Read eggon MoaOroma 2 Bible Online

MoaOroma 2 - eggon bible

MoaOroma 2

¹Aŋo akyemeazba, aŋo o la o sõ moahwõ ombgu? Aŋo o wo ayayi a mbo le, aŋo o wo la elomakyeŋ ma mbo. O wo boŋ o la o sõ moahwõ ombgu, ambo aŋo o la o kpo edgu ayakplo ba moa a la a kpo lo le, aŋo o vu eŋo.

²Agi e yi zhezheŋ ba Ahogbrẽ a la a kpo ekplo la e wo shasha angyiŋ, o wo baŋ a la a sõ moa la a kpo edgu ayakplo he lo ombgu.

³Ambo aŋo akyemeazba, o la o kpo edgu ayakplo hi, nga aŋo o gba o sa o dzu ma o la o sõ moahwõ ombgu! Eka boŋ o ka, aŋo ó gro ombgu ba Ahogbrẽ lo?

⁴O dzu mbo, aŋo o la o dzĩ okpoghwo ogagre ba Ahogbrẽ, ta la eso ble-ble baŋ a wo la alo ma angyiŋ. Ambo adlidzi angyiŋ, Ahogbrẽ a la a ka ayiekŋe okyku eshi a klo boŋ o ghwo obiŋ!

⁵Ambo aŋo o wo la eso la e shye nga o shye eshri boŋ. Okyku eka he aŋo o da ombgu boŋ o la o ta ma o ta-ta. Nga alo ó wo nzenze onda ba Ahogbrẽ á ba a hwile esõ-etpiayi baŋ nga á sõ areyaŋ a mbo ombgu ba adlidzi.

⁶Okyku eshi Ahogbrẽ á shri egbre á da areyaŋ a mbo eka ekplo baŋ a kpo angyiŋ.

⁷Moakyeŋ a la a kpo otum la o wo odzadzi, nga moa a nyuŋ eshri mo a la a zga nga a klo esesla, ta la ekʼpo ta la eso ba gbagbu-amo. Ahogbrẽ nga á shri eso ba gbagbu-amo á shri á da moahi lo.

⁸Moabze a la a klo eshri emo sha, nga moa a la a tla adlidzi, nga moa a kpo otum obi. Ahogbrẽ nga á sõ mo ombgu la o vu olo.

⁹Moare la a kpo odlobi mvye, moa á kpo ewu, nga á gno olo nzenze. Ohi lo ó zga esĩ ta la moaEyahuda, nga moa la a wo moaEyahuda mbo a mbo á kpo ewu lo.

¹⁰Ambo Ahogbrẽ á shri onyuonyuŋ, ta la ekʼpo, ta la opyapyaŋ ba eso á shri á da moare la a la a kpo ayakplo la a wo adzi. MoaEyahuda á hwiŋ a khwo, moa la a wo moaEyahuda mbo a mbo á hwiŋ.

¹¹Ahogbrẽ a sko moare mvye a zga okyekyeŋ angyiŋ.

¹²Moa la a wo moaEyahuda mbo, moa a yi odaŋ ba Omusa mbo. Moa a yi odaŋ mbo, ambo moa á tpi ayi okyku odlobi mo. MoaEyahuda a yi odaŋ, ambo moa a la a kpo odlobi, okyku eka he moa á sõ mo ombgu la odaŋ lo angyiŋ.

¹³Moa a shri opyapyaŋ a zga agʼbaha moarehwi ta la Ahogbrẽ okyku moa a gŋo odaŋ angyiŋ mbo, mbo, ambo okyku o kpo ekplo ba odaŋ o lu.

¹⁴Moa la a wo moaEyahuda mbo a yi odaŋ mbo, ambo o wo ba moa la eso mo a la a kpo ekplo ba odaŋ o lu le, odzudzu mo ó wo ozhẽ ba odaŋ lo angyiŋ, ambo moa a ka a yi odaŋ mbo.

¹⁵Eda mo é tsa eka ba moa a ta ekplo ba odaŋ o klo eso mo. Enzi ba eso mo e tsa ba alo o wo adlidzi angyiŋ, okyku eshi aga mo a la a shrom mo ombabze, nga ombabze alo a la a tsom mo.

