kpo mbo, a la a gno oraŋ!

²³Ambo o wo baŋ a fu esõ eha eshri ekplo baŋ a ri le, Ahogbrẽ a sõ ŋa ombgu omba baŋ a ri lo, okyku eshi aŋa eshrishri eŋa a bmi ta la lo mbo. Ekployaŋ a mbo ba eso boŋ e bmi ta la lo mbo le, alo e dzu odlobi angyiŋ.