Read eggon MoaOroma 3 Bible Online

MoaOroma 3 - eggon bible

MoaOroma 3

¹MoaEyahuda a raŋ eshri a gre moa la a wo moaEyahuda mbo? Owlamakyeŋ o wo ma moa a sheŋ ongyum?

²Owlama o wo ma o gre eshri! Okyku eshi Ahogbrẽ a shri odlo baŋ a shri a da moaEyahuda oriori.

³Ambo o wo moakyeŋ a la a kpo adlidzi mbo le, alo o nyom Ahogbrẽ o kpo adlidzi?

⁴O nyom Ahogbrẽ o kpo adlidzi ku-ku mbo! O wo ba areyaŋ a mbo a la a sheŋ akpro a mbo, Ahogbrẽ a la a kpo adlidzi. Odlo Ahogbrẽ o lu mi le, Aŋo o lu odlo kye, o da mo a yi boŋ o lu adlidzi omba boŋ o lu odlo. O wo eka he, moa á lu ombgu á bga ŋo omba ba moa a sõ ŋo ombgu mbo.

⁵Ambo o wo ba akpu bi e la e ta a la a kpo a ghwo okyku o tsa odlodzi ba Ahogbrẽ le, agi é kpo eshi? O wo ba Ahogbrẽ a la a kpo gi ewu okyku akpu bi e la e ta le, aŋa a ta akpu angyiŋ? Ame e lu odlo ahe eka moare a la a lu angyiŋ.

⁶Aŋa a ta akpu angyiŋ mbo! O wo ba Ahogbrẽ a wo adlidzi mbo le, á kpo anyu á ba a sõ obiŋ hi ombgu?

⁷Ambo o wo ba akpu ba ame e la e ta, a la a kpo a ghwo nga a da mo a ka Ahogbrẽ la esesla nga a tsa adlidzi baŋ zhezheŋ le, moa á sõ me ombgu ba ame e wo are odlobi okyku eshi angyiŋ?

⁸Okyku eshi agi e la e lu mi le, Agimi e da gi e kpo odlobi okyku o da odlodzi o ba? Moarekyeŋ a ba a klo odlo pa la me nga moa a zhĩ me eka he lo. Moa á sõ mo ombgu eka ba alo o raŋ o gre!

⁹Agi Eyahuda e gno oraŋ e gre moa la a wo moaEyahuda mbo? Otsitsi a mbo mbo! Ame e sheŋ e tsa gimi bgu, moaEyahuda, ta la moahwõ mvye, moa a wo moawaghrẽ ba odlobi angyiŋ.

¹⁰Akpa ba Ahogbrẽ a lu mi le, Arekyeŋ la a wo la odlodzi a wo ma mbo.

¹¹Arekyeŋ la a ka Ahogbrẽ a bmye, Nga a la a klo ŋa a wo ma mbo.

¹²Moare mvye moa a zhiŋ ogbu a blu Ahogbrẽ. Moa mvye a ta akpu. Arekyeŋ a la a kpo ekplo la e wo edzi mbo, arekyeŋ a mbo mbo ku-ku!

¹³Ohwlo mo o wo eka ba engu ba moa hwile lo. Akpro sha a la a zgi anyu mo. Odlo eka ekpre ba emabi angyiŋ o la o zgi anyu mo.

¹⁴Anyu mo a bli la odlobi a gre eshri.

¹⁵Moa a fpu ayga a ta are etsa nga a bga ŋa mbo.

¹⁶Okroyaŋ moa a gre, moa a la a tpi lo ayi nga, moa a la a shri ewu a shri a ba.

¹⁷Moa a yi ozhẽ ba opyapyaŋ mbo ku-ku.

¹⁸Moa a nye eda okyku o kpo eyli Ahogbrẽ ku-ku mbo.

¹⁹Ohuhuhi agi e yi ba ekployaŋ a mbo la e wo odaŋ, e wo okyku moa la a la a kpaŋ odaŋ, nga e wo okyku o da areyaŋ a mbo a bʼbi anyu baŋ okyku o da gi mvye e yi ba Ahogbrẽ á ba a sõ moarehwi obiŋ hi pyeŋ ombgu.