¹⁶Ozhẽ Oshpaodzadzi ba ame e nyum hi, o tsa eka ba Ahogbrẽ á ba a kpo onda mi lo. Á sõ moare ombgu eshko ba Eyesu Ekristi okyku ayakplo ba moa a ghre eso mo.

¹⁷O boŋ o wo anyu? Aŋo o la o bzi eŋo are ba Eyahuda. Aŋo o kom odaŋ abgo gble nga o la o nyom egʼba la eshko Ahogbrẽ.

¹⁸Aŋo o yi ekplo ba Ahogbrẽ a klo boŋ o kpo, nga aŋo o sheŋ o yi ba odaŋ o lu ma aŋo o sla ekplo la e wo edzi angyiŋ o kpo.

¹⁹Aŋo o sheŋ o yi, ba moa a sla ŋo okyku o doŋ o dzu atsaozhẽ okyku moavgayi, nga okyku o doŋ o dzu ayimom okyku moa la a wo evbu.

²⁰Moa a sla ŋo okyku o don o dzu are la a tsa moadro, ta la are la a nye moa ola anwye. Agimi e la e ka eka bimi e hwiŋ oyiyi ta la adlidzi pyeŋ okro ba odaŋ angyiŋ.

²¹Aŋo o la o nye moahwõ, ambo okyku eshi aŋo o nye eŋo mbo? Aŋo o la o nyum oshpa o la o lu mi le, Agimi e si esi mbo, ambo aŋo o si esi mbo?

²²Agimi e la e lu mi le, Agimi e ta ekpa mbo, ambo agimi e la e ta ekpa mbo? Agimi e la e tla okpko, ambo agimi e la e si anzho la a wo aku olo moa-ozhẽ evbu.

²³Aŋo o la o nyom egʼba boŋ o yi odaŋ ba Ahogbrẽ, ambo aŋo o pre odaŋ nga o da eshko Ahogbrẽ e gbu anzi mbo?

²⁴Akpa ba Ahogbrẽ a lu mi ma okyku gimi Eyahuda angyiŋ, moa la a wo moaEyahuda mbo a la a lu odlo ototno eshri ba Ahogbrẽ.

²⁵O wo bimi e la e kpaŋ odaŋ le, osheŋongyum bimi e la e sheŋ he e wo ozhẽ. Ambo o wo bimi e la e pre odaŋ le, osheŋongyum bimi e la e sheŋ he, o wo ozhẽ-okyeŋ ku-ku mbo.

²⁶Are la a wo a ba Eyahuda mbo la a sheŋ ongyum mbo, o wo baŋ a la a kpaŋ odaŋ le, Ahogbrẽ á sko ŋa á zga eka ba are la a kpaŋ odaŋ lo mbo?

²⁷Okyku eka he, agimi Eyahuda, moa la a wo moaEyahuda mbo á sõ gimi ombgu, okyku eshi agimi e la e pre odaŋ. Ambo agimi e la e ta lo akpa nga, e la e da mo a sheŋ gimi ongyum. Ambo moa la a wo moaEyahuda mbo la a da mo a sheŋ mo ongyum mbo, moa a la a kpaŋ odaŋ.

²⁸Ambo ekakahelo, ayi angyiŋ a wo a ba Eyahuda ba adlidzi? Are ba moa a sheŋ ŋa ongyum angyiŋ? Eka he angyiŋ mbo, are ba moa a sheŋ ŋa ongyum egʼba angyiŋ mbo.

²⁹Ambo are ba Eyahuda ba adlidzi angyiŋ a wo are la a wo a ba Eyahuda eso. Edgu are he lo angyiŋ a wo are la a da mo a sheŋ ŋa ongyum eso. Ohe lo o wo otum ba Ogbgaodzi ba Ahogbrẽ angyiŋ, o wo otum ba odaŋ ba moa a ta akpa angyiŋ mbo. Are he lo a la a yga otsom baŋ okro ba Ahogbrẽ angyiŋ, aŋa a la a yga lo okro moarehwi angyiŋ mbo.