Read eggon 1 MoaOkorinti 3 Bible Online

1 MoaOkorinti 3 - eggon bible

1 MoaOkorinti 3

¹Agimi anáŋ, ame e lu adlidzi e da gimi, ame e kpo e gbu ba ame e lu odlo ka la gimi eka ba alo o raŋ o gre ba ame e lu pa la moarehwi la a wo la Ogbgaodzi ma angyiŋ mbo. Ame e lu odlo ka la gimi eka moarehwi ba obiŋ hi, nga eka moanwye afifi la a bmi ba adlidzi ta la Eyesu.

²Ame e la e vgi gimi la abmo, ame e la e vgi gimi la algori la a shye angyiŋ mbo okyku eshi agimi e tse ma a wo mbo. Ohuhuhi a mbo, ame e ka gimi e tse ma mbo ku-ku,

³okyku eshi ame e ka gimi e kpo ayakplo eka moarehwi ba obiŋ hi. Agimi e ta efpu ta la egimi, nga e kʼpi eha ta la egimi. Ayakplo he lo a tsa bimi e wo moarehwi ba obiŋ hi nga e lu obiŋ hi ma mbo?

⁴Omba ba akyeŋ eshki bimi a lu mi le, Ame e wo a ba Oblus. Ahwõ a lu mi le, Ame e wo a ba Apolos, agimi e la e kpo ayakplo eka moarehwi ba obiŋ hi angyiŋ mbo?

⁵Ayi angyiŋ a wo Apolos? Nga ayi angyiŋ a wo Oblus? Agi e wo moawaghrẽ ba Ahogbrẽ sha. Okro bi angyiŋ agimi e bmi ba adlidzi. Areyaŋ a mbo eshki bi a la a kpo otum ba Adigi-odne a shri a daŋ.

⁶Ame e fu eyi lo, nga Apolos a ygi lo ami. Ahogbrẽ angyiŋ a da lo e hlu.

⁷Are la a fu, ta la are la a ygi lo ami, moahi lo a wo akplokyeŋ angyiŋ mbo. Ahogbrẽ a wo esĩ lo, okyku eshi aŋa a da lo e hlu.

⁸Are la a fu, ta la are la a ygi ami, moa a wo ondundum mbo. Ahogbrẽ á shri egbre ba areyaŋ a mbo á daŋ eka ba otum baŋ a kpo angyiŋ.

⁹Agi nga e wo okyekyeŋ okro otum ba agi e kpo okyku Ahogbrẽ. Agimi nga e dzu agbi ba Ahogbrẽ. Nga agimi e sa e wo anzoŋ ba Ahogbrẽ angyiŋ.

¹⁰Ame e mbdzi aku eka are la a yi o mbdzi a gre eshri, okyku eshi ame e kpo otum ta la oyioyi ba Ahogbrẽ a shri a da me. Ame nga e ta ahwim lo, nga arekyeŋ a mbdzi anzoŋ lo. Ambo o raŋ o gre ba areyaŋ a mbo a nyuŋ a kpo-kpo eka baŋ a la a mbdzi lo.

¹¹Okyku eshi Ahogbrẽ a sheŋ a sla Eyesu Ekristi akya-kyeŋ a daŋ a dzu ahwim lo. Moa a kpo a gbu ba moa a ta ahwim-akyeŋ ondundum nga mbo.

¹²Moakyeŋ moa á kpo otum ta la ezanariya, o mbo le azurfa, o mbo le ézhim la e wo la egbmo nzenze, okyku o mbdzi anzoŋ o fu ahwim lo. Moakyeŋ moa á kpo otum ta la okokõ, o mbo le adzi, o mbo le asoso okyku otum he lo.

¹³Moa á ka edgu otum ba areyaŋ a mbo onda ba Ekristi a tsa lo. Onda mi lo angyiŋ ovo ó ba o tsa otum ba areyaŋ a mbo. Moa á dzo lo ovo, okyku o da mo a ka edgu otum mo.

¹⁴O wo ba ekplo ba are a mbdzi a fu ahwim lo e dzo mbo le, are he lo á hwiŋ egbre.

¹⁵Ambo o wo ba otum arekyeŋ o ri ovo le, á hwiŋ egbre mbo, ambo are he lo á kokom á ba a gro.

¹⁶Agimi e yi bimi e wo akulu ba Ahogbrẽ angyiŋ, nga ba Ogbgaodzi ba Ahogbrẽ o la o dzu eshyẽ bimi mbo?

¹⁷Okyku eka he o wo ba arekyeŋ a tpi akulu ba Ahogbrẽ ayi le, Ahogbrẽ a mbo á tpi are lo ayi. Akulu ba Ahogbrẽ a wo la esesla, nga agimi angyiŋ e wo akulu baŋ lo.

¹⁸O raŋ o gre ba arekyeŋ a bile eŋa mbo. O wo ba arekyeŋ eshki bimi a ka eka baŋ a yi eda a gre eshri ayakplo ba obiŋ hi le, o raŋ o gre baŋ a ta eshri baŋ ble okyku o daŋ a ka ayakplo a bmye.

¹⁹E ka, ayakplo ba moarehwi ba obiŋ hi a sko a zga eka ayakplo la a tsa okaobmye a gre eshri, Ahogbrẽ a da lo a dzu a ba adro ototno egi ayi baŋ. Akpa ba Ahogbrẽ nga a lu mi le, Ahogbrẽ a ta amgbaŋ okyku o vu moa la a wo la okaobmye ma, ibu ba eda mo.

²⁰Akpa ba Ahogbrẽ a sa a lu mi le, Adigi-odne a yi aga moarehwi la a wo la okaobmye ma, ba alo a wo a ba ototno.

²¹Okyku eka he arekyeŋ a la a nyom egʼba ta la ekplo moahwõ a mbo a kpo a gbu mbo. Ambo adlidzi angyiŋ, ekployaŋ a mbo e wo abgo bimi.

²²Oblus, ta la Apolos, ta la Ebitru, ta la obiŋ hi, ta la eso ta la eku, ta la ekplu hi, ta la asheŋayi-asheŋayi, moahi lo pyeŋ, moa a wo a bimi angyiŋ.

²³Agimi e wo moarehwi ba Ekristi, Ekristi nga a wo arehwĩ ba Ahogbrẽ.