²⁰Arekyeŋ á hwiŋ opyapyaŋ ta la Ahogbrẽ okyku baŋ a la a kpaŋ odaŋ angyiŋ mbo. Odaŋ o wo okyku o da areyaŋ a mbo a yi baŋ a wo are odlobi angyiŋ.

²¹Ambo ohuhuhi ozhẽ ba Ahogbrẽ a la a shri opyapyaŋ a shri a zga agʼbaha baŋ pa la moarehwi o wo tsoŋ a mo. Alo o wo ozhẽ ba odaŋ angyiŋ mbo. Odaŋ pa la moarehwi ba Ahogbrẽ a hom otum a mbo, moa a zgi egŋe eshri lo.

²²Ahogbrẽ a shri opyapyaŋ a zga agʼbaha baŋ pa la moarehwi ozhẽ obmi ba adlidzi ta la Eyesu Ekristi angyiŋ. Egʼbakyeŋ e wo ma mbo. Ahogbrẽ a kpo ohi lo okyku areyaŋ a mbo.

²³Areyaŋ a mbo a kpo odlobi, nga moa a wo ogyugyuŋ ta la Ahogbrẽ la a shla moare.

²⁴Ambo ozhẽ ba ototno ba okpoghwo ba Ahogbrẽ, okyku Eyesu Ekristi, opyapyaŋ o sa o ba agʼbaha moarehwi ta la Ahogbrẽ. Eyesu angyiŋ a la a kyu moare abgo.

²⁵Ahogbrẽ a shri ŋa a shri a di okyku gi ozhẽ eku baŋ, okyku o da moare a hwiŋ okyuabgo odlobi o wo ba moa a bmi ba adlidzi ka la ŋa. Ahogbrẽ a shri Ekristi a di okyku o tsa eka baŋ a la a shri opyapyaŋ a shri a zga agʼbaha baŋ pa la moarehwi. Ayga Ahogbrẽ a ta eso ble-ble nga a sko odlobi moarehwi a zga akplokyeŋ mbo.

²⁶Ambo ohuhuhi, a la a sko odlobi moarehwi a zga akplokyeŋ, okyku o tsa baŋ a la a shri opyapyaŋ a zga agʼbaha baŋ pa la moarehwi. Ozhẽ he, Ahogbrẽ a tsa baŋ a wo a ba odlodzi angyiŋ, nga a tsa baŋ a la a shri opyapyaŋ a zga agʼbaha baŋ ta la areyaŋ a mbo la a bmi ba adlidzi ta la Eyesu.

²⁷O wo ba alo o wo eka he angyiŋ le, agi é nyom egʼba okyku eshi angyiŋ? Okyku ba are a la a kpaŋ odaŋ? Alo o wo ozhẽ-okyeŋ angyiŋ mbo, are a hwiŋ oshla okyku baŋ a bmi ba adlidzi angyiŋ.

²⁸Ekplo ba ekpyemgbyeŋ a mo nga, opyapyaŋ o la o dzu agʼbaha ba Ahogbrẽ ta la arehwĩ ozhẽ obmi ba adlidzi sha. Alo o wo ozhẽ ba okpaŋodaŋ angyiŋ mbo.

²⁹Ahogbrẽ a wo Ahogbrẽ ba moaEyahuda sha? A wo Ahogbrẽ moa la a wo moaEyahuda mbo ko mbo? A wo Ahogbrẽ mo a mbo!

³⁰Ahogbrẽ a wo akyakyeŋ angyiŋ. Aŋa á shri opyapyaŋ á shri á zga agʼbaha baŋ pa la moaEyahuda o wo ba moa a bmi ba adlidzi. Á kpo eka he lo pa la moa la a wo moaEyahuda mbo a mbo o wo ba moa a bmi ba adlidzi.

³¹O sa o hwile ozhẽ okyku o da gi e tla odaŋ okyku ombi ba adlidzi angyiŋ? O wo eka he angyiŋ mbo. O dzu omgbybi ba agi e kpaŋ odaŋ.