Read eggon MoaOroma 5 Bible Online

MoaOroma 5 - eggon bible

MoaOroma 5

¹Ohuhuhi, okyku obmi ba adlidzi bi, moa a shri opyapyaŋ a zga agʼbaha bi ta la Ahogbrẽ, agi e wo la esõ-egbubiŋ ta la Ahogbrẽ okyku Eyesu Ekristi angyiŋ.

²Aŋa a yga gi okyku obmi ba adlidzi bi, nga a da gi e hwiŋ okpoghwo ba Ahogbrẽ. Agi e wo la okpoghwo lo a mbo ohuhuhi. Agi e la e kpo ovye angyiŋ okyku bi e la e ka ayi ozhẽ okyku esesla ba Ahogbrẽ ba agi é ba e hwiŋ!

³O raŋ o gre ba agi e kpo ovye angyiŋ omba ba agi e kpo ewu, okyku eshi ewu angyiŋ e la e shri oghwo-esõ e shri e ba.

⁴Oghwo-esõ ba agi e la e ghwo omba bi e la e kpo ewu, o da Ahogbrẽ a gno oraŋ ka la gi. Okyku eka he, agi e la e ka ayi ozhẽ.

⁵Okayiozhẽ he lo o wo o ba ototno angyiŋ mbo, okyku eshi Ahogbrẽ a da Ogbgaodzi baŋ a shri a da gi ototno, o shri oklo baŋ o ghwo eso bi.

⁶Omba ba agi e wo oshye ma a wo mbo, Ekristi a kpu okyku moaedlobi. Omba he lo angyiŋ, Ahogbrẽ a sla.

⁷O wo ewu o gre eshri ba arekyeŋ a kpu okyku areodlodzi. Ambo alo o kpo o gbu ba arekyeŋ a bmi a kpu okyku areadzi.

⁸Ambo Ahogbrẽ a sheŋ a tsa gi baŋ a la a klo gi a gre eshri. Omba ba agi e yi e wo moaedlobi ayga, Ekristi a ba a kpu okyku gi!

⁹Okyku eku ba Eyesu Ekristi angyiŋ agi e hwiŋ opyapyaŋ agʼbaha bi ta la Ahogbrẽ. Agi é gro ombgu ba Ahogbrẽ okyku Eyesu sha angyiŋ.

¹⁰Agi e mbi e wo moafpu ba Ahogbrẽ, ambo okyku eku ba Anwye baŋ a kpu, aŋa a zhiŋ gi a da gi e dzu moakyeŋazba. Ohuhuhi ba Ahogbrẽ a da gi e dzu moakyeŋazba, nga okyku ba Eyesu a wo la eso ma, agi e hwiŋ oshla e gre eshri!

¹¹Ambo ohe lo o khwo angyiŋ mbo. Agi e la e kpo ovye eshko Ahogbrẽ okyku Adigi Eyesu Ekristi. Aŋa angyiŋ a kpo ozhẽ a da gi e dzu moakyeŋazba ba Ahogbrẽ.

¹²Odlobi o ba obiŋ hi okyku arekyakyeŋ sha. Odlobi baŋ angyiŋ o shri eku o shri o ba. Okyku eka he, eku e ngla e shki moarehwi mvye obiŋ hi, okyku moarehwi mvye a kpo odlobi.

¹³Odlobi o wo obiŋ hi ayga, moa a shri odaŋ ba Omusa a shri a ba. Omba mi lo, odaŋ o wo ma mbo, okyku eka he moa a sko odlobi a zga akplokyeŋ mbo.

¹⁴A zga omba ba Adamu a ba omba ba Omusa, moarehwi mvye a wo abgo ba eku angyiŋ. Moare la a kpo odlobi mbo eka ba Adamu a kpo, omba baŋ a pre odaŋ ba Ahogbrẽ, moa a mbo a wo abgo ba eku angyiŋ. Adamu a dzu emle are la á ba.

¹⁵Ambo moaha lo moa a wo okyekyeŋ angyiŋ mbo. Okyku eshi ototno ba Ahogbrẽ a shri a ba, o wo eka odlobi ba Adamu angyiŋ mbo. O wo adlidzi angyiŋ ba moare nzenze a jygi okyku odlobi ba arekyakyeŋ hi lo. Ambo okpoghwo ba Ahogbrẽ o wo nzenze, nga ototno ba Ahogbrẽ a mbo o wo ekakahelo okro moarehwi nzenze, okyku okpoghwo arekyekyeŋ ba moa a bzi ŋa Eyesu Ekristi.

¹⁶Ototno ba Ahogbrẽ a shri a ba o wo ondundum ta la odlobi ba arehwĩ akyakyeŋ hi lo. Ambla baŋ a kpo odlobi okyekyeŋ lo, ombgu ba odlobi o ba, ambo ambla ba moa a kpo odlobi nzenze nga, Ahogbrẽ a sa a shri okyuabgo a ba ototno.

¹⁷O wo adlidzi angyiŋ ba eku e zga esĩ ba o ri ekʼpo okyku odlobi ba arekyakyeŋ mi lo. Ambo ekplo ba Eyesu Ekristi arekyekyeŋ a kpo e gre eshri! Moare mvye la a yga okpoghwo baŋ he lo, ta la ototno ba odlodzi baŋ a shri a ba, moa á ri ekʼpo eshko ba Ekristi.

¹⁸Okyku eka he, eka ba odlobi okyekyeŋ o jygi moarehwi mvye, ekakehelo odlodzi okyekyeŋ ó shri oshla ta la eso ó da mo.

¹⁹Eka ba moarehwi mvye a zhiŋ a dzu moaedlobi okyku odlobi ba arekyakyeŋ, ekakahelo, moare nzenze moa a shri opyapyaŋ a zga agʼbaha mo ta la Ahogbrẽ okyku odlodzi ba arekyakyeŋ.

²⁰Moa a zgi la odaŋ, okyku o da mo a tsa areyaŋ a mbo ayakplobi. Odlobi lo o ta ma-ma, ambo okpoghwo ba Ahogbrẽ o gre lo nzenze.

²¹Eka ba odlobi o ri ekʼpo ozhẽ ba eku, ekakahelo angyiŋ, okpoghwo ba Ahogbrẽ o la o ri ekʼpo ozhẽ ba odlodzi. O la o shri eso ba gbagbu-amo o shri o da gi eshko Eyesu Ekristi Adigi-odne.